1. Tese tinoda kuti ukama hwedu uitenyi?

IMWE hambzaji inodanwa Pauline, yakati: “Kuvhira pondakajija cokwadi, ndaida kuti vese vo ukama hwangu vave na inini mu Paradhiso. Maningi-ningi ndaida kuti mwamunangu Weni pomwe no mwana wedu, tibatane pa kushandira Jehovha.” Muno ukamavo ucikazivi Jehovha zve ucina rudo naye here? Kangaije mungatovavo no mazwiro akafanana no a hambzaji Pauline. *

2. Muvhunjo japi jatinozodavira pa jijo ya nyamasi?

² Itusu atidikani kuvangirija ukama hwedu kuti utende masoko akanaka no kuwana upenyu ucikaperi. Asi tingavabesera kuti vafunungure murangariro javo no mwoyo kuti vatende kuashira masoko o mu Bhaibheri. (2 Timoti 3:14, 15) Waro, ngenyi tinodikana kucumaera vo pa ukama hwedu? Ngenyi tinodikana kuzwisisa mazwiro avo? Tingabeseresa kuti ukama hwedu kuti ugume pa kuda Jehovha inga ndisu? Zve hama no hambzaji jese jo mu ungano yedu, jingatibeseresa kudini?

3. Mukuzwirana na 2 Pedru 3:9, ngenyi tinodikana kucumaera vo pa ukama hwedu?

³ Sambiri pano, Jehovha anozoparaja nyika ino. Basi vaya “vainga vakasanwa kuti vazopone kucikaperi,” kana kuti vaya vano cido cakanaka co kuva no upenyu ucikaperi, vanozoponeswa. (Maitiro o Vapostori 13:48) Itusu tinopeja nguva yakawanda no simba kuti ticumaere masoko akanaka ku vandhu vaticikazivi.  Ngokudaro, azvizivi kushata kudavo kuti ukama hwedu ushandirevo Jehovha. Baba wedu vano rudo, Jehovha, “aadi kuti mundhu afe, anoda kuti vese vaphinduke mwoyo.”—Verenganyi 2 Pedru 3:9.

4. Kuposa kwapi kwatinoita patinonga tecicumaera vo pa ukama hwedu?

⁴ Tinodikana kuziva kuti kuno manera akanaka no akashata o kucumaera masoko o ruponeso. Inga muezaniso, patinocumaera mundhu waticikazivi, kangaije tinovereketa mu njira yakanaka, asi patinonga tecicumaera umwe wo pa ukama hwedu, tobhuya mu njira yakasiayana.

5. Zvicinyi zvatinodikana kuceukija ticito tacumaera ukama hwedu?

⁵ Ku uzinji hwedu, kangaije tinoceukija kuti potakatanga kubhuya no vo pa ukama hwedu takabhuya mu njira icikazivi kunaka. Zve wari tinoda kuita mu njira imweni. Mupostori Pauro wakapa mbhangiro inosisira ku Makristu, paakati: “Izwi renyu ngariite rakanaka nguva jese, rakarungwa ngo munyu, kuti muzive kupingura ariwese inga bzaanofanera.” (VaKolosi 4:5, 6) Ngo iyo ndava, zvaushoni maningi kuceukija mbhangiro iyi patinoda kubhuya no vo pa ukama hwedu. Tikatama kudaro, tingakasika kuvanyangajisa kunja ko kutipurukira.

6-7. Ipanyi muezaniso unokhombija dikano yo kukhombija usizi ku mudoni acikanamati.

⁶ Khombijanyi usizi. Hambzaji Pauline, vanangwaya pakutanga, vakati: “Pakutanga, ndaida basi kubhuya no mwamuna wangu ngo pamusoro po zviro zvo umwari. Andicaidazve kubhuya ngo ‘zviro’ zvimweni.” Asi, mwamuna wa hambzaji Pauline avacainga no zivo iri yese yo Bhaibheri zve avacaizwisisa zvaibhuyari hambzaji Pauline. Vakatovona kuti hambzaji Pauline vaida kubhuya ngo pamusoro po ciara basi. Vaitothya dangani hambzaji Pauline  vainga vobatana no gerejha rakashatisisa zve raitovacengeja.

⁷ Hambzaji Pauline vakatonanga kuti, vaipeja nguva yakawanda no hama jo mu ungano, ngo kwenda ku musongano, kocumaera pomwe no mabungaijo. Ivona vakati: “Nguva jimweni, mwamuna wangu waijizwa ari ega, ngokuti waiguma kanyi kucina mundhu.” Pacina kukana-kana, Weni waida kugara no mukaji wakepomwe no mwana. Iyena aacaiziva shamwari imbza jo mukaji wake zve zvaivoneka inga kuti hambzaji Pauline vaida maningi kugara naijona kusiyapo kugara no mwamuna wavo. Zve Weni wakaguma pa kuvhunja mukaji wake kuti varambane. Mungakwanisa kuvona manera aizoita hambzaji Pauline kuti vakhombije usizi here?

8. Mukuzwirana na 1 Pedru 3:1, 2, ukama hwedu kazinji unosotenyi kwatiri?

⁸ Gajanyi muezaniso wakanaka. Kazinji ukama hwedu unosota maningi zviya zvatinoita kusiyapo zvatinonanga. (Verenganyi 1 Pedru 3:1, 2.) Pakufamba ko nguva hambzaji Pauline, vakazwisisa izvi. Ivona vakati: “Ndaizviziva kuti Weni waitida maningi zve aacaidadi kurambana na inini. Asi, paakabhuya ngo kurambana, ndakazwisisa kuti ndaidikana kutanga kuita zviro mu njira ya Jehovha. Kusiyapo kuvereketa maningi, ndaida kugaja muezaniso wakanaka.” Hambzaji Pauline vakasiya kuvangirija Weni kuti azwe zvinonanga Bhaibheri zve vakatanga kubhuya ngo pamusoro po shwiro jimweni. Weni wakavona kuti mukaji wake wainga wova mundhu ano runyararo, wakavonavo kuti mwana wake wainga waano mufambiro waushoni maningi. (Mazwi Akangwara 31:18, 27, 28) Weni paakavona kuti Bhaibheri rabesera maningi mbhuri yake, iyena wakatenda  kuashira masoko akanaka.—1 VaKorinto 7:12-14, 16.

9. Ngenyi tinodikana kwenderera mberi tecibesera ukama hwedu?

⁹ Mucaremba kubesera ukama hwenyu. Jehovha wakagaja muezaniso waushoni maningi. ‘Acikaregeri’ kana kuphinda no kuphinda iyena wakapa vandhu mukana kuti vaashire masoko akanaka no kuwana upenyu. (Jeremia 44:4) Zve mupostori Pauro wakavhunja Timoti kuti atame kuremba pa kubesera vamweni. Ngenyi? Ngokuti, ngokuita kudaro, iyena waizopona no kuponesavo vaya vaimupurukira. (1 Timoti 4:16) Tinoda maningi ukama hwedu, ngokudaro tinoda kuti vagume pa kuziva zvokadi zvinowanika mu Soko ra Mwari. Magama no zviito zvaushoni zva hambzaji Pauline, zvakabesera maningi mbhuri yavo. Wari, ivona vakadakara maningi ngokuti vese vari kushandira Jehovha. Vovari vari kushanda inga mapiyona zve Weni ari kushanda inga mukuru wo ungano.

10. Ngenyi tinodikana kuva vandhu vanosengerera?

¹⁰ Ivanyi munosengerera. Potakatanga kujija Bhaibheri, takatanga kupona mukuzwirana no ndhungamiro ja Mwari. Asi ukama hwedu unganesehwa kuzwirana no cinjo jotapera kuita. Kazinji, zvovanotanga kuvona ngo zvokuti, aticabatani navo pa kuceukija maferiyadho amweni o zviara kana aticanghwiniri mu shwiro jo matongehwe o nyika. Kangaije vamweni vanotanga kunyangajwa ndisu. (Mateu 10:35, 36) Asi, atidikani kuremba kuvabesera. Kudari tikatama kueja kuvabesera kuti vazwisise zvatinotenda, tinonga tecinanga kuti ivona avafaneri kuwana upenyu ucingaperi. Jehovha aazivi kutipa mutoro wo kutonga, wakapa basa rondhoro, Jesu. (Johani 5:22) Tikava vandhu vanosengerera, ukama hwedu kangaije ungatanga kudakarira masoko akanaka.—Vonanyi bhokiso rinoti: “ Shandisanyi Saiti Yedu Kuti Mujijise.”

11-13. Tinojijenyi ngo manera akataja Alise vabari vake?

¹¹ Ivanyi makavanga asi makanaka mwoyo. (Mazwi Akangwara 15:2) Vonanyi muezaniso wa Alise. Paakajija ngo pamusoro pa Jehovha iyena wainga ndhambo no ukama hwake. Iwona wainga ucikatendi Mwari zve wainghwinira mu shwiro jo matongehwe o nyika. Iyena wakazwisisa kuti, waidikana kuvhunja vabari vake zviro zvaushoni zvaainga ecijija. Iyena wakati: “Ukanonoka kuvhunja ukama hwako ngo pamusoro po zvaunotenda, zvinozovahwaja maningi.” Iyena waianja kutarira karata mbhuri yake. Mu karata jondhojo iyena waipsaka shwiro yaizodakarihwa ngo ukama hwake, yakadari inga rudo. Perapo waivavhunjisa kuti vanovona kudini ngo shwiro yondhoyo. (1 VaKorinto 13:1-13) Iyena nguva jese waibongesera maningi vabari vake ngo zvese zvavakamuitira zve waivatumira zviri zvese. Paaienda kovona vabari vake, iyena waibesa mai wake pa kuita basa ro pa muzi. Pakutanga, vabari vake avazivi kudakarira povakavhunjwa kuti wainga waano zvitendwa zvipsa.

¹² Alise paaipeja njiku jakati kuti no vabari vake, waienderera mberi eciteveja urongwa hwake hwo kuverenga Bhaibheri. Iyena wakati: “Izvi zvakabesera mai wangu kuti vavone kuti Bhaibheri rinosisira maningi kwandiri.” Pa nguva yondhoyo, baba wa Alise vakatoda kujija zviri zvese zvinovha mu Bhaibheri, kuti vazwisise zvakaitisaro kuti mwana wavo acinje murangariro zve vaida kuvona pakaposekera Bhaibheri. Alise wakati: “Ndakavatarira masoko mu Bhaibherimo.” Ngowapi wakava muviyo wakona? Kusiyapo kuvona pakaposekera Bhaibheri, baba wa Alise vakadakarira maningi zvovakaverenga mu Soko ra Mwari.

¹³ Tinodikana kuva takavanga asi takanaka mwoyo, pikija tikatodikana kucungurira  zvineso. (1 VaKorinto 4:12b) Inga muezaniso, Alise, wakadikana kucungirira kuhwiswa kwaaiitwa ndi mai wake. Iyena wakati: “Pondakabhabhatijwa mai wangu vakandivhuja kuti ndiri ‘mwana wakashata.’” Alise wakaitenyi? “Kusiyapo kuregera shwiroyo yakadaro, ngo nderemejo yese, ndakavavhunja kuti ndasunga kuva umwe wo Zvapupu zva Jehovha zve narini andicaizocinja murangariro wangu. Ndakaeja kuvavhunjazve kuti ndaivada maningi. Tese takacema zve ndakavabikira zvokuha zvinonaka. Kuvhira pondhopo, mai wangu vakazwisisa kuti zivo yo Bhaibheri yainga yecindiitisa mundhu waushoni.”

14. Ngenyi atidikani kutendera kuti ukama hwedu ucinje cisungo cedu co kushandira Jehovha?

¹⁴ Zvingatora nguva kuti ukama hwedu unase kuzwisisa kuti atizosii kushandira Jehovha. Inga muezaniso, Alise paakasunga kushanda inga piyona, kusiyapo kuita basa raida vabari vake, mai wake vakacemazve. Alise wakaenderera mberi wakavanga. Iyena wakati: “Kudari ukatendera kuti ukama hwako ucinje civaringo cako pa ciro cakati kuti, ivona vanozoeja kukucinja pa zviro zvimweni. Asi, kudari tikaenderera mberi takavanga zve takanaka mwoyo no ukama wedu, zvingaita kuti vamweni vavo vade kutipurukira.” Ndizvona zvakaitika na Alise. Vese vo ukama hwake wari vaamapiyona zve baba wake vari kushanda inga mukuru wo ungano.

15. Mukuzwirana na Mateu 5:14-16; pomwe na 1 Pedru 2:12, kuitisa kudini “mabasa . . . auxoni” o vamweni anobesera ukama hwedu?

¹⁵ Jehovha kuti akwevere vandhu kwaari, anoshandisa “mabasa . . . auxoni” o hama jo mu  ungano. (Verenganyi Mateu 5:14-16; 1 Pedru 2:12.) Kudari womakarovorana naye asipi umwe wo Zvapupu zva Jehovha, kureva kuti iyena wakambova no mukana wo kuziva hama jo ungano yenyu here? Hambzaji Pauline, vanangwaya pakutanga, vaianja kukoka hama no hambzaji kuti vaviye pa muzi pavo. Izvo zvaiita kuti mwamuna wavo vavazive. Weni anoceukija kuti hama imweni yakamubesera kuti acinje murangariro wake ngo pamusoro po Zvapupu zva Jehovha. “Hama iya yakakumbira njiku ku basa kuti iviye koovona mutambo wo bhora na inini. Ndakagara ndorangarira kudari: ‘Iyena ii mundhu inga ndini.’”

16. Ngenyi tinodikana kukoka ukama hwedu kuti uviye ku musongano?

¹⁶ Njira imwe yakanakisisa yo kubesera vo pa ukama hwedu, ngo yo ku vakoka kwenda ku musongano jo ungano na itusu. (1 VaKorinto 14:24, 25) Musongano wokutanga wakaendiwa ndi Weni, wakava wo Cirangarijo, ngokuti wainga ecivha ku basa zve musongano wainga ucikatori nguva zinji. Iyena wakati: “Andizivi kuzwisisa ciri cese, asi condinoceukija i vandhu vainga kondhoyo. Ivona vaiviya kondicungamija zve vaindidakarira. Ndakakwanisa kuvona kuti i vandhu vaushoni.” Weni wakavona kuti varovorani vamweni vaitaja Pauline mu njira yo kunaka mwoyo, vaimubesera kubata mwana pa musongano no mu basa ro kucumaera. Ngokudaro, paakasunga kuzwisisa zvitendwa zvipsa zva Pauline, iyena wakakumbira hama iya kuti imubesere kujija Bhaibheri.

17. Ngenyi atidikani kujivona tino ndava asi ngenyi atidikani kurangarira kuti ukama hwedu auzocinji?

¹⁷ Tinoda kuti vese vo ukama hwedu vagume pa kushandira Jehovha. Asi, pikija no kuvangisira kwedu kuti tibesere ukama hwedu kuti ushandire Jehovha, nguva jimweni ivona vangatoramba kuzviita. Kana zvakadaro, atidikani kujivona inga kuti tino ndava. Itusu atikwanisi kuvangirija ari wese kuti atende zvatinotenda. Asi, ukama hwenyu paunozwisisa kuti makadakara ngo kushandira kwenyu Jehovha, zvingauita kuti ucinje murangariro wawo. Ngo kudaro, vaitirenyi mukumbiro. Bhuyanyi ngo kunaka mwoyo. (Maitiro o Vapostori 20:20) Ivanyi no cokwadi co kuti Jehovha anozokomborera kuvangisira kwenyu. Zve kudari ukama hwenyu ukatema civaringo co kumupurukira, iwona unozoponeswa!