1. Ngocapi cidakajiso catinaco?

ICIDAKAJISO cikuru maningi kuva divi ro ungano ya Jehovha! Itusu tiri mu paradhiso yo kumujimu yakazara ngo runyararo no vandhu vakadakara. Ngoyapi ndau yenyu mu ungano?

2. Pauro wakashandisa muezaniso japi mu karata jake jakafemehwa?

² Tingajija zvizinji ngo pamusoro po shwiro iyi, kuvhira ku muezaniso wo mupostori Pauro, waakashandisa ko vhaza jakawanda mu karata jake jakafemehwa. Pa karata imwe nga imwe, Pauro wakaezanisa ungano no muviri wo mundhu. Iyena wakaezanisazve mundhu umwe nga umwe mu ungano no mativi o muviri.—VaRoma 12:4-8; 1 VaKorinto 12:12-27; VaEfeso 4:16.

3. Ngozvapi zvijijo zvitatu zvaticada kuvona mu musoro uno?

³ Mu musoro uu, tinozovona zvijijo zvitatu zvatingajija ngo muezaniso ja Pauro. Cokutanga, tinozojija kuti umwe nga umwe wedu, ano ndau * mu ungano ya Jehovha. Cocipiri, tinozovona zvatingaita kudari tikava no cineso co kuzwisisa kuti icinyi ndau yedu mu ungano. Cocitatu, tinozovona kuti ngenyi tinodikana kwenderera mberi takabatikana pa kuita basa rotakapuwa ndi Jehovha mu ungano.

4. VaRoma 12:4, 5, inotijijisenyi?

⁴ Cijijo cokutanga catingava naco kuvhira ku muezaniso wa Pauro, ngo cokuti umwe nga umwe wedu, ano ndau mu mbhuri ya Jehovha. Pauro wakatanga muezaniso wake ngo kunanga kudari: “Mbzakadi, kudari ngo bzo tino bzihwa bzizinji pa muviri umwe, bzese bzosianavo pa basa rabzo, ndibzonavo bzondhobzo itisu, tese pondhopo tinoita muviri umwe mwa Kristu, notiri umwe nga umwe bzihwa bzo vamweni.” (VaRoma 12:4, 5) Pauro waida kunangenyi ngo magama aya? Waida kunanga kuti umwe nga umwe wedu, ano basa rakasiyana mu ungano, asi tese tinosisira.

5. Jehovha wakapa ‘zvipo’ zvapi ku ungano?

⁵ Pamunorangarira vaya vano ndau mu ungano, kangaije munokasika kurangarira vanotungamirira. (1 VaTesalònika 5:12; Vaheberi 13:17) Ngo zvokadi kuti Jehovha, ecishandisa Kristu wakapa ‘zvipo zviri vanarume’ ku ungano yake. (VaEfeso 4:8, Shanduro yeNyika Itsva) ‘Zvipo [izvi] zviri vanarume’ zvinobatanija vo Mukhumbi Unotonga, vabeseri vo Mukhumbi Unotonga, vo Komisau yo Cine, muvonereri wo ndharaundha, vajijisi vo zvikora zvo umwari, vakuru vo ungano pomwe no vabeseri vo ungano. Hama jese iji, jakagajwa ngo mujimu mucena kuti jikorondhe mavhuta anosisira a Jehovha no kushandira zvinodiwa zvo ungano.—1 Pedru 5:2, 3.

6. Mukuzwirana na 1 VaTesalònika 2:6-8, hama jakagajwa ngo mujimu jinovangisira kuti jiitenyi?

⁶ Hama jinogajwa ngo mujimu mucena kuti jiite mabasa akasiyana-siyana. Inga mativi akasiyana-siyana o muviri, akadari inga murenje no nyara anoshanda kuti abesere muviri wese, hama jinogajwa ngo mujimu mucena jinoshanda ngo simba kuti jibesere ungano yese. Ivona avapsaki rukujo. Kusiyapo zvondhozvo, vanoshanda ngo simba kuti vavangise hama no hambzaji javo. (Verenganyi 1 VaTesalònika 2:6-8.) Tinobonga maningi Jehovha ngo kuva no hama jakadari jinodira zvinodiwa zvo vamweni pakutanga.

7. Ngoapi makomborero ari kuva no vazinji vari munguva yakazara?

⁷ Vamweni mu ungano vangagajwa kuti vashande inga mamisiyonario, mapiona anosisira kana o nguva jese. Kunasa kunanga, hama no hambzaji zinji kutenderera pasi pese, jiri kucumaera no kuita kuti basa ro kuita vajiji rive ravo kamare. Ngo kuita kudaro, ivona vari kubesera vazinji kuti vagume pa kuva vajiji va Jesu Kristu. Kazinji vacumaeri avo vo nguva yakazara, vano zviro zvishoma basi zvo kunyama, asi Jehovha ari kuvapfupa ngo makomborero mazinji. (Marco 10:29, 30) Itusu tinoda maningi hama no hambzaji iji zve tinobonga ngo kuva kwajo divi ro ungano!

8. Ngenyi tingananga kuti vacumaeri vese vo masoko akanaka vanosisira kuna Jehovha?

⁸ Kunanga kuti i hama jakagajwaya basi kana jiri mu nguva yakazara jino divi rajo mu ungano? Haiwa, andijopi jega! Vacumaeri vese vo masoko akanaka vanosisira kuna Jehovha no kuungano. (VaRoma 10:15; 1 VaKorinto 3:6-9) Kunasa kungana, ciro cikuru cinoitwa ngo ungano ngo cokuita kuti vandhu vave vajiji va Tenji wedu Jesu Kristu. (Mateu 28:19, 20; 1 Timoti 2:4) Vese vanosongana no ungano, azvinenyi dangani ndi vacumaeri vakabhabhatijwa kana kuti haiwa, vanoeja kudira basa iri pa ndau yo kutanga.—Mateu 24:14.

9. Ngenyi tinoda maningi hambzaji jedu jo Cikristu?

⁹ Jehovha wakapavo hambzaji ndau inosisira. Iyena anoreremeja vakaji, majimai, noni no hambzaji jicizivi kurovohwa jinomushandira jakagondeka. Bhaibheri rinobhuya ngo vanakaji vazinji vakadakajisa Mwari. Irona  rinovananga inga muezaniso jakanaka jo uzivi, rutendo, kuvangisira, cicunge, kukova pomwe no mabasa akanaka. (Luka 8:2, 3; Maitiro o Vapostori 16:14, 15; VaRoma 16:3, 6; VaFilipi 4:3; Vaheberi 11:11, 31, 35) Tinobonga maningi Jehovha ngokuti tino vanakaji vo cikristu mu ungano jedu, vano mugariro jakafanana no jataperari kuzwa.

10. Ngenyi tinoreremeja maningi vasharuka?

¹⁰ Itusu takakomborehwazve ngo kuva no vasharuka vazinji. Ungano jino hama jaavasharuka no hambzaji jinoshandira Jehovha mu upenyu hwajo hwese. Vamweni avana mukuvo wakareba no vajija cokwadi. Azvinenyi hazvo, vasharuka vari mu ungano mwedu, vari kusongana no zvineso zvakasiyana-siyana zvo uhomi zvakatobatana no kukura kwavo. Zvineso izvo, kangaije zvingatoita kuti vatame kuita zvese zvovaida kuita mu ungano, kubatanijavo basa ro kucumaera. Pikija zvakadaro, ivona vanoita zvavanokwanisa mu basa ro kucumaera no kushandisa simba ravo kuti vakwanise kuvangisa vamweni no kuvajijisa. Cimwenizve, tinobeserekavo ngo uzivi hwavo. Kunasa kunanga, ivona vanodiwa maningi ndi Jehovha zve itusu tinovadavo.—Mazwi Akangwara 16:31.

11-12. Munovangiswa kudini ngo majaha mu ungano yenyu?

¹¹ Amborangariranyivo ngo pamusoro po majaha no vasikana vari mu ungano jedu. Ivona vanosongana no zvineso zvakasiyana-siyana povanonga vecikura mu nyika ino inotongwa ndi Sathana Dhiyabhu zve yakazara ngo jijiso jakashata jo vandhu. (1 Johani 5:19) Hina, tinovangiswa maningi patinovona majaha no vasikana vacipa mupinguro javo pamusongano, vacienda kocumaera no kujivirira zvavanotenda ngo cicunge cese. Hina, imwimwi majaha no vasikana, muno ndau inosisira maningi mu ungano ya Jehovha.—Nduyo 8:3.

¹² Hama no hambzaji jimweni, jinonesehwa maningi kutenda kuti jino ndau inosisira maningi mu ungano. Waro zvicinyi zvingabesera umwe nga umwe wedu kuti ajizwe kuva no ndau mu ungano? Ngatende tivone.

13-14. Ngenyi vamweni vanojizwa inga kuti avasisiri mu ungano?

¹³ Vonanyi cijijo co cipiri catingajija ngo muezaniso wa Pauro. Apa, iyena wakasotesesa maningi zvineso zvino vazinji nyamasi uno. Kuno hama zinji, zvinovanesera maningi kutenda kuti ivona vano ndau inosisira mu ungano. Pauro wakatara kudari: “Murenje ukati: Inini andiripi nyara, ndibzo andina rupande pa muviri, ungazotama kuita muviri, here? Njeve ikati: ngokuti inini andiripi jiso, andiripivo muviri, aicaizotamepi kuita cihwa co muviri.” (1 VaKorinto 12:15, 16) Pauro wainga ecijijisenyi ngo muezaniso uu?

¹⁴ Kudari mukajiezanisa no vamweni mu ungano, zvinomuita kuti mujivone kuti amusisiri. Vamweni mu ungano vano cipo co kujijisa, co kuronga ushoni mabasa kana kuva vahavisi vaushoni. Kangaije mungatojizwa inga kuti imwimwi amuna zvipo zvondhozvo kuti muite zvakafanana inga ndivona. Mukajivona kudaro, zvinokhombija kuti munojidodokesa no kujibata. (VaFilipi 2:3) Asi ngwariranyi. Kudari mukagara mucijiezanisira no vamweni, munozoguma pa kuva mundhu anosuruvara. Kangaije mungatoguma pa kurangarira inga zvakanangaya Pauro kuti, imwimwi amuna ndau mu ungano nee padoko. Waro zvicinyi zvingamubesera kuti muhwisane no mazwiro ondhoo?

15. Mukuzwirana na 1 VaKorinto 12:4-11, tinodikana kuzwisisa cinyi ngo pamusoro po zvipo zvatinazvo?

¹⁵ Ambovonanyi cokwadi ici basi: Jehovha wakapa Makristu amweni o muzana ro kutanga ro makore zvipo ecishandisa mujimu mucena wake, asi asipi Makristu ese akaashira zvipo izvi. (Verenganyi 1 VaKorinto 12:4-11.) Jehovha wakavapa zvipo zvakasiya-siyana no kukwanisa kuita zviro mu njira jakasiyana-siyana. Asi Mukristu umwe nga umwe, waisisira. Nyamasi uno, itusu atizivi kuashira zvipo mu njira inoshamaisa ngo mujimu mucena. Asi zvaperari kunangwa zvinoshandavo kwatiri. Asipi tese nyamasi uno  tinokwanisa kuita zviro zvondhozvo, pikija zvakadaro, tese tinosisira kuna Jehovha.

16. Mbhangiro yapi yotakapuwa ndi mupostori Pauro yatinodikana kushandisa?

¹⁶ Kusiyapo kujiezanisira no Makristu amweni, tinodikana kushandisa mbhangiro yakafemehwa yo mupostori Pauro yokuti: “Umwe nga umwe ngaasotesese bziito bzake; pondhopo anozowana ndava yo kujikuja yena kamare, asi ngo ndava yo umweni.”—VaGalàsia 6:4.

17. Tinozobesereka kudini kudari tikatevejera mbhangiro ya Pauro?

¹⁷ Kudari tikatevejera mbhangiro yakafemehwa yo mupostori Pauro, tosotesesa zviito zvedu, tinozovona kuti tinozokwanisa kuita zviro zvicikakwanisi kuita ngo vamweni. Inga muezaniso, umwe mukuru kangaije aangakwanisi hake kuita ushoni hurukuro pa tiribhuna asi wokwanisa ushoni kuita basa ro kucumaera masoko akanaka. Kana angakonehwa hake kuva mukuru anokwanisa ushoni kuronga zviro pa ungano asi wova muhavisi ano rudo wo kuti vacumaeri vanozwa vakasujunuka kuti vakumbire besero. Kana angatozivika maningi ngo kuva kwake anoashira vafambi. (Vaheberi 13:2, 16) Patinonasa kuvona zvatinokwanisa kuita tinozova no mathangwe akanaka o kujizwa ushoni patinoita ciri cese mu ungano. Atizovi no thima no zvinokwanisa kuita hama jedu kudari zvikasiyana no zvatinokwanisaro.

18. Tingaitisa kudini nane kukwanisa kwedu kuita zviro?

¹⁸ Azvinenyi kuti basa rapi ratinoita mu ungano, tese tinodikana kuva no cido co kuda kuitisa nane basa redu no kuengejera zvatinokwanisa kuita. Kuti atibesere kuitisa nane, Jehovha ari kutijijisa mu njira inoshamaisa ecishandisa sangano rake. Inga muezaniso, pa musongano wedu wo pakati po sumana, tinojijiswa manera o kuitisa nane basa redu ro kucumaera. Muri kueja kushandisa zvamuri kujijiswa pa musongano uwu here?

19. Zvicinyi zvamungaita kuti mukwanise kwenda ku Cikora co Vavhangeri vo Umambo?

¹⁹ Jehovha anoshandisavo Cikora co Vavhangeri vo Umambo kuti akwanise kutijijisa. Cikora ici cingaendiwa ngo hama no hambzaji jiri mu nguva yakazara jino makore anokwana kuita 23 dakara 65. Kangaije mungatozvivona inga kuti amuzokwanirisi cido ici. Asi kusiyapo kuita rista yo kuti ngenyi amuripi kwenda ku cikora ici zvaizova zvaushoni kundandanisa mathangwe ari kumuita kuti mude kwenda kucikora condhoco. Perapo itanyi urongwa unozomubesera kuva no zvikwaniriso zvinodiwa kuti muende ku cikora ici. Ngo besero ra Jehovha no kushanda ngo simba kwamuri kuita, zvamunovona inga azvikwanisiki, zvinodokwanisika.

20. Tingajijenyi kuvhira pana VaRoma 12:6-8?

²⁰ Cijijo cocitatu catingawana kuvhira ku muezaniso wa Pauro cinowanika pana VaRoma 12:6-8. (Veranganyi.) Apa Pauro wakanangazve kuti vese um ungano vano zvipo zvakasiyana. Asi wari iyena wakakohomejera kuti tinodikana kushandisa zvipo zvatinazvo waro kuti tivangise vamweni mu ungano.

21-22. Tingajijenyi ngo muezaniso wa hama Roberto na hama Felise?

²¹ Vonanyi muezaniso wo hama yatingadana Roberto. Pakupera kushandira ku nyika imweni, iyona yakagajwa kuti iende koshandira ku Bheteri yo nyika yayo. Pikija hama iyi yainga no cokwadi co kuti aizivi kucinjwa ngo ndava yo kuita ciri cese cakashata, iyona yakananga kudari: “Ndakava no mazwiro akashata okujivona inga ndatoshaisha kamare, izvi zvakatopeja mweji jakati kuti. Ndakava no mukuvo  wo kuti ndakatorangarira kusiya kushandira pa Bheteri.” Waro hama iyi yakaitenyi kuti ivezve no mudakaro? Mukuru umweni wakaiceuja kuti Jehovha wakavajijisa mu basa rovaiita kare, ngokudaro, vaizokwanisa kubudirira mu basa ro vakagajwaro. Hama Roberto vakazwisisa kuti vaidikana kuima kubatikana ngo zviro zvakaitika kare, votanga kusotesesa zviro zvovaida kuita wari.

²² Hama Felise Episcopo vakavavo no cineso cakafanana. Ivona no mukaji wavo vakapeja cikora co Gireadhi mu gore ro 1956 zve voenda kooshandira mu ndharaundha yo Bhorivhiya. Mu gore ro 1964 ivona vakava no mwana. Hama Felise vakati: “Kwatiri cakava cineso cikuru maningi kusiya basa redu raidakajisa. Ndingatonanga kuti ndakatopeja gore ndakatosuruvara basi. Asi, ngo besero ra Jehovha, ndakacinja murangariro wangu zve ndobatikana pa basa rangu ripsa inga baba.” Munojizwavo inga hama Roberto na hama Felise? Muri kujizwa makasuruvara ngokuti wari amuripi kuita basa manera maiita kare here? Kudari ndizvona, imwimwi munozodakara kudari mukacinja, mosotesesa zviya zvamuri kuita wari kuti mukwanise kushandira Jehovha no hama jenyu. Rambanyi makabatikana, shandisanyi zvipo zvenyu no zvamunokwanisa kuti mushandire vamweni, mukadaro munozowana mudakaro ngo kuvangisa ungano yenyu.

23. Tinodikana kutora nguva kuti tirangarijisise ngo pamusoro penyi zve musoro unotevera unozodavira muvhunjo japi?

²³ Umwe nga umwe wedu anosisira maningi kuna Jehovha. Iyena anoda kuti tive divi ro mbhuri yake. Kudari tikarangarira ngo manera atingakwanisa kubesera hama no hambzaji jedu no kushanda ngo simba kuti tikwanirise basa redu, atizotambujiki ngo kujivona inga kuti atisisiri mu ungano. Waro tingati kudini ngo mavonero atinoita vamweni mu ungano? Tingakhombijisa kudini kuti tinovada no kuvareremeja? Musoro unotevera unozodavira muvhunjo iji jinosisira.