1. Jehovha wakapenyi ku umwe no umwe wo vashandiri vake vakagondeka?

JEHOVHA ngo rudo hwese, wakapa umwe nga umwe wo vashandiri vake vakagondeka ndau muungano yake. Pikija mabasa atinoita akasiyana, tese tinosisira zve tinoda besero ro umwe no umweni. Mupostori pauro wakatibesera kuzwisisa izvi. Kuitisa kudini?

2. Mukuzwirana na VaEfeso 4:16, ngenyi tinodikana kureremejana ngo cedu no kushanda takabatana?

² Inga zvakatahwa pa vhesi yakacijikira musoro uno, Pauro wakananga kuti apana na umweni wedu angakwanisa kusota mushandiri umweni wa Jehovha wonanga kudari: “Andina basa na iwewe.” (1 VaKorinto 12:21) Kudari tecida kuti ungano ive no runyararo, tinodikana kureremejana ngocedu no kushanda takabatana. (Verenganyi VaEfeso 4:16.) Patinoshanda takabatana, ungano inoramba yakavanga zve vese vanojizwa vanodiwa.

3. Tinozovonenyi pa jijo iyi?

³ Tinokhombija kuti tinoreremeja hama jedu jo mu ungano ngo divi rapi? Pa jijo iyi, tinozovona kuti vakuru vangakhombijisa kudini kuti vanoreremejana ngocavo. Tevere, tinozovona kuti tingakhombijisa kudini kuti tinoreremeja hama no hambzaji jedu jicizivi kucadha. Pejisire, tinozojija manera otingareremeja vayani vacingavereketi ushoni ndumi yedu.

4. Mbhangiro yapi inowanika pana VaRoma 12:10 inodikana kutevejehwa ngo vakuru?

⁴ Vakuru vese mu ungano vakagajwa ngo mujimu mucena wa Jehovha. Umwe na umwe wavo anokwanisa kuita zviro zvakasiyana-siyana. (1 VaKorinto 12:17, 18) Vamweni vatogajwa sasambi zvokuti avatona zvizinji zvavanoziva. Vamweni avacakwanisi kuita zvizinji ngo ndava yo usharuka kana zvineso zvo uhomi. Pikija zvakadaro, apana mukuru umwe hake angadikana kusota mukuru umweni wo ungano woita inga ari kunanga kudari: “Andina basa na iwewe.” Kusiyapo zvondhozvo, mukuru umwe nga umwe anodikana kutevera mbhangiro ya Pauro inowanika pana VaRoma 12:10.—Verenganyi.

5. Vakuru vangakhombijisa kudini kuti vanoreremeja umwe no umweni zve ngenyi izvo zvinosisira maningi?

⁵ Mukuru angakhombijisa kudini kuti anoreremeja vakuru vamweni? Ngo kunasa kuvapurukira. Ivona vanodikana kuita zvondhozvo maningi-ningi pavanonga vari pa musongano vecida kutonga shwiro huru. Ngenyi? Vonanyi zvinobhuya Murindiri wo 1 wa Outubro wo 1988 mu Ciputukezi: “Vakuru vanozozwisisa kuti Kristu, ecishandisa mujimu mucena, anozokwanisa kubesera mukuru ariwese, angakwanisa kunanga ciambi co Bhaibheri cingabesera kuti vakwanise kuhwisana no mugariro uriwese kana kutotema civaringo cinosisira. (Maitiro o Vapostori 15:6-15) Mujimu mucena ungakwanisa kubesera vakuru vese haiwa umwe basi.”

6. Vakuru vangaitisa kudini kuti vashande vakabatana zve kubatana uku kungabeseresa kudini ungano?

⁶ Mukuru anoreremeja vakuru vamweni aaeji nguva jese kuva mundhu wokutanga kuvereketa pavanonga veciita musongano javo. Iyena aandovereketi maningi kupinda vamweni zve aavoni kuti mazano ake mukuvo wese ngo akanaka. Kusiapo zvondhozvo, iyena anobhuya munjira yo kujidodokesa no kujibata. Vamweni pavanonanga mavonero avo, iyena anonasa kupurukira. Pa zvese hazvo, iyena anodakarira maningi kuvhunja vamweni ndhungamiriro jo Bhaibheri no kutevejera zvese zvinonangwa ngo “muranda  wakagondeka no wakangwara.” (Mateu 24:45-47) Vakuru pavanobhuya ngo munjira yo rudo no nderemejo, mujimu mucena unonga uri pondhopo wecivabesera kutema zvivaringo zvinovangisa ungano.—Jakobo 3:17, 18.

7. Jesu waivona kudini vacizivi kucadha?

⁷ Mu ungano, muno varovorani vakawanda no mbhuri jakawanda. Asi munavo hama no hambzaji jicizivi kucadha. Waro, tingatajisa kudini vayani vacizivi kucadha? Vonanyi zvairangarira Jesu ngo pamusoro po vacikazivi kucadha. Paainga pasi pano, Jesu aazivi kurovora. Jesu wakaramba wakadaro ecipeja nguva yake no simba pa basa raainga eciita. Jesu aazivi kumbonanga kuti Makristu ese anodikana kucadha kana kutama kucadha. Asi iyena wakananga kuti Makristu amweni aacaizocadha. (Mateu 19:11, 12) Jesu waireremejavo vayani vainga vacizivi kucadha. Iyena aazivi kuvona vayana vacizivi kucadha inga vandhu vakaderera maningi, veciita inga kuti zviripo zvavari kuruza muupenyu.

8. Mukuzwirana na 1 VaKorinto 7:7-9, Pauro wakavangisa Makristu kuti aitenyi?

⁸ Inga ndi Jesu, Mupostori Pauro wakaramba acizivi kucadha mu basa raiita. Pauro aazivi kumbonanga kuti zvainga zvakashata kuti Makristu acadhe. Iyena wakakhombija kuti kucadha kana kutama kucadha cainga cisungo co mundhu ega. Pikija zvakadaro, Pauro wakavangisa Makristu kuti avone kuti aizoenderera mberi ecishandira Jehovha acizivi kucadha. (Verenganyi 1 VaKorinto 7:7-9.) Pauro, aacaivona Makristu acizivi kucadha inga akaderera. Izvi zvakavoneka paakasana mujaha Timoti, wainga acivizi kucadha, kuti aite mabasa akakura mu ungano. * (VaFilipi 2:19-22) Izvi zvinovonesa kuti zvaizova zvakashata kurangarira kuti hama iyi inokwanirisa kana kuti aikwanirisi ngo ndava yo kutama kucadha kwayo.—1 VaKorinto 7:32-35, 38.

9. Ngoapi mavonero aushoni ngo pamusoro po kucadha no kutama kucadha?

⁹ Jesu na Pauro avazivi kunanga kuti Makristu anodikana kucadha kana kutama kucadha. Waro, ngoapi mavonero akanaka ngo pamusoro po shwiro iyi? Murindiri wo 1 wa Outubro wo 2012, wakava wakaezanana pawakati: “Zvokadi kamare, kutama kucadha no kucadha kungatovoniwa inga zvipo zvinovha ka Jehovha. . . . Jehovha aavoni kutama kucadha inga zviro zvinoitisa nyowa.” Tecirangarira  zvanangwari, tinodikana kurangarira ndau jino hama no hambzaji jedu mu ungano, jicizivi kucadha.

10. Tingakhombijisa kudini kuti tinoreremeja hama no hambzaji jedu jicikazivi kucadha?

¹⁰ Tingakhombijisa kudini kuti tinoreremeja mazwiro no mugariro wo hama no hambzaji jedu jicikazivi kucadha? Zvaushoni kuziva kuti Makristu amweni akatema civangiro co kutama kucadha. Kuveni vamweni vaidakarira maningi kucadha, asi avato vamuwana wo kucadha naye. Vamweni vakafihwa ngo vadiwa vavo. Waro, kunanga kuti zvaizova zvaushoni, hama jo mu ungano jogara jecivhunjisa Mukristu acizivi kucadha, kuti ngenyi aaripi kucadha here? Kana kugara tecimupsakira mujaha kana musikane? Nguva jimweni Mukristu acizivi kucadha angatokumbira besero kuti awane mundhu wo kucadha naye. Kudari iyena acizivi kukumbira, waizova no mazwiro api kudari vamweni vakabatikana pa kumupsakira ari wese? (1 VaTesalònika 4:11; 1 Timoti 5:13) Vonanyi zvakananga hama no hambzaji jedu jakagondeka jicizivi kucadha ngo pamusoro po shwiro iyi.

11-12. Zvicinyi zvaizoita kuti tirembese vacizivi kucadha?

¹¹ Muvonereri umweni wo ndharaundha acizivi kucadha anobudirira mu basa rake anonanga kuti kutama kucadha kunoviisa makomborero akawanda. Asi iyena anosuruvara maningi hama no hambzaji jinovoneka inga kuti jinoda kubesera pajinovhunjisa kudari: “Ngenyi imwimwi amuna mukaji?” Hama imweni inoshanda ku Bheteri, icizivi kucadha, yakati: “Mukuvo umweni, hama no hambzaji jinondiita kuti ndirangarire kuti kutama kucadha kunozwisa urombo. Zvinoviisazve mavonero o kuti kutama kucadha asipi cipo asi cineso.”

¹² Hambzaji imweni icizivi kucadha inoshanda ku Bheteri, yakati: “Vacumaeri vamweni vanorangarira kuti vese vacizivi kurovora vari kupsaka wo kucadha nae, kana kuti, wese acizivi kurovora ari kupsaka mukana wo kuda kuzivana no ari wese. Vhaza imweni, ndakadikana kuita hwendo ndoenda kumutundhu umweni kuti ndiite basa rimweni ro Bheteri. Hambzaji yakandiashiraro, yainga no musongano pa usiku wondhowo, ngo kudaro, yakandivhunja kuti ku ungano kwayo kwainga no hama mbiri jainga no mupira wanguwu. Iyona yakandigondesa kuti aicaizondipsakira ari wese. Asi potakaguma pa Nyumba yo Umambo, iyona yakanditora yoenda na inini kuno hama mbiri jiya. Kunasa kunanga, tese tovatatu takamuka kubira ngo nyowa, ngo zvakaitikaro.”

13. Muezaniso japi jakavangisa hambzaji imweni icizivi kucadha?

¹³ Hambzaji imweni icizivi kucadha, inoshanda ku Bheteri, yakati: “Ndinoziva mapiona aamadhodha kamare acizivi kucadha. Asi akaezanana, anobatikana pa basa rao, anojipira no kudakara pa basa rakatikuti. Ivona vanoita kuti ungano ienderere mberi. Cimwenizve, ivona vanovona mugariro wavo mu njira yaushoni, avajivoni kuva vakakwirira maningi ngo kutama kwavo kucadha nee avajivoni inga kuti avana mudakaro ngo kutama kwavo kucadha no kuva no mbhuri.” Izvi zvinoita kuti ungano ive ndau yakaseja. Vese vanojizwa vakareremejwa zve vanosisira. Apana anodikana kujizwa inga murombo kana acikasisiri zve apana anodikana kujivona inga anosisira maningi kana kujidira pa ndau yakakhwirira maningi. Umwe nga umwe anoziva ndau yake.

14. Tingakhombijisa kudini kuti tinoreremeja vacizivi kucadha?

¹⁴ Hama no hambzaji jedu jicizivi kucadha, jinoda kuti vandhu mu ungano vavareremeje ngo mugariro javo, kuciripi kucadha kana  kutama kucadha kwavo. Atidikani kuvazwira urombo, tinodikana kuvareremeja ngo kugondeka kwavo. Tikaita kudaro, hama no hambzaji jedu jicizivi kucadha ajizovoni inga tiri kunanga kudari: “Andina basa na imwimwi.” (1 VaKorinto 12:21) Mukusiyana, ivona vanozovona kuti tinovareremeja no kuziva kuti vano ndau mu ungano.

15. Hama jimweni jinoita cinjo japi kuti jikwanise kuengejera kushandira kwavo Jehovha?

¹⁵ Makore manganani adarika, vacumaeri vazinji vakasana kujijira ndumi imbza kuti vanyegejere basa ravo ro kucumaera. Kuti vaite zvondhozvo, vakadikana kuita cinjo mu upenyu hwavo. Vakadikana kubuda mu ungano yaibhuya ndumi yavo vopinda ku ungano yaida besero yaibhuya ndumi imweni. (Maitiro o Vapostori 16:9) Kuita cinjo iyi, icivaringo co mundhu ega cakaitwa ngo Makristu, kuti aakwanise kushandira Jehovha. Pikija zvingatora makore akawanda kuti vanase kubhuya ushoni ndumi yedu, ivona vangakwanisa kubesera ushoni ungano. Mugariro javo jaushoni no zvovanokwanisa kuita, zvingavangisa ungano. Pacina kukana-kana, hama iji jinozvipira, jinosisira maningi kwatiri.

16. Vakuru vanodikana kushandisenyi kuti vakonokeje hama kuti ive mukuru kana mubeseri wo ungano?

¹⁶ Vakuru vo ungano avadikani kutama kukonokeja hama kuti ive mukuru kana mubeseri wo ungano, ngo pamusoro pokuti aito yanasa kuvereketa ushoni ndumi yo unganoyo. Cinodikana kusotwa ngo vakuru basi ngo cokuti hama yondhoyo, iri kukwanirisa ushoni zvikwaniriso zvinonangwa ngo Bhaibheri kana kuti haiwa, kuciripi kupsaka mavereketero ainoita ndumi yo unganoyo.—1 Timoti 3:11, 14; Tito 1:10.

17. Vabari vanodikana kutema civaringo capi pavanothutha kwenda ku nyika imweni?

¹⁷ Mbhuri jimweni jo Cikristu jakacinja joenda kogara nyika jimweni kuti jiwane kokutizira kana kuwana basa. Pa mugariro jakadari, zvingaita kuti vana vavo vangaenda kojija kucikora co munyika yondhoyo cinobhuiwa ndumi yo nyikeyo. Kangaije majibaba vangatodikana kutojija ndumiyo kuti vakwanise kuwana basa. Asi kudari mu nyikeyo muno ungano kana gurupu rinoita musongano ngo ndumi yavo keni? Ngokwapi ko vangaenda kovona musongano? Ku ungano inobhuiwa ndumi yo nyikeyo kana ku ungano inobhuya ndumi yovanovereketaro?

18. Mukuzwirana na VaGalàsia 6:5, tingakhombijisa kudini kuti tinoreremeja zvasungwa ngo musoro wo mbhuri?

¹⁸ Musoro wo mbhuri ndiyena angatema civaringo cokuti mbhuri yake ngo kwapi kwaingaenda kosonganira. Zvecivoneka kuti i shwiro yo mundhu ega, iyena anodikana kuziva kuti ngozvapi zvinosisira ku mbhuri yake. (Verenganyi VaGalàsia 6:5.) Itusu tinodikana kureremeja zvasungwaro ngo musoro wo  mbhuri. Azvinenyi no zvaasungaro, tinodikana kutendera zvaasanaro no kuashira mbhuriyo ngo rudo pa ungano.—VaRoma 15:7.

19. Musoro wo mbhuri anodikana kuita mukumbiro ngo pamusoro penyi?

¹⁹ Nguva jimweni, mbhuri kangaije ingasana ungano inobhuiwa ndumi yo vabari kuveni vana avanasi kuvereketa ndumiyo. Kudari ungano, inogara mu ndau inovereketwa ndumiyo, zvingaita kuti vana vanganesehwa kuzwisisa zvinobhuiwa pa musongano no kuenderera mberi ku divi ro umwari. Ngenyi? Kangaije vana vanonga vecijija ku cikora inobhuiwa ndumi yo nyikeyo, kuciripi ndumi yo majibaba avo. Pa mugariro jakadari, musoro wo mbhuri anodikana kuita mukumbiro kuti avone zvaizobesera umujimu wo vana vake. Iyena angaita zvondhozvo ngo kuvabesera kuti vanase kubhuya ndumi yavo kana kucinja kwenda ku ungano inobhuiwa ndumi yovanonasa kuzwisisa. Azvinenyi zvasungwa ngo musoro wo mbhuri, ungano yaanokhetaro inodikana kureremeja no kuvaita kuti vajizwe ushoni.

20. Tingakhombjisa kudini kuti tinoreremeja hama no hambzaji jedu jiri kujijira ndumi imbza?

²⁰ Pa zvese zvotaperari kuvona, mu ungano zinji, tinovona hama no hambzaji jinovangisira kuti jijijire ndumi imbza. Kuti vasanangure zvavanonga vacirangarira, cingava cineso. Asi kudari, tikatama kusotesesa kuposa kwavanoita pavanobhuya ndumi yedu, tinozokwanisa kuvona rudo hwavo kuna Jehovha no cido cavo cokuda kumushandira. Kudari tikanasa kusotesesa mugariro jaushoni jo hama no hambzaji iji, tinozovona kuti ivona vanosisira zve tinozovareremeja. Kutama kwavo kuvereketa ushoni ndumi yedu, azvitiiti kuti tivavhunje kudari: “Andina basa na iwewe.”

21-22. Tino cidakajiso cenyi?

²¹ Tinobonga maningi Jehovha ngokuti wakatipa basa rinosisira mu ungano yake. Kwaari, azvinenyi kuti tiri vanarume, vanakaji, vakacadha no vacizivi, majaha, vasharuka kana kuti takarerukihwa ngo kuvereketa ndumi imweni kana tinonesehwa, tese tinosisira maningi kuna Jehovha no ku umwe na umwe wedu.—VaRoma 12:4, 5; VaKolosi 3:10, 11.

²² Ngatienderere mberi tecivangisira kushandisa zvijijo zvinosisira zvatajija ngo muezaniso wa Pauro wo muviri wo mundhu. Ngo kudaro, tinozokwanisa kukhombija kuti tinoreremeja ndau yedu, no ndau yo vamweni mu ungano ya Jehovha.