TESE tinodikana kujivhunjisa kudari: Ndinojivona inga mundhu anobongesera here? Bhaibheri rakananga kuti vandhu vazinji mu nguva jedu jino, vaizova ‘vacikabongi.’ (2 Timoti 3:2, Baiberi Mazwi Akacena aMwari) Kangaije munotozivavo vandhu vanodakarira kuitihwa zviro basi. Ivona vanojivona inga vanofanera maningi kuitihwa zvondhozvo zve avadikani kubongesera. Zvokadi kamare, apana mundhu anodakarira kugara no vandhu vacikabongi.

Mukusiyana, vashandiri va Jehovha vari kuvhunjwa kuti: ‘Vave vandhu vanobonga.’ Ngokudaro, tinodikana ‘kubonga ngo bzese.’ (VaKolosi 3:15; 1 VaTesalònika 5:18) Kubongesera kunotibesera mu njira jakasiya-siyana.

Thangwe guru rinotiita kuti tive vandhu vanobongesera ngo rokuti, tinojizwa ushoni. Mundhu paanobongesera ngokuti tamuitira ciri cese, iyena anodakara maningi zve itusu tinodakaravo. Ngenyi kubongesera kunova no muviyo iji? Vonanyi basi muezaniso uwu: Mundhu paanova no cido co kuda kumuitira ciro, zvinovonesa kuti iyena anomuda maningi zve imwimwi munofanera. Zvinovonesazve kuti iyena anoneseka ndimwi. Kuvona mundhu eciita kudaro, zvinotidakajisa maningi. Atee, tingatovona kuti ndizvona kamare zvakaitika na Ruti. Bhowazi wakakhombija kuva mundhu anokova. Pacina kukana-kana, Ruti wakadakara maningi ngo kuziva kuti pano mundhu anonesekavo naye.—Rute 2:10-13.

Ciro cinosisira maningi i kubongesera Mwari. Pacina kukana-kana, nguva jimweni, munotorangariravo ngo pamusoro po zviro zvakawanda zvomakapuwa ndi Mwari no zvimweni zvaarikumupa mbhera wari. (Deuteronòmio 8:17, 18; Maitiro o Vapostori 14:17) Asi, kusiyapo kurangarira basi ngo pamusoro po kunaka mwoyo ka Mwari, madini kurangarijisisa ngo pamusoro po makomborero amunawo no ari kuashira vaya vamunoda? Kurangarijisisa ngo pamusoro po kukova ko Musiki wenyu, kunozomuita kuti muve mundhu anobonga zve munozothemba kuti Jehovha anomuda no kuneseka ndimwi.—1 Johani 4:9.

Atidikani basi kudakara ngo kurangarijisisa ngo pamusoro po kukova ka Jehovha no makomborero aanotipa. Tinodikana kumubonga. (Nduyo 100:4, 5) Mutari umweni, wakananga kudari: “Kubongesera vamweni kunotiita kuti tidakare.”

Thangwe rimweni rinotiitisa kuti tive vandhu vanobongesera ngo ro kuti, kubongesera kunovangisa ushamwari. Tese tinoda kuti vandhu vatireremeje. Patinobongesera ngo mwoyo wese mundhu watiitira ciro caushoni, ushamwari hwedu unovanga. (VaRoma 16:3, 4) Kusiyapo zvondhozvo, zvingaitazve kuti vandhu vatinobongaya vade kutibesera. Ivona vanozwisisa kuti patinokhombija kunaka mwoyo vamweni, ivona vangatotiitiravo zvakanaka. Zvokadi kamare, kubesera vamweni kunotipa mudakaro. Jesu wainga no razau paakananga kudari: “Anodakara anopa, kupinda wiya anopuwa.”—Maitiro o Vapostori 20:35.

Ecibhuya ngo pamusoro po kubongesera, Robert Emmons, mutungamiriri wo basa rimweni raiitwa ngo Univhersidhadhi yo Karifoniya, wakananga kudari: “Kuti tive vandhu vanobongesera, tinodikana kuzwisisa kuti tinoda besero ro vamweni. Nguva jimweni tinopekeja vamweni zviro, nguva jimweni itusu tinoashira.” Cokwadi nga ici: Kuti tienderere mberi tecipona no kuva no upenyu unodakajisa tinodikana kutendera besero ro vamweni mu njira jakasiyana-siyana. Inga muezaniso, ivona vangatibesera ngo kutipa zvokuha kana kutitengera mutombo. (1 VaKorinto 12:21)  Mundhu anobongesera anoreremeja zvaanoitihwa ngo vamweni. Ngo iyo ndava jivhunjisenyi kudari: Kureva kuti inini ndinobongesera mundhu paanondiitiraya zviro here?

Thangwe rimweni rinotiita kuti tive vandhu vanobongesera ngo ro kuti, kubongesera kunotiita kuti tive no mavonero akanaka kusiyapo kuva no mavonero akashata. Kunasa kunanga, mwoyo wedu wakadari inga sefo. Iwona unokwanisa kutibesera kuti tibatisise zviro zvakanaka. Mundhu anobongesera, anoanja kubatikana maningi pa zviro zvakanaka kusiyapo kubatikana pa zvineso. Patinoengejera kubongesera kwedu, tinova no mukana wo kuvona zviro zvaushoni. Kubatikana pa zviro zvaushoni kunozotibesera kuti titeveje mbhangiro yo mupostori Pauro yo kuti: “Dakaranyi ngari yese mwa Tenji.”—VaFilipi 4:4.

Munozovona kuti kubongesera kunotibesera kuti titame kuva no mazwiro acikabesi. Zvingava zvecinesa maningi mundhu anobongesera, wova ano ushanje, wogara wakasuruvara kana woviga bundu. Kusiyapo zvondhozvo, mundhu anobongesera, aapsakisisi maningi zviro zvokunyama. Anobongesera ngo zvaanazvo zve aaeji kupsaka zvimweni.—VaFilipi 4:12.

Inga Makristu, tinozviziva kuti Sathana anoda kutivona takasuruvara zve ticina mudakaro ngo ndava yo zvineso zvatiri kusongana nazvo mu njiku jino jokupejisira. Zvokadi kamare, iyena waizodakara maningi naaitivona teciva no mavonero akaposeka zve tova vandhu vanon’gun’guta. Asi, kuva no mavonero ondhoo, aacaizotibesera mu basa redu ro kucumaera. Kunasa kunanga, kubongesera kwakabatana no mucero yo mujimu mucena wa Mwari, yakadari inga mudakaro no rutendo. Inga muezaniso, tinodakara ngo zvese zvaushoni zvatinopuwa ndi Jehovha. Cimwenizve, tino rutendo pa zvese zvaanotigondisa kuti anozoita kumbejiyo.—VaGalàsia 5:22, 23.

Ngo kuva divi ro vashandiri va Jehovha, kangaije mungatenderana no zvese zvanangwari mu musoro uu. Pikija zvakadaro, azvizivi kureruka kuva vandhu vanobonga no vano mavonero akanaka. Asi, mucadonyangajwa. Imwimwi mungakwanisa kuva mundhu anobongesera. Kuitisa kudini? Njiku jese psakanyi nguva kuti mumborangarire ngo pamusoro po zviro zvese zvaushoni zvo upenyu hwenyu zvingamuita kuti muve mundhu anodakara. Pamunoita zviro zvakadaro, zvinozomurerukira maningi kuva mundhu anobongesera. Mukadaro, munozodakara maningi kupinda vaya vanobatikanaya pa zvineso zvavo. Rangariranyi ngo pamusoro po zviro zvaushoni zvamunoitihwa ndi Mwari no vandhu vamweni. Munovona kudini kutarira zviro zvamuitikira pa njiku yenyu zvomavona kuti zvinodikana kubongwa?

Vandhu vakajija ngo pamusoro po shwiro iyi, vanonanga kuti: “kuva no cirovejeso co kubongesera, kungacinja mashandire anoita uruzvi hwedu, zvotiita kuti tive vandhu vanopsaka zvaushoni.” Mundhu anobongesera ano mudakaro. Ngokudaro, rangariranyi makomborero amunao, dakaranyi ngo zvese zvaushoni zvamunazvo zve ivanyi munobongesera! Kusiyapo kurangarira kuti munofanera kuashira zvese mu upenyu hwenyu, “Bonganyi Tenji Mwari ngokuti wakanaka mwoyo.” Cimwenizve, “Bonganyi [ngo] bzese.”—1 Kronike 16:34; 1 VaTesalònika 5:18.