1-2. Tecivona muezaniso wa hama Angelito, zvicinyi zvaangaita mundhu pacake?

MURI MWANA wo Capupu ca Jehovha here? Kudari mukadavira kuti hina, ceujanyi kuti imwimwi amungavi shamwari ya Jehovha ngokuti vabari venyu i shamwari ja Jehovha. Azvinenyi kuti majibaba edu i Zvapupu kana kuti haiwa, mundhu pacake anodikana kusakurira ega ushamwari wake na Jehovha.

² Vonanyi muezaniso wa hama Angelito. Ukama wese wo hama iyi, wainga Zvapupu zva Jehovha. Asi, hama Angelito pavainga mujaha, avacaijizwa phedo na Jehovha. Ivona vakananga kudari: “Ndaishandira Jehovha ngokuda kutevejera zvaiitwa ngo ukama hwangu.” Hama Angelito vakazotema civaringo co kuverenga Bhaibheri no kurangarijisisa zvovaiverengaro. Vaiitazve maningi mukumbiro. Ngowapi wakava muviyo? Ivona vakati: “Ndakavona kuti ciro cimwe candingaita kuti ndijizwe phedo na Jehovha, ngo cokunasa kumuziva.” Muezaniso wa hama Angelito unomusa muvhunjo jinosisira maningi: Kuziva ciri cese ngo pamusoro pa Jehovha no kunasa kumuziva, zvakasiyana papi? Tinodikana kuitenyi kuti tinase kumuziva?

3. Kuziva ciri cese ngo pamusoro pa Jehovha no kunasa kumuziva, zvakasiyana papi?

³ Tingananga kuti mundhu anoziva Jehovha ngokuti anoziva zina rake kana ciri cese cakaitwa no kunangwa ndiyena. Asi, kunasa kuziva Jehovha kunobatanija zviro zvizinji. Tinodikana kutora mukuvo wakareba tecijija ngo pamusoro pake no mugariro jake. Perapo, tingazokwanisa kuzwisisa kuti ngenyi Jehovha anonanga no kuita zvakati. Kuita zvondhozvo, zvinozotibesera kuvona kuti Jehovha anovona kudini mavonero edu,  zvatinoita no zvivaringo zvatinotema. Pakupera kuziva kuti ngozvapi zvaanoda Jehovha kuti tiite, tinodikana kutozvishandisa.

4. Ngenyi kujija ngo pamusoro po muezaniso jo vandhu vanonangwa mu Bhaibheri zvinotibesera?

⁴ Vandhu vamweni vangatishora ngokuti tiri kushandira Jehovha. Kangaije vangatonyanyisa kutishora patinotanga kwenda ku musongano. Asi kudari tikathemba Jehovha, iyena aazotisii. Kuthemba kondhoko, kunozoita kuti tive no ushamwari wo kwenda no kwenda na Jehovha. Kunanga kuti zvinokwanisika kunasa kumuziva Jehovha no kuva shamwari yake here? Hina, zvinokwanisika! Muezaniso wakagajwa ngo vandhu vacikazivi kukwana, inga ndi Mosi na Mambo Dhavhidhi unovonesa kuti zvinokwanisika. Zvecivoneka kuti ticazobhuya ngo zviro zvovakaita, ticazodavira muvhunjo muviri iji: Mosi na Mambo Dhavhidhi, vakazivisa kudini Jehovha? Zve tingajijenyi ngo muezaniso wavo?

5. Mosi wakasana kuitenyi?

⁵ Mosi wakasana kushandira Jehovha. Paainga no makumarongomuna o makore, Mosi wakasana kuva divo ro vandhu va Jehovha, Vahebheru, kuciripi hake kuda kuzivika inga “mwana wo mwana wokaji wa Faro.” (Vaheberi 11:24) Iyena wakaramba kuva no nduma. Mosi paakabesera Vahebheru, waizviziva kuti Faro waizonyangajwa maningi. Faro wainga mutongi ano simba zvokuti waivoniwa ngo Vaejipita inga mwari. Izvi zvinovonesa kuti Mosi wainga no rutendo hwakavanga! Iyena wakathemba Jehovha. Kuthemba uku, kwaisisira maningi ngo kuti ndikona kwakaita kuti Mosi ave no ushamwari wo phedo na Jehovha, ushamwari wo kwenda no kwenda.—Mazwi Akangwara 3:5.

6. Tinojijenyi ngo muezaniso wa Mosi?

⁶ Ngozvapi zvatinojija? Inga ndi Mosi, tese tinodikana kusana kwatiri: Kureva kuti tinosana kushandira Mwari no kuva ku divi ro vandhu vake here? Kangaije tinodikana kuvangisira kuti tishandire Mwari. Zvingatoita kuti vandhu vacikazivi Mwari votanga kutiteverera. Asi kudari tikathemba Baba wedu vo kudenga, tinozova no cokwadi cokuti ivona vanozotibesera!

7-8. Mosi wakaenderera mberi ecijijenyi?

⁷ Mosi wakaenderera mberi ecijija ngo mugariro ja Jehovha no kuita kuda kwake. Inga muezaniso, Jehovha paakakumbira Mosi kuti asujunure Vaiziraeri kuuranda ku Ejipita, Mosi wakathya zve wakavhunja Jehovha kakawanda kuti aazivi kunasiririka kuti aite basa riya. Mupinguro wa Mwari wakakhombija kuti wainga no unyasha, kana kuti, iyena wakazwisisa mazwiro a Mosi, womubesera. (Exodo 4:10-16) Inga muviyo, Mosi wakakwanisa kuita kuda ka Mwari zve wakatumira masoko o rutengeso kuna Faro uwo waivoniwaya inga mwari. Zve Mosi wakavona Jehovha ecishandisa simba rake ngo kuponesa Vaiziraeri, woparaja Faro no masoca ake pa Jombe ro Kupsuka.—Exodo 14:26-31; Nduyo 136:15.

⁸ Vaiziraeri povakasujunuhwa ku Ejipita, vaindon’gun’guta nguva jese. Pikija zvakadaro, Jehovha wakakhombija kuva mundhu anosengerera zve Mosi wakakwanisa kuzvivona zvese izvi. (Nduyo 78:40-43) Jehovha wakacinja murangariro wake wo kuparaja Vaiziraeri, pasure po kukumbihwa ndi Mosi kuti atame kuvaparaja. Nga izvo, Mosi wakakwanisazve kuvona Jehovha ecikhombija kujidodokesa mu njira inoshamaisa.—Exodo 32:9-14.

9. Mukuzwirana no Vaheberi 11:27, ushamwari hwa Mosi na Jehovha hwainga hwakadini?

⁹ Pasure pa izvo, ushamwari wa Mosi na Jehovha wakaguma pa kuvanga zvoita inga  kuti Mosi waikwanisa kuvona Babake vo kudenga. (Verenganyi Vaheberi 11:27.) Kuitira kuvonesa kuti ushamwari hwavo hwainga hwo phedo kamare, Bhaibheri rinoti: “Tenji Mwari waivereketa na Mosi meso ngo meso, inga mundhu anovereketa no xamwari yake.”—Exodo 33:11.

10. Kuti tinase kuziva Jehovha tinodikana kuitenyi?

¹⁰ Ngozvapi zvatinojija? Kuti tinase kuziva Jehovha, atidikani basi kujija ngo pamusoro po mugariro jake asi tinodikana kuita zvaanoda. Jehovha, nyamasi uno “anoda kuti vandhu vese vaponeswe, no kukwanisa kuziva bzokadi.” (1 Timoti 2:3, 4) Njira imwe yatingaita zvinoda Jehovha ngo yo kuvhunja vamweni ngo pamusoro pake.

11. Ngenyi tingananga kuti patinojijisa vamweni ngo pamusoro pa Jehovha, tinonasa kumuziva?

¹¹ Kazinji, patinonga tecijijisa vamweni ngo pamusoro pa Jehovha, itusu tinonasa kumuziva. Inga muezaniso, tinokwanisa kuvona unyasha wa Jehovha kuno vandhu paanotibesera kuti tiwane vaya vanoda kuva shamwari jake. (Johani 6:44) Tinovona kuti izwi ra Mwari, Bhaibheri, rino simba, ngokuti rinobesera vajiji vo Bhaibheri kuti vasiye zvirovejeso zvakashata no kuvabesera kuti vasimire undhu upsa. (VaKolosi 3:9, 10) Tinokwanisazve kuvona kusengerera ka Mwari ku vandhu vo mu ndima yedu, ngokuti iyena anotitumira kuno vaya vanoda kujija ngo pamusoro pake no kuvaita kuti vaponeswe.—VaRoma 10:13-15.

12. Mukuzwirana na Exodo 33:13, Mosi wakakumbirenyi zve ngenyi?

¹² Mosi waireremeja maningi ushamwari hwake na Jehovha. Jehovha wakashandisa Mosi kuti aite mabasa makuru. Ngo ndava yazvo, Mosi wakanasa kuziva Jehovha. Asi iyena ngo nderemejo yese, wakakumbira besero kuna Jehovha kuti anase kumuziva. (Verenganyi Exodo 33:13.) Mosi wainga no makore anopindirija makumasere, paakakumbira besero iri. Asi, waizviziva kuti waidikana kujija zvizinji ngo pamusoro pa Baba vake vo kudenga.

13. Ngoyapi njira imwe yatingakhombija kuti tinoreremeja ushamwari hwedu na Jehovha?

¹³ Ngozvapi zvatinojija? Azvinenyi dangani tino makore mangana tecishandira Jehovha, ticadobata kurangarira kuti ushamwari wedu na Jehovha ngo wo kwenda no kwenda. Njira imwe yatingakhombija kuti tinoreremeja ushamwari hwedu na Jehovha ngo yo kubhuya naye mu mukumbiro.

14. Ngenyi mukumbiro i njira inosisira maningi ingatibesera kuti tijije zvizinji ngo pamusoro pa Mwari?

¹⁴ Kuti muve no ushamwari wo cike-ndi-cikevo no ariwese, munodikana kubhuya naye mukuvo wese. Ngokudaro, itanyi mukumbiro kuna Jehovha mukuvo wese zve mucadothya kumuvhunja zviri mukati mo mwoyo wenyu. (VaEfeso 6:18) Hambzaji imweni inodanwa Krista, inogara Turikiya, yakananga kudari: “Pandinobhuya na Jehovha ngo pamusoro po murangariro wangu zve ndovona kuti anondibesera, rudo hwangu no rutendo kwaari hwunoengejeka. Pandinovona madaviriro anoita Jehovha mukumbiro jangu, zvinondibesera kuti ndivone Jehovha inga Baba zve Shamwari yangu.”

15. Jehovha wakanangenyi ngo pamusoro pa Mambo Dhavhidhi?

¹⁵ Mambo Dhavhidhi vakabahwa mujinja rainamata Jehovha Mwari. Asi, izvi azvirevi kuti Dhavhidhi wainamata Jehovha ngokuti mbhuri yake yaimunamata. Dhavhidhi pacake wainga no ushamwari na Jehovha zve Jehovha waimuda maningi. Jehovha pacake wakananga kuti Dhavhidhi wainga mundhu “wo ndinodakajihwa ndiyena.” (Maitiro o Vapostori 13:22) Waro, Dhavhidhi wakaitisa kudini kuti ushamwari hwake na Jehovha ugume pa kuvanga?

16. Dhavhidhi wakajijenyi ngo pamusoro pa Jehovha ngo kuvona zvakasikwa?

 ¹⁶ Dhavhidhi wakajija ngo pamusoro pa Jehovha ngo zviro zvaakasika. Dhavhidhi paainga aciri mujaha, waipeja maningi nguva ari kunja acihavisa mavhuta a babake. Kangaije pa ngari iyo, iyena wakatanga kurangarijisisa ngo zviro zvakasikwa ndi Jehovha. Inga muezaniso, no usiku, paaisota mudenga, Dhavhidhi aacaivona basi zviuru no zviuru zvo ndondho. Asi iyena wairangarijisisa mugariro wo mundhu wakaitaro ndondhojo. Ngenyi tingananga kudaro? Ngo magama aakandundihwa kuti atare, okuti: “Gore rinotokotesa goja ra Mwari nyereji jinoverenga bziito bzo nyara jake.” (Nduyo 19:2, 3) Dhavhidhi paakarangarijisisa ngo manera akaruhwa vandhu, wakakwanisa kuvona kuti Jehovha ano uzivi unoshamaisa maningi. (Nduyo 139:14) Ngo kurangarijisisa ngo pamusoro po zviro zvakaita Jehovha, Dhavhidhi wakakwanisa kuvona kuti iyena mudoko maningi mukuezanisa na Jehovha.—Nduyo 139:6.

17. Zvicinyi zvatingajija patinorangarijisisa ngo pamusoro po zvisikwa?

¹⁷ Ngozvapi zvatinojija? Psakanyi kuziva zvakasika Mwari. Mucadakara basi go kuva mu nyika yakaseja yakasikwa ndi Jehovha. Psakanyi nguva yo kuvona zvisikwa zva Jehovha no kushamaisika ndizvona. Pa njiku no njiku, rangarijisisanyi ngo zviro zvakasika Jehovha—muti, zvinyama no vandhu, kuti zvinomujijisenyi ngo pamusoro pa Jehovha. Ngokudaro, pa njiku no njiku munozokwanisa kujija zvizinji ngo pamusoro pa Baba wenyu vano rudo. (VaRoma 1:20) Munozovona kuti pa kufamba ko nguva rudo hwenyu na Jehovha unozova wakavanga.

18. Mukuzwirana na Nduyo 18:1, Dhavhidhi waizivenyi?

¹⁸ Dhavhidhi waiziva kuti Jehovha waimubesera. Inga muezaniso, Dhavhidhi paakajivirira mavhuta a babake pa muromo wo mbondoro no urso, iyena waiziva kuti Jehovha ndiyena wakamubesera kuti akwanise kuuraya zvinyama zvese izvi. Paakanyisa zigakanyara Goriati, wakavona nyara ya Jehovha yecimubesera. (1 Samueli 17:37) Paakapokonyoka munyara ja Mambo Sauri, uwo wainga no thima, Dhavhidhi wakazwisisa kuti wainga waponeswa ndi Jehovha. (Nduyo 18:1) Kudari Dhavhidhi naainga mundhu wokuzvikuja, iyena waizoda kukujwa ngo kuwina uku. Asi iyena waizvidodokesa zve waiziva kuti waibesehwa ndi Jehovha mu upenyu hwake.—Nduyo 138:6.

19. Ngozvapi zvatinojija ngo muezaniso wa Dhavhidhi?

¹⁹ Ngozvapi zvatinojija? Tinodikana kuita zvizinji kuciripi basi kukumbira kuti Jehovha atibesere. Tinodikana kueja kuziva kuti Jehovha anotibesera papi zve anotibeseresa kudini. Patinojidodokesa, tinozozwisisa kuti atikwanisi kuita ciri cese tega zve tinozovona kuti Jehovha anozotibesera kuti tiite zvaticikakwanisi kuita. Patinovona Jehovha ecitibesera, ushamwari wedu naye unova wakavanga. Hama Izaki vanogara ku Fiji, avo vaanomakore akawanda vecishandira Jehovha, vakakwanisa kuzwisisa kuti izvi i zvokadi. Ivona vakati: “Ndikarangarira pandakatanga kujija Bhaibheri mbhera nyamasi, ndinokwanisa kuvona manera andiri kubesehwa ndi Jehovha. Inga muviyo, Jehovha wakava wokadi kwandiri.”

20. Tingajijenyi ngo ushamwari wainga na Dhavhidhi na Mwari?

²⁰ Dhavhidhi wakatevejera mugariro ja Jehovha. Jehovha wakatisika kuti tikwanise kutevejera mugariro jake. (Genesi 1:26) Patinojijira ngo pamusoro po mugariro ja Jehovha, zvinozova zvakareruka kuti titevejere mugariro jake. Dhavhidhi wainasa kuziva ushoni Babake vo kudenga, ngokudaro, iyena waikwanisa kuvatevejera paaitaja vamweni. Vonanyi  muezaniso uu basi. Dhavhidhi wakashaishira Jehovha paakaita uhure na Bhati-Shebha zve woita kuti mwamuna wake aurawe. (2 Samueli 11:1-4, 15) Asi Jehovha wakaitira unyasha Dhavhidhi, ngokuti iyena waitaja vamweni ngo unyasha. Ngo kuva no ushamwari hwakavanga na Jehovha, Dhavhidhi wakava mambo waidika ngo jinja ro Vaiziraeri zve Jehovha wakamushandisa inga muezaniso kuitira majimambo ese o Iziraeri.—1 Majimambo 15:11; 2 Majimambo 14:1-3.

21. Inga zvatinovona pana VaEfeso 4:24; 5:1, ngojapi jinozova muviyo kudari tikava “vaejaeji va Mwari”?

²¹ Ngozvapi zvatinojija? Tinodikana kuva “vaejaeji va Mwari.” Patinotevejera Mwari, tinobesereka pacedu zve tinojija zvizinji ngo pamusoro pake. Patinotevejera mugariro ja Jehovha, tinokhombija kuti tiri vana vake.—Verenganyi VaEfeso 4:24; 5:1.

22-23. Zvicinyi zvinoitika patinoshandisa zvatinojija ngo pamusoro pa Jehovha?

²² Inga zvatavona, tingajijira ngo pamusoro pa Jehovha, ngo zvaakasika pomwe no Bhaibheri. Bhaibheri rino muezaniso jakawanda jo vashandiri vakagondeka va Mwari jatingatevejera, jakadari inga Mosi na Dhavhidhi. Jehovha wakaita divi rake. Tinodikana kuita divi redu ngo kujija zvizinji ngo pamusoro pake.

²³ Atizoregeri kujija ngo pamusoro pa Jehovha. (Mucumaeri 3:11) Zvinosisira maningi asipi zviya zvatinojija ngo pamusoro pake, asi zvinosisira ikushandisa zviya zvatinojija. Tikashandisa zvatinojija no kuteveja Baba wedu vano rudo, ivona vanozoendereravo mberi vecikwedera kwatiri. (Jakobo 4:8) Mu Soko rake, iyena anotigondesa kuti aazosiyi vaya vanovangisira kuti vanase kumuziva.