Mungadavira muvhunjo iji makacijikira pa Murindiri jo 2019 here?

Cigondiso ca Mwari cokuti: “Cokurhwa ndicona, cakanasirihwa kuambana nemwi, acizobudiriri,” cinoda kurevenyi? (Isaia 54:17)

Tingava no cokwadi co kuti Jehovha anozotijivirira pa “simba ro vaxuphi.” (Isaia 25:4, 5) Vavengi vedu avazokwanisi kubudirira pa kutihwisa.—Murindiri wo 01/19, mapheji 6-7.

Jehovha wakatajisa kudini mu njira yo ururami Vakanani no Vaiziraeri vakapandukaya?

Jehovha wakananga kuti waizotonga vese vaya vaiita zvo uhure no kushaisha kutaja vanakaji no vana vavo. Asi, Jehovha wakakomborera vaya vaimuzwira zve vaitaja vamweni ngo ururami.—Murindiri wo 02/19, mapheji 22-23.

Tinodikana kuitenyi kudari mukumbiro ukaitwa ngo mundhu acikaripi Capupu ca Jehovha?

Tinodikana kwenderera mberi takanyarara zve no nderemejo yese. Atidikani kuitavo “ameni,” atitodikani kubatana nyara navo pavanonga veciita mukumbiro. Tinodikana kuita mukumbiro wedu ngo cinyararire.—Murindiri wo 03/19, pheji 31.

Ngenyi kuita zvo uhure no mwana mudoko i cishaishi cikuru?

Kuita zvo uhure no mwana mudoko i kushaishira mwanewo, ungano, utongi na Mwari. Mu nyika jo kuti mutemo wokuti mundhu anoita zvo uhure no mwana mudoko anodikana kwenda kokeshahwi ku maporisiya, vakuru vanouzwira.—Murindiri wo 05/19, mapheji 9-10.

Tingaitisa kudini kuti ticinje kana kuitisa nani manera edu o kurangarira?

Zviro zvinosisira maningi zvatingaita nga izvi: Kuita mukumbiro kuna Jehovha, kurangarijisisa, kuzvizemena pacedu no kuziva kusana shamwari jedu.—Murindiri wo 06/19, pheji 11.

Tingajinasiririsa kudini wari kuitira kuzoteverehwa?

Tinodikana kuvangisa ushamwari hwedu na Jehovha, ngo kuita zviro zvakadari inga izvi: Kuva no cokwadi co kuti Jehovha anotida zve aazotisii tega, kuverenga Bhaibheri nguva jese no kuita mukumbiro; kuva no cokwadi co kuti makomborero anogondiswa ngo Umambo hwa Mwari anozokwanirisika; kudira mu musoro vhesi jatinodakariraya maningi no kudira mu musoro ndumbo jinokuja Jehovha no kujiimba.—Murindiri wo 07/19, mapheji 2-4.

Zvicinyi zvatingaita kuti tibesere ukama hwedu kuti uponeswe?

Zvinosisira maningi kukhombija usizi, kugaja muezaniso wakanaka no kuva vakanaka mwoyo.—Murindiri wo 08/19, mapheji 15-17.

Inga zvakagondiswa ndi Jesu pana Mateu 11:28, tinozorojeswa kudini?

Itisu tino vakuru vano rudo, shamwari jaushoni no basa rakanaka.—Murindiri wo 09/19, pheji 23.

Jehovha anotipekejesa kudini cido no simba ro kuda kuita ciri cese? (VaFilipi 2:13)

Patinoverenga Bhaibheri no kurangarijisisa, Mwari angatibesera ngo kutipa cido co kuita zvaanoda no simba ro kuita. Mujimu mucena unozotibesera kuti tiitise nani zvatinoita pa kushandira Jehovha.—Murindiri wo 10/19, pheji 21.

Zvicinyi zvatinodikana kuita ticito tatema civaringo cinosisira?

Tindodikana kuita zviro zvishanu izvi: Kunasa kupsakisisa, kukumbira uzivi, kuvona kuti ngenyi tinoda kuziita, kugaja zvatinoda kuita no kuvona zvatiri.—Murindiri wo 11/19, mapheji 27-29.

Sathana paakabhuya na Evha, iyena wakananga kuti mundhu ano ciro cicikafi here?

Kangaije andizvopi. Sathana aazivi kunanga kuti zvaizovoneka inga kuti Evha wafa. Wakananga kuti Evha aacaizofa. Apana ciyara cimwe haco comanyepo cakasara pa ndambi ya Nowa. Murangariro wokuti mundhu ano ciro cicikafi, kangaije wakabuda Jehovha acito aparaja vandhu vaivaka rusingo hwo Bhabheri.—Murindiri wo 12/19, pheji 15.