Zvinobhuiwa pana Deuteronòmio 22:25-27, azvisoteseswi pa ndava ino mwanarume wiya ngokuti iyena wainga waano ndava kare. Mutemo uri kunangwari apa, unovonesa kuti mwanakaji aana ndava. Vonanyi basi.

Mavhesi atavonaya, anobhuya ngo pamusoro po mwanarume anoita zvopabonde “muguta” no musikane waimisihwa mwanarume. Ngokuita kudaro, iyena ano ndava yo kuita upombo, ngokuti musikane waimisihwa mwanarume anovoniwa inga wakacadha. Waro musikanewo keni? Mavhesi awo, anovonesa kuti iyena aazivi kumima. Kudari iyena naakamima vamweni vaida kumubesera. Ngokutama kwake “kurija mbhere,” waingavo no ndava yo kuita upombo.—Deuteronòmio 22:23, 24.

Asi Mutemo wainanga ngo mugariro wakasiyana, po waiti: “Kaveta, kudari mundhu akavona mu bani musikane wakaimisihwa mwanarume, womujipa wovatana naye, anozourawa basi mwanarumewo. Auzoiti ciro ku musikane, ngokuti yena aana uxaixi hunofanera kuurawa. Bzokadi, ndava ii inoezana no ndava yo mundhu anoambira mudoni wake no kumuuraya. Yena wakamuvona mu bani, no musikane wakaimisihwa dangani wakarija mbhere, apana wakavia kuzomubesa.”—Deuteronòmio 22:25-27.

Pa mugariro uu, vatongi vaitenda zvainangwa ngo musikane. Munjira yapi? Zvinovoneka inga kuti iyena “wakarija mbhere, apana wakavia kuzomubesa.” Ngokudaro, iyena aana ndava yo kuita upombo. Asi mwanarume, wainga no ndava yo kuita upombo, ngokuti iyena ‘wakamujipa wovatana naye.’

Ngokudaro, pikija mutemo waisotesesa kutama ndava ko mwanakaji, zvanangwari mu mavhesi aya, ndizvona kamare, pakunanga kuti mwanarume uu anondava yo kujipa no kuita upombo. Zvokadi kamare, vatongi ‘vaizoamba ngo kubzibvunjisisa,’ kana kuzvipsakisisa. Ngokudaro, ivona vaizoguma pa mbhejiso yaushoni, inozwirana no ndhungamiro jakajeka jainga jakagajwa ndi Mwari.—Deuteronòmio 13:14; 17:4; Exodo 20:14.