Kangaije andizvopi. Sathana aazivi kunanga kuti zvaizovoneka inga kuti Evha wafa. Wakananga kuti Evha aacaizofa. Iyena aazivi kunanga kuti divi riri rese ricikavoneki ra Evha (rinodanijwari ngo vazinji nyamasi uno kuti i mwiha,) raizoenda kopona ku ndau imweni. Sathana paakavereketa ecishandisa nyoka, wakati kuna Evha: “Andibzopi, amuzofi.” Ngo magama aya, waida kunanga kuti, kudari Evha naakaha mucero wo muti wiya, waizoenderera mberi ecipona zve waizova no upenyu wakanakisisa, acikadi besero ra Mwari.—Genesi 2:17; 3:3-5.

Kudari jijiso yo kuti mundhu ano ciro cicikafi [inga zvinojijiswa nyamasi uno,] aizivi kuvha mu munda wo Edheni, waro yakazovhepi? Atina cokwadi, asi catinoziva ngo co kuti, kunamata ko kunyepa kwakapera pa Ndambi yo mu njiku ja Nowa. Apana ciri cese haco cakasara pa Ndambi iyi, nee murangariro wakaposeka wo ciyara co manyepo. Basi vanamati vo cokwadi ndivona vakapona, Nowa no mbhuri yake.

Ngokudaro, jijiso inowanikari nyamasi uno, kangaije yakavepo pakupera ko Ndambi yo mu njiku ja Nowa. Zvokadi kamare, Mwari paakaita kuti vandhu vabhuye ndumi jakasiyana-siyana zve ‘vaparajane pasi pese,’ zvingaita kuti vandhu vakaparajana no vano murangariro wondhowo, wo kuti mundhu ano ciro cicikafi. (Genesi 11:8, 9) Asi, azvinenyi hazvo kuti jijiso iyi yakatanga rini, tino cokwadi co kuti “baba wo unyepi,” Sathana Dhiabhu, ari kuita kuti jijiso iyi iwanike pasi pese.—Johani 8:44.