1. Zvicinyi zvinoitika patinonga takasuruvara?

ITUSU njiku jese tinosongana no zvineso. Asi zvinonesa maningi kucungirira zvineso patinonga takasuruvara.Tinodikana kuziva kuti kusuruvara kungatiita kuti tijizwe ticikasisiri, ticina mudakaro. Mazwi Akangwara 24:10, inoti: “Ukarembesesa pa njiku yo khombo, simba rako i doko.” Ngokudaro, patinonga takasuruvara tingajizwa takaremba zvokuti zvinozonesa maningi kucungirira zvineso zvedu.

2. Ngozvapi zvingatiita kuti tive takasuruvara zve ngozvapi zvatinozovona pa musoro uu?

² Zviro zvizinji zvingatisiya takasuruvara. Zvimweni zvingavoneka, zvakadari inga kutama kukwana, kutama kukwanisa kuita zvimweni no kuhwaja. Kuveni zvimweni azvivoneki, zvakadari inga kutama kuashira mabasa ataidakarira mu sangano ra Jehovha kana kucumaera mu ndima ino vandhu vacikadakariri kuzwa masoko o Umambo hwa Mwari. Pa musoro uu, tonozovona zviro zvinganani zvatingaita kuti tihwisane no kusuruvara.

3. Ngozvapi zvingatibesera kuti tive no mavonero ari pakati no pakati ngo pamusoro po kutama kukwana kwedu?

³ Ngokutama kwedu kukwana, zvakareruka kuva no mazwiro akashata ngo pamusoro pedu no kutama kwedu kukwanaisa kuita zvimweni. Ngokudaro, tingatorangari kuti Jehovha aangatotitenderi kuti tinghwine mu nyika imbza. Manera aya o kurangarira akashata maningi. Waro tinodikana kuvona kudini kuposa kwatinoita? Bhaibheri rinonanga kuti vandhu vese “vakaxaixa” ticikabataniji na Jesu Kristu. (VaRoma 3:23) Asi Jehovha aabatikani maningi ngo zviro zvatinoposa kana kuti aaveteri kuti tive vakakwana. Kusiyapo izviwari, ivona ndi Baba vano rudo vanoda kutibesera. Cimwenizve, ivona vanosengerera. Vanoziva kuti  tese tiri kushanda ngo simba kuti tiite zviro zvaushoni no kutama kuva no mazwiro acikabesi ngo pamusoro pedu. Ngokudaro, ivona vanoda kamare kutibesera.—VaRoma 7:18, 19.

4-5. 1 Johani 3:19, 20, yakabeseresa kudini hambzaji mbiri janangwari mu ndima kuti jihwisane no kusuruvara?

⁴ Vonanyi muezaniso wo hambzaji Dhebhora na hambzaji Mariya. * Hambzaji Dhebhora povainga vaciri mwana mudoko, avacaitajwa ushoni ngo ukama hwavo. Ivona avacaisimbwa maningi. Ngo kudaro, povainga vakura, vaijivona ngo njira yakashata. Povaiposa padoko, vaijivona inga apana cakanaka covaiita. Hambzaji Mariya, vaingavo no cineso cakafanana. Ukama hwavo, hwaivapseruja maningi. Izvo zvakavaita kuti vave no mazwiro acikabesi. Pikija pavakapera kubhabhatijwa, vakajivona kuti avacaifanera kuva Capupu ca Jehovha.

⁵ Asi hambzaji mbiri iji, ajizivi kusiya kushandira Jehovha. Ngenyi? Ngokuti ivona vaiita mukumbiro kuna Jehovha vacimuvhunja mazwiro avo. (Nduyo 55:23) Ivona vakaguma pakuziva kuti Baba vedu vano rudo vo mugore, vanoziva zviro zvese zvakashata zvakatiitikira kare no mazwiro atinao ngo pamusoro pazvo. Asi ivona, vanokwanisavo kuvona mugariro jakanaka jatinajo, jaticikakwanisi kuvona tega.—Verenganyi 1 Johani 3:19, 20.

6. Ngoapi angava mazwiro o mundhu kudari akaphindazve kuita zviro zvakashata zvaakaita kare?

⁶ Ariwese angaeja kushanda ngo simba kuti atamezve kuita ciro cakashata. Asi nguva jimweni, iyena kangaije angaitazve zviro zvondhozvo zvomuita kuti asuruvare. Ngo zvokadi kuti itusu atijizwi ushoni patinoshaisha. (2 VaKorinto 7:10) Asi atidikani kuguma pakujivona inga tatoshaisha maningi, totorangarira kudari: ‘Inini ndashaisha zokuti izanyi muvone. Jehovha angaitisa kudini kuti andiregerere?’ Izvi andizvopi. Cimwenizve, zvinotiita kuti tisiye kushandira Jehovha. Rangariranyi basi zvataverengaya pana Mazwi Akangwara 24:10, izvo zvaivonesa kuti simba redu raizova doko patinonga takasuruvara. Kusiyapo izvo, ‘bhuyanyi’ na Jehovha ngo kuita mukumbiro no kukumbira kuregerehwa ndiyena. (Isaia 1:18) Jehovha paanovona kuti imwimwi makhauyadi kamare zvokuti muri kutoeja kuita cinjo, iyena anozomuregerera. Mukuengejera, psakanyi besero ro vakuru. Ivona vanozomubesera kuti muvezve no ushamwari hwakanaka na Jehovha.—Jakobo 5:14, 15.

7. Ngenyi atidikani kusuruvara patinonesehwa kuita zvakanaka?

⁷ Mukuru umweni anogara Fransa anodanwa Jean-Luc, anovhunja vaya vanohwisana no mazwiro acikabesi kudari: “Mundhu wakarungama pamberi pa Jehovha, asipi wiya acikaposi,  asi nga wiya anokumbira kuregerehwa ngo zvaakaposa woita zvese zvaanokwanisa kuti acinje.” (VaRoma 7:21-25) Ngokudaro, mucarangarira kuti imwimwi amusisiri ngo ndava yo zviro zvomakaposa kareko. Zivanyi kuti apana hake angakwanisa kuva wakarungama pamberi pa Mwari. Tese tinoda unyasha ucikaezaniswi wa Mwari ecishandisa muripo.—VaEfeso 1:7; 1 Johani 4:10.

8. Ndiyani angativangisa patinonga takasuruvara?

⁸ Hama no hambzaji jo mu ungano jingativangisa! Ivona vangatipurukira patinoda kubhuya zviri zvese. Vangativhunjazve magama anovangisa. (Mazwi Akangwara 12:25; 1 VaTesalònika 5:14) Hambzaji Joy vanogara Nijheria vaihwisana no kusuruvara, vakananga kudari: “Ngokwapi kwandaizova ndicina hama no hambzaji? Vangiso yandinoashira icivha ku hama no hambzaji jangu, inovonesa kamare kuti Jehovha arikudavira mukumbiro jangu. Inini ndakajijira kwavari manera andingavangisavo hama jimweni jinonga jakasuruvara.” Ngatizive kuti hama no hambzaji jedu asipi nguva jese vanoziva kuti tinoda kuvangiswa. Ngokudaro, tinodikana kupsaka mukana wo kubhuya no hama yakaivha kumujimu, kuti itibesere pazvinodikana weya.

9. Nduyo 41:4; 94:19, inotivangisa kudini?

⁹ Psakanyi besero ra Jehovha. Patinonga ticikajizwi ushoni, maningi-ningi patinonga tino ciyayo, zvingatinesera maningi kurangarira zviro zvaushoni. Pikija Jehovha aaripi kutirapa wari ngo mushamaiso, iyena anotiembezera no kutipa simba ratinoda kuti tikwanise kucungirira. (Verenganyi Nduyo 41:4; 94:19.) Inga muezaniso, angashandisa hama no hambzaji kuti jiviye kotibesera kuita basa riri rese pa muzi pedu kana kutotibesa kutenga zviri zvese. Iyena angashandisazve hama jedu kuti jitiitire mukumbiro. Angatotibeserazve kuceuja zviro zvinovangisa zvotakaverenga mu Soko rake, zvakadari inga vetero inoshamaisa yo kuva no upenyu wakakwana ticikazwi kuhwaja kuri kwese mu nyika imbza iri kuviyari.—VaRoma 15:4.

10. Zvicinyi zvakaita hama Isang kuti vatame kugara vakasuruvara pakupera kuitika asidhenti?

¹⁰ Hama Isang vanogara Nijheria, vakaita asidhenti vooma divi rimwe. Medhiko wavo, wakavavhunja kuti avacaizofambazve. Hama Isang vakananga kudari: “Mwoyo wangu wakamuka kukhuvazika ndotopera simba.” Waro, kunangadi kuti ivona vakaperadi simba kamare? Haiwa. Waro zvicinyi zvakavabesera? Ivona vakananga kudari: “Inini no mukaji wangu, atizivi kusiya kuita mukumbiro kuna Jehovha no kujija Soko rake. Takadakara ngo zviro zvese zvotainga nazvo, kubatanijavo vetero yedu yo kuzopona mu nyika imbza.”

11. Hambzaji Sindi vakawanisa kudini mudakaro povainga vacihwaja?

¹¹ Hambzaji Sinde vanogara Meshiko, vakavhunjwa ndi medhiko wavo kuti vainga no ndhendha yaizoita kuti vafe. Waro zvicinyi zvovakaita kuti vakwanise kucungirira mugariro uwu? Povainga vaciraphwa, vakatema civaringo co kucumaera njiku jese. Ivona vakatara kudari: “Kuita zvondhozvo, kwakandiita kuti ndide kubesera vamweni, kuciripi kubatikana ngo peresau yondakaizwa no kuhwajihwa ko ndainga nako. Zvandaida kuita ngo zvokuti: Pondaibhuya no mamedhiko kana mafurumeri, ndaida kuvavhunjisa ngo pamusoro po mbhuri javo. Perapo ndaivhunjisa kuti ngenyi ivona vakakheta kuita basa iri rinonesa. Izvo zvaindibesera kuti ndivone zvaizokwanisa kubaya mwoyo wavo. Vamweni vavo vaitonanga kuti vazinji vanoviya koraphwa, avavhunjisivo kugara kwatakaita. Vazinji vaindibonga ngo matajiro andaivaita. Vamweni vakona vaitondipekeja numero javo jo foni. Ndaizviziva kuti Jehovha, waizondibesera kucungirira pa mugariro uu unonesa.  Asi ndakazoshamaisika maningi ngo mudakaro wakazondipa.”—Mazwi Akangwara 15:15.

12-13. Vaya vari kuhwaja vangakwanisa kudini kucumaera zve ngowapi unova muviyo wakona?

¹² Mundhu anohwaja angasuruvara ngokuti aakwanisi kuita zvizinji mu basa ro kucumaera. Vamweni vangatowana njira jo kucumaera. Hambzaji Laurel Nisbet vaigara Estadhus Unidhus, vakapeja 37 o makore vari mu mucini wo simbi unobesera kufema! Ivona vaingazve no kanseri, vakaitwa peresau jakawanda zve vainga no mapundu mu muviri. Asi zvineso zvese izvi azvizivi kuvaita kuti vatame kucumaera. Ivona vakacumaera mafurumeri no vaiviya kovavhakacira pamuzi pavo. Ngowapi wakava muviyo wakona? Ivona vakabesera vandhu vanokwana kuita gumi no vanomwe kuti vazive Jehovha! *

¹³ Mukuru umweni anogara Fransa anodanwa Richard, wakapa mazano anoshanda kuna vaya vacikakwanisi kubuda pamuzi ngo ndava yo kuhwaja. Ivona vakati: “Ndinovona kuti zvaizova zvaushoni kuva no mabhuku no marevhista pambhene kuti vandhu vakwanise kumavona. Izvi zvingavangisa hama no hambzaji jedu jinodiwa jicikakwanisi kwenda kocumaera muzi ngo muzi.” Vese vacikakwanisi kubuda pamuzi vangacumaeravo vacishandisa karata kana foni.

14. Ngowapi muezaniso unoshamaisa wakagajwa ndi Mambo Dhavhidhi?

¹⁴ Tino mathangwe akawanda maningi angaita kuti titame kuashira mabasa atinoda pa kushandira Jehovha. Inga muezaniso, zvingaita kuti taavasharuka kana taano zvineso zvo uhomi kana mugariro umwenivo hawo. Kudari tiri pa mugariro uu, tingajija zvizinji ngo muezaniso wa Mambo Dhavhidhi. Paakavhunjwa kuti aazivi kusanwa kuti avake themberi ya Mwari, zviro zvainga ecida maningi, iyena wakanasa kubesera wiya wakasanwa ndi Mwari kuti aite basa iri. Dhavhidhi wakapa zvese zvaainga nazvo kuti abesere basa iri. Iyena wakavhisa goridhi no sirivha. Uwu i muezaniso unoshamaisa maningi watinodikana kutevera.—2 Samueli 7:12, 13; 1 Kronike 29:1, 3-5.

15. Hama Hugues vakahwisana kudini no kusuruvara kovainga nako?

¹⁵ Hama Hugues vanogara Fransa, vakasiya kushanda inga mukuru ngo ndava yo zvineso zvo uhomi. Ivona vakatokonehwa kuita ciri cese haco pamuzi. Ivona vakatara kudari: “Pakutanga, ndaijizwa ndakasuruvara, ndicikasisiri, asi pakufamba ko nguva ndakazoguma pa kutendera mugariro wangu wo kutama kukwanisa kuita zvimweni, ndovazve no mudakaro pa kushandira Jehovha. Ndakatema civaringo co kutama kuremba inga ndi Gidhiyoni no 300 o  vanarume vaainga navo pikija vainga vakaremba. Ngokudaro, ndinozohwisana no zvineso zvangu.”—Vatongi 8:4.

16. Ngozvapi zvatingajija ngo muezaniso wo ngirozi?

¹⁶ Ngirozi jakagondeka i muezaniso wakanaka. Mambo Akabhi paainga ecitonga, Jehovha wakakumbira ngirozi kuti jinange mavonero ajo ngo macengejero aaizoita Mambo Akabhi. Ngirozi nganani jakananga mavonero ajo. Asi Jehovha, wakakheta ngirozi imwe, wonanga kuti mavonero ayo aizobudirira ushoni. (1 Majimambo 22:19-22) Zvecivoneka kuti ngirozi jimweni jakapavo mavonero ajo, kunanga kuti ijona jakaguma pa kurangarira kuti ‘ngenyi ndapeja nguva yangu?’ Itusu atina mathangwe okunanga kuti ijona jakarangarira kudaro. Ngirozi jinozvidodokesa maningi, cimwenizve jinopa rukujo Jehovha.—Vatongi 13:16-18; Apokalipsi 19:10.

17. Ngozvapi zvatingaita kudari tikasuruvara ngo kutama kuashira mabasa ataida mu sangano ra Jehovha?

¹⁷ Batisisanyi mukana watinawo wokuva Zvapupu zva Jehovha no kucumaera Umambo hwake. Mu sangano ra Jehovha tingaita ma basa mazinji asi asipi ondhoo anotiita kuti tive vanosisira pamberi pa Mwari. Kujidodokesa kunotiita kuti tidiwe ndi Jehovha no hama no hambzaji jedu. Ngokudaro, deketeranyi Jehovha kuti amubesere kuti murambe mucizvidodokesa. Rangariranyi ngo muezaniso jo vashandiri va Jehovha vanozvidodokesa vakatahwa mu Bhaibheri. Ngo mwoyo wese shandiranyi hama no hambzaji jenyu.—Nduyo 138:6; 1 Pedru 5:5.

18-19. Mungaitisa kudini kuti muwane mudakaro mumushando wenyu pikija mu ndharaundha mwenyumo vandhu avadakariri?

¹⁸ Munosuruvara kudari mundharaundha mwenyumo vandhu avadakariri masoko akanaka? Kana munoguma pamuzi mucikakhandi ari wese here? Pa mugariro wakadari, zvicinyi zvamunoita kuti murambe muno mudakaro? Pano njira jimweni jingatibesera, jinowanika pa bhokiso rinoti:  “Njira Jinoita Kuti Basa Renyu ro Kucumaera Ribudirire.” Zvinosisira maningi kuva no mavonero aushoni ngo pamusoro po mushando wedu. Waro izvi zvinobatanijenyi?

¹⁹ Batikananyi pa kutokotesa zina ra Mwari no Umambo hwake. Jesu wakanasa kujekesa kuti vashoma basi ngo vaizomutevera. (Mateu 7:13, 14) Patinonga ticicumaera, tinocidakajiso co kushanda pamwepo na Jehovha,  Jesu no ngirozi. (Mateu 28:19, 20; 1 VaKorinto 3:9; Apokalipsi 14:6, 7) Jehovha anokwevera vaya vanoda kumushandira. (Johani 6:44) Kudari vandhu vakatama kutipurukira pa mukuvo wondhoo, kangaije vanozotipurukira pa vhaza imweni yatinozobhuya naye.

20. Jeremia 20:8, 9, inotijijisenyi ngo pamusoro po kuhwisana no kusuruvara?

²⁰ Tingajija zvizinji kuvha ku muporofita Jeremiya. Iyena wakagajwa kuti ashande mu ndharaundha yainesa maningi. Vandhu vaimutuka no kumuitira jee “njiku jese.” (Verenganyi Jeremia 20:8, 9.) Pa mukuvo umweni, wakatosuruvara maningi voguma pa kuda kuregera kucumaera. Asi acizvona zvaakaita. Ngenyi? “Izwi ra Mwari” raiita inga muriro mukati mwa Jeremiya zvokuti aacaikwanisa kugara nazvo. Izvo zvingaitikavo kwatiri, kudari Soko ra Mwari rikava mu murangariro mwedu no mu mwoyo. Izvo ngazvinotiitisazve kuti tide kujija Bhaibheri njiku jese no kurirangarijisisa. Ngokudaro, mudakaro wedu unozoengejeka mu basa ro kucumaera zvokuti vandhu vazinji vanozoda kutipurukira.—Jeremia 15:16.

21. Tingaitisa kudini kuti tihwisane no kusuruvara azvinenyi no zviri kuitisaro?

²¹ Hambzaji Dhebhora vanangwaya pa kutanga vakananga kudari: “Kusuruvara ingatova njira inoshandiswa ndi Sathana.” Asi Jehovha Mwari, ano simba rakakura kupinda Sathana no zvaanoshandisaro. Ngokudaro, pamunonga makasuruvara azvinenyi thangwe ramuitisaro kudaro, deketeranyi kuti Jehovha amubesere. Iyena anozomubesera kuti mukwanise kuhwisana no kutama kukwana kwenyu no kutama kwenyu kukwanisa kuita zvimweni. Anozomubeserazve pamunonga mucihwaja. Anozomubesera kuti muve no mavonero ari pakati no pakati ngo pamusoro po mabasa amungaita mu sangano ra Jehovha. Angamubeserazve kuti muve no mavonero aushoni pa basa ro kucumaera. Ngokudaro, itanyi mukumbiro mecivhunja baba wenyu vano rudo zvese zvamuri kuzwa. Ngo besero ravo, mungakwanisa kuhwisana no kusuruvara.