1-2. Ngenyi zve kuitisa kudini Jehovha wakafunungura gwanja kuti tive divi ro mbhuri yake?

JEHOVHA wakatikoka kuti tiite divi ro mbhuri yo vanamati vake. Mbhuri yedu yakaumbhwa ngo vandhu vakadakara, vakajipira kuna Mwari zve vanotenda muripo wo Mwana wake. Tino upenyu unodakajisa wari uno zve tiri kuvetera kuva no upenyu ucikaperi kumbejiyo, kudenga kana mu Paradhiso pasi pano.

² Ecindundihwa ngo rudo, Jehovha wakaita ndhamburiko huruwane maningi kuti tiite divi ro mbhuri yake. (Johani 3:16) Itusu ‘takatengwa ngo mutengo mukuru.’ (1 VaKorinto 6:20) Ngo ndava yo muripo, Jehovha wakaita kuti tikwanise kuva no ushamwari wo phedo naye. Tino cidakajiso co kudanija Baba, mundhu anosisira maningi mudenga no pasi. Inga zvotakavona pa musoro waperari, Jehovha ndi Baba vakanakisisa kupinda vese.

3. Ngowapi muvhunjo watingajiita? (Vonanyi bhokiso rinoti: “ Kureva Kuti Jehovha Anonasa Kundiziva Here?”)

³ Kangaije tingatozviitavo muvhunjo wakafanana no wakaita mutari umweni wo Bhaibheri, paakati: “Ndinoripira kudini Tenji Mwari bzakanaka bzese bzaakandiitira?” (Nduyo 116:12) Zvokadi kamare, apana na umwe wedu angakwanisa kuripira Jehovha zvese zvaanotiitira. Asi, rudo hwake unotiita kuti timudevo. Mupostori Johani wakatara kudari: “Itusu ngatimude Mwari, ngokuti ndiyena wakatanga kutidisa.” (1 Johani 4:19) Waro, tingakhombijisa kudini kuti tinoda Baba wedu?

4. Mukuzwirana na Jakobo 4:8, ngenyi tinodikana kuvangisira kuti tive no ushamwari wo phedo na Jehovha?

⁴ Jehovha anoda kuti tive shamwari yake yo phedo zve anoda kuti tibhuye naye. (Verenganyi Jakobo 4:8.) Jehovha anoda kuti ‘tivangirire mukunamata’ zve yena mukuvo wese aripo kuti atipurukire. (VaRoma 12:12) Jehovha asipi mundhu wakabatikana maningi kana mundhu wakaremba kuti atame kuzwa mukumbiro jedu. Kuti tihwirijire kutajwa kwatinotwa ndi Jehovha, tinodikana kuzwira zvaanotivhunja. Tinoita zvondhozvo ngo kuverenga Bhaibheri, mabhuku o sangano pomwe no kunasa kuteya njeve pa musongano. Inga mabhuisano aushoni anobesera mwana kuti ave no ushamwari wo phedo na Baba wake, mabhuisano aushoni na Jehovha anoita kuti tive no ushamwari wo phedo naye.

5. Tingaitisa kudini nane mukumbiro jedu?

⁵ Amborangariranyi ushamwari hwenyu na Jehovha. Jehovha anotikoka kuti tiite mukumbiro kwaari zve tifunungure mwoyo wedu. (Nduyo 62:9) Zvaizova zvaushoni kujivhunjisa kudari: ‘Kureva kuti mukumbiro jangu jakadari inga masoko akaita kukhopwa odihwa paripese kana jakadari inga karata yakatahwa ngo nyara, inokhombija mazwiro angu kamare? Pacina kukana-kana, imwimwi munoda maningi Jehovha zve munoda kuva no ushamwari wakavanga naye. Kuti mudaro, munodikana kubhuya naye mukuvo wese. Jehovha ngaave shamwari yenyu yamunothemba. Muvhunjenyi mazwiro enyu. Ivanyi no cokwadi cokuti mungabesehwa ndi Jehovha.

6. Zvicinyi zvatinodikana kuita kuti tive no ushamwari wo phedo na Baba wedu vo mugore?

⁶ Kudari tinoda kuva shamwari jo phedo ja Baba wedu vo mugore, tinodikana kuva vandhu vanobongesera. Zvokadi kamare, tinotenderana no mutari wo nduyo, wakatara kudari: “Bzixamaisonyi bzo makaita, Tenji Mwari wangu! Mabasenyi o makatiitira! Apana wakaezana na imwimwi. Ndinoda kubzitokotesa, kuvereketa ndi ibzona; asi bzinopindirija kuverengwa kurikwese.” (Nduyo 40:6) Itusu tinoita zvizinji kupinda kuva no mazwiro okubongesera, tinokhombija kubongesera kwedu kuna Jehovha ngo zvese zvatinovereketa no kuita. Izvi zvinotiita kuti tive takasiyana no vandhu vazinji vo mu njiku jedu jino. Tiri kupona mu nyika yo kuti vandhu vazinji avabongeseri ngo zvavanoitihwa ndi Mwari. Kunasa kunanga, cimwe co citatijo co kuti tiri kupona mu “njiku jokupejisira” ngo co kuti vandhu avabongeseri. (2 Timoti 3:1, 2) Zvokadi kamare, atidi kuva vandhu vano mugariro wakadaro!

7. Jehovha anoda kuti tiitenyi zve ngenyi?

⁷ Akuna baba vanoda kuvona vana vavo vacitakana, asi ivona vanoda kuvavona vacitamba vese. Mukufananavo, Jehovha anoda kuti vana vake vese vazwane. Ngo iyo ndava, ciro cinotivonesa kuti tiri Makristu o cokwadi i rudo watinawo ku umwe no umweni. (Johani 13:35) Zvokadi kamare, tinotenderana no mutari wo nduyo, wakatara kudari: “Vonanyi kunaka no kudakajisa kwabzo kugara pamwepo inga hama no hama.” (Nduyo 133:1) Patinokhombija kuti tinoda hama no hambzaji jedu, tinokhombija kuti tinoda Jehovha. (1 Johani 4:20) Pacina kukana-kana, zvinodakajisa maningi kuita divi ro mbhuri yo hama no hambzaji ‘jakathiva mwoyo [zve] jinozwirana unyaxa.’—VaEfeso 4:32.

8. Mukuzwirana na 1 Johani 5:3, ngocapi cinotiitisa kuti tizwire Jehovha?

⁸ Jehovha anoda kuti vana vazwire vabari zve anoda kuti itusu timuzwirevo. (VaEfeso  6:1) Tinodikana kuzwira Jehovha ngokuti ndiyena Musiki wedu, anotipa zvatinoda zve iyena anoziva maningi kupinda baba ariwese. Asi cinoita kuti timuzwire i rudo hwatinahwo kwaari. (Verenganyi 1 Johani 5:3.) Pikija pano zviro zvizinji zvinotiita kuti tizwire Jehovha, iyena aativangiriji kuti timuzwire. Jehovha wakatipa rusujunuko wokukheta zvatinoda kuita. Kusiyapo kudakara ngo rudo wedu naye, iyena anodakarazve kudari itusu tikamuzwira.

9-10. Ngenyi zvinosisira maningi kuziva ndhungamiro no kujiteveja?

⁹ Vabari vanoda kuti vana vavo vave vakajiviririka. Ndizvona zvinovaitisa kuti vagaje mutemo pa muzi kuitira kugara ushoni ko vana vavo. Kudari vana vakazwira mutemo yese, ivona vanokhombija kuti vanothemba vabari no kuvareremeja. Ngo kudaro, kuziva no kuzwira mutemo ja Baba wedu vo kudenga, kunosisira maningi. Kudari tikazwira, tinokhombija kuti tinovada no kuvareremeja zve tinobesereka pacedu. (Isaia 48:17, 18) Ngo divi rimweni, vaya vanoramba no kutama kuzwira ndhungamiro ja Jehovha vanokotora muviyo jakashata.—VaGalàsia 6:7, 8.

¹⁰ Patinopona mu njira inodakajisa Jehovha, kunojivirira zvinotikhuvaza kuunyama, mu mazwiro no kudivi ro umwari. Jehovha anoziva zvinosisira kwatiri. Hambzaji Aurora, vanogara ku Estadhus Unidhu vakananga kudari: “Ndinozviziva kuti kuzwira Jehovha nguva jese kunomuviyo wakanaka mu upenyu.” Izvi ndizvona kamare. Munokwanisa  kurangarira manera makabesehwa ngo kuzwira mutemo ja Jehovha?

11. Mukumbiro unotibeseresa kudini?

¹¹ Mukumbiro unotibesera kuti tizwire pikija zvecinesaweya. Nguva jimweni, ngo ndava yo kutama kukwana, zvinonesa kuzwira Jehovha. Asi tinodikana kuita zvese zvatinokwanisa kuti titame kushaisha. Mutari wo nduyo wakakumbira kudari: “Ndizwisisenyi no kungwarira mupango yenyu, kuti ndiiteveje ngo mwoyo wese.” (Nduyo 119:34) Hambzaji Denise vanoshanda inga piyona wo nguva jese, vakananga kudari: “Pandinovona zvecindinesa kuteveja imwe yo ndhungamiro ja Jehovha, ndinokumbira simba Jehovha kuti ndiite zvakanaka.” Ivanyi no cokwadi cokuti Jehovha nguva jese anodavira mukhaindi uu wo mukumbiro.—Luka 11:9-13.

12. Mukuzwirana na VaEfeso 5:1, tinodikana kuitenyi?

¹² Verenganyi VaEfeso 5:1. Zvecivoneka kuti tiri ‘vana vanodiwa’ va Jehovha, tinovangisira maningi kuti timutevejere. Tinotevejera Jehovha patinova vandhu vano rudo, vano unyasha zve vanoregerera patinonga tino vamweni. Kudari vamweni vacikazivi Jehovha vakavona mugariro jedu jaushoni, ivona kangaije vangadavo kujija ngo zva Jehovha. (1 Pedru 2:12) Kutevejera mugariro ja Jehovha zvinosisira maningi ku vabari vo Cikristu nyamasi uno. Kudari vabari vakataja vana ngo matajihwe atinoizwa ndi Jehovha, vana vangada kuva shamwari ya Baba wedu vano rudo.

13. Zvicinyi zvingatibesera kuti tive no cicunge?

 ¹³ Mwana anodakarira maningi babake, anobhuya ndivona mukuvo wese ku vamweni. Itusuvo tinozvikuja ndi baba wedu, Jehovha, zve tinoda kuti vandhu vazinji vamuzive. Tese tinojizwa inga Mambo Dhavhidhi, uwo wakatara kudari: “Ndinojikuja mwa Tenji Mwari.” (Nduyo 34:2) Waro, kudari muno nyowa keni? Mungavisa kudini no cicunge kuti mubhuye ngo zva Jehovha? Amborangariranyi mudakaro unova na Jehovha patinobhuya ngo zvake. Ceujanyi kuti kuziva Jehovha kungabeseresa kudini vandhu vamweni kuti vave no upenyu waushoni. Zve zivanyi kuti kudari Jehovha wakabesera hama jedu mu nguva jo Bhaibheri, iyena angatibeseravo.—1 VaTesalònika 2:2.

14. Ngenyi basa ro kucumaera rinosisira maningi?

¹⁴ Jehovha aakheti mundhu. Ngo iyo ndava, anodakara maningi patinotaja vamweni ngo rudo, ticina mukheto. (Maitiro o Vapostori 10:34, 35) Njira imweni inosisira maningi yo kukhombija rudo ku vamweni ngo yo kuvacumaera. (Mateu 28:19, 20) Iri, ibasa rinosisira maningi, ngokuti vese vanoashira masoko akanaka vanova no upenyu waushoni nyamasi no upenyu ucikaperi kumbejiyo.—1 Timoti 4:16.

15-16. Mathangwe api atinao anotiita kuti tidakare?

¹⁵ Jehovha ndi baba vano rudo zve vanoda kuti mbhuri yavo ive yakadakara. (Isaia 65:14) Ngozvokadi kuti tingasongana no zvineso, asi wari tino mathangwe anotiita kuti tirambe takadakara. Inga muezaniso, tino cokwadi cokuti baba wedu vanotida maningi. Tino zivo yakakwana yo Soko ra Mwari, Bhaibheri. (Jeremia 15:16) Zve tinoita divi ro mbhuri inosisira maningi, yakaumbwa ngo vandhu vanoda Jehovha, vanoda mupango yake zve vanodisana ngocavo.—Nduyo 106:4, 5.

¹⁶ Kusiapo zvondhozvo, tingaramba takadakara ngokuti tinoziva kuti kumbejiyo upenyu unozova waushoni maningi. Mbai-mbai pano, Jehovha anozopeja ushati hwese zve anozoshandisa Umambo hwake kuti acinje nyika, kuti ive Paradhiso. Tinovetero inoshamaisa yo kuzoashira vese vaya vakafa. (Johani 5:28, 29) Uwu unozova mukuvo unodakajisa! Cinosisira maningi ngocokuti, mbai-mbai pano, vese kudenga no pasi vanozopa Baba wedu vano rudo rukujo, kusimbwa no kunamatwa kwavanofanera.