1-2. (a) Ngenyi Jesu wakatinasiririra njira yakareruka yo kuceukija kufa kwake? (b) Mugariro japi ja Jesu jaticazovona?

MUNGASANANGURA zvinoitwa pa Cirangarijo co gore ngo gore co kufa ka Kristu here? Zvokadi kamare, uzinji hwedu tinoceukija zvinoitika pa Majisa o Cirariro ca Tenji. Ngenyi? Ngokuti cirariro cinoitwa mu njira yakareruka maningi. Asi, iciitiko cino revo huru. Ngokudaro, tingazvibvunjisa kudari: ‘Ngenyi cirariro cinoitwa mu njira yakareruka?’

² Pa mushando wake pasi pano, Jesu waizivika ngo kujijisa zvokadi zvinosisira mu njira yakareruka, yakajeka no icikanesi kuzwisisa. (Mateu 7:28, 29) Mu njira yakafanana, iyena wakatinasirira njira yakareruka yo kuceukija * kufa kwake. Ngatibhuisane ngo pamusoro po Cirangarijo no zviro zvinganani zvakanangwa no kuitwa ndi Jesu. Tinozozwisisa kuti kuitisa kudini Jesu waijidodokesa, wainga no cicunge zve no rudo, perapo tinozojijira kuti tingamutevejeresa kudini.

3. Inga zvinonangwa pana Mateu 26:26-28, Shanduro yeNyika Itsva, Jesu wakaitisa kudini kuti areruse ciitiko ici cinosisira zve pau no vhinyu zvinoimirirenyi?

³ Jesu wainga no 11 ro vapostori vake vakagondeka, paakagaja Cirangarijo co kufa kwake. Iyena wakatora zvainga zvasara pa cirariro co Phasika zve wakagaja kuceukija uku kwakareruka. (Verenganyi Mateu 26:26-28, Shanduro yeNyika  Itsva.) Iyena wakashandisa basi, pau icina mbijo no vhinyu yaingaro pondhopo. Jesu wakabvunja vapostori vake kuti pau yaiimirira muviri wake wakakwana zve vhinyu yaimirira ngazi, yaaizopira ngo ndava yavo. Vapostori avazivi kukahamara ngo ndava yo kureruswa ko ciitiko ici cinosisira. Ngenyi avazivi kukahamara?

4. Kuitisa kudini ngwajo yakapuwa Marita ndi Jesu inotibesera kuzwisisa kuti ngenyi Jesu wakarerukisa Cirangarijo?

⁴ Vonanyi basi zvakaitika pa mweji jokutanga pa makore matatu o mushando wa Jesu, paakabvakacira shamwari jake jo phedo Razaro, Marita na Maria. Povaibungaija, Jesu wakatanga kujijisa. Marita waingepovo, asi iyena waibatikana maningi ngo kunasirira zvokuha zvizinji kuitira mukokwi wake, Jesu. Paakavona izvi, Jesu ngo kunaka mwoyo kwese wakapangira Marita, wakamubesera kuvona kuti zvaainasiriraro azvicaisisira maningi. (Luka 10:40-42) Pakufamba ko nguva, acito wapira upenyu hwake, Jesu wakashandisa pacake mbhangiro iyi. Iyena wakagaja Cirangarijo mu njira yakareruka. Izvi zvinotijijisenyi ngo pamusoro pa Jesu?

5. Manera anoitwa Cirangarijo anokhombijenyi ngo pamusoro pa Jesu zve zvinozwirana kudini no VaFilipi 2:5-8?

⁵ Pa zvese zvaainanga no kuita Jesu waijidodokesa. Azvikahamaji kuvona kujidodokesa kwaakaita pa usiku hwo kupejisira hwo upenyu hwake pa nyika. (Mateu 11:29) Iyena waizviziva kuti waidikana kupa upenyu hwake kuitira vandhu no kuzomuswa ndi Jehovha kuti azove mambo mugore. Pikija eciziva izvo, iyena aazivi kujidakajisa ngo kuita kuti ciitiko ico cive cinonesa. Kusiyapo izvo, iyena wakabvunja vajiji vake kuti kamwe pa gore vaidikana kumucereceja ngo kuita cirariro cakareruka. (Johani 13:15; 1 VaKorinto 11:23-25) Cirariro caakaita Jesu mu njira yakareruka, cakakhombija kuti iyena aacainga mundhu anozvikuja. Tingadakara ngokuti kujidodokesa ndi rimwe vara rakanakisisa ra Mambo wedu wo mugore.—Verenganyi VaFilipi 2:5-8, Shanduro yeNyika Itsva.

6. Tingatevejeresa kudini kujidodokesa ka Jesu patinosongana no zvineso?

⁶ Tingatevejeresa kudini kujidodokesa ka Jesu? Ngo kudira zvido zvo vamweni pakutanga. (VaFilipi 2:3, 4)  Rangariranyi ngo usiku wo kupejisira wo upenyu wa Jesu pasi pano. Jesu waizviziva kuti tevere waizofa mu njira inosuruvarisa; zvicito zvaitika, iyena waineseka ngo pamusoro po vapostori vake vakagondeka, avo vaizosuruvara ndiyena. Ngokudaro iyena wakapeja usiku ecivajijisa no kuvavangisa. (Johani 14:25-31) Jesu ngo kujidodokesa kwese hwakakhombija kuneseka ngo kugarisika ko vamweni kupinda kwake. Wakatigajira muezaniso wakanaka maningi!

7. Jesu wakakhombijisa kudini cicunge paakapera kugaja Majisa o Cirariro ca Tenji?

⁷ Jesu naapera kugaja Majisa o Cirariro ca Tenji, wakakhombija cicunge cikuru maningi. Kuitisa kudini? Jesu wakatenda kuita kuda ka Baba wake, pikija eciziva kuti kuita zvondhozvo zvaizoreva kuva no rufu unonyoweja, inga mushaishi. (Mateu 26:65, 66; Luka 22:41, 42) Jesu wakaramba akagondeka kwakaperera, ngokudaro waizokuja zina ra Jehovha, kubesera ukuru-kuru hwa Mwari no kuita kuti vandhu vakakhauya vakwanise kupona no kucingaperi. Pa nguva yondhoyo, Jesu wakanasirira vateveri vake ngo pamusoro po zvineso zvavaizosongana nazvo.

8. (a) Jesu wakabvunjenyi vapostori vake vakagondeka? (b) Pa makore mazinji akazotevera, vajiji va Jesu vakatevejeresa kudini muezaniso wake wo kucunga?

⁸ Jesu wakakhombijazve cicunge ngo kutama kuneseka ngo ciri cese haco zve wakabatikana maningi ngo zvinodiwa zvo vapostori vake vakagondeka. Cirariro cakareruka, caakagaja pasure po kujinga Judha, caizoceukija vese vaizova vateveri vake vakazojwa, muviyo wo ngazi ya Jesu, yaakakovana no vaaizotonga navo. (1 VaKorinto 10:16, 17) Kuitira kuvabesera kuti varambe vakabatisisa kudanijwa kwavo ko kwenda mugore, Jesu  wakabvunja vateveri vake zvicinyi zvaivetera iyena na Baba wake kwavari. (Johani 15:12-15) Jesu wakabvunjazve vapostori vake ngo pamusoro po zvineso zvavaizosongana nazvo. Perapo, ecinanga ngo muezaniso wake kamare, iyena wakavavangisa kuti ‘vacunge.’ (Johani 16:1-4a, 33, Baiberi Mazwi Akacena aMwari) Pa makore mazinji akazotevera, vajiji va Jesu vakatevera muezaniso wake wo kujiramba no kukhombija cicunge. Pikija no kutambujika, ivona vakabesana mu zvineso zvakasiyana-siyana.—Vaheberi 10:33, 34.

9. Tingatevejeresa kudini Jesu pa kukhombija cicunge?

⁹ Mukuezanavo, nyamasi uno tinotevejera muezaniso wa Jesu pa kukhombija cicunge. Inga muezaniso, zvinoda kucunga kuti tibesere hama jedu jiri kuteverehwa ngo ndava yo rutendo hwavo. Nguva jimweni, hama jedu jingasungwa jicina ndava. Pazvinoitika, tinodikana kuita zvese zvatingakwanisa kuti tijibesere, kubatanijavo kujiinikira. (VaFilipi 1:14; Vaheberi 13:19) Njira imweni yo kukhombija kuti tino cicunge ngo yo kuramba tecicumaera ‘takacunga.’ (Maitiro o Vapostori 14:3, BMAA) Inga ndi Jesu, takasunga kuramba tecicumaera masoko o Umambo pikija vandhu pavanotiphikiza no kutiteverera. Nguva jimweni, kangaije tingajivona ticina cicunge. Tinodikana kuitenyi?

10. Pa sumana jo Cirangarijo, tinodikana kuitenyi zve ngenyi?

¹⁰ Tingavangisa kucunga kwedu ngo kurangarira ngo pamusoro po zvatiri kuimira ngo ndava yo muripo wakaitwa ndi Jesu Kristu. (Johani 3:16; VaEfeso 1:7) Pa sumana jo Cirangarijo, tino mukana wo kuengejera kubongesera kwedu ngo muripo wa Jesu. Pa njiku jondhojo, rambanyi meciverenga vhesi jo Bhaibheri kuitira Cirangarijo no kunasa kurangarijisisa ngo pamusoro po kufa kwa  Jesu. Patinoungana pa Majisa o Cirariro ca Tenji, tinozonasa kuzwisisa kuti pau no vhinyu zvinorevenyi no kuziva kuti muripo uwo unoimirirenyi. Patinobongesera ngo zvakaita Jehovha na Jesu no kuzwisisa kuti zvinobesera itusu no vadiwa vedu, kuimira kwedu kunozovanga zve kunozotiita kuti ticungirire mbhera kumagumo.—Vaheberi 12:3.

11-12. Mbhera wari tajijenyi ngo pamusoro po Majisa o Cirariro ca Tenji?

¹¹ Mbhera wari tajija kuti Majisa o Cirariro ca Tenji anoticeukija haiwa basi kusisira ko muripo asi, anoticeukijazve mugariro jakanakisisa ja Jesu, jo kujidodokesa no kucunga. Tinodakara maningi ngokuti Jesu ari kuramba ecikhombija mugariro iji inga Mupiri Mukuru wedu wo mugore, uwo anotibesera! (Vaheberi 7:24, 25) Kuitira kukhombija kubongesera kwedu kunobva pasi po mwoyo, tinodikana kuceukija kufa ka Jesu no kugondeka kwese inga zvaakananga. (Luka 22:19, 20) Tinoita izvo mu dhiya inozwirana no dhiya 14 ya Nisani, dhiya inosisira maningi pa gore.

¹² Kureruswa ko Majisa o Cirariro ca Tenji kunotijijisa vara rimweni rakaita kuti Jesu atifire. Paainga pasi pano inga mundhu, iyena waizivika ngo mugariro wondhowo. Ngorapi?

13. Johani 15:9; na 1 Johani 4:8-10, inosanangurisa kudini rudo unokhombijwa ndi Jehovha na Jesu zve ndiani anobesereka ndiwona?

¹³ Jesu wakanasa kukhombija rudo wakakura wa Jehovha pa zvese zvaaita. (Verenganyi Johani 15:9; 1 Johani 4:8-10.) Pamusoro po zvese, Jesu waindundihwa ngo rudo unobva pasi po mwoyo kuti apire upenyu hwake kuitira itusu. Azvinenyi dangani tiri vo kuzojwa kana vo ‘mabvuta amweni,’ tinobesereka ngo rudo wakakhombijwa ndi Jehovha no wo Mwana wake, ngo kuita muripo. (Johani 10:16; 1 Johani 2:2) Rangariranyi basi ngo pamusoro po zvinoshandiswa pa Cirangarijo, zvondhozvo zvinokhombija rudo hwa Jehovha no kutaja kwaanoita vajiji vake. Kuitisa kudini?

14. Jesu wakakhombijisa kudini rudo ku vajiji vake?

¹⁴ Jesu wakakhombijazve rudo ku vateveri vake vokuzojwa ngo mujimu, ngo kugaja kwake cirariro mu njira yakareruka kuti ivona vazvivone. Pa kufamba ko nguva, vajiji avo vokuzojwa vaidikana kuita Cirangarijo gore ngo gore, azvinenyi mugariro wavo, kubatanijavo na vaya vainga vari mu kadheya. (Apokalipsi 2:10) Vakakwanisa kuzwira Jesu here? Hina vakakwanisa!

15-16. Vamweni vakaitisa kudini kuti vaceukije Majiisa o Cirariro ca Tenji pikija pavainga pa mugariro unonesa?

¹⁵ Tikavona mu nguva jedu jino, maKristu okadi-kadi ari kuvangisira kuti aceukije kufa ka Jesu. Iwona anotevejera zvese zvakagajwa kuti aite Majisa o Cirariro ca Tenji mbhera pavanokwanisa, pikija nguva jimweni ari pa mugariro jinonesa maningi. Vonanyi basi muezaniso uwu. Hama Harold King pavainga mu kadheya yavoga ku Shina, ivona vakaita zvese zvavaikwanisa kuti vaite Cirangarijo. Vacikazivi kuvoneka ngo ari wese, vakanasirira kuti vaite Cirangarijo, vecishandisa zviro zvovainga nazvo. Ivona vakanasa kurangarira, kuti vazive dhiya yo Cirangarijo. Poyakaguma dhiya yo cirangarijo, ivona vakaimba, voita mukumbiro zve voita hurukuru yakacijikira mu Bhaibheri.

¹⁶ Muezaniso umweni nga uwu. Cimwe cikwata co hambzaji jainga mu kadheya ku ndau yaidihwa vasungwi pa hondo yocipiri yo nyika, vakadira pa ngozi upenyu hwavo kuti vaceukije Majiisa o Cirariro ca Tenji. Asi, ngokuti zviro zvinoshandiswa pa Cirangarijo zvakareruka, ijona jakakwanisa kuita  Cirangarijo jicikavoneki ngo ari wese. Ijona jakananga kudari: “Takaima pondhopo takatendenejana, pakati painga no cimeza cakadihwa pano yo kucena, pondhopo takadira pau no vhinyu. Vhera yotakabhwakija yakabvenekera ndau yese, inga magezi, yaitibesera kuvona zvotainga teciita. . . . Tese takakhombija ngo mbhiko yo takaita kuna Baba wedu kuti taizoshandisa simba redu rese kuti ticenese zina ravo rakacena.” Wakavadi rutendo unokahamarisa! Jesu wakakhombija rudo paakaita kuti tikwanise kuita Cirangarijo pikija patinonga pa mugariro unonesa.

17. Ngojapi mubvunjo jatinodikana kuzviita?

¹⁷ Cirangarijo pacinonga cecikwedera, taizoita zvakanaka kujibvunjisa kudari: ‘Ndingatevejeresa kudini Jesu ngo phedo pa kukhombijira rudo? Kureva kuti ndinorangarira zvinodiwa zvangu basi kupinda zvo vatendi doni vangu here? Ndinovetera kuti hama no hambzaji jangu jiite zvizinji kupinda zvavanokwanisa kuita here?’ Nguva jese tinodikana kutevejera Jesu no kukhombija kuva ‘no murangariro wondhowo.’—1 Pedru 3:8.

18-19. (a) Tingava no cokwadi cenyi? (b) Masunga kuitenyi?

¹⁸ Dikano yo kuita Cirangarijo co kufa ka Kristu aizogari kwenda no kwenda. Jesu ‘paanoviya’ pakati po dambujiko guru, iyena anozoviya kotora “vakasanwa vake” kuti vaende mugore zve Cirangarijo acizoithwizve.—1 VaKorinto 11:26; Mateu 24:31.

¹⁹ Pikija Cirangarijo acizoithwi kwenda no kwenda, tingava no cokwadi co kuti vashandiri va Jehovha vanozoramba vaciceukija cirariro ici inga citatijo co kujidodokesa, kucunga no rudo hwakakhombijwa ndi Jesu. Pa nguva yondhoyo, vaya vanoita cirangarijo avazothyi kubvunja vaya vanonga vacipona pa nguva yondhoyo ngo pamusoro po cirangarijo. Asi kuti tibesereke kubvira wari, tinodikana kusunga kutevejera kujidodokesa ka Jesu, kucunga no rudo hwake. Kudari tikaita zvondhozvo, tingava no cokwadi co kuti tinozoashira mupfupo wedu unobva ka Jehovha.—2 Pedru 1:10, 11.