1-2. (a) Jehovha anovona kudini mamirioni o vandhu paanoungana kuitira kuceukija Majiisa o Cirariro ca Tenji? (Vonanyi pikica yo kutanga.) (b) Zvicinyi zvatinozobhuisana pa musoro uno?

RANGARIRANYI basi Jehovha paanovona mamirioni o vandhu kutenderera nyika yese akaungana kuti aceukije Majiisa o Cirariro ca Tenji. Iyena aavoni basi kuwanda ko vandhu, asi anovona kuvangisira ko umwe nga umwe wavo. Inga muezaniso, iyena anovona vese vanovangisira kuti vave pa Cirangarijo makore ese. Pakati pavo, pangawanika vaya vanoviya ku cirangarijo pikija veciteverehwa. Vamweni avaendi ku musongano nguva jese, asi vanovona Cirangarijo inga ciro cinosisira maningi cavanodikana kuita. Jehovha anovonavo vaya vanoviya ku Cirangarijo pa bvaza yo kutanga, kangaije ngo kukwevejehwa ngo cidaka-daka co kuda kuziva musongano uwu.

² Zvokadi kamare, Jehovha anodakajihwa ngo kuvona vazinji vacienda ku Cirangarijo. (Luka 22:19) Asi, Jehovha aasotesesi maningi mutengo wo vandhu vanoenda ku Cirangarijo. Iyena anosotesesa maningi cinovaitisa kuti vaende ku Cirangarijo. Pamusoro uno, tinozobhuisana ngo pamusoro po mubvunjo unosisira maningi wokuti: Kusiyapo kwenda ku Cirangarijo, ngenyi tinoendazve ku musongano jinoitwa sumana ngo sumana?

3-4. (a) Ngenyi tinoenda ku musongano? (b) Ngowapi umwe wo mugariro unotiita kuti tiende ku musongano? (c) Inga zvotavona pana 1 VaKorinto 11:23-26, ngenyi atidikani kurobva kwenda ku Cirangarijo?

³ Tinodira pa ndau yokutanga musongano jedu, ngo kuti ndi divi ro kunamata kwedu. Cimwenizve, tinoenda ku musongano  ngokuti tinojijiswa ndi Jehovha. Vandhu vanojikuja, vanoramba murangariro wo kuti vanodikana kujijiswa ciri cese. (3 Johani 1:9) Ngo kusiyana, tino cido co kujijiswa ndi Jehovha no sangano raanoshandisa.—Isaia 30:20; Johani 6:45.

⁴ Kwenda kwedu ku musongano kunotatija kuti tinojidodokesa, takanasiririka zve tinoda kujijiswa. Pa usiku wo Cirangarijo co kufa ka Jesu, itusu tinoenda pa ciitiko ici cinosisira ngokuti tinoda kuzwira Jesu ngo kujidodokesa kwese no mupango wake wokuti: ‘Itanyi ibzi mucindiceukijira.’ (Verenganyi 1 VaKorinto 11:23-26.) Musongano uu unovangisa zvatiri kuimira kumbeji no kuticeukija manera atinotajwa ndi Jehovha. Pikija zvakadaro, Jehovha anoziva kuti tinoda kuvangiswa no kuva takagondeka makore ese. Ngo kudaro, anotinasirira musongano sumana ngo sumana zve anotivangisa kuti tiende. Kujidodokesa kunotiita kuti timuzwire. Isusu tinopeja nguva nganani pa sumana tecinasirira kuitira kupinda ku musongano jese.

5. Ngenyi vandhu vanojidodokesa, vanotenda kukokwa ndi Jehovha?

⁵ Gore ngo gore, uzinji wo vandhu vanojidodokesa, vanotendera kukokwa ndi Jehovha kuti vajijiswe ndiyena. (Isaia 50:4) Ivona vanodakara pavanoenda ku Cirangarijo zve vanototanga kwenda ku musongano jinoitwa pa sumana. (Zakaria 8:20-23) Tese tiri wari mu cokwadi tino cidakajiso co kujijiswa no kurungamiswa ndi Jehovha, “mubeseri [wedu] no ruponeso [hwedu].” (Nduyo 40:17) Ngocapi caizova cidakajiso cikuru kana kuti cinosisira maningi, kupinda kukokwa kuti tijijiswe ndi Jehovha na Jesu?—Mateu 17:5; 18:20; 28:20.

6. Kuitisa kudini kujidodokesa kwakabesera mwanarume umweni kuti aende ku Cirangarijo?

⁶ Gore ngo gore, tinoita zvese zvatinokwanisa kuti tikoke vandhu vazinji kuti vaviye ku Cirangarijo co kufa ka Jesu. Vandhu vazinji vanojidodokesa, vakabesereka ngo kutendera kukokwa. Inga muezaniso, Pa makore akakhirira, umwe mwanarume wakaashira mukoka wo Cirangarijo, asi wakabvunja hama yakamukokaro kuti aacaizokwanisa kwenda. Pikija zvakadaro, pa usiku wo Cirangarijo, hama iya yakakahamara ngo kuvona mwanarume wondhowo kamare ari kunghwina mu Nyumba yo Umambo. Mwanarume wiya wakakahamara maningi ngo manera aakashihwa zvokuti wakatotanga kwenda ku musongano jinoitwa pa sumana. Ngokudaro iyena wakaruza musongano mutatu basi pa gore rakatevera. Waro, zvicinyi zvakamubesa kuti ave no mavonero akanaka? Wainga wakapfava zvokuti wakatocinja murangariro wainga nawo. Hama yakamukokaya yakazoguma pa kunanga kudari: “Uu, mwanarume anojidodokesa kamare.” Pacina kukana-kana, Jehovha wakakwevera mwanarume uu kuti amunamate, wari ndi imwe yo hama jedu.—2 Samueli 22:28; Johani 6:44.

7. Kuitisa kudini zvatinojija ku musongano no zvatinoverenga mu Bhaibheri zvinotibesera kuti tive vanojidodokesa?

⁷ Zvatinojija ku musongano no zvatinoverenga mu Bhaibheri zvingatibesera kuti tive vanojidodokesa. Pa sumana nganani Cirangarijo cicito catanga, musongano wedu kazinji unocijikira pa muezaniso wa Jesu no kujidodokesa kwaakaita ngo kupira upenyu hwake inga muripo. Cirangarijo pacinonga cicikwedera, tinovangisira kuverenga Bhaibheri ngo pamusoro po zviitiko zvaitendeneja rufu hwa Jesu no kumuswa kwake. Zvatinojija ku musongano no zvatinoverenga mu Bhaibheri zvinojikisa kubonga kwedu cipiriso cakaitwa ndi Jesu kuitira itusu. Tinondundihwa kuti titevejere kujidodokesa ka Jesu no kuita zvinoda Jehovha, pikija patinosongana no zvineso.—Luka 22:41, 42.

8. Jesu wakakhombijisa kudini cicunge?

⁸ Tingaejazve kutevejera Jesu ngo kukhombija cicunge. Rangariranyi ngo makhombijire aakaita cicunge acito afa. Jesu waizviziva kuti tevere, vavengi vake vaizomushora, kumupsaputa no kumukohomera. (Mateu 20:17-19) Pikija zvakadaro, waizosongana no rufu. Nowaguma mukuvo, wakabvunja vapostori vake vakagondeka vaainga navo ku Getsemani kuti: ‘Mukanyi, ngatende. Vonanyi! Waaphedo wiya anondipira.’ (Mateu 26:36, 46, Shanduro yeNyika Itvsa) Nowaguma mutungwa wo vandhu komubata, wakajietha, wobvunja masoca kuti aregere vapostori vake vapinde. (Johani 18:3-8) Cicunge cakadini cakakhombijwa ndi Jesu! Nyamasi uno, maKristu okuzojwa no mabvuta amweni, vari kueja kutevejera Jesu ngo kutatija cicunge. Kuitisa kudini?

9. (a) Ngenyi tinodikana kuva no cicunge kuti tiende ku musongano nguva jese? (b) Kuitisa kudini muezaniso wedu, unopsasa hama jedu jakafungihwa ngo ndava yo rutendo hwavo?

⁹ Kuti tiende ku musongano nguva jese, tinodikana kuva no cicunge pa mugariro unonesa. Hama no Hambzaji jimweni, jinoenda ku musongano pikija jecihwisana no kusuruvara, kuvora mwoyo no zvineso zvo uhomi. Vamweni no cicunge cese vanoenda ku musongano pikija vaciteverehwa ngo mbhuri kana ngo utongi. Rangariranyi basi kuti muezaniso wedu ungapsasisa kudini hama jedu jiri mu kadheya ngo ndava yo rutendo hwavo. (Vaheberi 13:3) Pavanozwa kuti tiri kwenderera mberi tecishandira Jehovha pikija patinosongana no zvineso, zvinovavangisa, zvovaita kuti vaengejere rutendo, cicunge no kugondeka. Mupostori Pauro, wakasongana no mugariro wakafanana. Paainga ari mu kadheya ku Roma, iyena wakadakara paakazwa kuti hama jake jiri kushandira Mwari jakagondeka. (VaFilipi 1:3-5, 12-14) Naapera kusujunuhwa, Pauro wakatarira karata ku vaHebheri. Pa karata yondhoyo, iyena waingwaja maKristu akagondeka kuti asie ‘rudo hwavo ku hama urambe uripo’ zve aacaidikana kushwa kwenda ku musongano.—Vaheberi 10:24, 25; 13:1, Shanduro yeNyika Itvsa.

10-11. (a) Ndiyani watinodikana kukoka kuitira kwenda ku Cirangarijo? (b) Ngorapi thangwe ratinowana pana VaEfeso 1:7, kuti tiite kudaro?

¹⁰ Tinokhombija cicunge pa tinokokavo ukama hwedu, vadoni vo ku basa, pomwe no vo cigarisano kuti vaviye ku Cirangarijo. Ngenyi tinovakoka? Tinobongesera ngo zvakatiitira Jehovha na Jesu zve zvinotindundira kuti tikokevo vamweni kuti vaviye ku Cirangarijo. Tinoda kuti vazive kuti vangabesereka kudini ngo ‘unyasha ucikaezaniswi’ wa Jehovha ecishandisa muripo.—Verenganyi VaEfeso 1:7, Shanduro yeNyika Itvsa; Apokalipsi 22:17.

¹¹ Ngo kutatija kwedu cicunge co kwenda ku musongano, tinokhombijavo mugariro umweni unosisira maningi, wakakhombijwa ndi Mwari no Mwana wake mu njira inokahamarisa.

12. (a) Musongano jedu jinovangisa kudini rudo hwedu kuna Jehovha na Jesu? (b) 2 VaKorinto 5:14, 15 inotivangisa kudini kuti titevejere Jesu?

¹² Rudo hwedu kuna Jehovha na Jesu, unotiita kuti tiende ku musongano. Zve zvatinojija ku musongano zvinojikisa rudo hwedu kuna Jehovha no Mwana wake. Pa musongano, tinoceukijwa nguva jese zvovakatiitira. (VaRoma 5:8) Cirangarijo maning-ningi cinoticeukija kukurisisa ko rudo hwavo, pikija kwa vaya vacikadi kuziva kusisira ko muripo. Ngo kubongesera kwese, tinoeja kutevejera Jesu ngo maponero atinoita dhiya ngo dhiya. (Verenganyi 2 VaKorinto 5:14, 15.) Kusiyapo izvo, mwoyo wedu unotindundira kuti tisimbe Jehovha ngo kutipa kwake muripo. Njira imwe yo kumusimba, ngo yo kupa mupinguro unobva pasi po mwoyo.

13. Tingakhombijisa kudini kujika ko rudo hwedu kuna Jehovha no Mwana wake? Sananguranyi.

¹³ Tinokhombijazve rudo hwedu hwakajika kuna Jehovha no Mwana wake ngo kuva no cido co kuda kusiya zvese ngo ndava javo. Kazinji tingazviita ngo kuenda ku musongano. Ungano zinji, jinoita musongano wo pakati po sumana co madeko novapera kuita mabasa avo, kangaije vamweni povanonga vakaremba. Asi musongano jimweni jinoramba jiciitwa pa kupera ko sumana vamweni pavanonga vakazorora. Kureva kuti Jehovha anovona patinonga ticienda ku musongano pikija patinonga takaremba here? Hina! Ngo zvokadi, patinovangisira kwenda ku musongano, Jehovha anovona kamare rudo hwatinomukhombijira.—Marco 12:41-44.

14. Jesu wakagajisa kudini muezaniso wo kukhombija rudo wokujipira?

¹⁴ Jesu wakatigajira muezaniso wo kukhombija rudo wokujipira. Iyena wakaita izvi haiwa basi ngo kuva wakanasiririka kuti afire vajiji vake, asi ngo kuva anodira zvido zvo vamweni pambeji po zvido zvake. Inga muezaniso, paakasongana no vajiji vake iyena wainga waremba kuunyama no kuneseka mu murangariro. (Luka 22:39-46) Asi iyena wakabatikana maningi ngo zvaaida kupa vamweni kucikaripi kuimira kuashira. (Mateu 20:28) Apo rudo hwedu kuna Jehovha no hama jedu paunovanga, tinoita zvese zvatinokwanisa kuti tiende ku Cirangarijo co kufa ka Tenji inga manera atinoita kuti tiende ku musongano jimweni.

15. Ngovapi vari kuda maningi besero?

 ¹⁵ Ndisu basi maKristu okadi, ngo iyo ndava tinodakara maningi ngo kupeja nguva yakawanda tiri pamwepo no vapsa. Asi, tiri kuda maningi kubesera “vatendidoni” vaya vakaima kwenda kumusongano no koocumaira. (VaGalàsia 6:10) Tinokhombija kuti tinovada ngo kuvavangisa kuti vaende ku musongano, maningi-ningi ku Cirangarijo. Inga ndi Jehovha na Jesu, tinodakara maningi patinovona mundhu wainga wasiya kwenda ku musongano no kocumaera, ecihwirira kuna Baba no Muhavisi wedu ano rudo, Jehovha.—Mateu 18:14.

16. (a) Tingavangisana kudini zve musongano jedu jinozotibesera kudini? (b) Ngenyi iyi i nguva yakanaka yo kuceukija magama a Jesu anowanika pana Johani 3:16?

¹⁶ Pa sumana jinotevera, kokanyi mutengo wamunokwanisa wo vandhu kuti vaviye pa Cirangarijo cinozoitwa ngo mavira zuva o mu Cishanu, njiku 19 ya Abril wo 2019. (Vonanyi bhokiso rinoti “ Munozovakoka Here?”) Mu gore rinoviyari, ngatiite zvese zvatinokwanisa kuti tivangisane ngo kuva pa musongano jese jatinopuwa ndi Jehovha. Mugumo wo nyika ino paunonga wecikhwedera, tinoda kwenda ku musongano, ijo jinotibesera kuti tirambe tecijidodokesa, takacunga no kuva no rudo. (1 VaTesalònika 5:8-11) Ngo mwoyo wedu wese, ngatikhombije kuna Jehovha no Mwana wake, zvatinozwa ngo kuziva kuti ivona vanotida maningi!—Verenganyi Johani 3:16.