1-2. Ngocapi ciro cinoshamaisa cakaitika mu njiku yo Pentekoste yo gore ra 33 N.V.Y?

MAINGA mu Dimingu comangwanani mu Jerusarema. Yainga njiku yo pentekoste yo gore ra 33 N.V.Y. Cikwata cinokwana kuita zana na makumaviri, vainga vakaungana mu nyumba yo nyezuru. (Maitiro o Vapostori 1:13-15; 2:1) Jesu wainga wakavavhunja kuti vatame kubuda mu Jerusarema, ngokuti vaizoashira cipo cinosisira maningi. (Maitiro o Vapostori 1:4, 5) Zvicinyi zvakazoitika?

² ‘Cipondho-pondho wakaguma, kubva mugore, mwaungu waidari inga kuvhunguza ko dutu.’ Mwaungu wakazaja nyumba yese. Kuvhira iponapo, pa musoro po vajiji pakava no “murabzu [waidari] inga muriro,” zve vese “vakazara ngo mujimu mucena.” (Maitiro o Vapostori 2:2-4) Ecishandisa njira iyi inoshamaisa, Jehovha wakakwanisa kupa mujimu mucena wake kuno cikwata ciya co vandhu. (Maitiro o Vapostori 1:8) Ndivona vakatanga kuzojwa ngo mujimu mucena * no kuva no soterero inoshamaisa yo kuzotonga na Jesu kumatenga.

3. Ngenyi Makristu ainga pa Pentekoste ainga no cokwadi co kuti azojwa ngo mujimu mucena?

³ Kudari nomainga umwe wo vajiji vainga mu nyumba iyana, zvokadi kamare amucaizokanganwa njiku iyani. Cimwenizve,  amucaizokana-kana kuti mazojwa ngo mujimu mucena. Ngokuti, ciro cakadari inga muriro cakabuda pa musoro penyu, comuita kuti mutange kuvereketa ndumi jakasiyana-siyana! (Maitiro o Vapostori 2:5-12) Asi, izvi zvinomusa muvhunjo. Kureva kuti vese vanozojwa ngo mujimu mucena, vanozojwa ngo njira inoshamaisa zve pa mukuvo wondhowo here? Haiwa. Tinozvizivisa kudini?

4. Kureva kuti vaya vakazojwa mu zana ro kutanga ro makore, vakazojwa pa nguva yondhoyo here? Sananguranyi.

⁴ Pakutanga ngativone kuti ndirini mundhu paanozojwa. Cikwata ciya co 120 o Makristu, andicopi cega cakazojwa ngo mujimu mucena pa njiku yo Pentekoste yo gore ra 33 N.V.Y. Mu njiku yondhoyo, vandhu vanokhwedera kuita zviuru zvitatu vakaashira mujimu mucena. Ivona vakazojwa pavainga vecibhabhatijwa. (Maitiro o Vapostori 2:37, 38, 41) Asi pa makore akazotevera, asipi Makristu ese akazojwa paainga ecibhabhatijwa. Vasamaria vakazojwa no papera mukuvo wakati kuti no vapera kubhabhatijwa. (Maitiro o Vapostori 8:14-17) Kuzojwa kumweni kucikazivi kumbovonekazve, kwakava kwa Kornerio no vo pa muzi pake, avo vakazojwa ngo mujimu mucena vacito vakabhabhatijwa.—Maitiro o Vapostori 10:44-48.

5. Mukuzwirana no 2 VaKorinto 1:21, 22, zvicinyi zvinoitika mundhu paanozojwa ngo mujimu mucena?

⁵ Wari ngatende tivone zvinoitika mundhu paanozojwa ngo mujimu mucena. Vandhu vamweni vakazojwa vanovona zvecinesa kutenda kuti vasaniwa ndi Mwari. Ivona vanojivhunjisa kudari: ‘Ngenyi Mwari wasana inini?’ Kuveni vamweni avajizwi mu njira iyi. Azvinenyi hazvo ngoapi mazwiro avanova nawo, mupostori Pauro wakasanangura zvinoitika no vese vaya vanozojwa, paakati: ‘Surevo ko kuritenda, makadihwa cidhindho * ngo mujimu wakagondeswa: mujimu mucena cibatiso co utaka hwedu.’ (VaEfeso 1:13, 14) Kana kuti, Jehovha anoshandisa mujimu mucena wake kuti ajekese kwavari kuti ivona vasanwa. Ngo njira iyi, mujimu mucena unoshanda inga “cibatiso” cinovakhohwesa kuti ivona  vanozoenda koorarama kwenda no kwenda ku matenga kuciripi pasi pano.—Verenganyi 2 VaKorinto 1:21, 22.

6. Mukristu wakazojwa anodikana kuitenyi kuti aashire cidhindho cake co kwenda kumatenga?

⁶ Kudari Mukristu akazojwa, zvinoreva kuti zvatopera kudhindhwa kuti aende kumatenga here? Haiwa. Pikija ano cokwadi co kuti wasaniwa kuti aende kumatenga, iyena anodikana kuceukija mbhangiro iyi: “Ngo ndava yazvo, hamadoni vangiriranyi kuti muvangise kudanijwa no kusanwa kwenyu. Mukaita kudaro, amucazokhugunyibze.” (2 Pedru 1:10) Ngokudaro, pikija Mukristu akasaniwa kana akadanijwa kuti aende koorarama kumatenga, iyena anozoashira cidhindho cake kudari akaenderera mberi akagondeka.—VaFilipi 3:12-14; Vaheberi 3:1; Apokalipsi 2:10.

7. Vokuzojwa vanozvizivisa kudini kuti vadanijwa kwenda kumatenga?

⁷ Asi mundhu anozvizivisa kudini kuti wadanijwa kuti aende kumatenga? Mupinguro wakanasa kujekeswa pa magama a Pauro ku hama jakazojwa jo ungano yo Roma, ijo jainga ‘jakadanijwa kuita vanasi.’ Iyena wakati: “Mbzakadi, amuzivi kuaxira mwiha wo uranda, kuti muthyebze. Kaveta makaaxira mwiha wo urehwi, ngo wo tinomima ndiwona kuti: ‘Abba, Baba!’ Mujimu wambhwine unoita fakazi mu mujimu wedu, kuti tiri vana va Mwari.” (VaRoma 1:7; 8:15, 16) Izvi zvinoreva kuti Mwari, anoshandisa mujimu mucena kuti ukohwese mundhu kuti iyena wasanwa kuti aende kumatenga.—1 VaTesalònika 2:12.

8. Mukuzwirana na 1 Johani 2:20, 27, ngenyi Makristu okuzojwa aadi kubeswa ngo ari wese kuti vave no cokwadi co kuti vazojwa?

⁸ Jehovha anoita kuti vandhu vaya vaanokoka, vatame kukana-kana kuti ivona vasaniwa kuti vaende kumatenga. (Verenganyi 1 Johani 2:20, 27.) Zvokadi kamare, Makristu okuzojwa anojijiswavo ndi Jehovha mu ungano inga mudhu ari wese hake. Asi ivona avadi kubeswa ngo ari wese kuti vave no cokwadi co kuti vazojwa. Jehovha wapera kushandisa simba guru rinowanika mudenga no pasi, iro rinozivika inga mujimu mucena, kuti vave no cokwadi co kuti vazojwa!

9. Mukuzwirana na VaEfeso 1:18, zvicinyi zvinoitika mundhu paanozojwa?

⁹ Vashandiri vazinji va Jehovha nyamasi uno, vanonesehwa maningi kuzwisisa zvinoitika, mundhu paanozojwa ndi Mwari. Izvo zvinozwisisika. Ngenyi? Ngokuti ivona avazivi kuzojwa. Mwari wakasika vandhu kuti vararame kwenda no kwenda pasi pano haiwa kumatenga. (Genesi 1:28; Nduyo 37:29) Asi Jehovha wakakheta vamweni kuti vararame kumatenga. Ngokudaro, paanozoja mundhu, Jehovha anocinja soterero yake pomwe no njira yake yo kurangarira, kuti mundhu wondhowo ade kurarama kumatenga.—Verenganyi VaEfeso 1:18.

10. Zvinorevenyi ‘kubahwa ngo papsa’? (Vonanyi masoko o pasi.)

¹⁰ Mukristu paanozojwa ngo mujimu mucena, iyena ‘anobahwa ngo papsa.’ * Jesu wakananga kuti zvinonesa maningi kusanangurira mundhu acikazivi kuzojwa kuti mundhu ‘anobahwa ngo papsa’ anozwa kudini.—Johani 3:3-8.

11. Sananguranyi zvinoitika no murangariro wo Mukristu paanopera kuzojwa.

¹¹ Zvicinyi zvinoitika no murangariro wo Mukristu paanopera kuzojwa? Acito azojwa,  iyena wainga no vetero yo kurarama kwenda no kwenda pasi pano. Iyena waitoimira njiku yo kuti Jehovha, anozopeja ushati no kuita kuti nyika ino ive paradhiso. Kangaije waitojivona eciashira ukama kana shamwari yecimuswa ko vakafa. Asi paanozojwa, Mukristu wondhowo anotanga kurangarira ngo njira imweni. Ngenyi? Izvi azvirevi kuti iyena aacadakaririzve soterero yo kurarama pasi pano. Kangaije ngo kuvona kuti pasi pano, pano matambujiko akawanda maningi, zvomuita kuti aperehwe ngo mudakaro. Kusiyapo zvondhozvo, Jehovha wakashandisa mujimu wake mucena kuti acinje murangariro pomwe no soterero yaaidakariraya maningi.

12. Mukuzwirana na 1 Pedru 1:3, 4, vokuzojwa vanozwa kudini ngo soterero yavo?

¹² Zvingaita kuti Mukristu wakazojwa, wojivona inga kuti aafaneri kuva no cidakajiso ici cinosisira. Asi iyena aakani-kani kuti Jehovha wakamusana. Iyena anodakara maningi no kubongesera ngo soterero yaanayo yo kuzorarama kumatenga.—Verenganyi 1 Pedru 1:3, 4.

13. Vokuzojwa vanovona kudini upenyu hwavo pasi pano?

¹³ Izvi zvinoreva kuti Makristu okuzojwa anoda kufa here? Mupostori Pauro wakadavira muvhujo uu. Iyena wakaezanisa muviri wo vo kuzojwa no tende, paakati: “Mbzakadi, potiri mu nyumba ino, tinogomera ticicamwa ngo kuramba kupfenyurihwa nguvo jedu; tinoda basi kusimira imweni pa nyezuru pa iya, kuti muviri wedu uu unofa uphindujwe ku ndaramo.” (2 VaKorinto 5:4) Izvi, azvirevi kuti Makristu aya aacadi kurarama pasi pano, oda kufa ngo kukasika. Mukusiyana, ivona vanodakarira kurarama no kushandisa upenyu hwavo kuti vashandire Jehovha no ukama hwavo pomwe no shamwari. Atinenyi no zvavanoita, vokuzojwa vanoceukija soterero inoshamaisa yo kumbeji.—1 VaKorinto 15:53; 2 Pedru 1:4; 1 Johani 3:2, 3; Apokalipsi 20:6.

14. Ngozvapi zviro zvicingavonesi kuti mundhu wakazojwa ngo mujimu mucena?

¹⁴ Kangaije mungatojivhunjisa kuti makazojwadi kamare ngo mujimu mucena kana kuti haiwa. Kudari ndizvona, ambojiitenyi muvhunjo iji: Munoda maningi kuita kuda ka Jehovha here? Munodakarira kujija Soko ra Mwari pomwe no ‘zviro zvakajika zva Mwari’ here? (1 VaKorinto 2:10) Muri kuvona kuti Jehovha ari kumubesera kuti mubudirire mu mushando wenyu here? Munovona kuti i mutoro wakakura kubesera vamweni kuti vajije ngo pamusoro pa Jehovha here? Munovona kuti Jehovha ari kumubesera mu njira jinonasa kuvoneka mu upenyu hwenyu here? Kudari mukadavira kuti hina muvhunjo jese iji, zvinokhombija kuti masaniwa kuti muende kumatenga here? Aikhona, azvirevi kudaro. Ngenyi? Ngokuti vashandiri vese va Jehovha vangava no mazwiro iwonawo, azvinenyi dangani vakazojwa kana kuti haiwa. Ecishandisa mujimu mucena, Jehovha angakwanisa kupa simba ironaro vashandiri vake, azvinenyi soterero yavo. Kunasa kunanga, kudari imwimwi muri kujivhunjisa kuti makazojwa kana kuti haiwa, zvinovonesa kamare kuti amuzivi kuzojwa. Vaya vakasanwa ndi Jehovha avakani-kani dangani vakazojwa kana kuti haiwa. Ivona vano cokwadi co kuti vakazojwa!

15. Tinozvizivisa kudini kuti asipi vese vakaashira mujimu mucena wa Mwari vakasanwa kuti vararame kumatenga?

¹⁵ Mu Bhaibheri tinovona muezaniso jo vandhu vakagondeka vakaashira mujimu mucena. Pikija zvakadaro, ivona avacainga no vetero yo kuzorarama kumatenga. Inga  muezaniso, Dhavhidhi waitungamirihwa ngo mujimu mucena. (1 Samueli 16:13) Mujimu mucena wakamubesera kuti muzwisise zviro zvakawanda zvinonangwa mu Bhaibheri. Cimwenizve, wakamutungamirira kuti atare mativi amweni o Bhaibheri. (Marco 12:36) Pikija zvakadaro, mupostori Pedhru wakananga kuti Dhavhidhi “aazivi kukhwira kuenda mugore.” (Maitiro o Vapostori 2:34) Johani Mubhabhatiji wainga mundhu ‘wakazara ngo mwiha wakacena.’ (Luka 1:13-16) Jesu wakananga kuti akuna mundhu wakakura kupinda Johani, asi iyena wakanangavo kuti Johani aacaizoita divi ro Umambo hwo mugore. (Mateu 11:10, 11) Jehovha wakashandisa mujimu mucena wake kuti ape vanarume ava simba ro kuita zviro zvinoshamaisa, asi aazivi kushandisa mujimu mucena wake kuti asane vandhu ava kuti vararame kumatenga. Izvi zvinoreva kuti ivona avacaingondeka maningi inga vaya vakasanwaya kuti vatonge kumatenga here? Haiwa. Izvo zvinoreva kuti Jehovha anozovamusa kuti vazorarame pasi pano, mu Paradhiso.—Johani 5:28, 29; Maitiro o Vapostori 24:15.

16. Vashandiri vazinji va Jehovha nyamasi uno, vari kuimira mupfupo wapi?

¹⁶ Vashandiri vazinji va Mwari nyamasi uno, vano soterero yo kuzorarama pasi pano kuciripi kumatenga. Kudari inga ndi Abhirahama, Sara, Dhavhidhi, Johani Mubhabhatiji pomwe no vanarume vamweni no vanakaji vakagondeka vo mu nguva jo Bhaibheri. Ivona vari kuvetera no cidakadaka cese, kuvona Umambo hwa Mwari hwecitonga pasi pese.—Vaheberi 11:10.

17. Musoro unotevera unozodavira muvhunjo japi?

¹⁷ Zvecivoneka kuti vokuzojwa vamweni vaciri pasi pano, zvingaita kugara no muvhunjo munganani. (Apokalipsi 12:17) Inga muezaniso, vokuzojwa vanodikana kujivona kudini pacavo? Kudari mu ungano mundhu akatanga kuha pau no kumwa vhinyu, munodikana kumuvona kudini? Kudari civerengero co vandhu vokuzojwa cikaenderera mberi ceciengejeka keni? Munodikana kukaya-kaya here? Musoro unotevera unozodavira muvhunjo iji.