1. Zvicinyi zvakananga Jehovha kuti zvaizoitika mu njiku jedu jino?

ECINANGIRA zvaizoitika mu njiku jedu jino, Jehovha wakati: “Mu njikujo, gumi ro vandhu vo majinja no vo ndumi jese, vanozobata muJuda ngo mbhiri ro hanju yake, veciti: ‘Tinoda kuenda newe, ngokuti tazwisisa kuti Mwari anemwi.’” (Zakaria 8:23) “MuJuda” anoimirira vaya vakazojwa ndi Mwari ngo mujimu mucena. Vanodanijwazve “Israeli ya Mwari.” (VaGalàsia 6:16) Kuveni “gumi ro vandhu” vanoimirira vese vaya vano soterero yokurarama pasi pano kwenda no kwenda. Ivona vanozviziva kuti Jehovha ari kukomborera cikwata ici zve vanojizwa kureremejeka kunamata Jehovha pamwepo navo.

2. “Gumi ro vandhu” ‘vanoendesa’ kuduni no vokuzojwa?

² Vonanyi kuti Bhaibheri rinonanga kuti “gumi ro vandhu” vanozobata “muJuda ngo mbhiri ro hanju yake, veciti: ‘Tinoda kuenda newe, ngokuti tazwisisa kuti Mwari anemwi.’” Pikija apa pecinangihwa muJudha umwe basi, ngo maitiro ari ese, gama ro kuti “newe” riri kunangira vandhu vanodarika kuita umwe. Izvi zvinoreva kuti Mujudha asipi mundhu umwe, asi anoimirira cikwata cese co vokuzojwa. Nyamasi uno, zvinonesa kuziva zina ro umwe nga umwe ro vokuzojwa vari pa nyika. * Pikija zvakadaro, vaya vanovetero yo kurarama pasi pano ‘vangaenda’ no vokuzojwa. Kuitisa kudini? Ngo kushandira Jehovha pamwepo navo. Asi vanovetero yo kurarama pasi pano avataji vo kuzojwa inga vatungamiriri, ngokuti  vanoziva kuti mutungamiriri wavo ndi Jesu.—Mateu 23:10.

3. Muvhunjo japi jinozodavihwa pa jijo iyi?

³ Zvecivoneka kuti pacino vokuzojwa pakati po vandhu va Mwari nyamasi uno, vamweni vangajivhunjisa kudari: (1) Vokuzojwa vanodikana kujivona kudini pacavo? (2) Kudari ari wese ku ungano kwedu akatanga kuha pau no kumwa vhinyu pa Cirangarijo, tinodikana kumuvona kudini? (3) Tinodikana kukaya-kaya kudari tikavona kuti mutengo wo vanoha pau no kumwa vhinyu pa Cirangarijo uri kuengejeka here? Jijo iyi inozodavira muvhunjo iji.

4. Ngwajo yapi yatinowana pana 1 VaKorinto 11:27-29, inodikana kubatisiswa ngo vokuzojwa zve ngenyi?

⁴ Vokuzojwa vanodikana kubatisisa ngwajo inowanika pana 1 VaKorinto 11:27-29. (Verenganyi.) Mu njira yapi Mukristu wokuzojwa waizova “acikanakiri” kuha pau no kumwa vhinyu pa njiku yo Cirangarijo? Iyena waizova acikanankiri kuha pau no kumwa vhinyu kudari aaripi kurarama mukuzwirana no ndhungamiro jakarungama ja Jehovha. (Vaheberi 6:4-6; 10:26-29) Vokuzojwa vanozviziva kuti, kudari vanoda kuashira ‘mupocero  wo vakadanijihwa kupuwa ndi Mwari, kubvira nyezuru, mwa Kristu Jesu,’ vanodikana kuramba vakagondeka.—VaFilipi 3:13-16.

5. Vokuzojwa vanodikana kujivona kudini pacavo?

⁵ Mujimu mucena wa Jehovha unobesera vandhu kuti vajidodokese, auiti kuti ivona vajikuje. (VaEfeso 4:1-3; VaKolosi 3:10, 12) Ngo iyo ndava, vokuzojwa avajivoni kuti i vakuru kupinda vamweni. Ivona vanozviziva kuti Jehovha aazivi kuvapa maningi mujimu mucena kupinda vashandiri vake vamweni. Ivona vanozviziva kuti Jehovha anovapa mujimu mucena wake mu njira imweyo yaanopa vashandiri vake vamweni. Ivona avajivone kuti vanozwisisa maningi zvokadi zvo Bhaibheri kupinda vamweni. Cimwenizve, avavhiri kuvhunja mundhu kuti atangevo kuha pau no kumwa vhinyu pa Cirangarijo, vecirangarira kuti mundhuwo wakazojwa. Kusiyapo zvondhozvo, vokuzojwa vanozviziva kuti ndi Jehovha basi anokoka vandhu kuti vaende mugore.

6. Mukuzwirana no 1 Korintio 4:7, 8, zvicinyi zvicikadikani kuithwa ngo vo kuzojwa?

⁶ Vokuzojwa vanovona kuti i cidakajiso kudanijwa kwenda mugore. Pikija zvakadaro, ivona avaveteri kuti vareremejwe maningi ngo vamweni. (VaFilipi 2:2, 3) Cimwenizve, ivona vanozviziva kuti, povakazojwa, Jehovha aazivi kuvhunja ari wese. Ngo iyo ndava, vokuzojwa avakahamari povanovona ari wese acikana-kana pakuda kuziva dangani ivona vakazojwadi kana kuti haiwa. Ivona vanozviziva kuti Bhaibheri rinotingwaja kuti titame kukasika kutendera mundhu wiya anonanga kuti wagajwa basa riri rese rinosisira ndi Mwari. (Apokalipsi 2:2) Makristu okuzojwa aadi kuvoniwa ngo maitiro akasiyana. Ndizvona zvinovaitisa kuti vatame kuvhunja ari wese kuti ivona vakazojwa. Ivona avagari vacidadira vamweni ngokuti vakazojwa.—Verenganyi 1 VaKorinto 4:7, 8.

7. Zvicinyi zvicikaitwi ngo vokuzojwa zve ngenyi?

⁷ Makristu okuzojwa aadikani kujivona inga ari pa cikwata cicikanghwiniwi ngo vamweni. Ivona avapsaki vamweni vakazojwa kuti vabhuisane ngo pamusoro po kuzojwa kwavo kana kuumba zvikwata zvo kujija Bhaibheri. (VaGalàsia 1:15-17) Vokuzojwa novaiita izvo, ungano aicaizovepi yakabatana. Cimwenizve, vaizohwisana no mujimu mucena, uwo unobesera kuti vandhu va Mwari vave no runyararo pomwe no rubatano.—VaRoma 16:17, 18.

8. Ngenyi tinodikana kungwarira maningi ngo pamusoro po matajire atinoita ari wese anoha pau no kumwa vhinyu pa Cirangarijo? (Vonanyi masoko o pasi.)

⁸ Tinodikana kutajisa kudini hama no hambzaji  jakazojwa? Zvaizova zvakashata maningi kukuja mundhu, pikija noiri hama yakazojwa ya Kristu. (Mateu 23:8-12) Bhaibheri parinobhuya ngo pamusoro po vakuru, rinotivhunja kuti ‘titevejere rutendo hwavo.’ Asi rinotivhunjazve kuti atidikani kuvona mundhu inga mutungamiriri wedu. (Vaheberi 13:7) Zvokadi kamare, Matahwa anonanga kuti ivona vanofanera ‘kukujwa zvakapetwa kaviri.’ Asipi ngo ndava yo kuti vakazojwa, asi ngokuti ‘vanotungamirira ngo njira yakanaka’ zve ‘vanoshanda ngo simba pa kuvereketa no kujijisa.’ (1 Timoti 5:17, Shanduro yeNyika Itsva) Vokuzojwa vaizoita nyowa kudari vamweni vakavakuja kana kuvareremeja zvicina mutengo. * Kusiyapo izvo, vaizova vandhu vanojikuja. (VaRoma 12:3) Zvokadi kamare, aticaizodakarira kuti hama yakazojwa ya Kristu, iite cishaishi cakakura kudari!—Luka 17:2.

9. Tingakhombijisa kudini kuti tinoreremeja vandhu vakazojwa ndi Jehovha?

⁹ Tingakhombijisa kudini kuti tinoreremeja vandhu vakazojwa ndi Jehovha? Atidikani kuvaita mubvunjo ngo pamusoro po kuzojwa kwavo. Shwiro iyi ngo yavo, itusu atidikani kuinghwinira. (1 VaTesalònika 4:11; 2 VaTesalònika 3:11, Shanduro yeNyika Itsva) Ticadorangarira kuti murume wavo kana mukaji, vabari kana vamweni vo pa mbhuripo vakazojwavo. Vetero yo kwenda kumatenga aipekejwani, pikija tinogara no mundhu wakazojwa. Ngokuti vetero iyi, vakaipuwa ndi Mwari. (1 VaTesalònika 2:12) Atidikani kuita muvhunjo jinonyangaja vamweni. Inga muezaniso, atingavhunjisi mukaji wo hama yakazojwa kuti anojizwa kudini paanorangarira ari mu nyika imbza acina murume wake. Kusiyapo izvo, tingava no cokwadi cokuti mu nyika imbza, Jehovha ‘anozogutisa bzese bzinorarama.’—Nduyo 145:16.

10. Ngenyi mbhangiro yo kutama kuemura vandhu ingatijivirira?

¹⁰ Atidikani kuvona vokuzojwa inga vanosisira maningi kupinda vamweni. Tikaita kudaro tinonga tecijijivirira pacedu. Kuitisa kudini? Bhaibheri rinotivhunja kuti kangaije, vokuzojwa vamweni avazorambi vakagondeka. (Mateu 25:10-12; 2 Pedru 2:20, 21) Asi kudari tikatama kuemura vandhu, na kamwe aticaizoteveja vamweni ngokuti vanozivika maningi kana vokuzojwa, pikija vecishandira Jehovha ko makore akawanda. (Juda 1:16) Ngokudaro, povanotama kuva vakagondeka kana kusiya ungano, atizoruzi rutendo hwedu kuna Jehovha kana kutoima kumushandira.

11. Zvicinyi zviri kuitika no civerengo co vandhu vanoha pau no kumwa vhinyu pa Cirangarijo?

¹¹ Ko makore akawanda, civerengo co vandhu vanoha pau no kumwa vhinyu pa Cirangarijo caiderera. Asi mumakore ano, civerengo co vandhu ava ciri kukura. Waro tinodikana kuneseka ngo pamusoro pazvo here? Haiwa. Ngativone kuti ngenyi atidikani kuneseka.

12. Ngenyi atidikani kuneseka ngo pamusoro po mutengo wo vaya vanoha pau no kumwa vhinyu?

¹² “[Jehovha] anoziva vandhu vake.” (2 Timoti 2:19) Jehovha anoziva vakazojwa. Asi hama jinoverenga vanoha pau no kumwa vhinyu ajizvizivi. Ngokudaro, civerengo cinobatanija vese vanojivona inga vakazojwa kasike avazivi. Inga muezaniso, kuno vamweni vakatanga kuha pau no kumwa vhinyu asi  vakazoima. Vamweni vangava no ndhendha jo mu musoro zvotovaita kuti varangarire kuti vano vetero yo kuzotonga na Kristu mugore. Ngokudaro, atinasi kuziva mutengo wasara uri pasi pano wo vandhu vokuzojwa.

13. Bhaibheri rinonanga mutengo wo vokuzojwa vanonga vari pasi pano dambujiko guru ricito ratanga here?

¹³ Vokuzojwa vanozowanika mu mativi mazinji pasi pano Jesu paanozoviya kuzovatora kuti aende navo mugore. (Mateu 24:31) Bhaibheri rinonanga kuti mu njiku jo kupejisira, kunozova no vandhu vashoma basi vokuzojwa pasi pano. (Apokalipsi 12:17) Asi, irona arinangi kuti vangana vanozonga vari pasi pano dambujiko guru parinozotanga.

14. Mukuzwirana no VaRoma 9:11, 16, tinodikana kuzwisisenyi ngo pamusoro po makhetere anoita Jehovha vokuzojwa?

¹⁴ Jehovha ngaanokheta nguva yo kusana vokuzojwa. (VaRoma 8:28-30) Jehovha wakatanga kukheta vokuzojwa Jesu naapera kumuswa kuvha ko vakafa. Zvinovoneka inga kuti, mu nguva jo Makristu okutanga, Makristu ese ocokwadi ainga akazojwa. Pa makore akazotevera, vazinji vainanga kuti Makristu avacaitevejera Kristu. Pikija zvakadaro, mu makore ondhoo, Jehovha wakazoja vashoma vaingaya Makristu ocokwadi. Ivona vaidari inga tirigu yakanangwaya ndi Jesu kuti yaizomera pakati po sakuro. (Mateu 13:24-30) Pakati po mazuva ano okupejisira, Jehovha aciri kusana vandhu kuti vaite divi ro vo 14.000. * ngokudaro, Mwari akakheta kuzoja Makristu amweni kumbhiri ko mugumo, atidikani kukana-kana ngo pamusoro po uzivi  hwake. (Verenganyi VaRoma 9:11, 16.) * Tinodikana kungwarira maningi kuti titame kuva inga vashandi vo basa vo pa muezaniso wakasumuhwaya ndi Jesu. Ivona vakatanga kungu’ngu’ta ngo cisungo co mune wo munda ngo pamusoro po vaya vakapejisira kushanda.—Mateu 20:8-15.

15. Kureva kuti vokuzojwa vese vanoita divi ro “muranda wakagondeka no wakangwara,” unonangwaya pana Mateu 24:45-47? Sananguranyi.

¹⁵ Asipi vese vano vetero yo kwenda mugore vanoita divi ro “muranda wakagondeka no wakangwara.” (Verenganyi Mateu 24:45-47.) Kudari inga muzana ro kutanga ro makore, Jehovha na Jesu vari kushandisa vandhu vashoma kuti vahise kana kujijisa vandhu vakawanda. Mu nguva yondhoyo, Makristu okuzojwa mashoma basi akashandiswa kuti atare Matahwa o Cigiriki o Cikristu. Nyamasi uno, i Makristu vanganani basi vo kuzojwa vano mutoro wo kupa “bzokuha ngo nguva kwayo.”

16. Majijenyi pa jijo iyi?

¹⁶ Jijo iyi yatijijisenyi? Tatija kuti Jehovha wakasana kupa upenyu ucikaperi ku uzinji wo vandhu vanomushandira no kupa upenyu ku vandhu vashoma kuti vazotonge naye kumatega. Jehovha anozopfupa vashandiri vake vese, “muJuda” kubatanijavo no “gumi ro vandhu.” Ngokudaro, iyena anovetera kuti ivona vazwire mutemo jondhojo zve varambe vakagondeka. Vese vanodikana kuramba vecijidodokesa. Vese vanodikana kushandira Jehovha zve voenderera mberi vakabatana. Vese vanodikana kuvangisira kuti ungano ienderere mberi ino runyararo. Ngo iyo ndava, mugumo paunonga wecikhwedera, ngatienderere mberi tecishandira Jehovha zve tecitevera Kristu inga “muxambi umwe!”—Johani 10:16.