1. Inga ndi Mambo Dhavhidhi, ngowapi muvhunjo watingajiita?

TESE tinoda kuva no upenyu hwakagajana. Apana anodakara ngo kuthimwa-thimwa. Nguva jimweni itusu tingatothimwa-thimwa maningi. Ndizvona zvinoitisa kuti vashandiri vamweni va Jehovha vaite muvhunjo wakafanana no wakaita Mambo Dhavhidhi kuna Jehovha: “Mbhera rini ndinozotambujika mukati mwangu, ndinozocamwa mu mwoyo, usiku no masikati?”—Nduyo 13:3.

2. Ngozvapi zvatinozovona pa musoro uno?

² Pikija nguva jimweni tingathimwa-thimwa, kuno zviro zvimweni zvatingaita kuti titame kuthimwa-thimwa maningi. Pa musoro uwu, tinozotanga kuvona zviro zvinganani zvingatiita kuti tithimwe-thimwe. Perapo, tinozovona zviro zvitandhatu zvingatibesera kuti tirambe takagajana patinohwisana no zvineso zvedu.

3. Ngozvapi zviro zvingatiita kuti tithimwe-thimwe? Waro kunanga kuti tingakwanisa kuzvitiza?

³ Zviro zvizinji zvingatiita kuti tithimwe-thimwe. Itusu atingakwanisi kuita kuti zviro zvondhozvo, zvitame kuitika. Inga muezaniso, zvecivoneka kuti peresu yo zviro inondoramba yeciengejeka, zvinonesa maningi kutema mutengo wo mare inozomoshwa pa kutenga zvokuha, zvokusimira no zvimweni zvakadaro. Atikwanisizve kuziva kuti vadoni vedu vo ku basa kana vokucikora vanozotiejesa kudini kuti titame kuva takagondeka kana kuita zvouhure. Cimwenizve, atikwanisi kuita kuti vandhu vatame kuita zvo ugevenga mu ndharaundha yatinogararo. Itusu tinosongana no zvineso zvese izvi ngokuti tiri kupona mu nyika yakazara ngo vandhu vano murangariro ucikazivi kucijikira  mu Bhaibheri. Sathana mwari wo nyika iyi, anoziva kuti vandhu vamweni vanozotendera kuti “bziejo bzo nyika” zvivaimise kushandira Jehovha. (Mateu 13:22; 1 Johani 5:19) Ngo kudaro, itusu atikani-kani kuti nyika yakazara ngo zvineso zvinoita kuti vandhu vagume pa kuthimwa-thimwa.

4. Zvicinyi zvingaitika kudari tikathimwa-thimwa ngo pamusoro po zvineso zvedu?

⁴ Tingatoguma pa kuthimwa-thimwa ngo ndava yo zvineso zvedu zvototiita kuti titame kurangarira ciri cese. Inga muezaniso, tingatothimwa-thimwa ngo kutama kuwana mare inokwana kuti titenga zviri zvese, kana kuti tinozohwaja, tokonehwa kwenda ku basa kana kutoruza basa. Tingatothimwathimwazve ngo kurangarira kuti atizogondeki patinozoejwa kuti titame kuzwira mutemo ja Jehovha. Sambiri pano, Sathana anozoita kuti vese vaanovonerera vahwise vandhu va Mwari. Ngokudaro, tingatothimwa-thimwa ngo kurangarira kuti zvicinyi zvatinozoita pa kuhwiswa kondhoko. Tingatojivhujisa kudari: ‘Kunanga kuti zvakashata kuva no mazwiro akadari ngo pamusoro po zviro izvi?’

5. Jesu waida kunangenyi paakananga kuti: “Mucathimwa-thimwa”?

⁵ Tinozviziva kuti Jesu wakavhunja vateveri vake kudari: “Mucathimwa-thimwa.” (Mateu 6:25) Kunanga kuti Jesu wainanga kuti itusu atidikani kuthimwa-thimwa ngo ciri cese here? Haiwa! Ceujanyi kuti vashandiri vamweni va Jehovha vo mu nguva yo kare vaithimwathimwavo. Asi zviro zvovaiita zvaidakajisa Jehovha. * (1 Majimambo 19:4; Nduyo 6:4) Jesu wainga ecitivangisa. Iyena aacaidepi kuti tithimwe-thimwe ngo pamusoro po zviro zvaaizotiita kuti tivone kushandira Jehohva inga ciro cicikasisiri maningi mu upenyu hwedu. Waro zvicinyi zvatinoita patinothimwa-thimwa?—Vonanyi bhokiso rinoti: “ Tingazviitisa Kudini?”

6. Mukuzwirana no VaFilipi 4:6, 7, zvicinyi zvingatibesera kuti tive vakagajana?

⁶ (1) Itanyi mukumbiro vhaza jakawanda. Patinonga tecithimwa-thimwa ngo ndava yo zvineso, tinodikana kuita mukumbiro kuti Jehovha atibesere. (1 Pedru 5:7) Jehovha angadavira mukumbiro wenyu ecimupa, “rugarisiko . . . hunopinda uzivi hwese [hwo vandhu.]” (Verenganyi VaFilipi 4:6, 7.) Jehovha angamupa rugarisiko hwondhowo ecishandisa simba rake ro mujimu mucena.—VaGalàsia 5:22.

7. Ngozvapi zvamunodikana kuziva pamunonga meciita mukumbiro kuna Mwari?

⁷ Pamunoita mukumbiro kuna Jehovha muvhunjenyi mazwiro ese amunawo. Nanganyi kamare zvamunodaro. Muvhunjenyi cineso camunaco no kumusanangurira mazwiro amunawo ngo pamusoro paco. Kudari zvecikwanisika kunasirira cinesoco, kumbiranyi uzivi kuti muvone zvokuita no simba ro kutoita zvirozvo. Kudari apana camungaita kuti munasirire cinesoco, kumbiranyi Jehovha kuti amubesera kuti mutame kuthimwa-thimwa. Pamunomuvhunja zviro zvamuri kuda ngo mukumbiro, pakufamba ko nguva munozovona kuti Jehovha anodavirisa kudini mukumbiro jenyu. Kudari mukumbiro jenyu jikatama kudavihwa ngo kukasika, amudikani kuremba. Jehovha aadi basi kuti munange zvamuri kudaro, asi anoda kuti muvangisire pa kuita mukumbiro.—Luka 11:8-10.

8. Zvicinyi zvatinodikana kubatanija pa mukumbiro jedu?

 ⁸ Pamunonga mecivhunja Jehovha mazwiro enyu mu mukumbiro, ivanyi no cokwadi co kuti mabatanijanivo mazwiro okubonga. Zvinosisira maningi kuvona makomborero atiri kuashira, pikija patinosongana no zvineso. Kudari nguva jimweni mukakonehwa kuvhisa magama amunoda kamare, ceujanyi kuti Jehovha anodavira mukumbiro jenyu, pikija mukananga basi kuti ‘ndapota ndibesenyi!’—2 Kronike 18:31; VaRoma 8:26.

9. Vandhu vangawanisa kudini jiviriro yokadi?

⁹ (2) Thembanyi uzivi hwa Jehovha kuciripi wenyu. Mu nguva jo muporofita Isaia, Vajudha vaithya kuhwiswa ngo Vaasiria. Ivona avacaidepi kunyiswa ngo Vaasiria, ngokudaro, vakakumbira kuti Vaejipita vavabesere. (Isaia 30:1, 2) Jehovha wakavangwaja kuti kuthemba kwavo Vaejipita kwaizovaviisira zvineso. (Isaia 30:7, 12, 13) Ecishandisa Isaia, Jehovha wakavhunja vandhu vake manera ovaizowana jiviriro yokadi. Iyena wakati: ‘Simba renyu rinozovha pakuramba makagajana no kundithemba.’—Isaia 30:15b, Shanduro yeNyika Itsva.

10. Mugariro japi jingatiita kuti tivonese kuthemba kwedu Jehovha?

¹⁰ Tingakhombijisa kudini kuthemba Jehovha? Vonanyi muezaniso munganani. Ngatiti mawana basa raushoni raizomupoceresa mare yakawanda, asi raizomuita kuti mushande nguva jakawanda zvomuita kuti mutamezve kubatikana mu zviro zvokumujimu. Ecimborangariranyi kuti ku ndau yamunoshandira, ari wese angakhombija inga kuti anomuda, asi iyena asipi mushandiri wa Mwari wakabhabhatijwa. Kana amborangariranyizve kuti vo paukama hwenyu vaizomugogomera kudari imwimwi mukaramba mecishandira Jehovha. Pa mugariro umwe nga umwe, imwimwi mungatodikana kutema civaringo cinonesa, asi Jehovha anozokwanisa kumupa ndhungamiro yamunoda. (Mateu 6:33; 10:37; 1 VaKorinto 7:39) Muvhunjo unomuka nga uu, kunanga kuti imwimwi munozothemba Jehovha no kushandisa ndhungamiro yake here?

11. Ngojapi muezaniso jo mu Bhaibheri jatingajija jingatibesera kuti tirambe takagajana pikija patinoteverehwa?

¹¹ (3) Jijanyi ngo muezaniso jaushoni no jakashata. Mu Bhaibheri muno muezaniso jakawanda maningi jinovonesa kuti zvinosisira maningi kuramba takagajana no kuthemba Jehovha. Pamunonga mecijija muezaniso iji, vonanyi kuti ngozvapi zvakabesera vashandiri va Jehovha kuti varambe vakagajana povainga veciteverehwa. Inga muezaniso, dare guru ro Judheya porakananga kuti vapostori avacaidikanazve kucumaera, ivona avazivi kuthya. Kusiyapo zvondhozvo, ngo cicunge cese ivona vakananga kudari: “Bzinodikana kutenda Mwari kupinda vandhu.” (Maitiro o Vapostori 5:29) Pikija povakapera kutakwa, ivona avazivi kuthya. Ngenyi? Ngokuti ivona vaizviziva kuti Jehovha waivabesera. Iyena waidakara ngo zvavaingaro vaciita. Ngokudaro, ivona vakaenderera mberi vecicumaera masoko akanaka. (Maitiro o Vapostori 5:40-42) Mukufananavo, mujiji Stefano paainga eciuraiwa, iyena wainga wakagajana zve mu meso make makaphinduka ‘motojana no mumeso mo ngirozi.’ (Maitiro o Vapostori 6:12-15) Ngenyi? Ngokuti iyena wainga no cokwadi co kuti Jehovha waidakara ngo zvaaingaro eciita.

12. Mukuzwirana na 1 Pedru 3:14 na 4:14, ngenyi tingadakara patinoteverehwa?

¹² Vapostori vakavona kamare kuti Jehovha wainga ecivabesera. Iyena wainga wakavapa simba kuti vaite mushamaiso. (Maitiro o Vapostori 5:12-16; 6:8) Asi itusu nyamasi uno, atikwanisi kuita mushamaiso.  Asi Jehovha ecishandisa Soko rake, anotivhunja kuti patinonga teciteverehwa ngo ndava yo urungami, iyena anodakara zve mujimu wake unozova nesu. (Verenganyi 1 Pedru 3:14; 4:14.) Ngokudaro, kusiyapo kuthimwa-thimwa ngo pamusoro po zvatinozoita kumbejiyo, tinodikana kuita zvese zvatinokwanisa kuti tivangise kuthemba kwedu kuti Jehovha anozotibesera no kutiponesa. Inga zvakaitwa ngo vajiji vo muzana ro kutanga, tinodikana kuthemba cigondiso ca Jesu, cokuti: “Inini ndinozomupa mipinguro yo uzivi, kuti akuna na umwe wo vakorore venyu anozokwanisa kucijikira no kudavira.” Jesu wakatigondesazve kuti: “Ngo kuvangirira kwenyu munozoponesa mwiha yenyu.” (Luka 21:12-19) Cimwenizve, mucadokanganwa kuti Jehovha anoenderera mberi ecirangarira ciro cidoko kamare, cakaitwa ngo vashandiri vake vakafa vakagondeka. Ecishandisa zvaanozivaro, iyena anozovamusa.

13. Tingabesereka kudini ngo muezaniso jo vaya vacikazivi kuramba vakagajana no kuthemba Jehovha?

¹³ Tingajijavo zvimweni kuvha kwa vaya vacizivi kuramba vakagajana no kuthemba Jehovha. Kujija ngo muezaniso iji jakashata, kunotibesera kuti titame kuitavo zvakafanana. Inga muezaniso, pa kutanga ko kutonga kwake, Mambo Aza wo Judha wakathemba Jehovha paakahwiswa ngo masoca akawanda zve Jehovha wakamubesera kuti avanyise. (2 Kronike 14:8-11) Asi pakufamba ko nguva, paakahwiswa ngo masoca mashoma a Mambo Bhaaza wo Iziraeri, Aza wakapagari masoca o Vaasiriya kuti amubesere kusiyapo kupsaka Jehovha, inga zvaakaita kare. (2 Kronike 16:1-3) Cimwenizve, pa mazuva o kupejisira o upenyu hwake, paakahwaja maningi, iyena aazivizve kupsaka besero ra Jehovha.—2 Kronike 16:12.

14. Zvicinyi zvatingajija ngo kuposa kwakaita Aza?

¹⁴ Pakutanga, Aza wakapsaka besero ra Jehovha paakasongana no zvineso. Asi no papera mukuvo wakati kuti iyena aazivi kuita kudaro, iyena wakatema civaringo co kupeja ega zvineso zvake. Civaringo caakatemari co kupsaka besero ro Vaasiriya kuti ahwise Vaiziraeri, pakutanga caivoneka inga zano raushoni kamare. Asi kubudirira kwake akucaizova ko mukuvo wakareba. Ecishandisa muporofita wake, Jehovha wakamuvhunja kudari: “Ngokuti makada kubeswa ndi mambo wo Síria, asi ndi Tenji Mwari wako, masoca a mambo wo Síria, anozopokonyoka mu nyara jako.” (2 Kronike 16:7) Tinodikana kungwarira kuti titame kujithemba maningi tecirangarira kuti tinokwanisa kupeja toga zvineso zvatiri kusongana nazvo, kusiyapo kupsaka ndhungamiro ja Jehovha tecishandisa Soko rake. Pikija patinodikana kutema civaringo ngo kukasika, tinodikana kugajana tothemba Jehovha. Tikaita kudaro, iyena anozotibesera kuti tibudirire.

15. Zvicinyi zvatinodikana kuita patinonga teciverenga Bhaibheri?

¹⁵ (4) Ivanyi no vhesi jo mu Bhaibheri mu musoro. Pamunowana vhesi mu Bhaibheri jinokhombija kusisira ko kuva mundhu wakagajana, no kuthemba Jehovha, ejanyi kujidira mu musoro. Kangaije mungazorangarira kuti kujiverenga ngo izwi guru zvingabesera, kana kujitarira pari pese kuti muzokwanise kujiceukija. Jehovha wakavhunja Joshuwa kuti nguva jese waidikana kuverenga ngo izwi guru bhuku ro mutemo. Kuti zvese zvaanoita zvibudirire ushoni. Zvaaiverengaro pa mutemo, zvaizomubesera kuti atame kuthya, asi ave no cicunge co kutungamirira vandhu va Mwari. (Joxwa 1:8, 9) Vhesi zinji jatinowana mu Soko ra Mwari jingatibesera kuti tive vakagajana, pa mugariro wo kuti kazinji waizotiita kuti  tive vanothimwa-thimwa kana kuthya.—Nduyo 27:1-3; Mazwi Akangwara 3:25, 26.

16. Jehovha anoshandisa kudini ungano kuti itibesera kuti tive vakagajana tecimuthemba?

¹⁶ (5) Pejanyi nguva no vandhu va Mwari. Jehovha anoshandisa hama no hambzaji jedu kuti jitibesere kuti tive vakagajana, tecimuthemba. Pa musongano jedu tinobesereka ngo hurukuro jinoithwa pa tiribhuna, mupinguro jinoithwa ngo vapurutani no mabhuyo anovangisa anoithwa ngo hama no hambzaji. (Vaheberi 10:24, 25) Tinovangiswazve patinovhunja shamwari yedu yo phedo mazwiro atinawo. “Izwi rakanaka” rinovha ku shamwari ringatibesera kuti titamezve kuthimwa-thimwa.—Mazwi Akangwara 12:25.

17. Mukuzwirana na Vaheberi 6:19, vetero yedu yo Umambo inotibeseresa kudini kuti tirambe takagajana patinosongana no zvineso?

¹⁷ (6) Ivanyi no vetero yakavanga. Vetero yedu yo Umambo, inoshanda “inga nanga.” Iyona inotigajanisa patinosongana no zvineso kana kuthimwa-thimwa. (Verenganyi Vaheberi 6:19.) Cimborangariranyi ngo pamusoro po kumbeji kwatinogondeswa ndi Jehovha. Pa mukuvo uwo akucinazve na umwe anozothimwa-thimwa. (Isaia 65:17) Jivonenyi mwega muri mu nyika imbza yakagajana, icikaitiki zviro zvakashata. (MIKEYA 4:4) Imwimwi mungavangisazve vetero yenyu pamunovhunja vamweni ngo pamusoro po nyika imbza. Itanyi zvese zvamunokwanisa mu basa ro kucumaera no kuita vajiji. Mukaita kudaro, munozova no “ruvetero hwenyu hucikaposeki mbhera ku magumo.”—Vaheberi 6:11.

18. Tinozosongana no zvineso zvapi kumbejiyo zve zvicinyi zvatingaita kuti tibudirire?

¹⁸ Mugumo wo nyika ino paunonga wecikhwedera, tingasongana no zvineso zvingatiita kuti tithimwe-thimwe. Vhesi yedu yo gore ro 2021, inozotibesera kuti tihwisane no zvineso zvondhozvo. Inozotibeserazve kuti tirambe takagajana ticikathembi simba redu asi tecithemba Jehovha. Mu gore rino rese ngatikhombije kuti tino rutendo ku cigondiso ca Jehovha co kuti: ‘Simba renyu rinozovha pakuramba makagajana no kundithemba.’—Isaia 30:15.