1. Zvicinyi zvinokhombija kuti mbhuri zinji nyamasi uno, ajicina rudo?

BHAIBHERI rakananga kuti mu njiku jo kupejisira vandhu vaizova “vacina rudo.” (2 Timoti 3:1, 3) Nyamasi uno, itusu tiri kuvona ciporofita ici cecikwanirisika. Inga muezaniso, vandhu vazinji vari kurambana, vari kunyangajirana zve vana vari kujizwa inga kuti avadiwi. Pikija mbhuri jinotogara pa muzi umweo, ajina ushamwari hwo phedo. Umwe mupangiri wo mbhuri wakananga kudari: “Mai, baba no vana avabhui vese. Kusiyapo zvondhozvo, vanopeja nguva yakawanda vecishandisa komputadhori, matabhureti, foni no kutamba vhidheyo gemi. Pikija mbhuri iji jinogara pa muzi wondhowo avatonasi kuzivana kamare.”

2-3. (a) Mukuzwirana no VaRoma 12:10, tinodikana kukhombija rudo hwo ukama kuno ani? (b) Zvicinyi zvatinozovona pa musoro uwu?

² Itusu atidi kuva inga vandhu vazinji vo nyika ino vacina rudo. (VaRoma 12:2) Kusiyapo zvondhozvo, tinoda kusakurira rudo hwo ukama, kuciripi ku vo mbhuri yedu basi, asi ku hama no hambzaji jedu jo mu ungano. (Verenganyi VaRoma 12:10.) Rudo hwo ukama icinyi? Gama iri rinosanangura mushovo wo rudo unokhombijwa ku vandhu vo mbhuri yondhoyo. Uwu, ndiwona mushovo wo rudo watinodikana kukhombija kuno hama no hambzaji jedu. Patinokhombija rudo hwo ukama, tinonga tecibesera kuti vandhu vese vashandire Jehovha pamwepo vakabatana.—MIKEYA 2:12.

³ Kuitira kubesereka no kuvona manera otingakhombija rudo hwo ukama, ngatende tivone muezaniso munganani jo mu Bhaibheri.

4. Nduyo 103:8, inotivhunjenyi ngo pamusoro po rudo hwa Jehovha?

⁴ Bhaibheri rinotivhunja kuti Jehovha ano mugariro jaushoni maningi. Inga muezaniso, irona rinonanga kuti “Mwari,  rudo.” (1 Johani 4:8) Patinoziva izvi ngo pamusoro pa Jehovha, zvinotiita kuti tide kuva shamwari jake. Asi Bhaibheri rinotivhunjazve kuti Jehovha “wakazara ngo rudo.” (Verenganyi Nduyo 103:8.) Izvi zvinovonesa kamare kuti Jehovha anotida maningi!

5. Jehovha anokhombijisa kudini unyasha zve itusu tingamutevejeresa kudini?

⁵ Vonanyi kuti Nduyo 103:8, inobatanija rudo hwa Jehovha no mugariro umweni unotiita kuti tikhwedere phedo naye, unyasha. (Exodo 34:6) Njira imwe yaanokhombija ndiyona Jehovha unyasha hwake ngo yo kutiregerera patinoposa. (Nduyo 51:3) Mu Bhaibheri gama ro kuti unyasha rinoreva zvizinji kusiyapo basi kuregerera mundhu waita ciri cese cakashata. Unyasha i mazwiro o mukati kamare, anoita kuti mundhu paanovona mundhu ecineseka ade kumubesera. Jehovha anotivhunja kuti cido caanaco co kuda kutibesera cakakura maningi kupinda cido cina mai pa kuda kubesera mwana wavo. (Isaia 49:15) Patinonga tecineseka, unyasha hwa Jehovha unomuita kuti ade kutibesera. (Nduyo 37:39; 1 VaKorinto 10:13) Tingakhombija unyasha kuno hama no hambzaji jedu ngo kujiregerera no kutama kusuruvara pajinotinyangajisa. (VaEfeso 4:32) Asi njira huru kamare, yatingakhombija ndiyona unyasha ku hama jedu, ngo yo kujibesera pajinosongana no zvineso. Rudo paunotiita kuti tikhombije unyasha ku vamweni, tinonga tecitevejera Jehovha muezaniso mukuru wo rudo.—VaEfeso 5:1.

6. Jonatani na Dhavhidhi vakakhombijisa kudini rudo umwe kuno umweni?

⁶ Bhaibheri rino muezaniso jo vandhu vacikazivi kukwana vakakhombija rudo. Vonanyi muezaniso wa Jonatani na Dhavhidhi. Bhaibheri rinoti: “Mwoyo wa Jonatani wakadisisa Davidi, wakamuda inga kujida kwake.” (1 Samueli 18:1) Jehovha wainga wakasana Dhavhidhi kuti ave mambo. Asi pasure pazvo, Sauri wakava no ushanje na Dhavhidhi woeja  kumuuraya. Asi Jonatani mwana wa Sauri aazivi kubatana na babake pa kuda kwavo kuuraya Dhavhidhi. Jonatani na Dhavhidhi vakagondesana kuti vaizoenderera mberi vari shamwari no kubesana nguva jese.—1 Samueli 20:42.

7. Zvicinyi kangaije zvaizoita kuti Jonatani na Dhavhidhi vatame kuva shamwari?

⁷ Zvinoshaimisa maningi kuvona kuti Jonatani na Dhavhidhi vainga no ushamwari uwu wo phedo, kuveni painga no zviro zvimweni zvaizoita kuti ivona vatame kuva no ushamwari wakadari. Inga muezaniso, Jonatani wainga no makore anodarika 30 kupinda Dhavhidhi. Izvo kangaije zvaizoita kuti Jonatani arangarire kuti, azviiti kuti ndive no ushamwari no cimujaha ici cicikazivi ciri cese mu upenyu. Asi, Jonatani aazivi kutaja Dhavhidhi ngo njira iyi, iyena waireremeja maningi Dhavhidhi.

8. Ngenyi munorangarira kuti Jonatani wainga shamwari yaushoni maningi ya Dhavhidhi?

⁸ Kangaije Jonatani waizova no ushanje na Dhavhidhi. Inga mwana wa Mambo Sauri, Jonatani kangaije waizogara ecindonanga kuti ndini ndinodikana kuva mambo pasure pa babangu. (1 Samueli 20:31) Asi, Jonatani waijidodokesa, cimwenizve wainga wakagondeka kuna Jehovha. Ngokudaro, iyena wakanasa kubesera Jehovha ngo kusana kwake Dhavhidhi inga mambo waitevera. Cimwenizve iyena wainga wakagondeka ka Dhavhidhi, pikija izvo zvainyangajisa maningi Sauri.—1 Samueli 20:32-34.

9. Kunanga kuti Jonatani waivona Dhavhidhi inga muvengi? Sananguranyi.

⁹ Zvecivoneka kuti Jonatani waida maningi Dhavhidhi, iyena aacaimuvona inga muvengi. Jonatani wainga no cicunge zve wakakwanisa kuwina hondo jakawanda. Cimwenizve, waikwanisa ushoni kushandisa mupasha. Iyena na baba wake Sauri, vaizivika maningi inga vandhu “vaigogomesesa inga hokotora” zve “vaivanga kupinda mbondoro.” (2 Samueli 1:22, 23) Izvo kangaije zvaizoita kuti Jonatani agume pakujikuja ngo zvese zvaushoni zvaakaitari. Asi Jonatani wakaita zviro mu njira yakasiyana, ngo kutama kuphikizana na Dhavhidhi no kuva no ushanje. Mukusiyana, Jonatani waidakarira maningi cicunge cainga na Dhavhidhi no kuthemba kwaaita Jehovha. Inga muezaniso, Dhavhidhi paakauraya Goriati, Jonatani wakatanga kuva no ushamwari wo phedo naye. Tingakhombijisa kudini rudo hwakadari kuno hama no hambzaji jedu?

10. Zvinoda kunangenyi ‘kudisana ngo mwoyo wese’?

¹⁰ Bhaibheri rinotivhunja kuti tinodikana ‘kudisana ngo mwoyo wese.’ (1 Pedru 1:22) Jehovha wakatigajira muezaniso waushoni maningi ngo pamusoro pazvo. Rudo hwake hwakavanga maningi zvokuti apana ciri cese cingatiita kuti titame kuva takagondeka kwaari. (VaRoma 8:38, 39) Gama ro cigiriki ro kuti ‘ngo mwoyo wese,’ rinovonesa kuti mundhu anovangisira maningi kuti akhombije rudo. Nguva jimweni, zvinonesa padoko kukhombija rudo kuno hama no hambzaji jedu. Vandhu vamweni pavanotinyangajisa, tinodikana kwenderera mberi ‘tecikorondhana ngocedu, ngo rudo, tecivangirira kugara no mujimu umwewo, ngo rubatano no rugarisiko.’ (VaEfeso 4:1-3) Kudari tikavangisira kuti tive ‘takagarisika’ no hama no hambzaji jedu, zvinozotiita kuti titame kubatisisa maningi zvavanoposa. Tinozoita zvese zvatinokwanisa kuti tivone hama jedu inga manera ajinovoniwa ndi Jehovha.—1 Samueli 16:7; Nduyo 130:3.

11. Ngenyi kukhombija rudo hwo ukama nguva jimweni kunonesa?

 ¹¹ Azvizivi kureruka kukhombija rudo hwo ukama kuno hama no hambzaji jedu, maningi-ningi pavanoposa. Ciri kuvoneka inga kuti ici cakavavo cineso co Makristu amweni o muzana ro kutanga. Inga muezaniso, zvinovoneka inga kuti Evhodhia na Sintike avacainga no cineso povaishanda “pa mutivi pa [Pauro]” vacicumaera masoko akanaka. Asi, ngo thangwe riri rese vo vaviri avacaizwana. Ngokudaro, Pauro wakavangwaja kuti ‘vave no murangariro umwewo kuna Mwari.’—VaFilipi 4:2, 3.

12. Tingakhombijisa kudini rudo hwo ukama kuno hama no hambzaji jedu?

¹² Tingakhombijisa kudini rudo hwo ukama kuno hama no hambzaji jedu nyamasi uno? Patinoziva ushoni hama no hambzaji jedu, tinozokwanisa ushoni kuvazwisisa no kuvakhombijira rudo hwo ukama. Makore edu no zvirovejeso zvedu azvidikani kutiphingaija pa kukhombija rudo uhu. Ceujanyi kuti Jonatani na Dhavhidhi vaisiyana no makore anokwana kuita 30. Asi pikija zvakadaro, ivona vakava no ushamwari wo phedo kamare. Mu ungano mwenyu, kunanga kuti muno hama yaamusharuka kana iri mujaha wamaidakarira kuva no ushamwari nayo here? Ngo kuita kudaro, mungakhombija kuti imwimwi ‘munoda hama.’—1 Pedru 2:17.

13. Ngenyi azvikwanisiki kuva no ushamwari no vese mu ungano?

¹³ Waro kukhombija rudo kuno hama no hambzaji jedu zvinoda kureva kuti tinozova no ushamwari no vese mu ungano? Haiwa, andizvopi. Azvizivi kushata kuva no ushamwari no vaya vano zvido zvakaezana no zvedu totama kuva no ushamwari no vamweni. Jesu waidanija vajiji vake vese kuti “shamwari,” asi iyena waida maningi Johani. (Johani 13:23; 15:15; 20:2) Asi Jesu aacaitira zviro zvakanaka basi kuna Johani. Inga muezaniso, Johani no hama yake Jakobo povakaviya kokumbira kuti vave no zvigaro zvakakhwirira mu Umambo hwa Mwari, Jesu wakavavhunja kudari: “Kaveta kugara pa mukono wangu wo muho, dangani wo boxwe, asi  inini ndinopa.” (Marco 10:35-40) Tevejeranyi Jesu, mucaitira basi zvakanaka ku shamwari jenyu jo phedo. (Jakobo 2:3, 4) Ngokuti zvondhozvo zvinoviisa mujimu wo kukashana, zviro zvicikadikani kuitwa mu ungano yo Cikristu.—Juda 1:17-19.

14. Mukuzwirana no VaFilipi 2:3, cinyi cinozotibesera kuti titame kuva no mujimu wo kuphikizana?

¹⁴ Patinokhombija rudo wo ukama kuno hama no hambzaji jedu, tinoita kuti ungano itame kuva no mujimu wo kuphikizana. Ceujanyi kuti Jonatani aazivi kuphikizana na Dhavhidhi, aazivi kuvona Dhavhidhi inga muvengi. Tese tingatevejera muezaniso wa Jonatani. Atidikani kuvona hama jedu inga vavengi ngo ndava yo zviro zvavanokwanisa kuita, asi ‘ngo kuthiva mwoyo tinodikana kuvavona inga vakuru.’ (Verenganyi VaFilipi 2:3.) Ceujanyi kuti tese tingakwanisa kuita ciri cese cingabesera ungano yedu. Kudari tikaenderera mberi tecizvidodokesa, tinozokwanisa kuvona mugariro jakanaka jino hama no hambzaji jedu no kubesereka ngo kugondeka kwavo.—1 VaKorinto 12:21-25.

15. Majijenyi ngo zvakaitika na hambzaji Tania no mbhuri yavo?

¹⁵ Pakambhera ngo kuitika ciri cese cakashata mu upenyu hwedu, Jehovha anotitondhoja ecishandisa rudo hwo ukama no besero rinovha kuno hama no hambzaji jedu. Vonanyi zvakaitika no mbhuri imweni ngo mu sabudu povainga vecivha ku gungano ro nyika zinji ro 2019 rainga no musoro waiti, “Rudo ahuperi!”, ku Estadhus Unidhus. Hambzaji Tania, avo vainga no vana vatatu vakananga kudari: “Potainga tecifambisa karu yedu teciienda ku hoteri, karu imweni yakavia kotitaka. Apana wakakhuvazika,  asi ngo kukasika tese takabuda mu karu toima kunja. Ngo divi rimweni ro citaka takavona mundhu acitimusira mukuno kuti tiiende mu karu yake. Yainga hama yainga yecivhavo ku gungano. Aicaengepi iyona yoga yainga yaima basi. Hama jimweni shanu jainga javha ku nyika imweni kuti jiviye kovona gungano jakaimavo. Hambzaji imweni yakatikumbatira, izvo zvakaitiita kuti tijizwe ushoni kamare pa nguva iyo. Itusu takavhunja hama no hambzaji jiya kuti tainga tiri ushoni, asi ivona avazivi kutisiya tega. Ivona vakagara na itusu mbhera kuguma ko mamedhiko. Cimwenizve, vakaita zvese zvovaikwanisa kuti tive no zvese zvataida. Pa mukuvo uwu wo kunesa, takakwanisa kuvona rudo hwa Jehovha. Izvi zvakavangisa rudo hwedu kuno hama no hambzaji. Cimwenizve, zvakavangisa rudo hwedu no kubongesera Jehovha.” Mucaceuja pa vhaza iri yese yo makada besero, movona hama no hambzaji jecimukhombijiranyi rudo hwo ukama here?

16. Ngoapi mathangwe atinao anotiita kuti tienderere mberi tecikhombijirana rudo hwo ukama?

¹⁶ Ejanyi kuvona zviro zvakanaka zvinoitika pamunokhombijirana rudo hwo ukama. Tinovangisa hama no hambzaji jedu pajinosongana no zvineso. Tinobesera hama no hambzaji jedu kuti jishandire Jehovha jakadakara. Tinovonesa kuti tiri vajiji va Jesu no kubesera kuti vandhu vano mwoyo wakanaka vade kushandira Jehovha. Cikuru-kuru, tinozokuja “Baba wo unyaxa [na] Mwari wo unyarajo hwese.” (2 VaKorinto 1:3) Ngokudaro, tese ngatienderere mberi tecikhombija rudo hwo ukama!