1. Hurukuro yakaithwari mu gore ra 1935 yakapsasisa kudini mujaha umweni?

MUJAHA umweni wainga no makore 18 paakabhabhatijwa mu gore 1926. Vabari vake vainga Vajiji vo Bhaibheri, inga madanijihwe aiithwa Zvapupu zva Jehovha pa mukuvo wondhowo. Ivona vainga no vana vatatu vo rume na vaviri vokaji, vavakarera kuti vashandire Jehovha na Jesu Kristu. Inga zvaiithwa ngo Vajiji vo Bhaibheri vokare, mujaha uwu waihavo pau no kumwa vhinyu pa Majisa o Cirariro ca Mambo co gore ngo gore. Asi mavonero aaiita vetero yake akacinja paakazwa hurukuro ino musoro unoti “Uzinji Hukuru.” Hurukuro iyi yakaithwa mu gore ra 1935, ndi hama Joseph Franklin Rutherford pa gungano rakaithwa ku Washington D.C., U.S.A. Vajiji vo Bhaibheri vakajijenyi pa gungano iri?

2. Icokwadi capi cakadurujihwa ndi hama Rutherford pa hurukuro yavo?

² Pa hurukuro iyi, hama Rutherford vakavonesa vaya vaizoita divi ro “uzinji hukuru” hunonangwa pana Apokalipsi 7:9. Kuvhira pondhopo Vajiji vo Bhaibheri vairangarira kuti uzinji hukuru, cainga cikwata cimweni co vandhu caizoenda kudenga. Cikwata ici cainga cakagondeka padoko kupinda vo kuzwojwa. Hama Rutherford vakashandisa Bhaibheri kuti vasanangure kuti uzinji hukuru aucaingepi wakasanwa kuti uende kudenga, asi ainga mavhuta amweni * aizopona “pa dambujiko  guru” no kurarama kwenda no kwenda pasi pano. (Apokalipsi 7:14) Jesu wakagondesa kudari: “Ndino mabvuta amwenibze, aciripi o phandu iri: naonavo ndinoda kumakwengweneja; Iwona anozozwa izwi rangu. Pondhopo apo panozova no muxambi umwe no muhavisi umwe.” (Johani 10:16) Mavhuta amweni aya ndi Zvapupu zva Jehovha zvakagondeka zvinovetero yo kurarama kwenda no kwenda mu paradhiso pasi pano. (Mateu 25:31-33, 46) Ngatende tivone kuti zwisiso iyi yakacinjisa kudini vandhu va Jehovha kubatanijavo no hama iya yaingaya no makore anokwana kuita 18.—Nduyo 97:11; Mazwi Akangwara 4:18.

3-4. Pa gungano ro 1935, zvicinyi zvakazwisisa vazinji ngo pamusoro po vetero yavo zve ngenyi?

³ Zvakadakajisa maningi muiti wo hurukuro paakavhunjisa vapurutani kuti: “Vese vaya vanovetero yo kuzorarama pasi pano, tapota ngavamuke vaime.” Hama imweni yainga pondhopo yakavona kuti metadhi yo vandhu vainga pondhopo vakamuka, voima. Perapo Hama Rutherford vakananga kudari: “Vonanyi! Uzinji hukuru!” Pavakapera kunanga zvondhozvo vandhu vese vainga pondhopo vakadakara maningi. Vese vakamukaya vakazwisisa kuti avacaingepi vasanwa kuti vaende kudenga. Ivona vaiziva kuti avacaingepi vakazojwa ngo mujimu mucena wa Mwari. Pa njiku yakatevera yo gungano vandhu vanokwana kuita 840 vakabhabhatijwa. Vazinji vavo vainga vo mavhuta amweni.

⁴ Pakupera ko hurukuro iyi, mujaha watanangaya pa kutanga no zviuru zvimweni zvo vandhu, vakaregera kuha pau no kumwa vhinyu pa Majiisa o Cirariro ca Mambo. Vazinji vaingavo no mazwiro akafanana no mazwiro ainga no hama imweni yakananga kudari: “Cirangarijo co 1935, cakava co kupejisira caandakaha pau no kumwa vhinyu. Ngokuti ndakazwisa kuti Jehovha aacaingepi washandisa mujimu wake mucena kuti andipe vetero yo kwenda kudenga. Asi ndainga no vetero yo kupona pasi pano no kubesera kuti nyika ino ive paradhiso.” (VaRoma 8:16, 17; 2 VaKorinto 1:21, 22) Kuvhira pondhopo, uzinji hukuru wakatanga kuengejeka. Cimwenizve, ivona vakatanga kushanda no vokuzojwa vainga vakasara * pasi pano.

5. Jehovha anovona kudini vayani vakaregera kuha pau no kumwa vhinyu pa Cirangarijo?

⁵ Jehovha wakavona kudini vaya vakaregeraya kuha pau no kumwa vhinyu pa kupera ko gore ro 1935? Jehovha anovona kudini vandhu vari kubhabhatijwa nyamasi uno perapo voha pau no kumwa vhinyu, asi pa kufamba ko nguva vozwisisa kuti avazivi kuzojwa ngo mujimu mucena? (1 VaKorinto 11:28) Vamweni vanoha pau no kumwa vhinyu ngo kuti avanasi kuzwisisa vetero yavo. Asi pavanoziva kamare kuti ivona vainga veciposa, vosiya kuha pa no vhinyu, voenderera mberi vecishandira Jehovha vakagondeka, Jehovha anovaverenga inga mavhuta amweni. Pikija vaciripizve kuha pau no kumwa vhinyu, ivona vari kuenderera mberi vecienda ku Cirangarijo. Ngokuti vanoda kubongesera ngo zvese zvavakaitihwa ndi Jehovha na Jesu.

6. Jesu wakavhunja ngirozi kuti jiitenyi?

⁶ Zvecivoneka kuti dambujiko guru riri kukhwedera, zvinovangisa maningi kuvonazve zvakatahwa pana Apokalipse 7 inobhuyaya ngo pamusoro po vo kuzojwa no uzinji hukuru hwo mavhuta amweni. Jesu wakavhunja  ngirozi kuti jienderere mberi jakacijikira mbhepo murongomuna jo kuparaja. Ijona jaidikana kubata mbhepo iji mbhera vokuzojwa vese vapere kudihwa cidhindho. (Apokalipsi 7:1-4) Inga mupfupo wo kugondeka kwavo, hama ja Kristu jo kuzojwa, jinozova mambo no vapiri kudenga. (Apokalipsi 20:6) Jehovha, Jesu no ngirozi, vese ava vanozodakara maningi ngo kuvona zana na makumarongomuna na varongomuna o zviuru zvo vokuzojwa veciashira mupfupo wavo wo kwenda kudenga.

7. Mukuzwirana na Apokalipsi 7:9, 10, Johani wakavonenyi zve ivona vaiitenyi? (Vonanyi pikica yo pakapa.)

⁷ Pakupera kubhuya ngo pamusoro po majimambo no vapiri vanokwana kuita 144.000, Johani wakavona ciro cinoshamaisa maningi, “uzinji hukuru” hwainga hwapona pa Armagedhoni. Mukusiyana no cikwata co kutanga, cikwata cocipiri, cainga cakakura maningi zve cainga cicikaverengeki. (Verenganyi Apokalipsi 7:9, 10.) Ivona vainga “vakasimira nguvo jakacena.” Izvi zvaikhombija kuti ivona avazivi kujipsipisa ngo nyika ino ya Sathana. Ivona vakaenderera mberi vakagondeka kuna Mwari na Kristu. (Jakobo 1:27) Ivona vaikhuwa ngo ndava yo zviro zvavainga vaitihwa ndi Jehovha na Jesu, Vhuta ra Mwari. Vakamusa matavi o mucindu mu nyara vecikhombija mudakaro ngo kuziva kuti Jesu, wainga Mambo wakagajwa ndi Jehovha.—Ezanisiranyi na Johani 12:12, 13.

8. Apokalipsi 7:11, 12, inotivhunjenyi ngo pamusoro po mbhuri ya Jehovha yo kudenga?

⁸ Verenganyi Apokalipsi 7:11, 12. Zvicinyi zvakaitika no mbhuri ya Jehovha kudenga poyakavona uzinji hukuru? Johani wakavona kuti vese kudenga vainga vakadakara, vecikuja Mwari pavaivona uzinji hukuru. Mbhuri ya Jehovha yo kudenga, inozodakara ngo kuvona kukwanirisika ko civoniso ici, uzinji hukuru pahunozoponeswa pa dambujiko guru.

9. Mukuzwirana na Apokalipsi 7:13-15, zvicinyi zviri kuithwa ngo uzinji hukuru wari?

⁹ Verenganyi Apokalipsi 7:13-15. Johani wakatara kuti vandhu vaiumba cikwata co uzinji hukuru, vainga ‘vakapaja no kucenesa nguvo javo mu ngazi yo Bvuta.’ Izvi zvinoreva kuti ivona vano hana yakacena no mugariro wakarungama pamberi pa Jehovha. (Isaia 1:18) Ivona vakajipira vobhabhatijwa, vova no rutendo hwakavanga ku muripo wa Jesu no kuva no ushamwari na Jehovha. (Johani 3:36; 1 Pedru 3:21) Izvo ndizvona zvinovaitisa kuti vafanere kuima pamberi po dendemaro ra Mwari veciita basa rakacena pasi pano, “usiku no masikati.” Pikija wari, ivona vanovangisira pa kuita basa guru ro kucumaera Umambo no kuita vajiji vecidira pa kutanga zvinodiwa zvo Umambo hwa Mwari.—Mateu 6:33; 24:14; 28:19, 20.

10. Uzinji hukuru huno cokwadi cenyi zve ngocapi cigondiso cavanozovona cecikwanirisika?

¹⁰ Uzinji hukuru hunovha ku dambujiko guru huno cokwadi co kuti Mwari anozoenderera mberi ecivataja. Ngokuti “Wiya anogara pa dendemaro anozovakorondha mu tende yake.” Cigondiso ciri kuvetehwa ngo mavhuta amweni kuvhira kare cinozokwanirisika kamare. Cigondiso cavari kuvetera cinonanga kuti: “[Mwari] anozopukusa misoji yo mu meso mavo. Akucazovi no kufa nokuti mariji, kurira nokuti kuhwaja.”—Apokalipsi 21:3, 4.

11-12. (a) Inga zvinonangwa pa Apokalipsi 7:16, 17, makomborero api anozoashihwa ngo uzinji ukuru? (b) Zvicinyi zvinoitwa ngo mavhuta amweni zve ngenyi?

¹¹ Verenganyi Apokalipsi 7:16, 17. Wari kamare vashandiri vazinji va Jehovha vari kutambujika. Ngokuti avaripi kuwana mare inokwana kuti vatenge zvokuha zvinodiwa, kana kuhwisana no zvineso zvinobahwa ngo kudihwa  mu kadheya, pomwe no hondo. Vamweni vari kudihwa mu kadheya ngo ndava yo rutendo hwavo. Asi uzinji hukuru huri kudakara ngokuziva kuti hunozopona pa kuparajwa ko nyika ino yakashata. Nguva jese ivona vanozova no zvokuha zvakawanda zvo kumujimu no zvokunyama. Jehovha paanozoparaja nyika ino yakashata ya Sathana, iyena anozova no cokwadi co kuti uzinji hukuru, hwakajiviririka ku ushungu hwake, uwo wakadari inga ‘kupisa kukuru.’ Dambujiko guru parinopera, Jesu anozoita kuti vese vaponaya pa dambujiko guru, vaende koomwa “kumwa yo uhomi” hucingaperi. Rangariranyi basi: Uzinji hukuru hunovetero inoshamaisa. Mabhiriyoni o vandhu vanonga vacararama kangaije avacazofizve!—Johani 11:26.

¹² Mavhuta amweni anovetero inoshamaisa maningi. Izvi zvinozovaita kuti vabonge Jehovha na Jesu! Ivona avasani upenyu hwo kwenda kudenga. Pikija Jehovha acizivi kuvasana kuti vaende kudenga, iyena anovada inga madire aanoita vokuzojwa. Vese, vokuzojwa no vomavhuta amweni vanokuja Mwari na Kristu. Njira imwe yavangaita ndiyona izvi ngo yokwenda ku Majiisa o Cirariro ca Mambo.

13-14. Ngenyi vandhu vese vanodikana kwenda ku Cirangarijo co kufa ka Kristu?

¹³ Mu makore ano, pa vandhu vanokwana kuita 1.000 vanoenda ku Cirangarijo, umwe basi ngaanoha pau no kumwa vhinyu. Izvo zvinoreva kuti mu ungano zinji kutenderera pasi pese, ajina mundhu anoha pau no kumwa vhinyu. Zvinovonesazve kuti vazinji vanoenda ku Cirangarijo, vano vetero yo kupona pasi pano. Waro ngenyi ivona voenda ku Cirangarijo? Ivona voita zvondhozvo ngo thangwe rakaezana rinoita kuti vandhu vaende kumucadho wo shamwari. Ivona vanoenda ku mucadho ngokuti vanoda kutatija kuti vanoda vandhu vari kucadharo no kubesera kuti ivona vakwanise kucadha. Mukufananavo, vo mavhuta amweni vanoenda ku Cirangarijo ngokuti vanoda kukhombija rudo hwavo no kubesera Kristu pomwe no vokuzojwa. Ciro cimwenizve cinoita kuti vo mavhuta amweni vaende ku Cirangarijo, ngo cokuti vanoda kubongesera ngo muripo wa Jesu. Ngokuti muripo ondhoo, ndiwona unoita kuti ivona vazopone pasi pano kwenda no kwenda.

 ¹⁴ Thangwe rimweni rinoita kuti vo mavhuta amweni vaende ku Cirangarijo, ngo rokuti ivona vanoda kuzwira mupango wa Jesu. Jesu paakaita Majisa o kutanga o Cirariro ca Mambo no vapostori vake vakagondeka, iyena wakavavhunja kudari: “Itanyi ibzi mucindiceukijira.” (1 VaKorinto 11:23-26) Ngokudaro, mavhuta amweni anoenderera mberi ecienda ku Cirangarijo, vokuzojwa vamweni pavanonga vaciri pasi pano. Cimwenizve, vo mavhuta amweni vanokoka vvandhu vakawanda kuti vaendevo ku Cirangarijo.

15. Zvicinyi zvatinodikana kuita kuti tikuje Mwari na Kristu pa Cirangarijo?

¹⁵ Pa Cirangarijo, itusu tino mukana wo kukuja Mwari na Jesu patinonga tecimba no kuita mukumbiro. Hurukuro yo Cirangarijo gore rino, ino musoro unoti: “Bongeseranyi ngo zvese zvamakaitihwa ndi Mwari na Kristu!” Iyona inozoengejera kubongesera kwedu Jehovha na Kristu. Pau no vhinyu pazvinonga zvecifambiswa, tese tinozoceukija kuti pau inoimirira muviri wa Jesu, vhinyu inoimirira ngazi yake. Cimwenizve, inotiita kuti tirangarire ngo pamusoro po rudo wakatakakhombijihwa ndi Jehovha, paakatendera kuti mwana wake, atifire. (Mateu 20:28) Wese anoda Baba wedu vo mugore pomwe no mwana wake, anozoenda ku Cirangarijo.

16. Vokuzojwa no vomavhuta amweni vakaezana papi?

¹⁶ Musiyano uri pakati po vokuzojwa no vo mabuta amweni, andiwopi unoita kuti ivona vave vanosirira kuna Mwari. Vese vanosisira kuna Mwari. Tinoziva zvondhozvo ngokuti mutengo wakaripwa ku vokuzojwa no ku mavhuta amweni, ndiwona wondhowo, upenyu wo Mwana wake anodiwa. Musiyano uri pakati pavo, ngo wo kuti ivona vano vetero yakasiyana. Vese vanodikana kuramba vakagondeka kuna Mwari no kuna Kristu. (Nduyo 31:24) Cimwenizve, ceujani kuti mujimu wa Mwari, unoshanda mu njira yakaezana kuno vese. Izvo zvinoreva kuti Jehovha anoshandisa mujimu wake mucena kuti abesere umwe na umwe pa zviro zvaanoda.

17. Vokuzojwa vaciri wari pasi pano vari kuveterenyi?

¹⁷ Makristu o kuzojwa aazivi kubahwa no vetero yo kwenda mugore. Ivona vakaipuwa ndi Mwari. Ivona vanorangarira ngo pamusoro po vetero yavo, vanoita mukumbiro ngo pamusoro payo no kudakara kuti vazoashire mupfupo wavo wo mugore. Ivona avatozvizivi kuti muviri wavo unozova wakadini vakaenda mu gore. (VaFilipi 3:20, 21; 1 Johani 3:2) Pikija zvakadaro, ivona vari kuvetera kusongana na Jeovha, Jesu, ngirozi pomwe  no vamweni vokuzojwa. Vari kuveterazve kugara pa ndau yavo mu Umambo hwo mugore.

18. Mavhuta amweni ari kuveterenyi?

¹⁸ Mavhuta amweni ari kuvetera kupona pasi pano kwenda no kwenda. Ici i ciro cinodiwa ngo vandhu vese. (Mucumaeri 3:11) Ivona vari kuvetera njiku yavanozobesera kucinja nyika ino ive paradhiso. Ivona vari kuvetera ngo cido cese njiku yo vanozokwanisa kuvaka nyumba javo, kusima zviri zvese mu jhardhim yavo no kugara no vana vavo vano uhomi wakakwana. (Isaia 65:21-23) Ivona vari kuvetera kufamba mu ndau jakasiyana-siyana jo nyika, vecivona matundu, makwasha, jombe no kujija zviro zvakawanda ngo pamusoro po zvese zvakasika Jehovha. Asi cinovadakajisa pa zvese izvi, ngo cokuziva kuti ushamwari hwavo na Jehovha unozoenderera mberi wakavanga.

19. Cirangarijo cinotipa mukana wo kuitenyi? Gore rino cinozoitwa rini?

¹⁹ Jehovha wakapa umwe nga umwe wo vashandiri vake vakajipira vetero inoshamaisa yo kumbeji. (Jeremia 29:11) Cirangarijo co kufa ka Kristu, cinopa tese mukana mukuru wo kukuja Mwari na Kristu ngo ndava yo zvese zvavakaitihwa kuti vakwanise kuva no upenyu ucingaperi. Pacina kukana-kana, Cirangarijo ndi musongano unosisira maningi unobatanija Makristu okadi-kadi. Icona cinozoitwa mu mavira zuva o Sabudu njiku 27 ya Março, gore ro 2021. Gore rino, vazinji vanozokwanisa kwenda ku musongano uu unosisira. Vamweni vanozoendeyo pikija veciteverehwa. Vamweni vanotoceukija kufa ka Kristu, no vari mu kadheya. Tino cokwadi cokuti Jehovha, Jesu no mburi yese yo mugore vanonga vecitivona. Ngo kudaro, tinovetera kuti mundhu umwe nga umwe, cikwata no ungano vave no Cirangarijo caushoni!