Sakuriranyi Usizi ku “Vandhu Vese”
JESU paakajijisa vajiji vake kucumaera masoko akanaka, wakavangwaja kuti asipi nguva jese vandhu vaizoda kuvazwa. (Luka 10:3, 5, 6) Zvondhozo zvinoitikavo mu mushando wedu. Vandhu vamweni vatinosongana navo vangaguma pa kuva vanonyangajwa kana kuvereketa ngo hasha. Zve pavanodavira ngo njira iyi, zvingatinesera maningi kuva no usizi no kuda kuvacumaera.
Mundhu ano usizi anovona zvinodiwa no zvineso zvo vamweni, anovazwira pena zve anoda kuvabesera. Asi, zvicinyi zvinozoitika kudari tikaruza usizi hwedu ku vandhu vatinosongana navo mu mushando wedu? Tinozoruza kuvangisira kwedu, kuda kunanga kuti, atizovi no cidaka-daka co kuda kuvacumaera nee atizodi kuvabesera. Tingaezanisa kuvangisira kwedu no muriro. Kuti muriro urambe wecibwaka, unodikana kuengejehwa huni. Mukufanana, kuti kuvangisira kwedu kuve kwakavanga, tinodikana kuva no usizi.—1 VaTesalònika 5:19.
Tingajijira kudini kuva no usizi, pikija pazvinonga zvecinesa? Ngatibhuisane ngo muezaniso mutatu jatingatevejera: Jehovha, Jesu no mupostori Pauro.
TEVEJERANYI USIZI WA JEHOVHA
Ko zviuru zvo makore, vandhu vari kunanga manyepo ngo pamusoro pa Jehovha. Asi iyena anoramba ari ‘munasi kuno vacingabongi no vakaxata.’ (Luka 6:35) Anokhombijisa kudini kunaka mwoyo? Iyena anosengerera no vandhu vese. Jehovha anoda kuti “vandhu vese” vaponeswe. (1 Timoti 2:3, 4) Pikija Jehovha anonyenya ushati, vandhu vanosisira maningi kwaari zve aadi kuti ivona vafe.—2 Pedru 3:9.
Jehovha anoziva kuti Sathana anokwanisa ushoni kuita kuti vandhu vatende manyepo. (2 VaKorinto 4:3, 4, Shanduro yeNyika Itsva) Vazinji vakajijiswa manyepo ngo pamusoro pa Mwari kubvira povainga vadoko kamare. Ngokudaro, manera ovanorangarira no kuzwa angavaita kuti vaneseke pa kuda kuashira cokwadi. Asi, Jehovha anoda kamare kuvabesera. Tinozviziviza kudini?
Inga muezaniso, rangariranyi mazwiro akava na Jehovha ngo pamusoro po vandhu vo dhorobha ro Ninivhe. Pikija ivona vainga vakashata, Jehovha wakabvunja Jona kudari: “Nditame kuitira usizi, here, Ninive, guta guru, rino kupinda zana na makumaviri o bziuru bzo vandhu, vacikazivi kusianisa nyara yo muho no nyara yo boxwe, no nyamavo jakawanda?” (Jona 4:11) Jehovha wakazwira pena vandhu avo, vandhu avacaiziva cokwadi ngo pamusoro pake. Ngokudaro, iyena wakatuma Jona kuti avangwaje.
Tino mazwiro akafanana no a Jehovha ngo pamusoro po vandhu. Ivona vanosisira maningi. Inga ndi Jehovha, tinoda kamare kuvabesera kuti vajije ngo pamusoro pake pikija pa zvinovoneka inga kuti avazoashiri cokwadi.
TEVEJERANYI USIZI WA JESU
Inga ndi Babake, Jesu wakazwira pena vandhu ngokuti vainga “vakaremba vecizirika, inga mabvuta acina muhavisi.” (Mateu 9:36) Jesu waizwisisa kuti ngenyi vainga pa mugariro wondhowo. I ndava yo kuti vatungamiriri vavo vo zviara vaivataja mu njira yakashata zve vaivajijisa manyepo. Zve pikija Jesu waizviziva kuti vazinji vaiviya komupurutana avacaizoguma pa kuva vateveri vake ngo mathangwe akasiana-siana, iyena aazivi kusia kuvajijisa zviro zvizinji.—Marco 4:1-9.
Mucadoremba kudari ari wese akaramba kumupurutana pa bvaza yo kutanga
Mugariro paunocinja mu upenyu, vandhu kangaije vangatanga kuvona cokwadi mu njira yakasiana
Vandhu pavanodavira ngo njira yakashata masoko edu, tinodikana kueja kuvazwisisa kuti ngenyi vaita kudaro. Kangaije vano mavonero akashata ngo pamusoro po Bhaibheri kana ngo pamusoro po maKristu ngokuti vakambovona vamweni vaidanijwa maKristu asi vaiita zviro zvakashata. Vamweni kangaije vakazwa manyepo ngo pamusoro po zvatinotenda. Pikija vamweni vangatothya kuti ukama kana vandhu mu ndharaundha yavo vanozovaseka kudari vakabhuya nesu.
Vamweni vatinosongana navo kangaije vakasongana no zviro zvakavanesa maningi. Imwe hambzaji iri misionario inodanijwa Kim yakananga kuti vandhu vazinji mu ndima yayo vakapokonyoka mu hondo zve vakaruza zviro zvese zvavainga nazvo. Avacaingepi no vetero yo kumbeji. Vainga vakanyangajwa zve apana no mundhu wovaithemba. Vandhu mu ndima yondhoyo kazinji vanoeja kurambisa Zvapupu kucumaera. Pa bvaza imweni, Kim paainga mu mushando wakatotakwa ndivona.
Hambzaji Kim vaizorambisa kudini vano usizi, pikija pavaishaisha kutajwa? Nguva jese ivona vaieja kuceukija pa Mazwi Akangwara 19:11, panoti: “Mundhu wakangwara anononoka kuceneka.” Pavanorangarira ngo pamusoro po zvakasongana no vandhu vo ndima yavo, zvinovabesera kuti vavazwire uzisi. Asipi vese vovaisongana navo vairamba. Mu ndima yondhoyo, vano hwiririro jimweni jaushoni.
Tingazvibvunjisa kuti: ‘Kudari andicaiziva cokwadi, ndaizodavirisa kudini pandaizogumihwa ngo Zvapupu zva Jehovha?’ Inga muezaniso, kudari notainga takazwa manyepo mazinji ngo pamusoro po Zvapupu keni? Kangaije taizoshaishavo kudavira zve taizoda kutajwa ngo usizi. Jesu wakananga kuti tinodikana kutaja vamweni mu njira yataizoda kutajwavo. Ngokudaro, tinodikana kueja kuzwisisa mazwiro o vamweni zve tova vanosengerera, pikija pazvinonga zvecinesa.—Mateu 7:12.
TEVEJERANYI USIZI WA PAURO
Mupostori Pauro wakakhombija usizi pikija vandhu avacaiashira ushoni zvaaicumaera. Ngenyi? Ngokuti wakaceukija zvaakambova. Iyena wakananga kudari: “Kare ndainga muxori wa Mwari no mutevereri wakaxata. Kaveta Mwari wakandiitira uriji; ngokuti andicaizivepi bzondaiita, mu kutama kutenda kwangu.” (1 Timoti 1:13) Pauro, waiziva kuti Jehovha na Jesu vakamukhombijira unyasha ukuru maningi. Iyena waikwanisa kuzwisisa vandhu vaidaya kumurambisa kucumaera, ngokuti kare waingavo no mazwiro ondhoo.
Nguva jimweni, Pauro waisongana no vandhu vaitenda kamare majijisiro o manyepo. Ngoapi akava mazwiro ake? Pana Maitiro o Vapostori 17:16, tinoverenga kuti, paainga ku Atena iyena “waivira, pakuvona guta rakazara ngo bzithombe.” Pikija zvakadaro, Pauro wakashandisa zvaimunyangajisaro inga njira yo kujijisa vandhu. (Maitiro o Vapostori 17:22, 23) Iyena wakacinja macumairiro ake zve wakavereketa ngo njira jakasiyana-siyana kuno vandhu vo mugariro jakasiyana ‘kuti akwanise kuwana vamweni’ ngo maitiro ese.—1 VaKorinto 9:20-23.
Patinocumaera vandhu vanodavira mu njira icikabeseri kana vano zvitendhwa zvakashata, tingaita zvakaita Pauro. Tingashandisa zvatinoziva kuti tivabesere kujijira ngo pamusoro po “masoko akanaka, anozivisa ruponeso.” (Isaia 52:7) Imwe hambzaji inodanwa Dorothy yakananga kudari: “Mu ndima mangu, vazinji vanonanga kuti Mwari wakashata mwoyo zve anotonga vandhu. Ndinovasimba ngo ndava yo zvitendhwa zvavo zvakavanga perapo ndinovakhombija zvinonanga Bhaibheri ngo pamusoro po mugariro jo rudo ja Jehovha no zvigondiso zvake kuitira kumbeji.”
RAMBANYI ‘MECINYISA UXAIXI NGO KUITA BZAUXONI’
Patinonga tecikhwedera ku mugumo, tingaramba tecivetera kuti murangariro jo vandhu vamweni jicazobva pa kushata kwenda pa kushatisisa. (2 Timoti 3:1, 13) Asi, atidikani kuruza usizi hwedu kana mudakaro ngo ndava yo madavirire anoita vandhu. Jehovha angatipa simba kuti tirambe ‘tecinyisa uxaixi ngo kuita bzauxoni.’ (VaRoma 12:21) Umwe piyona anodanwa Jessica wakananga kuti kazinji anosongana no vandhu vanozvikuja zve vanoseka itusu no masoko edu. Iyena wakaengejera eciti: “Izvi zvinganyangaja. Pandinotanga kubhuisana, ndinoita mukumbiro ngo cinyararire kuna Jehovha ndecikumbira kuti andibesere kuvona vandhu inga zvaanoita.” Izvi zvakabesera Jessica kuti atame kubatikana pa mazwiro ake, asi arangarire mabesere aangaita vandhu.
Tiri kupsaka vandhu vanoda kuwana cokwadi
Mu kufamba ko nguva, vamweni vanozoashira besero redu no kujija cokwadi
Tinodikanavo kueja kuvangisa hama no hambzaji jedu patinonga tecicumaera najo. Jessica wakananga kuti paanonga ari mu mushando no vamweni zve umwe wavo wakamboshaisha kutajwa paaicumaera, iyena anoeja kutama kusotesesa zvondhozvo. Kusiapo izvo, iyena anobhuya ciri cese cingabesera, cakadari inga muviyo waushoni wo kucumaera kwedu pikija vamweni avadaviri ushoni.
Jehovha anozviziva kamare kuti kucumaera nguva jimweni kunonesa. Asi, iyena anodakara maningi patinotevejera unyasha hwake! (Luka 6:36) Zvokadi kamare, Jehovha aazokhombijiri usizi no kusengerera ku vandhu vo nyika ino kwenda no kwenda. Tingava no cokwadi co kuti iyena anoziva nguva yo kuviisa mugumo. Mbhera kondhono, kucumaera kwedu ngo ko kukasika. (2 Timoti 4:2) Waro ngatirambe tecicumaera no kuvangisira no kuva no usizi ku “vandhu vese.”
