Hina, kuejehwa vari vaviri basi pacina thangwe rakavanga, ndi civoniso cokuti ivona vahura vese. Ngo kudaro, kudari pacina thangwe rakavanga, panodikana kuumbwa dare ro kutonga.—1 VaKorinto 6:18.

Dare ro vakuru rinodikana kungwarira maningi mugariro umwe nga umwe, kuti rikwanise kuvona kuti panodikana kamare kuumba dare ro kutonga kana kuti haiwa. Inga muezaniso: Kunanga kuti vari kunomorari vese here? Vakambopangihwa ngo vakuru ngo kuti vakamboshaisha kutamba vese here? Ngenyi vakaejehwa vese? Vainga vakazvironga kare here? Kunanga kuti vainga vacina manera amweni, kana kuti kwaitika ciro co kuti avaicakwanisa kucitonga vega, cakadari inga ciitico co cibvumbu kana ciro co kukasika, cakaita kuti vavone kuti njira imwe basi yainga yo kuejehwa vese here? (Mucumaeri 9:11) Vakavata pacinyi? Mugariro umwe unosiyana no umweni, ngo kudaro, kungawanika masoko amweni anozopsasa civaringo cinozotemwa ngo vakuru.

Dare ro vakuru rikapera kusotesesa masoko ese aya, rinozotema civaringo co kuti panodikana kuumba dare ro kutonga kana kuti haiwa.