MU BHAIBHERI muno muezaniso jakawanda jo vandhu ‘vakarembejeka, kudari inga itisu.’ (Jakobo 5:17) Inga muezaniso, itusu tinonasa kuzwisisa zvaida kunanga Pauro, pa magama ake ari pana VaRoma 7:21-24, paakati: “Inini ndikada kuteveja bzauxoni, ndinogumihwa ngo uxaixi. . . . Yowé kondiri, mundhu wo khombo!” Zvinovangisa maningi kuziva kuti Pauro mundhu wakagondeka, wakajizwavo kudaro.

Pauro wakanangazve ngo pamusoro po mazwiro ake. Pana VaGalàsia 2:20, iyena wakananga ngo pamusoro pa Jesu eciti: “Wakandidisa no kujipira ega, ngo ndava yangu.” Munojizwavo kudaro here? Kangaije asipi nguva jese.

Kudari atiripi kujizwa ushoni ngo ndava yo zvishaishi zvotakaita kare, zvingatinesera kutendera kuti Jehovha anotida no kutiregerera. Ngokudaro, zvinozotinesera kuvona muripo wa Jesu inga cipo kwatiri. Kureva kuti Jesu anodadi kuti tivone muripo inga cipo here? Zvicinyi zvinotibesera kuita zvondhozvo? Ngatende tidavire muvhunjo muviri iji.

Hina, Jesu anoda kuti tivone muripo inga cipo kwatiri. Tingazvizivisa kudini izvi? Amborangariranyi zvakatahwa pana Luka 23:39-43, Shanduro yeNyika Itsva. Mwanarume wakakohomehwa pa danda rokutambujikira phedo na Jesu. Iyena anotendera kuti wakaita ciro cakashata. Zvinovoneka inga kuti wakaita cishaishi cikuru kamare, ngokuti kupanicwa kwakadari, kwaiitihwa vandhu vondhovo. Mwanarume uu wainga ecithya zvokuti wakadeketerera Jesu eciti: “Ceukijanyi inini mukaguma ku umambo hwenyu.”

Waro, Jesu wakaitenyi? Rangariranyi basi kuhwajihwa kwakava na Jesu paakasikisa musoro wake, wosota mwanarume wiya. Pikija ecihwajihwa, Jesu wakamunyira zve womuvangisa eciti: ‘Zvokadi inini ndinokubvunja nyamasi kuti, iwewe unozova na inini mu Paradhiso.’ Jesu waizovhunja mwanarume wiya kuti ‘Mwana wo Mundhu . . . wakaviya kopa uhomi hwake kuti aponese vazinji.’ (Mateu 20:28) Asi Jesu wakakhombija kunaka mwoyo ngokubesera mwanarume wiya kuvona kuti muripo waizomubesera pacake. Tinozvivona izvi ngo magama akashandisa Jesu, okuti “iwewe” na “inini.” Zve Jesu wakavhunja mwanarume wiya kuti unozova mu paradhiso pasi pano.

Pacina kukana-kana, Jesu waida kuti mwanarume wiya atende muripo inga cipo cake kuitira iyena kamare. Kudari Jesu wakakwanisa kuva no mazwiro akadaro no mwanarume wiya acizivi kushandira Mwari, zvokadi kamare iyena ano mazwiro ondhowo no Mukristu wakabhabhatijwa, uwo anoshandira Jehovha. Zvicinyi zvingandibesera kuthemba kuti Jesu wakafiradi inini kamare?

Zvecivoneka kuti Pauro wakapuwa basa ro kucumaera, iyena wakazwisisa kuti Jesu wakafiradi  iyena kamare. Kuitisa kudini? Iyena wakati: “Ndinobonga Kristu Jesu, Tenji wedu, wakandivangisa wondigonda no kundipa basa iri, nokunyati kare ndainga muxori wa Mwari no mutevereri wakaxata.” (1 Timoti 1:12-14) Jesu wakapa Pauro basa iri pikija no zviro zvese zvakashata zvaakaita, izvo zvakamukhohwesa kuti Jesu waimuda zve waimuthemba. Jesu wakatipavo basa ro kucumaera masoko akanaka. (Mateu 28:19, 20) Kureva kuti basa redu ringatibeseravo inga rakabesera Pauro?

Albert, uwo wakahwirijwa wari mu ungano, pasure po kugara akajingwa ko 34 o makore, wakati: “Uxaixi hwangu huri pambeji pangu. Asi, pondinonga ndecicumaera, ndinojizwa inga ndi Pauro, ndinojizwa inga kuti Jesu wandipa basa. Izvo zvinondidakajisa maningi zve zvinondibesera kuti ndive no mavonero akanaka pandinojivona, mu upenyu hwangu pomwe no kumbeji kwangu.”—Nduyo 51:5.

Allan wainga cigevenga acito atanga kujija cokwadi. Iyena wakati: “Ndinogara ndecirangarira zvese zvakashata zvondakaitira vandhu. Nguva jimweni izvo zvinosuruvarisa maningi. Asi, ndinobonga maningi Jehovha ngo kushandisa inini inga mushaishi, kuti ndicumaere masoko akanaka ku vamweni. Pandinovona vandhu vacidakarira masoko akanaka, zvinondiceukija kuti Jehovha wakanaka zve ano rudo. Ndinojizwa inga kuti iyena ari kundishandisa kuti ndibesere vandhu vamweni vano upenyu wakadari inga wondainga nawo.”

Patinonga tecicumaera, tinobatikana pa kuva no murangariro no zviito zvaushoni. Kucumaera kunotikhohwesa kuti Jesu ano unyasha no rudo zve anotithemba.

Mbhera nyika ino yakashata iparajwe, mwoyo jedu jinoenderera mberi jecititonga ngo ndava yo zvishaishi zvotakaita kare. Zvicinyi zvinozotibesera kuhwisana no mazwiro akadaro?

Jean uwo anova no mazwiro o kujipa ndava ngo maponero aakava nawo paainga musikane, anoti: “Mwari mukuru kupinda mwoyo yedu.” (1 Johani 3:19, 20) Pamunonga makasuruvara ngo ndava yo zvishaishi zvenyu, ceukijanyi kuti Jehovha na Jesu vanonasa kuzwisisa kutama kukwana kwedu kupinda itusu. Ceujanyi kuti, ivona ngo rudo hwese vakatipa muripo zve avazivi kuupa vandhu vakakwana asi vashaishi vanokhombija kukhauya.—1 Timoti 1:15.

Ngative no cokwadi co kuti muripo, uripo kuitira kutibesera. Ngokudaro ngatinase kurangarijisisa manera akataja Jesu vandhu vacikazivi kukwana no kuita zvese zvatinokwanisa kuti tikwanirise basa redu ro kucumaera. Mukaita kudaro, mucazonangavo inga Pauro kuti: Jesu “wakandidisa no kujipira ega, ngo ndava yangu.”