1-2. (a) Mukuzwirana no mupango wa Jesu uri pa Mateu 28:18-20, ngo rapi basa guru rino Makristu? (b) Ngo japi muvhunjo jicazodavihwa pa musoro uno?

PASURE po kumuswa ko vakafa, Jesu wakakumbira vajiji vake kuti vaungane pa dundhu. Izvi kangaije zvakavakahamaja maningi. (Mateu 28:16) Kangaije ndiwona mukuvo waakavonekaya “kamwe [ngo] vandhu vaipinda mazana maxanu.” (1 VaKorinto 15:6) Ngenyi Jesu wakaunganija vajiji vake? Ngokuti waida kuvapekeja basa rinosisira maningi, paakati: ‘Endanyi moita kuti vandhu vo majinja ese vave vajiji.’—Verenganyi Mateu 28:18-20, Shanduro yeNyika Itsva.

² Vajiji vakazwaya mupango wa Jesu, vakava divi ro ungano yo Cikristu muzana ro kutanga ro makore. Basa guru rovainga naro, rainga ro kubesera vandhu vakawanda kuti vave vajiji va Kristu. * Nyamasi uno, kuno ungano jinokwana kuita makumi o zviuru kutenderra pasi pese. Basa guru riri kuitwa, ndirona raitwavo ngo vajiji vokutanga va Jesu. Pa musoro uno, ticazodavira muvhunjo murongomuna: Ngenyi basa ro kuita kuti vandhu vave vajiji rinosisira maningi? Zvicinyi zvinodikana kuitwa kuti vandhu vave vajiji? Kureva kuti Makristu ese anodikana kuita basa ro kupsaka vajiji here? Ngenyi kubesera vandhu kuti vave vajiji kunoda kusengerera?

3. Mukuzwirana na Johani 14:6; no 17:3, ngenyi basa ro kuita kuti vandhu vave vajiji rinosisira maningi?

³ Ngenyi basa ro kuita kuti vandhu vave vajiji rinosisira maningi? Mundhu angava shamwari ya Mwari basi akava mujiji wa Kristu. Cimwenizve, Vandhu vanotevera Jesu vano upenyu wakanaka zve vanoimira kuva no upenyu ucikaperi kumbejiyo. (Verenganyi Johani 14:6; 17:3.) Zvokadi, i basa guru kamare. Asi zvinodakajisa ngo zvokuti, atiriiti tega. Inga zvakanangwa ndi mupostori Pauro, “itisu tiri vabeseri va Mwari.” (1 VaKorinto 3:9) Cidakajiso cakakura zvakadini catakapuwari ndi Jehovha na Jesu inga vandhu vacizivi kukwana!

4. Tingajijenyi ngo muezaniso wa hama Ivan na hambzaji Matilde?

⁴ Basa ro kuita kuti vandhu vave vajiji, ringatidakajisa maningi. Vonanyi basi muezaniso wa hama Ivan no mukaji wavo Matilde vanogara mu nyika yo Korombia. Ivona vakacumairira mujaha umweni anodanwa Davier, uwo wakavavhunja kudari: “Ndinoda kucinja maponero angu, asi andikwanisi.” Davier wainga bhokisero (mutambo wo kutakana ngo zvibhakera), waishandisa mutombo jinodakwisa, waimwa atee kurejera zve waigara na Erika inga mukaji no mwamuna. Hama Ivan vakati: “Takatanga kumuvhakacira ku cindharaundha ciri ndhambo no sidhadhi. Kuti tigume kondhoyo, taidikana kufamba nguva jakawanda tecishandisa bhasikoro, mu gwanja rakazara ngo matope. Asi Davier wakatanga kucinja murangariro wake zve Erika wakatotangavo kujija Bhaibheri.” Pa kufamba ko nguva, Davier wakasiya kushandisa mutombo jinodakwisa, kumwa doro pomwe no kuita mutambo unozwi bhokisero. Zve wakatocadha na Erika. Hambzaji Matilde vakati: “Davier na Erika povakabhabhatijwa mu gore ro 2016, takaceukija zvakanangaya Davier, ‘Ndinoda kucinja asi andikwanisi.’ Takacema ngo kudakara.” Pacina kukana-kana, kubesera vandhu kuti vave vajiji va Kristu, kunoviisa mudakaro mukuru.

5. Ngocapi ciro cokutanga catinodikana kuita kuti vandhu vave vajiji?

⁵ Ciro cokutanga catinodikana kuita kuti vandhu vave vajiji, ngo co ‘kupsaka’ vanoda kujija ngo pamusoro pa Jehovha. (Mateu 10:11) Tinokhombija kuti tiri Zvapupu zva Jehovha, patinokwanisa kucumaera vese vatinowana. Tinokhombija kuti tiri Makristu okadi, patinozwira mupango wotakapuwa ndi Kristu, wo kucumaera masoko akanaka.

6. Zvicinyi zvingatibesera kuti tibudirire mu basa redu ro kucumaera?

⁶ Vamweni vatinosongana navo vanoda kujija Bhaibheri, asi vamweni avakhombiji kudakarira pakutanga. Ngokudaro, tinodikana kupsaka manera o kumusa cidaka-daka cavo. Kuti tibudirire mu basa ro kucumaera, tinodikana kuva vandhu vanonasa kunasirira. Tinodikana kusana shwiro jinodakarihwa ngo vandhu vatinosongana navo. Perapo, topsaka manera o kutangisa mabhuyo edu, tecishandisa shwiro jondhojo.

7. Mungatangisa kudini mabhuyo no ari wese zve ngenyi zvinosisira maningi kupurukira no kukhombija nderemejo?

⁷ Inga muezaniso, mungaita muvhunjo wakadari ku mune wo muzi: “Ndaidakarira kuziva mavonero enyu ngo pamusoro po shwiro iyi. Zvineso zvatiri kusongana nazvo nyamasi uno, zviri kupsasa vandhu vazinji kutenderera pasi pese. Munorangarira kuti utongi hwo nyika ino, ungakwanisa kupeja zvineso zvese izvi here?” Perapo verenganyi Danieli  2:44. Manera amweni ngo o kuita muvhunjo uwu: “Ngo mavonero enyu, ngoyapi njira yakanaka yo kurera vana?” Tevere verenganyi Deuteronòmio 6:6, 7. Azvinenyi hazvo shwiro yapi yamasana, rangariranyi vandhu vanodaro kuzwa masokoo. Rangariranyizve basi ngo besero ramunonga mecipa ku vandhuvo. Pamunonga mecibhuya navo, zvinosisira maningi kupurukira zvavanongaro vecinanga no kureremeja mavonero avo. Mukaita kudaro, munozokwanisa kuvazwisisa zve vanozodakarira kubhuyazve nemwi.

8. Ngenyi tinodikana kuvangisira kuti tiite hwiririro?

⁸ Mundhu acito atema civaringo co kuda kujija Bhaibheri, zvingatodikana kupeja nguva yakawanda no kuvangisira pa kuita hwiririro. Ngenyi? Ngokuti nguva jimweni tinovakhanda vakabatikana ngo mabasa amweni. Cimwenizve, kangaije mungatodikana kuita hwiririro pa vhaza jakawanda mbhera mune wo muzi wotema civaringo co kuda kujija Bhaibheri. Ceujanyi kuti muti ukure ushoni, unodikana kudirijihwa nguva jese. Mukufananavo, kuti mundhu ave no rudo na Jehovha pomwe na Jesu, tinodikana kumuvhakacira nguva jese, tecibhuya naye ngo pamusoro po Bhaibheri.

9-10. Ngenyi tingananga kuti Makristu ese anodikana kuita basa ro kupsaka vaya vano mwoyo unoda kuziva cokwadi?

⁹ Makristu ese anodikana kuita basa ro kupsaka vaya vano mwoyo unoda kuziva cokwadi. Tingaezanisa basa iri no basa ro kupsaka mwana wasvejeka. Kuitisa kudini? Vonanyi basi muezaniso wakaitikadi kamare, mwana ano makore matatu wasvejeka. Vandhu vanokwana kuita 500 vakazvipira kuti vaende komupsaka. Pejisire, no papera 20 o nguva, mwana wiya wakawanika no mundhu umwe  waiitavo basa rondhoro, phedo no munda wo mabomore. Asi mundhu wiya aacaida kusimbhwa ngo kuwana kwake mwana wiya. Iyena wakati: “Kuti mwana awanike kwakadikana vandhu vakawanda vaiite basa iri.”

¹⁰ Vandhu vazinji vakadari inga mwana wiya. Ivona vakasvejeka. Ivona avana vetero asi vanoda besero. (VaEfeso 2:12) Tiri cikwata cinodarika mamiriyau masere cinobatanijwa pa kuita basa ro kupsaka vaya vanofanera. Zvingaita kuti amuto makawana henyu mundhu anoda kujija Bhaibheri. Asi, vacumaeri vamweni vanoshanda mu ndima yenyu, kangaije vakambowana mundhu anoda kujija. Hama kana hambzaji painowana mundhu atee woguma pa kuva mujiji wa Kristu, vese vakaitaya basa ro kupsaka vanovavo no mudakaro ngo ndava yazvo.

11. Pikija amutoripi kuitisa jijo yo Bhaibheri wari uno, mungabeseresa kudini basa ro kuita vajiji?

¹¹ Pikija amutoripi kuitisa jijo yo Bhaibheri wari uno, mungabesera basa iri ngo njira imweni. Inga muezaniso, pamunovona mundhu mupsa pa Nyumba yo Umambo, mungamucungamija makadakara pomwe no kumubesera kuwana pokugara. Ngo njira iyo, mungamubesera kuvona kuti rudo unotivonesa kuti tiri Makristu okadi. (Johani 13:34, 35) Mupinguro jamunopa pa musongano, pikija jakafupika hajo, jingabesera vandhu vapsa kuti vakhombijevo rutendo hwavo zvecivha pasi po mwoyo zve ngo njira inoreremejeka. Mukakwanisa, mungabudavo no vacumaeri vapsa mu basa ro kucumaera no kubesera kushandisa ushoni Bhaibheri pa kubhuya no vandhu. Pamunoita kudaro, munonga mecimujijisa kutevejera Kristu.—Luka 10:25-28.

12. Tinodikana kuva no zivo yakakurisisa kuti tikwanise kubesera vamweni kuti vave vajiji va Jesu here? Sananguranyi.

¹² Ticadorangarira kuti tinodikana kuva no zivo yakakurisisa kuti tikwanise kubesera vamweni kuti vave vajiji va Jesu. Ngenyi? Vonanyi muezaniso wa Faustina, anogara Borivhiya. Paakaziva Zvapupu zva Jehovha iyena aacaikwanisa kuverenga. Asi wari, wokwanisa kuverenga padoko. Watobhabhatijwa zve anoda kujijisa vamweni. Pa sumana, anojija Bhaibheri no vandhu vashanu. Pikija Faustina aakwanisi kuverenga ushoni kupinda vajiji vake, iyena wakabesera vandhu vatandhatu kuti mbhera kubhabhatijwa.—Luka 10:21.

13. Pikija takaremba ngo basa rotaiita, ngoapi makomborero atingava nao patinovangisira kuti tibesere vamweni kuti vave vajiji?

¹³ Makristu mazinji ano mabasa akasiyana-siyana ovanoita. Pikija zvakadaro, vanopsaka nguva kuti vaitise jijo jo Bhaibheri zve zvondhozvo zvinovapa mudakaro mukuru. Vonanyi basi muezaniso wa hambzaji Melanie. Ivona vairera vega mwana wavo wokaji  ano makore 8, ku dhorobha ro Alaska. Zve ivona vaishanda basa dhiya yese zve vaidikana kukorondha baba wavo vainga no kanseri. Hambzaji Melanie ndivona basi vainga capupu ku dhorobha ravo. Ngo ndava yazvo, ivona vaiita mukumbiro nguva jese kuti vakwanise kuwana simba ro kwenda kocumaera pikija kwecitondhora. Njiku imweni vakacumaera mwanakaji umweni waidanwa Sara zve yakamuvhunja kuti Mwari ano zina. Pa kufamba ko nguva, Sara wakatenda kujija Bhaibheri. Hambzaji Melanie vakati: “Ngo mucishanu co usiku, ndaiwanika ndakaremba. Pikija zvakadaro, inini no mwanangu taienda kujija na Sara, takabesereka maningi. Taidakarira maningi kupsakisisa muvhunjo jaiitwa ndi Sara zve taidakarazve ngo kuvona kuti iyena waida kuva shamwari ya Jehovha.” No cicunge cese, Sara wakacungirira kuteverehwa kwaaitwa, wosiya kwenda ku gerejha rake zve wobhabhatijwa.

14. (a) Kuitisa kudini basa ro kuita vajiji rakaezana no kutanda? (b) Majijenyi ngo magama a Pauro anowanika pana 2 Timoti 4:1, 2?

¹⁴ Kudari mukatama kuwana mundhu anoda kujija Bhaibheri mu basa renyu ro kucumaera, mucadoramwija. Ceukijanyi kuti Jesu wakaezanisa basa ro kuita vajiji no kutanda. Vatandi vanopeja nguva yakawanda kuti vawane hove. Kazinji ivona vanotanda co usiku kana mamba-kwaeja, nguva jimweni vanotopinda kotandira ndhambo. (Luka 5:5) Mukuezanavo, vacumaeri vamweni, vanopeja nguva yakawanda no kusengerera kwese “vacitanda” mu ngari no mundau jakasiyana. Asi ngenyi vanoita  izvo? Kuti vanase kuwana vandhu. Kushanda uku ngo simba, kunoita kuti kuwanike vandhu vanodakarira masoko akanaka. Mungakwanisavo kucumaera pa nguva iriyese yokuti mungawana maningi vandhu here?—Verenganyi 2 Timoti 4:1, 2.

15. Ngenyi tinodikana kusengerera patinoitisa jijo yo Bhaibheri?

¹⁵ Ngenyi tinodikana kusengerera patinoitisa jijo yo Bhaibheri? Ngokuti, tinoda kuita zvizinji kupinda kubesera mujiji kuti azive no kuda zvinojijiswa ngo Bhaibheri. Tinoda kubesera mujiji kuti azive no kuda mune wo Bhaibheri, Jehovha. Kusiyapo zvondhozvo, kuti tijijise vajiji vedu vo Bhaibheri kuti ngozvapi zvakananga Jesu ku vajiji vake, itusu tinodikana kuvabesera kuti vagume pa kuziva kuti vangaponesa kudini inga Makristu o cokwadi. Tinodikana kusengerera no kuvabesera pavanonga vecivangisira kuti vashandise zvovari kujija mu Bhaibheri. Vajiji vamweni, vanokwanisa kucinja zvirovejeso zvavo no manera ovanorangarira ngo mweji munganani basi, asi vamweni vanoda nguva yakawanda kuti vazviite.

16. Majijenyi ngo muezaniso wa Raúl?

¹⁶ Zvakaitika no misionario umweni ku nyika yo Peru, zvinotibesera kuti tizwisise dikano yo kuva vandhu vanosengerera. Misionanrio uwu, wakati: “Ndakajija mabhuku maviri no mwanarume umweni waidanwa Raúl. Asi iyena wainga no zvineso zvikuru maningi mu upenyu hwake, zvaiimuita kuti anesehwe kushandira Jehovha. Mucadho wake aucaifamba ushoni, waivereketa magama anotuka zve vana vake avacaikwanisa kumureremeja. Iyena waiviya ku musongano nguva jese, ngo iyo ndava ndaindomuvhakacira kuitira kumubesera iyena no mbhuri yake. Asi, no papera makore matatu, iyena wakazobhabhatijwa.”

17. Tinozovonenyi pa musoro unotevera?

¹⁷ Jesu wakativhunja kuti ‘endanyi moita kuti vandhu vo majinja ese vave vajiji.’ Kuti tiite basa iri, kazinji tinodikana kubhuya no vandhu vo kuti nguva jimweni vanorangarira mu njira yakasiyana nesu, kubatanijavo no vaya vacikanamati kana vaya vacikatendi kuti Mwari ariyo. Pa musoro unotevera, tinozovona kuti tingacumaeresa kudini masoko akanaka ku vandhu vondhovo.