1. Ngorapi thangwe rinotiita kuti tidakare ratinowana pana 3 Johani 3, 4?

MUPOSTORI Johani wakabesera vandhu vakawanda kuti vajije cokwadi. Kuna iyena, Makristu awo waimavona inga vana vake, pikija no zveneso zvovaisongana nazvo, ivona avazivi kusiya kushandira Jehovha. Izvi zvakadakajisa maningi Johani. Nyamasi uno, tinovavo no mudakaro, patinovona vana votakabara kana vokumujimu, vecijipira kuna Jehovha no kuenderera mberi vacimushandira.​—Verenganyi 3 Johani 3, 4.

2. Ngocapi cainga cinangwa co karata ja Johani?

² Gore ro 98 Johani kangaije waigara ku Efeso kana phedo. Kangaije wakathutha woenda kogara kondhoyo pakubuda kwake mukadheya ku Patimosi. Pa mukuvo iwonawo, mujimu wa Jehovha wakaita kuti Johani atare karata ndhatu. Cinangwa co karata iji, cainga co kuvangisa Makristu akagondeka kuti vatame kuruza rutendo hwavo kuna Jesu no kuenderera mberi vacifamba mucokwadi.

3. Tinozodavira muvhunjo japi?

³ Johani wainga asara ega inga mupostori, iyena waineseka maningi ngo vajijisi vokunyepa vainga vecivoneka muungano. * (1 Johani 2:18, 19, 26) Vapanduki ava, vainanga kuti vaizwira Mwari asi avacaizwira mupango wake. Tinozovona mbhangiro yakafemehwa Johani kuti atare. Patinozovona zvondhozvo, tinozodavira muvhunjo mutatu: Zvinoda kunangenyi kufamba mu cokwadi? Zvineso zvapi zvingatiphinga kuti titame kufamba mucokwadi? Tingabesana kudini kuti tirambe takagondeka?

4. Mukuzwirana na 1 Johani 2:3-6; 2 Johani 4, 6, tinodikana kuitenyi kuti tifambe mucokwadi?

⁴ Kudari tinoda kufamba mu cokwadi, tinodikana kuwana cokwadi cinowanika mu Soko ra Mwari, Bhaibheri. Mukuengejera, tinodikana “kuteveja mupango yake.” (Verenganyi 1 Johani 2:3-6; 2 Johani 4, 6.) Jesu wakagaja muezaniso waushoni wokuzwira Jehovha. Ngo kudaro, njira inosisira maningi yo kuzwira Jehovha ngo kuteveja ngo phedo zvakaita Jesu.​—Johani 8:29; 1 Pedru 2:21.

5. Tinodikana kuva no cokwadi cenyi?

⁵ Kuti tirambe tecifamba mucokwadi, tinodikana kuva no gwinyiso rokuti Jehovha ndi Mwari wo cokwadi, nokuti zvese zvaanonanga mu Soko rake Bhaibheri, ngo zvokadi. Tinodikana kuva no cokwadi cokuti Jesu ndi Mesiya wakagondeswa. Nyamasi uno vazinji vanokana-kana kuti Jesu ndi Mambo wo Umambo hwa Mwari. Johani wakangwaja hama kuti kwainga no “vanyepi vakawanda” vaizoeja kupausa vaya vacainga vakanasiririka ushoni kuti vajivirire cokwadi ngo pamusoro pa Jehovha na Jesu. (2 Johani 7-11) Johani wakatara kuti: “Ndiyani munyepi, aciripi wiya anoramba kuti Jesu ndiyena Kristu?” (1 Johani 2:22) Kudari tikava vajiji vaushoni vo Soko ra Mwari, atizocengejwi. Tikaita kudaro tinozokwanisa kuziva Jehovha na Jesu. (Johani 17:3) Cimwenizve, tinozova no gwinyiso rokuti tino cokwadi.

6. Zvineso zvapi zvinosongana no majaha no vasikane?

⁶ Makristu ese anodikana kungwarira kuti atame kucengejwa ngo uzivi hwo vandhu. (1 Johani 2:26) Maningi-ningi majaha no vasikane, vanodikana kungwarira kuti vatame kuwira mu murawu uwu. Alekisiya, * hambzaji imweni yo Faransa, ino makumaviri na mashanu o makore, yakati: “Pondainga ndiri mwana mudoko, ndaineseka ngo majijisiro o nyika, maningi-ningi ngo pamusoro pokuti mundhu wakavha ngo kuphinduka-phinduka no majijisiro o vandhu. Nguva jimweni, ndaitodakarira zvaijijiswaro. Ndakavona kuti ndaidikanavo kupa mukana Jehovha wokuvereka kusiyapo kutendera zvese zvandaijijiswa kucikora.” Hambzaji Alekisiya vakajija bhuku rinozwi, A Vida​—Qual a Sua Origem? A Evolução ou a Criação? Ngo sumana nganani, kukana-kana kwese kwainga no hambzaji iyi kwakapera. Iyona yakati: “Ndakazvivona ndoga kamare kuti Bhaibheri rinocokwadi. Cimwenizve, ndakazwisisa kuti kupona mukuzwirana no zvarinojijisa zvinopa runyararo.”

7. Zvicinyi zvatinodikana kungwarira kuti titame kuita zve ngenyi?

 ⁷ Makristu ese, anodikana kungwarira kuti atame kushandira Jehovha pamwepo no kuita zviro zvakashata panguva yondhoyo. Johani wakananga kuti atidikani kufamba mucokwadi panguva yondhoyo teciita zviro zvakashata. (1 Johani 1:6) Kudari tecida kutendehwa ndi Jehovha nyamasi uno no kumbejiyo, tinodikana kuceuja kuti iyena nguva jese anokwanisa kuvona zvese zvatinoita. Kunasa kunanga apana ciro cakafisika kuna Mwari, ngokuti zvese zvatinoita zviri pambhene kuna Jehovha.​—Vaheberi 4:13.

8. Zvicinyi zvaticikadikani kutendera?

⁸ Ticadotendera mavonero o nyika ngo pamusoro po cishaishi. Mupostori Johani wakatara kudari: “Tikananga kuti atizivi kushaisha, tinonyepa ticikanangi bzokadi.” (1 Johani 1:8) Mu njiku ja Johani, vapanduki vainanga kuti mundhu angashaisha ngo cabomo woenderera mberi ano ushamwari na Mwari. Nyamsi uno, tiri kupona no vandhu vanorangarira kudaro. Vazinji vanonanga kuti vanotenda Mwari, asi avatendi zvaanonanga ngo pamusoro po cishaishi, maningi-ningi ngo zvo vatano. Zvinovona Jehovha kuva zvakashata, vandhu vanonanga kuti mundhu angasana zvaanoda.

9. Ngo wapi muviyo uno majaha no vasikane kudari vakabatisisa zvavanoziva kuti zvakanaka?

⁹ Zvinganesa maningi kuno majaha no vasikane kuenderera mberi no mavonero akanaka ngo pamusoro po vatano, kudari vandhu vakavatendeneja kubasa kana kucikora avatenderi jijiso jo Bhaibheri ngo pamusoro po zvo vatano. Ndizvona zvakaitika na hama Alekisanda. Ivona vakati: “Zvivasikane zvimweni kucikora, zvaindivangirija kuti ndi hure nazvo, zvecivoneka kuti andicainga no namoradha, ivona vainanga kuti ndaidakarira mwanarume doni.” Muri kusongana no muejo wakafanana here? Kudari ndizvona, ceujanyi kuti kubatisisa zviya zvamunoziva kuti zvakanaka  zvinomuita kuti muve no muviyo jaushoni. Kuita zvinonanga Bhaibheri, zvinojivirira imwimwi pacenyu, munova no uhomi hwaushoni, munojizwa ushoni mu mazwiro no ushamwari hwenyu na Jehovha unovavo hwaushoni. Cimwenizve, vhaza imwe nga imwe yamunocungirira muejo, munovanga maningi kuti mukwanise kucungirira muejo umweni. Mucakanganwa kuti mavonero anoita nyika vatano, akavha kuna Sathana. Ngo kudaro, nguva jese jamunoramba kuita zvakashata munonga ‘mecinyisa mushati.’​—1 Johani 2:14.

10. Kuitisa kudini 1 Johani 1:9 inotibesera kuti tishandire Jehovha no hana yakacena?

¹⁰ Tinozviziva kuti Jehovha ndiyena anocitendehwa cokuziva kuti ici cishaishi ico asipi. Ngo kudaro, itusu tinoita zvese zvatinokwanisa kuti titame kushaisha. Asi patinoshaisha, tinodekeca kuna Jehovha mu mukumbiro. (Verenganyi 1 Johani 1:9.) Patinoita cishaishi cikuru, tinopsaka besero ro vakuru. Ivona vakagajwa ndi Jehovha kuti vatikorondhe. (Jakobo 5:14-16) Panguva yondhoyo, tinodikana kungwarira kuti titame kugara tecijipa ndava ngo pamusoro po zvishaishi zvatakaita kare. Asi ngenyi? Ngokuti Baba wedu vanorudo vakatipa mwana wavo inga muripo kutira zvishaishi zvedu. Cimwenizve, Jehovha paanonanga kuti waregerera mushaishi wakhauya, iyena anoregerera kamare. Ngo kudaro, tingakwanisa kushandira Jehovha no hana yakacena.​—1 Johani 2:1, 2, 12; 3:19, 20.

11. Tingajiviririsa kudini murangariro wedu kujijiso jingarembesa rutendo hwedu?

¹¹ Tinodikana kuramba jijiso jo vapanduki. Kuvhira pakatanga kuumbhwa ungano yo Cikristu, Dhiyabhu ari kueja kusima kukana-kana mu murangariro mo vashandiri vakagondeka va Mwari. Tinodikana kuzwisisa kuti ngo capi cokwadi ngo api manyepo. * Vavengi vedu vangaeja kushandisa interneti kuti  varembese rutendo hwedu kuna Jehovha no rudo hwedu kuno hama. Ngo kudaro, mucatendera manyepo aya ngo kuti anovha kuna Sathana.​—1 Johani 4:1, 6; Apokalipsi 12:9.

12. Ngenyi tinodikana kuvangisa rutendo hwedu?

¹² Kuti ticungirire zviejo zva Sathana, tinodikana kuengejera rutendo hwedu kuna Jesu no kuthemba Jehovha manera aanoshandisa Jesu kuti akwanirise kuda kwake. Cimwenizve, tinodikana kuthemba vaya vanoshandiswa ndi Jehovha kuti vatungamirire sangano rake. (Mateu 24:45-47) Tingaengejera rutendo hwedu ngo kujija nguva jese Soko ra Mwari. Tikaita kudaro, rutendo hwedu hunozodari inga muti uno muji jakabata ushoni, kana kuti, muji jakareba maningi. Pauro wakananga zviro zvakafanana paakatarira hama jo kuungano yo Koroso, paakati: “Ngokuti makaaxira Jesu Kristu, Tenji wedu, fambanyi mwaari, diranyi mwaari miji yenyu; vakwanyi ndiyena; cijikiranyi kutenda.” (VaKolosi 2:6, 7) Mukristu paanoita zvese zvaanokwanisa kuti ave no rutendo hwakavanga, Sathana no vaanocengejaro avazokwanisi kurambisa kufamba kwedu mucokwadi.​—2 Johani 8, 9.

13. Ngo zvapi zvatingavetera zve ngenyi?

¹³ Tinovetera kuti nyika itinyenye. (1 Johani 3:13) Johani anoticeuja kuti “nyika yese yo pasi iri munyara ya Sathana.” (1 Johani 5:19) Mugumo paunonga wecikhwedera, Sathana anoengejera ushungu hwake. (Apokalipsi 12:12) Iyena aatihwisi basi munjira jicikavoneki ushoni, inga muezaniso, ngo kushandisa zviro kuti tiwire mu uhure kana kushandisa manyepo ovapanduki. Iyena anoshandisavo njira jinovoneka inga kuteverehwa. Zvecivoneka kuti Sathana anozviziva kuti wasarihwa ngo mukuvo mushoma, iyena anoita zvese zvaanokwanisa kuti aimise basa redu ro kucumaera no kurembesa rutendo hwedu. Atikahamari ngo kuvona kuti mu nyika jimweni, basa redu ro kucumaera rinorambijwa. Pikija zvakadaro, hama no hambzaji jo mu ndau iji, jiri kuenderera mberi jecicungirira. Ivona vari kukhombija kuti azvinenyi zvineso zvingaviiswa ndi Sathana, itusu tingaenderera mberi takagondeka!

14. Ngoyapi njira imwe ingabesera hama no hambzaji jedu kuti jirambe jiri mu cokwadi?

¹⁴ Kuti tibesere hama jedu kuti jirambe jiri mucokwadi, tinodikana kujikhombijira usizi. (1 Johani 3:10, 11, 16-18) Tinodikana kukhombija rudo kuno vamweni pa mukuvo wese, pikija pangabuda zvineso. Inga muezaniso, munoziva hama yakafihwa ngo ari wese, inoda besero no kuembezehwa here? Makambozwa kuti kuno hama jakawihwa ngo ngozi, jinoda besero ro kuvakihwa nyumba javo no Nyumba jo Umambo here? Itusu tinokhombija kuti tinoda hama no hambzaji jedu no kujikhombijira usizi ngo zvatinoita no kuvereketa.

15. Mukuzwirana na 1 Johani 4:7, 8, zvicinyi zvatinodikana kuita?

¹⁵ Patinokhombijirana rudo, tinonga tecitevejera Baba vedu vo kudenga, Jehovha. (Verenganyi 1 Johani 4:7, 8.) Njira imwe inosisira yokukhombijira rudo ngo yo kuregererana. Inga muezaniso, mundhu angatiiitra ciro cingatinyangajisa perapo okumbira kuregerehwa. Tinokhombija kuti tinoda mundhu wondhowo, ngo kumuregerera no kukanganwa zvakaitikaro. (VaKolosi 3:13) Hama imweni inodanijwa Aldho, yakasongana no cineso condhoco hama imweni yoyaireremeja poyakabhuya zvakashata ngo pamusoro po vandhu vo nyika yayo. Hama  Aldho vakati: “Ndakaita mukumbiro kakawanda, ndecikumbira kuti Jehovha andibesere kutama kuvona hama iya ngo njira yakashata.” Hama Aldho avazivi kuimira iponapo. Vakakoka hama iya kuti vaende vese kocumaera. Pavainga vecicumaera, hama Aldho vakananga kuti vainga vakasuruvara maningi ngo pamusoro po zvakaitikaro. Ivona vakati: “Hama iya poyakavona mazwiro ondakava nawo ngo pamusoro po zvayakanangaya, yakakumbira kuregerehwa. Ngo manera oyakavereketa, ndakazwisisa kuti yainga yakhauya. Takaregererana tokanganwa zvese zvakaitikaya.”

16-17. Tinodikana kutema civaringo co kuitenyi?

¹⁶ Mupostori Johani waida maningi hama jake, zvokuti waida kuti rutendo hwavo huvange. Izvi zvinovoneka pa mbhangiro jaakapa hama iji pa karata jake ndhatu jakafemehwa. Zvinodakajisa kuziva kuti hama no hambzaji, jakadari inga ndi Johani, jakazojwa kuti jizotonge pamwepo na Kristu mugore.​—1 Johani 2:27.

¹⁷ Zvinosisira maningi kubatisisa ngwajo jataashirari pa jijo iyi. Temanyi civaringo co kuenderera mberi mecifamba mucokwadi, mecizwira Jehovha pa zvese zvamunoita. Jijanyi Bhaibheri no kuthemba zvarinonanga. Vangisanyi rutendo hwenyu kuna Jesu. Rambanyi jijiso jo vandhu no jijiso jo vapanduki. Mucadoshandira Jehovha kuveni pa mukuvo wondhowo meciita zvakashata. Mucapurukira vandhu vanoeja kumukhohwesa kuti muite zviro zvakashata. Ponanyi mukuzwirana no ndhungamiriro ja Jehovha. Cimwenizve, beseranyi hama kuti jienderere mberi jecifamba mu cokwadi ngo kuregerera vaya vanomunyangajisa no kubesera vaya vanoda kubeswa. Tikaita zvondhozvo, pikija no zvineso zvatinosongana nazvo, tinozoenderera mberi tecifamba mu cokwadi.