1. Ngenyi kujidodokesa kunotiita kuti tive no ushamwari hwakanaka no vamweni, mukuzwirana no VaFilipi 2:3?

ITUSU tinojidodokesa kuti tizwire Jehovha, ngokuti makwanja ake akarungama kwatiri. (VaEfeso 4:22-24) Kujidodokesa kunotibesera kuti tidire pakutanga kuda ka Jehovha no kuvona vamweni kuva vakuru kupinda itusu. Ngo kuita kudaro, tinozova no mudakaro ngo kuva no ushamwari wo phedo na Jehovha no ku hama jedu.​—Verenganyi VaFilipi 2:3.

2. Zvicinyi zvaiziva mupostori Pauro zve tinozojijenyi pa musoro uno?

² Kudari tikatama kungwarira, tinozokwevehwa ngo mugariro jo vandhu vo nyika ino ya Sathana, vanojikuja no kujida pacavo. * Izvo zvakaitika no Makristu o muzana ro kutanga ro makore, apo Pauro paakatara karata ku vaRoma, eciti: “Ndinobvunja mundhu no mundhu, kuti acajivona kupinda bzokudikana, kaveta ajivone ngo kururama no uzivi.” (VaRoma 12:3) Pauro waizviziva kuti itusu tinodikana kuva vandhu vanojireremeja. Ngokudaro, kujidodokesa kunotibesera kuti tive vandhu vakaezanana. Pa musoro uno tinozojija mativi matatu anozovonesa dikano yo kuva kwedu vandhu vanojidodokesa. Divi ro (1) pa mucadho, (2) patinoashira mutoro mu sangano ra Jehovha no ro (3) zvatinodira mu interneti, inga mafoto, mavhidhiyo no zvatinotaremo.

3. Ngenyi pa mucadho pangava no zvineso, vamweni vanosunga kuitenyi paya panonga pabuda zvineso mu mucadho?

³ Jehovha anoda kuti mukaji no mwamuna vave vanodakara mu mucadho. Zvecivoneka kuti vandhu avazivi kukwana, vangavetera zvineso mu mucadho mwavo. Zvokadi, Pauro wakatara kuti, vakacadha vanozosongana no zvineso. (1 VaKorinto 7:28) Vamweni vanovona kuti vari kutopipana mu mucadho, kangaije votoguma pakurangarira kuti avacaitodikana kutorovorana. Vecikwevehwa ngo mugariro wo nyika ino, vanokasika kurangarira kuti kurambana ndikona kungapeja zvineso. Vangazorangarira kuti izvi zvinosisira maningi zve zvinozovaviisira mudakaro.

4. Zvicinyi zvamunodikana kuita ubhasopa mu mucadho wenyu?

⁴ Atidikani kurangarira kuti mucadho wedu auzivi kunasa kurongwa. Thangwe rimwe basi rinonangwa ngo Bhaibheri kuti vandhu varambane i upombo. (Mateu 5:32) Inga zvaakananga mupostori Pauro, kudari tikasongana no zvineso mu mucadho ativhiri kuzvikuja, totanga kurangarira kudari: ‘Mucadho wangu uri kuvonesa zvandaida here? Ndiri kuva no rudo wandaifanera here? Kureva kuti ndaizowana mudakaro ndikawana mundhu umweni here?’ Wananyi fundo guru pacenyu pa muvhunjo iji. Uzivi hwo nyika unomuvhunja kuti muite zvinoda mwoyo wenyu no kuita zvinomudakajisa, pikija zviro zvondhozvo zvingaita kuti mucadho wenyu upere. Uzivi hwa Mwari unotivhunja kuti: “Mucapsaka bzinomudakarisa basi, kaveta psakanyi bzinodakarisa vamweni.” (VaFilipi 2:4) Jehovha anoda kuti mucadho wenyu uenderere mberi haiwa kurambana. (Mateu 19:6) Zvinosisira maningi kurangarira Jehovha pakutanga, kusiyapo kurangarira imwimwi basi.

5. Mukuzwirana no VaEfeso 5:33, mukaji no mwamuna vanodikana kutajana kudini?

 ⁵ Mukaji no mwamuna vanodikana kutajana no rudo no nderemejo. (Verenganyi VaEfeso 5:33.) Bhaibheri rinotijijisa kuti zviri nane kupa, kupinda kuaashira. (Maitiro o Vapostori 20:35) Mugariro wapi unozobesera varovorani kuti vatatijirane rudo no nderemejo? Ndi kujidodokesa. Mukaji no mwamuna vanojidodokesa, avapsaki zvavo basi, asi vanopsaka “bzo vamwenivo.”​—1 VaKorinto 10:24.

6. Zvicinyi zvamajija ngo zvakabhuiwa na hama Steven no mukaji wavo Stephanie?

⁶ Kujidodokesa kunobesera mukaji no mwamuna kuti vave no mudakaro mu mucadho wavo. Inga muezaniso, mwamuna umweni anodanijwa Steven wakati: “Kudari movaviri muri cikwata, munozoshanda mwese, maningi-ningi panonga pabuda zvineso. Kusiyapo kurangarira kudari: ‘Zvicinyi zvakanaka kwandiri?’ munozorangarira kudari: ‘Zvicinyi zvakanaka kwatiri?’” Stephanie mukaji wa Steven anorangariravo kudaro. Iyena wakati: “Akuna mundhu anoda kurarama no mundhu anopipana. Ngo kudaro, patinotama kuzwana, tinoeja kupsaka ndhango yakona. Perapo, tinoita mukumbiro, tinopsakisisa no kubhuisana ngo ndava yazvo. Itusu tinohwisana no ndhangoyo kuciripi kuhwisana ngocedu.” Pacina kukana-kana, mukaji no mwamuna vacikapsaki zvavo basi vanova no mudakaro mukuru.

7. Hama inoashira mutoro mu ungano inodikana kuva no mugariro wapi?

⁷ Kwatiri i cidakajiso cikuru kushandira Jehovha azvinenyi no mashandire akona. (Nduyo 27:4; 84:11) Kudari hama ikajipira kuti iite basa riri rese rinosisira, tinoti makorokoto. Bhaibheri rinoti: “Ndiani anoda kuita mufambisi wo gungano, anoemura basa rauxoni.” (1 Timoti 3:1) Asi hama inoashira mutoro aivhiri kujirangarira pacayo basi. (Luka 17:7-10) Cinangwa cayo cinodikana kuva co kuda kushandira vamweni no kujidodokesa.​—2 VaKorinto 12:15.

8. Zvicinyi zvotajija ngo muezaniso wa Diotrefe, Uziya na Abhusaromi?

⁸ Bhaibheri rino muezaniso jakashata jo vandhu vaijida maningi pacavo. Diotrefe wakapsaka “kuita mutungamiriri” mu ungano. (3 Johani 9) Uziya ecindundihwa ngo kujikuja iyena wakaita basa rainga rakagajwa ndi Jehovha kuti riizwe ngo vapiri basi. (2 Kronike 26:16-21) Abhusaromi waida kuva mambo, asi wakavhunja vandhu kuti ndisananyi kuti ndive mambo wenyu. (2 Samueli 15:2-6) Ndhorovondho iji jo mu Bhaibheri jinokhombija kuti Jehovha aadakariri vandhu vanojipsakira nduma. (Mazwi Akangwara 25:27) Kujikuja no kuda zvakawanda zvinoita kuti mundhu azviviisire nyathwa.​—Mazwi Akangwara 16:18.

9. Jesu wakatisiira muezaniso wapi?

⁹ Ngo divi rimweni ngativone muezaniso watakasiihwa ndi Jesu. Bhaibheri rinoti: “Yena naainga no ciimo ca Mwari aazivi kuvangirira kuezana na Mwari.” (VaFilipi 2:6) Sure ka Jehovha, Jesu i mundhu wo cipiri ano simba guru, pikija zvakadaro iyena aajipsakiri nduma pacake. Iyena wakavhunja kudari vajiji vake: “Ngokuti mudoko pakati penyu, ndiyena mukuru wo vese.” (Luka 9:48) Zvinodakajisa kushanda pamwepo no vandhu vanojidodokesa inga Jesu, vakadari inga mapiyona, vabeseri vo ungano, vakuru no vavonereri vo ndharaundha. Vashandiri va Jehovha pavanokhombija kujidodokesa, vanoita kuti pa ungano pave no mujimu wo kudisana, rudo uhwo ndiwona unovonesa kuti tiri mu sangano ra Mwari.​—Johani 13:35.

10. Ngozvapi zvamungaita kudari mukavona kuti zvineso zviri mu ungano yenyu azviripi kutongwa ushoni?

¹⁰ Zvingaita kuti mu ungano menyu muno cineso  ciri cese asi muri kuvona kuti vakuru avaripi kukwanisa kupeja cinesoco. Waro mungaitenyi? Kusiyapo kugara mecingu’ngu’ta, ivanyi vanojidodokesa zve beseranyi vaya vanotungamirira. (Vaheberi 13:17) Zvingamubesera ngo zvokurangarijisisa ngo muvhunjo iji: ‘Kureva kuti zvineso zvandiri kuvona zvakatokura zvokuti zvinodikana kutotojaniswa? Kureva kuti iyi i nguva kwayo kuti zvitojaniswe? Kureva kuti ndini ndinodikana kuzvitonga? Kwandiri pacangu, ndiri kuita kuti ungano irambe yakabatana kana kuti haiwa?’

11. Mukuzwirana no VaEfeso 4:2, 3, ngowapi unozova muviyo wo kushandira Jehovha tecijidodokesa?

¹¹ Kuna Jehovha kujidodokesa kunosisira maningi kupinda zvikwaniriso zvatinazvo, cimwenizve kubatana kwedu kunosisira maningi kupinda kubudirira kwatiri kuita. Ngokudaro, itanyi ngo pamunokwanisa ndipona kuti mushandire Jehovha no kujidodokesa kwese. Mukaita kudaro, munoita kuti ungano irambe yakabatana. (Verenganyi VaEfeso 4:2, 3.) Vangisiranyi pa kucumaera. Psanganyi njira jaushoni jamungabesera ndijona vamweni no kuvaitira zvakanaka. Ashiranyi vese, kubatanijavo vaya vacina mutoro mu ungano. (Mateu 6:1-4; Luka 14:12-14) Kudari mukashanda ngo kuzvidodokesa kwese mu ungano, vamweni avazovoni zvikwaniriso zvenyu basi asi vanovonavo kujidodokesa kwenyu.

12. Bhaibheri rinotivhunjenyi ngo pamusoro po kuva no shamwari?

¹² Jehovha anoda kuti tive no nguva yo kudakara no shamwari jedu pomwe no ukama hwedu. (Nduyo 133:1) Jesu wainga no shamwari jaushoni. (Johani 15:15) Bhaibheri rinotivhunja  muviyo jaushoni jatinozova najo ngo kuva no shamwari jaushoni. (Mazwi Akangwara 17:17; 18:24) Irona rinotivhunjazve kuti atidikani kufundurukira ndhambo no vamweni. (Mazwi Akangwara 18:1) Vazinji vanorangarira kuti kushandisa interneti i njira imwe yo kuti vave no shamwari jakawanda zve kuti vajizwe vacikaripi ndhambo no vamweni. Asi tinodikana kubhasopa maningi patinoshandisa interneti.

13. Ngenyi vandhu vamweni vanoshandisa interneti vanojizwa vakasuruvara no vacikasisiri?

¹³ Kupsakisisa kumweni kwakavonesa kuti vandhu vanopeja mukuvo wakawanda vecivona mafoto no kuvona zvinonangwa mu interneti vanojizwa vari vega zve vakasuruvara. Ngenyi? Thangwe rimwe rinoita kuti vandhu vadire mafoto mu interneti ngo ro kuti, vanodira foto jovakabuda vari pa mukuvo unosisira maningi mu upenyu hwavo. Ivona vanonasa kukheta foto javo jakaseja maningi zve vanokhetazve foto javakabuda no shamwari javo, javakabuda vari pa ndau yakaseja maningi. Kuvha iponapo, mundhu anozovona foto iji anotanga kujiezanisira wotanga kuvona kuti upenyu hwake hwakaderera maningi kana kuti autosisiri kamare. Hambzaji imweni ino 19 o makore, yakati: “Ndakatanga kuva no bundu no vese vaya vaienda koobungaija kumbhiri ko sumana, kuveni inini ndainga ndiri ku muzi ndicikaiti ciri cese.”

14. Mbhangiro yatinowana pana 1 Pedru 3:8, inotibeseresa kudini kuti tishandise interneti ngo ungwaru?

¹⁴ Ngo zvokadi kuti interneti ingashandiswa pa kuita zviro zvakanaka. Inga muezaniso, inoita kuti tikwanise kubhuya no ukama hwedu pomwe no shamwari. Makambovona kuti zvizinji zvinodira vandhu mu interneti kuitira kuti vajikhombije pacavo kuno vamweni? Zvinoita inga kuti ivona vari kunanga kudari: “Ndivonenyi!” Vandhu vamweni vanotobhuya magama anopseruja ngo pamusoro po foto javo no jo vamweni. Izvi zvinohwisana no zvinonangwa ngo Bhaibheri, parinonanga kuti Makristu anodikana kujidodokesa no kuva no murangariro wondhowo.​—Verenganyi 1 Pedru 3:8.

15. Mbhangiro japi jo Bhaibheri jinotibesera kuti titame kuita inga vandhu vanodakariraya kujikhombija kuno vamweni?

¹⁵ Kudari imwimwi munoshandisa interneti, zvivhunjisenyi kudari: ‘Kunanga kuti foto, vhidhiyo no masoko ondinodira, zvinokhombija  kuti ndinojikuja here? Zvaizoita kuti vamweni vave no thima here?’ Bhaibheri rinoti: “Bzese bzo nyika yo pasi: madisiro o muviri, ruyemuro hwo majiso no kujikuja ko upfumi abzibvi ka Baba, zvinobva ku nyika yo pasi pano.” (1 Johani 2:16) Bhaibheri rimweni rinosanduja gama ro kuti “kujikuja ko upfumi” inga “kuda kujivonesa inga unosisira maningi.” Makristu aadikani kugara ecijikhombija kuno vamweni. Iwona anotevera mbhangiro yo Bhaibheri inoti: “Ticadoemura goja ra biresi, teciambirana no kuitirana thima ngocedu.” (VaGalàsia 5:26) Kujidodokesa kunotibesejera kuti titame kukwevehwa ngo mujimu wo kujikuja wo nyika ino.

16. Ngenyi atidikani kujikuja?

¹⁶ Tinodikana kujidodokesa ngokuti vanojikuja avana “uzivi.” (VaRoma 12:3) Mundhu anojikuja anoda maningi kuvereketesana, cimwenizve anojivona kuva anosisira maningi kupinda vamweni. Kazinji iyena anorangarira no kuita zviro mu njira yo kukhuvaza iyena no kukhuvaza vamweni. Kudari mundhu wondhowo akatama kucinja mugariro wake, Sathana anozopsipisa murangariro wake. (2 VaKorinto 4:4; 11:3) Ngo divi rimweni, mundhu anozvidodokesa ano uzivi. Iyena anojivona mu njira yakaezanana, cimwenizve, anotendera kuti vamweni vakuru kupinda iyena mu njira jakasiyana-siyana. (VaFilipi 2:3) Iyena anozviziva kuti “Mwari anorhwisana no vandhu vanojikuja, wopa unyaxa vaya vanojidodokesa.” (1 Pedru 5:5) Mundhu ano uzivi, aazodi kuvona Jehovha inga muvengi.

17. Zvicinyi zvatinodikana kuita kuti tirambe tecizvidodokesa?

¹⁷ Kuti tirambe tecijidodokesa, tinodikana kushandisa mbhangiro yo Bhaibheri yo ‘kuvhisa undhu wo kare pamwepo no maitiro ahwo, tosimira undhu hupsa.’ Kuti tiite izvi zvinoda kuvangisira kamare. Tinodikana kujija ngo muezaniso wa Jesu no kunasa kumutevejera. (VaKolosi 3:9, 10; 1 Pedru 2:21) Asi kuvangisira uku kungatibesera. Patinojijira kuva vanojidodokesa, upenyu hwedu hwo mbhuri unozova unodakajisa, tinobesera kuti ungano irambe yakabatana no kushandisa interneti mu njira yakarungama. Asi pa musoro po zvese, tinoashira makomborero okutendehwa ndi Jehovha.