1. Ngo rapi thangwe rinosisira rinotiitisa kuti tive no mudakaro?

TINODAKAJIHWA maningi ngo kuzwa kuti vashandiri va Mwari vari kusia kuti ruvheneko hwawo huvheneke! Mu gore rakapera, vandhu va Jehovha vakaitisa jijo jo Bhaibheri jinodarika 10.000.000. Zve mamirioni o vadakariri vapsa akavia ku Cirangarijo zve akajija zvizinji ngo pamusoro po rudo hwa Jehovha ngo cipo co muripo.—1 Johani 4:9.

2, 3. (a) Cicinyi cinotiita kuti titame kusiya ‘kujeka inga ruvheneko?’ (b) Tinozobhuisana ngo pamusoro penyi mu musoro uno?

² Zvapupu zva Jehovha pasi pese, zvinovereketa ndumi zinji jakasiyana-siyana. Asi izvi azvitiitisi kuti titame kukuja Jehovha inga mbhuri yakabatana. (Apokalipsi 7:9) Azvinenyi kuti tinobhuya ndumi yapi kana tinoponera kwapi, itusu tingamunikira inga ‘ruvheneko mu nyika.’—VaFilipi 2:15, Baiberi Mazwi Akacena aMwari.

³ Mushando wedu, rubatano hwedu hwo ciKristu pamwepo no mavonero okukasika, zvese zvinokuja Jehovha. Tingasiisa kudini kuti ruvheneko hwedu huvheneke mu ndau ndhatu iji?—Verenganyi Mateu 5:14-16.

4, 5. (a) Kusiapo kucumaera, tingasiisa kudini kuti ruvheneko hwedu huvheneke? (b) Tikava vakanaka mwoyo ngojapi muviyo jakanaka jinozovepo? (Vonanyi pikica yo kutanga.)

⁴ Kucumaera no kuita vajiji ndi imwe njira inosisira yo kusiya kuti ruvheneko hwedu huvheneke. (Mateu 28:19, 20) Mu gore ro 1925, musoro umweni wo Murindiri waiti: ‘Ruvheneko mu Cidima’ wakananga kuti mu njiku jo kupejisira, akuna waizova wakagondeka kuna Tenji kudari akatama kushandisa ‘mukana kuti asiye kuti ruvheneko hwake huvheneke.’ Perepo wakanangazve kudari: ‘Mundhu waidikana kuita zvondhozvo ngo kubvunja masoko akanaka vandhu vo pasi pano zve ngo kujizwiranisa no makwanja o ruvheneko.’ (Murindiri wo 1 wa Junho wo 1925) Kusiapo kucumaera kwedu, mufambiro wedu unokuja Jehovha. Vandhu vazinji vanotisota patinonga tecicumaera. Patinovanyemwererera no kuvacungamija takadakara, zvinovabesera kuti varangarire ushoni ngo pamusoro pedu pamwepo na Mwari watinonamata.

⁵ Jesu wakabvunja vajiji vake kudari: ‘Pamunonghwina mu nyumba cungamijanyi mbhuriyo.’ (Mateu 10:12, Shanduro yeNyika Itsva) Mu ndau yaicumaehwa ndi Jesu, cainga cirovejeso kunghwinisa mumba mundhu wovacikazivi. Mu ndau zinji nyamasi uno, ici asipi cirovejeso. Kazinji vandhu avanesi kunyangajwa pavanovona mundhu wovacikazivi pa muzi pavo. Asi, kudari tikakhombijira ushamwari no kunaka mwoyo, ivona vangajizwa vakasujunuka. Pamunonga meciita ucapupu hwo pambhene mucishandisa cikarinya co mabhuku, munozvivona kuti pamunonyemwererera vandhu no kuvacungamija mu njira yo ushamwari, ivona vanojizwa ushoni kuti vaviye kotora mabhuku here? Kangaije vangatoda kutanga kubhuisana!

6. Zvicinyi zvakabesera varovorani vaavasharuka kuti varambe vakavanga mu mushando?

⁶ Varovorani vamweni vo ku Ingratera avacakwanisi kucumaera muzi ngo muzi inga zvovaiita, ngokuti vano cineso co uhomi. Ngokudaro, vanogajika cikarinya co mabhuku kunja ko nyumba yavo. Ivona vanogara phedo no cikora, ngo iyo ndava vanodira mabhuku anozokwevera vabari pavanonga veciviya kotora vana vavo. Vabari vamweni vanotora mabhukuwo, kubatanija Mibvunzo Inobvunza Vechiduku—Mhinduro Dzinoshanda, Vhorume 1 no 2. Imwe hambzaji iri piyona kazinji yaicumaera pamwepo no varovoranivo. Vabari vaya vaivona kuti hambzaji iyi yaikhombija ushamwari zve varovorani ava vaida kamare kubesera vamweni. Vabari vamweni vakatotanga kujija Bhaibheri.

7. Mungabesera kudini vatizi vo nyatwa vari mu ndharaundha yenyu?

⁷ Pa mukuvo waperari, vazinji vakatiza nyika javo zve wari vari kuponera mu nyika jimweni inga vatizi vo nyatwa. Mungaitenyi kuti mubesere vatizi vo nyatwa vari mu ndharaundha yenyu kuti vajije ngo pamusoro pa Jehovha? Cokutanga, mungajija kucungamija mu ndumi yavo. Mukuengejera, ngo kushandisa apirikativo JW Language,  mungajijira magama mashoma angavaita kuti vade kubhuya nemwi. Perapo, mungavatatija mavhidhio kana mabhuku anowanika mu jw.org, mu ndumi yavo kamare.—Deuteronòmio 10:19.

8, 9. (a) Musongano wedu wo pakati po sumana unotibesera kudini? (b) Vabari vangabesera kudini vana vavo kuti vaitise nane mupinguro javo pa musongano?

⁸ Jehovha anotipa zvatinoda kamare kuti tibudirire patinonga tecicumaera. Inga muezaniso, zvatinojija pa Musongano Upenyu no Mushando zvinotibesera kuti tiite hwiririro no kutanga jijo yo Bhaibheri ngo maitiro akarungama.

⁹ Vandhu pavanovia ku musongano jedu, kazinji vanokahamara ngo mupinguro jinopa vana vedu. Mungajijisa vana venyu kuti vadavire ngo magama avo kamare. Vandhu vamweni vanotenda cokwadi pavanozwa vana vecipa mupinguro jinokhombija gonda ravo ngo njira yakareruka zve ngo mwoyo wese.—1 VaKorinto 14:25.

10. Kunamata ko mbhuri kungabesera kudini mbhuri kuti jirambe jakabatana?

¹⁰ Patinoeja kushanda ngo simba kuti tiroveje mbhuri yedu kuti ishande pamwepo yakabatana zve mu runyararo, tinokuja Jehovha. Inga muezaniso, kudari muri mubari, itanyi nasiriro kuti muve no majisa o Kunamata ko Mbhuri nguva jese. Mbhuri zinji jinovona JW Broadcasting jiri pamwepo zve pasure pazvo vobhuisana kuti vangashandisa kudini zvovajija. Ceujanyi kuti ndhungamiro jinodiwa ngo mwana mudoko jakasiana no jinodiwa ngo muaruki. Itanyi zvese  zvamunokwanisa kuti mubesere mundhu umwe nga umwe wo pa mbhuri yenyu kuti abesereke ngo kunamata ko mbhuri.—Nduyo 148:12, 13.

11-13. Tingabesera kudini ungano yedu kuti iyengejere kuva yakabatana?

¹¹ Pikija muri mujaha kana musikane, mungabesera vamweni mu ungano kuti vajizwe kuti vanodiwa. Njira imwe ngo yo kuita ushamwari no hama no hambzaji jaavasharuka. Vabvunjisenyi kuti zvicinyi zvakavabesera kuti varambe vecishandira Jehovha ko makore akawanda. Vangamujijisa zviro zvinosisira maningi. Izvi zvinozovangisa imwimwi na ivona! Zve tese, azvinenyi tiri majaha, vasikane kana vasharuka, tingaita kuti vaya vanoviya ku Nyumba yo Umambo yedu vajizwe ushoni. Mungavacungamija, kuvanyemwererera, kuvapa pokugara no kuita kuti ivona vazivane no vamweni. Itanyi kuti vajizwe inga vatori pa muzi.

¹² Mukagajwa kuti muitise musongano wo basa ro mu munda, mungabesera vasharuka kuti ruvheneko hwavo urambe wecimunikira. Ivanyi no gwinyiso ro kuti vave no ndima yakavanakira. Itanyi nasiriro kuti majaha no vasikane vashande navo. Hama no hambzaji jaavasharuka no vese vaya vano cineso mu uhomi, kazinji vanosuruvara ngokuti avacakwanisi kucumaera inga zvavaiita kare. Vanozojizwa ushoni pavanoziva kuti munovataja zve munozwisisa mugariro wavo. Azvinenyi kuti vaavasharuka maningi kana vaano makore akawanda mu cokwadi, kunaka mwoyo kwenyu kungavavangisa kuti varambe vecicumaera no kuvangisira kwese.—VaLevi 19:32.

¹³ VaIziraeri vaidakara ngo kunamata Jehovha pamwepo. Mutari wo nduyo wakatara kudari: “Vonanyi kunaka no kudakajisa kwabzo kugara pamwepo inga hama no hama.” (Verenganyi Nduyo 133:1, 2.) Iyena wakaezanisa rubatano uwu no mafuta o kuzoja ndiwona, anonyarisa ganda zve anonuhira. Mu njira yakafanana, tingatondhoja hama no hambzaji jedu ngo kuva mundhu anodakajisa zve wakanaka mwoyo. Izvi zvinoita kuti ungano iyengejere kuva yakabatana. Munganasa kuziva hama jo mu ungano mwenyu here?—2 VaKorinto 6:11-13.

14. Mungasiisa kudini kuti ruvheneko hwenyu huvheneke mu mutundhu wamunogararo?

¹⁴ Ruvheneko hwenyu ungavheneka azvinenyi kwamunonga muri. Kunaka mwoyo kwenyu kungaita kuti vo pa cigarisano cenyu vade kujija zvizinji ngo pamusoro pa Jehovha. Jibvunjisenyi kudari: ‘Zvigarisano zvangu zvinondivona kudini? Pa nyumba pangu pakacena no kurongeka here? Panoita kuti mutundhu uno uvoneke ushoni here? Ndiri cigarisano cinobesera vamweni here?’ Bvunjisanyi Zvapupu zvimweni kuti kunaka mwoyo no muezaniso wavo waushoni wakapsasa kudini ukama wavo, vocigarisano, vadoni vo kubasa kana vadoni vo kucikora.—VaEfeso 5:9.

15. Ngenyi tinodikana kuramba takarinda?

¹⁵ Kudari tecida kuti ruvheneko hwedu urambe  ucimunikira, tinodikana kuziva nguva yatiri kupona. Jesu wakabvunja vajiji vake, bvaza jakawanda, kudari: ‘Rambanyi makarinda.’ (Mateu 24:42; 25:13; 26:41, Shanduro yeNyika Itsva) Kudari tikavona kuti ‘dambujiko guru’ riciri ndhambo, atizongwariri pa mukana wese watinawo kuti tibesere vamweni kuti vajije ngo pamusoro pa Jehovha. (Mateu 24:21) Kunja ko kumunikira, ruvheneko hwedu padoko ngo padoko unotanga kujima zve ungatongara-ngara.

16, 17. Zvicinyi zvamungaita kuti murambe muno mavonero okukasika?

¹⁶ Wari tinodikana kuramba takarinda kupinda kare. Mugariro wo mu nyika uri kwenderera mberi ucishatisisa. Asi, tinoziva kuti mugumo unozoviya pa nguva kwayo inga zvakasanwa ndi Jehovha. (Mateu 24:42-44) Asi nguva iyi icito yaguma, tinodikana kusengerera no kusotesesa kumbeji kwedu. Verenganyi Bhaibheri njiku jese zve mucaregera kuita mukumbiro kuna Jehovha. (1 Pedru 4:7) Jijanyi ngo hama no hambzaji jiri kushandira Jehovha ko makore. Inga muezaniso, mungaverenga zviitiko zvo upenyu, zvakadari inga musoro unoti: “Makore 70 Ndakabata Kumupendero Wenguo yomuJudha,” wakabudiswa mu Murindiri 15 ya Abril wo 2012, mapheji 18-21, Cishona.

¹⁷ Rambanyi makabatikana pa kushandira  Jehovha. Itanyi zviro zvaushoni ku vamweni zve pejanyi nguva no hama no hambzaji jenyu. Munozodakara zve munozovona kuti nguva iri kupera ngo kukasika. (VaEfeso 5:16) Vashandiri va Jehovha vakakwanirisa zvizinji mu makore anodarika zana. Zve nyamasi uno, takabatikana maningi kupinda kare. Basa ra Jehovha riri kukura mu njira yo ticikarangariri. Ruvheneko hwedu huri kumonikira!

18, 19. Vakuru vangatibesera kudini kuti tishandire Jehovha no kuvangisira? Ipanyi muezaniso.

¹⁸ Pikija tinoposa kazinji, Jehovha anotendera kuti timushandire. Kuti atibesere, iyena wakatipa ‘zvipo zviri vanarume,’ kana kuti vakuru vo ungano. (Verenganyi VaEfeso 4:8, 11, 12, Shanduro yeNyika Itsva.) Ngokudaro, pamunobvakacihwa ngo vakuru, beserekanyi pa nguva yovanonga nemwi, jijanyi ngo ungwaru no mazano avo.

¹⁹ Inga muezaniso, varovorani vamweni vo ku Ingratera vakasongana no zvineso mu mucadho wavo zve vakakumbira kuti vakuru vaviri vavabesere. Mukaji waivona kuti mwamuna wake aacaitungamirira ushoni pa kushandira Jehovha. Mwamuna waijizwa kuti aacainga mujijisi waushoni zve wakatonanga kuti aacaiitisa kunamata ko mbhuri nguva jese. Vakuru vakabesera varovorani ava kuti varangarire ngo muezaniso wa Jesu. Ivona vakavangisa mwamuna kuti atevejere Jesu mu njira yaaitaja vajiji vake. Vakavangisa mukaji kuti ave anosengerera no mwamuna wake. Vakavapavo mazano amweni ngo pamusoro po kuita kunamata ko mbhuri pamwepo no vana vavo vaviri. (VaEfeso 5:21-29) Mwamuna uu wakashanda ngo simba kuti ave musoro wo mbhuri waushoni. Vakuru vakamuvangisa kuti atame kuremba zve athembe mujimu wa Jehovha. Zvokadi kamare, rudo no kunaka mwoyo kwakakhombijwa ngo vakuru, kwakabesera mbhuri yondhoyo!

20. Ngowapi unozova muviyo pamunosiya kuti ruvheneko hwenyu huvheneke?

²⁰ “Vanodakara vese vanothya Tenji Mwari, vanofamba mu makwanja ake!” (Nduyo 128:1) Munozodakara pamunosiya kuti ruvheneko hwenyu huvheneke. Ngokudaro, jijisanyi vamweni ngo pamusoro pa Mwari, itanyi zvamungakwanisa kuti mubesere mbhuri yenyu no ungano kuti varambe vakabatana no kuramba vakarinda. Vamweni vanozovona muezaniso wenyu waushoni zve vanozodavo kukuja Baba wedu, Jehovha.—Mateu 5:16.