1. Cicinyi cinotiita vakakhwirira kupinda zvinyama?

JEHOVHA wakapa vandhu ciro cinosisira maningi. Ciro condhoco ndi hana yedu. Iyona inotiita kuti tive vakakhwirira kupinda zvinyama. Tinozvizivisa kudini kuti Adhamu na Evha vainga no hana? Pasure po kushaishira Mwari, ivona vakafindara. Hana yavo yaivapa ndava.

2. Hana yedu ingaezanisihwa kudini no giadhori? (Vonanyi pikica yo kutanga.)

² Vaya vano hana yakashaisha kurovejwa vakadari inga piketi iri kufambiswa, asi ino giadhori rakagujuka. Kuita hwendo no giadhori rakagujuka ro kuti arizivi kugejerehwa ushoni, i ngozi. Mbhepo no maji o mujombe zvingaita kuti piketi indondomere. Giadhori rinoshanda ushoni, ringabesera mufambisi wo piketi kuti afambise ushoni. Hana yedu ingaezanisihwa no giadhori ro mufambiro wedu. Iyona ndi mazwiro edu o mukati ngo pamusoro po zvakanaka no zvakashata, ingatibesera kwenda ku divi  rakanaka. Asi kuti hana yedu ive mutungamiriri wakagondeka, inodikana kunasa kugejerehwa.

3. Zvicinyi zvingaitika kudari tikatama kuroveja ushoni hana yedu?

³ Kudari hana yedu aizivi kunasa kurovejwa, aizotingwaji kuti titame kuita zvakashata. (1 Timoti 4:1, 2, Shanduro yeNyika Itsva) Ingatikhohwesa kuti tivone zvakashata inga zvakanaka. (Isaia 5:20) Jesu wakabvunja vateveri vake kudari: “Unozoza mukuvo wokuti ariwese anomuuraya anozorangarira kuti ari [‘kuitira Mwari basa rakacena,’ Shanduro yeNyika Itsva.]” (Johani 16:2) Ndizvona zvairangarihwa ngo vakaurayaya mujiji Stefano. (Maitiro o Vapostori 6:8, 12; 7:54-60) Mukati mo ndhorovondho yo vandhu, vazinji vo mu zviara vari kuphwanya mutemo ngo maitiro akashatisisa, akadari inga kuuraya zve vari kunanga kuti vari kuzviita mukuzwira Mwari. Asi zvokadi kamare, zvavari kuitari zvinohwisana no mutemo ja Mwari. (Exodo 20:13) Zviri pambhene kuti hana javo ajizivi kuvatungamirira ngo maitiro akarungama!

4. Tingava kudini no cokwadi cokuti hana yedu iri kushanda ushoni?

⁴ Tingava kudini no cokwadi cokuti hana yedu iri kushanda ushoni? Mutemo no zviambi zvo mu Bhaibheri zvinobesera pa “kujijisa, kupangira, kufujura unyepi no kurebesa mu urungami.” (2 Timoti 3:16) Tinodikana kujija Bhaibheri nguva jese, kurangarijisisa zvarinonanga, no kuzvishandisa mu upenyu hwedu. Ngo maitiro ao, tinozoramba tecijijira kurangarira inga ndi Jehovha. Pasure pazvo, tingava no cokwadi cokuti hana yedu inozotitungamirira ushoni. Ngatibhuisane ngo pamusoro po kuti tingashandisa kudini mutemo no zviambi zva Jehovha kuti tiroveje hana yedu.

5, 6. Mutemo ja Mwari jinotibesera kudini?

⁵ Kudari tecida kuti mutemo ja Mwari jitibesere, atidikani basi kujiverenga kana kuziva basi kuti jinonangenyi. Tinodikana kujida no kujireremeja. Bhaibheri rinotibvunja kudari: “Nyenyanyi bzakaxata, disanyi bzakanaka.” (Amosi 5:15) Asi tingazviitisa kudini zvondhozvo? Tinodikana kujijira kuvona zviro inga mavonero aanozviita Jehovha. Amborangariranyi basi. Ngatiti amuripi kuvata ushoni zve medhiko wenyu womubvunja kuti munodikana kuha zvinovaka muviri, kudamura-damura, no kuita cinjo jimweni mu upenyu hwenyu. Imwimwi moteverera mbhangiro jake, zvotoshanda! Maizozwa kudini ngo pamusoro po mbhangiro ja medhiko wiya?

⁶ Ngo maitiro akafanana, Musiki wedu wakatipa mutemo kuti atibvikire ku muviyo jakashata jinoviiswa ngo cishaishi no kuitisa nani upenyu hwedu. Inga muezaniso, Bhaibheri rinotijijisa kuti ticadonyepa, ticadocengejera, ticadoba, ticadohura, ticadoita ugevenga kana kuita ciri cese cakabatana no zvo madhimoni. (Verenganyi Mazwi Akangwara 6:16-19; Apokalipsi 21:8) Patinova no muviyo jakanaka jinoviiswa ngo kuzwira Jehovha, rudo hwatinahwo naye pomwe no mutemo jake hunoengejeka.

7. Zviitiko zviri mu Bhaibheri zvinotibesera kudini?

⁷ Atibviri kutanga tatambujika ngo kuphwanya mutemo ja Mwari kuti tizozive zvakashata no zvakanaka. Tingajija ngo zvakaposa vamweni kareko. Muezaniso iji jakatahwa mu Bhaibheri. Mazwi Akangwara 1:6, inoti: “Muzivi ngaazwe no kuengejera uzivi hwake.” Uzivi wondhowo unobva kuna Mwari zve hwakanaka kupinda uri  wese hao! Inga muezaniso, rangariranyi matambujikire akaita Dhavhidhi pasure po kutama kuzwira Jehovha wohura na Bhate-shebha. (2 Samueli 12:7-14) Pamunoverenga ciitiko ici, jibvunjisenyi kudari: ‘Dhavhidhi waizotizisa kudini matambujiko aya? Zvicinyi zvandaizoitavo kudari ndainga pa mugariro wake? Kudari ndaiejwa kuti ndiite uhure ndaizoita inga ndi Dhavhidhi kana inga ndi Josefa?’ (Genesi 39:11-15) Tikanasa kurangarira ngo pamusoro po muviyo jakashata jo cishaishi, tinozoenderera mbheri ‘tecinyenya bzakaxata.’

8, 9. (a) Hana yedu ingatibesera kuti tiitenyi? (b) Hana yedu inoshandisa kudini no zviambi zva Jehovha?

⁸ Itusu tinoramba tiri ndhambo kamare no zviro zvinonyenywa ndi Mwari. Asi tinodikana kuitenyi tikava pa mugariro wo kuti apana mutemo wakajeka wo mu Bhaibheri? Tinozozvizivisa kudini zvinonga zvecida Mwari kuti tiite? Kudari tikatendera kuti Bhaibheri riroveje hana yedu, tinozotema civaringo ngo ungwaru.

⁹ Zvecivoneka kuti Jehovha anotida, iyena wakatipa zviambi zvingatungamirira hana yedu. Iyena wakasanangura kudari: “Ndini Tenji Mwari wako, wiya anokujijisa kuti uwane bzakanaka, wiya anokuseseja ngo gwanja ro unodika kutevera.” (Isaia 48:17, 18) Patinorangarijisisa ngo pamusoro po zviambi zvo Bhaibheri totendera kuti zvipsase mwoyo wedu, tingarungamisa no kunasirira hana yedu. Zvokadi kamare,  tinozobesereka pa kutema zvivaringo ngo ungwaru.

10. Ciambi cicinyi zve Jesu wakashandisa kudini zviambi pa kujijisa?

¹⁰ Ciambi ndi cokwadi cikuru cinotungamirira murangariro wedu, cinotibesera kutema zvivaringo zvaushoni. Kuziva zviambi zva Jehovha zvinotibesera kuzwisisa murangariro ja Jehovha zve ngenyi iyena wakatipa mutemo jakati kuti. Jesu wakashandisa zviambi kuti ajijise vajiji vake kuti murangariro no zviito zvino muviyo. Inga muezaniso, wakajijisa kuti ushungu ungaendesa ku ugevenga zve kurangarira zvo uhure kungaendesa ku upombo. (Mateu 5:21, 22, 27, 28) Patinotendera kuti zviambi zva Jehovha zvititungamirire, hana yedu inozova yakanasa kurovejwa zve tinotema zvivaringo zvinoviisa rukujo kuna Mwari.—1 VaKorinto 10:31.

11. Hana yedu ingasiyana kudini no jo vamweni?

¹¹ Pikija maKristu akaroveja hana yao ecishandisa Bhaibheri, iwona angaramba ano mavonero akasiyana ngo pamusoro po shwiro iri yese. Muezaniso umwe wazvo ngo wokuti tinodikana kumwa doro kana kuti haiwa. Bhaibheri arinangi kuti zvakashata kumwa doro, asi rinongwaja kuti atidikani kumwa maningi kana kudhakwa. (Mazwi Akangwara 20:1; 1 Timoti 3:8) Waro, zvinoreva kuti kudari muKristu acikamwi maningi, aadikani kurangarira zvimweni paanoda kutema civaringo cake here? Haiwa. Pikija hana yake inomutendera kumwa doro, iyena anodikana kurangariravo ngo pamusoro po hana jo vamweni.

12. Magama ari pana VaRoma 14:21 anotibesera kudini kureremeja hana jo vamweni?

¹² Pauro wakakhombija kuti tinodikana kureremeja hana jo vamweni paakatara kudari: “Mbzauxoni kutama kuha nyama, kumwa doro, nokuti kuita ciricese cinokhugunyisa hama yako.” (VaRoma 14:21) Ngo kudaro, pikija tino citendehwa co kumwa doro, tinozodira pamutivi citendehwa cedu kudari tikaziva kuti tinozokhuvaza hana yo muKristu umweni. Kangaije hama imwe yaimwa maningi icito yajija cokwadi asi yakatema civaringo co kutama kumwa nee padoko. Aticaizoda kuita ciri cese caizoiita kuti ihwirire ku cirovejeso cayo co kare. (1 VaKorinto 6:9, 10) Kudari hama yondhoyo ikava murendo wedu, taizoeja kuivangirija kuti imwe doro, pikija iyona yeciramba here? Haiwa!

13. Timoti wakareremeja kudini hana jo vamweni kuitira kuti akwanise kuvabesera kuashira masoko akanaka?

¹³ Timoti paainga mujaha, wakatendera kusokwa pikija kwaihwaja. Waiziva kuti kusokwa kwaisisira maningi kuno vaJudha vaaidikanaya kuzocumaera. Mukufanana na Pauro, Timoti aacaida kukhugunya ari wese. (Maitiro o Vapostori 16:3; 1 VaKorinto 9:19-23) Imwimwi munodavo kudira pa mutivi zvido zvenyu ngo kuda kubesera vamweni here?

14, 15. (a) Tingagumisa kudini pa kuva vakaibva? (b) MaKristu akaibva anotaja kudini vamweni?

¹⁴ Tese tinodikana kubva pa ‘jijiso jo kutanga ngo pamusoro pa Kristu’ zve ‘toshanda ngo simba kuti tive vakaibva.’ (Vaheberi 6:1, Shanduro yeNyika Itsva) Ativi maKristu akaibva basi ngo kuti taano makore akawanda tiri mu cokwadi. Zvinoda kuvangisira kuti tigume pa kuva vakaibva. Tinodikana kuenderera mberi tecikura mu zivo no zwisiso yedu. Ngo kudaro, tinodikana kuverenga Bhaibheri njiku jese. (Nduyo 1:1-3) Pamunoverenga Bhaibheri njiku ngo njiku, munozwisisa ushoni mutemo no zviambi zva Jehovha.

¹⁵ Ngowapi mutemo unosisira maningi kuno maKristu? Ndi mutemo wo rudo. Jesu wakabvunja vajiji vake kudari: “Mukaita kudaro vese vanozoziva kuti muri vajiji vangu: mukadisana ngo cenyu.” (Johani 13:35) Rudo unodanijwa kuti i “[‘mutemo,’ Shanduro yeNyika Itsva] wa Mambo” zve “kuteveja [‘mutemo,’ Shanduro yeNyika Itsva]”. (Jakobo 2:8; VaRoma 13:10) Atikahamari ngo kuzwa kuti rudo unosisira maningi, ngo kuti Bhaibheri rinonanga kuti “Mwari, rudo.” (1 Johani 4:8) Kuna Mwari, rudo hunopinda kuva no mazwiro basi. Iyena wakakhombija rudo hwake ngo zviito. Johani wakatara kudari: “Rudo hwa Mwari hwakavoneswa kudaro kotiri: Mwari wakatumira nyika yo pasi Mwana wake umwe ega, kuti tirarame ndiyena.” (1 Johani 4:9) Patinokhombija rudo kuna Jehovha, kuna Jesu, kuno hama jedu zve kuno vandhu vamweni, tinovonesa kuti tiri maKristu akaibva.—Mateu 22:37-39.

16. Patinoguma pa kuva maKristu akaibva, ngenyi tinoenderera mberi tecireremeja zviambi?

¹⁶ Patinoguma pa kuva maKristu akaibva, tinoenderera mberi tecireremeja zviambi. Kazinji, Mutemo jinoshanda pa mugariro  wakati kuti, asi zviambi zvinoshandiswa pa mugariro jakasiyana-siyana. Inga muezaniso, mwana mudoko aazwisisi ngozi inoviiswa ngo kushamwarijana no vandhu vakashata, ngo kudaro vabari vake vanodikana kumupa ndhungamiriro kuitira kumubvikira. (1 VaKorinto 15:33) Asi mwana wondhowo, paanoguma pa kuva mundhu wakaibva, anojijira kurangarira ngo pamusoro po zviambi zvo Bhaibheri. Zviambi zvondhozvo zvinozomubesera kusana shamwari jakanaka. (Verenganyi 1 VaKorinto 13:11; 14:20.) Patinoenderera mberi tecirangarira ngo pamusoro po zviambi zvo Bhaibheri, hana yedu inoengejeravo kuva yakagondeka. Tinonasa kuzwisisa zvakajeka zvaizoda Mwari kuti tiite pa mugariro uri wese hao.

17. Ngenyi tingananga kuti tino zvese zvatinoda kuti titeme zvivaringo zvo ungwaru?

¹⁷ Tino zvese zvatinoda kuti titeme zvivaringo zvinodakajisa Jehovha. Mu Bhaibheri, tinowana mutemo no zviambi zvinotibesera kuti tigume pa kuva ‘vanasi no vakatojanira mabasa ese auxoni.’ (2 Timoti 3:16, 17) Zviambi zvo Bhaibheri zvinotibesera kuzwisisa manera anorangarira Jehovha. Asi zvinoda kuvangisira kuti tizviwane. (VaEfeso 5:17) Kuti tibesereke, tino Índice das Publicações da Torre de Vigia, Bhuku ro Kupsakisisa ro Zvapupu zva Jehovha, Watchtower Library (Biblioteca da Torre de Vigia), BHIBHIRIOTEKA RO MU INTERNETI ro Torre de Vigia no apirikativho JW Library. Patinoshandisa mathurusi aya, tinozobesereka pa jijo yedu yo mundhu ega zve pa jijo yo mbhuri.

18. Zvicinyi zvinoitika patinoshandisa mutemo no zviambi zva Jehovha mu upenyu hwedu?

¹⁸ Upenyu hwedu hunonyanya kuita nani patinoshandisa mutemo no zviambi zva Jehovha! Nduyo 119:97-100, inonanga kudari: “Ndinodisisa mupango yenyu; ndinoirangarira njiku yese. Mupango yenyu inondiita wakangwara kupinda vavengi vangu, ngokuti iyona njangu mbhera narini. Ndinozwisisa kupinda vajijisi vangu, ngokuti ndinorangarira mazwi enyu. Ndino hwiru kupinda madoda, ngokuti ndinongwarira mupango yenyu.” Patinopeja nguva tecirangarijisisa ngo pamusoro po mutemo no zviambi zva Mwari, tinozoita zviro tecishandisa maningi ungwaru no zwisiso. Zve patinoshandisa mutemo no zviambi kuti tiroveje hana yedu, tinozogumira pa “mupimo wo kuperera kwa Kristu.”—VaEfeso 4:13.