1. Tingatevejeresa kudini Baba wedu vano rudo, Jehovha?

JEHOVHA anotida maningi. (Johani 3:16) Tinoda kutevejera Baba wedu vano rudo. Ngokudaro, tinoeja kuva no ‘murangariro yondhoyo, kudisana inga hama zve tova no mwoyo wo unyasha.’ Izvi, tinodikana kuzviitira vese “bzikuru-kuru ku vatendidoni.” (1 Pedru 3:8; VaGalàsia 6:10) Ngokudaro, hama kana hambzaji painosongana no zvineso, tinoda kuibesera.

2. Tinoda kujija ngenyi pa musoro uno?

² Vese vanoda kuva divi ro mbhuri ya Jehovha, vanozosongana no zvineso. (Marco 10:29, 30) Mugumo wo nyika ino paunonga wecikwedera, tinohwisana no muejo jakawanda. Waro tinodikana kuitenyi kuti tibesane? Ngativone zvatingajija ngo muezaniso jinowanika mu Bhaibheri ngo pamusoro pa Roti, Jobe na Naomi. Ticajijazve ngo zvineso zvinganani zviri kusongana no hama no hambzaji jedu nyamasi uno zve ticavona kuti tingavabeseresa kudini kuti vahwisane no zvinesozvo.

3. Inga zvatinovona pana 2 Pedru 2:7, 8, civaringo capi cakashata catemwa ndi Roti zve ngowapi wakava muviyo wakona?

³ Roti wakatema civaringo cakashata paakasana kogara Sodhoma, kwaingaya no vandhu vaiita zvo uhure. (Verenganyi 2 Pedru 2:7, 8.) Pikija ndauyo yainga yakanaka, Roti wakasongana no zvineso, paakaenda kogareyo. (Genesi 13:8-13; 14:12) Kangaije mukaji wake waidakarira maningi dhorobhero  kana vandhu vaigaremo, zvomuita kuti atame kuzwira Jehovha. Jehovha paakaparaja dhorobhero ngo muriro no eshofre, iyena wakaruza upenyu hwake. Amborangariranyi ngo pamusoro po vana vaviri vokaji va Roti. Ivona vainga vecida kucadha no vanarume vakafira mu Sodhoma. Roti wakaruza nyumba yake no mujiyo jake, kupinda zvese izvi, wakaruza mukaji wake. (Genesi 19:12-14, 17, 26) Pa mukuvo uu unonesa, Jehovha wakava mundhu anosengerera na Roti.

4. Jehovha wakakhombijisa kudini kuva anosengerera kuna Roti? (Vonanyi pikica yo pa kapa.)

⁴ Pikija Roti wakasana kogara Sodhoma, Jehovha ngo unyasha hwese wakatumira ngirozi jake kuti jiponese Roti no mbhuri yake. Ngokudaro, ngirozi jakavhunja Roti kuti abude ngo kukasika mu Sodhoma, asi Roti, wainonoka kana kuti “waikakanija.” Ngirozi jakadikana kubata mukono wa Roti no mbhuri yake kuti jivabudise kunja ko dhorobha. (Genesi 19:15, 16) Zve ngirozi jakavhunja Roti kuti atizire ku dundhu. Kusiyapo kuzwira Jehovha, Roti wakakumbira kuti atizire ku dhorobha rainga phedo. (Genesi 19:17-20) Jehovha ngo kusengerera kwese, wakamupurukira zve wakamutendera kuti atizire ku dhorobha riya. Asi pakufamba ko nguva, Roti wakathya kugaremo zve wakathutha kwenda kogara ku dundhu, kwaakavhunja pakutanga ndi Jehovha kuti atizireyo. (Genesi 19:30) Jehovha wakakhombija unyasha wakakura maningi! Waro tingamutevejeresa kudini?

5-6. Tingashandisisa kudini zvinonangwa pana 1 VaTesalònika 5:14?

⁵ Inga ndi Roti, hama kana hambzaji ingatema zvivaringo zvakashata, yotambujika ndizvona. Kudari zvikaitika keni, tinozoitenyi? Kangaije tingatorangarira kuti iri kukotora zvoyakasima, ici i cokwadi. (VaGalàsia 6:7) Pikija zvakadaro, tingaita zvinobesera. Tingabesera hama yondhoyo ngo kutevejera manera akabesera Jehovha Roti. Kuitisa kudini?

⁶ Jehovha aazivi kutumira ngirozi jake kuti jimungwaje basi, asi kuitira kumubesera kuti apokonyoke pa kuparajwa ko Sodhoma. Mukuezana, tinodikana kungwaja hama kana hambzaji jedu kudari tikavona kuti vari kuita zviro zvinozovaviisira zvineso. Asi, tingatovabesera ngo zviito. Pikija vanganonoka kushandisa mbhangiro yo vapuwa kuvhira mu Bhaibheri, tinodikana kusengerera. Ngative inga ngirozi jiya. Tinodikana kubesera hama kana hambzaji jedu kuciripi kujisiya, topinda. Kusiyapo magama basi, tinodikana kujibesera ngo zviito. (1 Johani 3:18) Mu njira yo kufananijira, kangaije zvingadikana kuita ngo kuvabata mukono zve tovakhombija manera avangashandisa mbhangiro yo vapuwa.—Verenganyi 1 VaTesalònika 5:14.

7. Tingatevejeresa kudi muezaniso wa Jehovha pa mavonero aakaita Roti?

⁷ Jehovha aacaisotesesa kutama kukwana kwa Roti. Kusiyapo izvo, Jehovha wakafemera mupostori Pauro acinangira Roti inga mururami. Zvinodakajisa kuziva kuti Jehovha anoregerera zvishaishi zvedu! (Nduyo 130:3) Tingakwanisa kutevejera muezaniso wa Jehovha pa mavonero aakaita Roti here? Tikasotesesa mugariro jakanaka jo hama no hambzaji jedu, tinozova vanosengerera kwavari. Izvi zvinozova zvakareruka kwavari kuti vatendere besero ratinovapa.

8. Unyasha unotitora kuti tiitenyi?

⁸ Mukusiyana na Roti, Jobe aazivi kutambujika ngo pamusoro po kutema civaringo cakashata. Iyena wakasongana no zvineso zvakakura, wakaruza mujiyo yake, aacaireremejwazve mu ndharaunda yake zve acainga  no uhomi hwaushoni. Kuitira kunyanyisa, vana vake vese vakapera kufa ciripo-ripoco. Zve shamwari jake jokunyepa ajizivi kutatija kuva no unyasha, jakamushora. Ngenyi jakaita kudaro? Ngokuti ijona jaisotesesa mavonekero o kunja. Inga muviyo, jakava no murangariro wakashata zve jakatonga Jobe mu njira yakashata. Waro mungatizisa kudini kuitavo zvondozvo? Rangariranyi kuti Jehovha basi, ndiyena anozviziva zviri kuitika no mundhuwo. Munodikana kunasa kumupurukira ushoni paanonga ecimuverengera zvineso zvake. Itanyi zvizinji kupinda kupurukira magama ake, ejanyi kuva no mazwiro aanao. Ngokuita kudaro, munokhombija kuva no mwoyo wondhowo ku hama kana hambzaji.

9. Unyasha unotiita kuti titame kuitenyi zve ngenyi?

⁹ Unyasha unozotiita kuti titame kundhandhanisa zvokunyepa ngo pamusoro po zvineso zviri kusongana no vamweni. Magumba kana magumbu anophwanya ungano. (Mazwi Akangwara 20:19; VaRoma 14:19) Mundhu anoita magumba kana magumbu, wakashata zve mazwi ake angakhuvaza anongaro ecitambujika. (Mazwi Akangwara 12:18; VaEfeso 4:31, 32) Zvinodakajisa maningi kudari tikasotesesa mugariro jaushoni jo mundhu zve torangarira manera atingamubesera kuti ahwisane no zvineso zvake.

10. Tinojijenyi ngo zvatinowana pana Jobe 6:2, 3?

¹⁰ Verenganyi Jobe 6:2, 3. Jobe wakavereketavo inga ‘benji.’ Pakufamamba ko nguva, Jobe wakakhauya. (Jobe 42:6) Inga ndi Jobe, hama kana hambzaji ingava yecithimwa-thimwa ngo pamusoro po zvineso, yoguma pa kuvereketa magama acizivi kurangarihwa zve yotoguma pa kukhauya. Waro zvicinyi zvatingaita? Kusiyapo kuishora ngo magama ayo, tingakhombija unyasha.  Ceujanyi kuti Jehovha na kamwe aacaida kuti tive no zvineso zvatiri kusongana nazvo nyamasi uno. Ngokudaro, zvinozwisisika kudari mushandiri wakagondeka wa Jehovha wovereketa magama acizivi kurangarihwa paanonga akasuruvara. Pikija akananga magama akashata ngo pamusoro pa Jehovha kana ngo pamusoro pedu, ticakasika kunyangajwa kana kumutonga ngo kunanga zviro zvakadaro.—Mazwi Akangwara 19:11.

11. Vakuru vangatevejeresa kudini Erihu pavanopa mbhangiro?

¹¹ Nguva jimweni, mundhu ari kuhwisana no zvineso angadikana kupuwa mbhangiro. (VaGalàsia 6:1) Vakuru vangazviitisa kudini? Ivona vanodikana kutevejera Erihu, uwo wakapurutana Jobe ngo kusengerera kwese. (Jobe 33:6, 7) Erihu wakapa mbhangiro pasure po kuzwisisa murangariro wa Jobe. Vakuru vakatevejera muezaniso wa Erihu, vanozopurutana no ubhasopa hwese zve vanoeja kuzwisisa mugariro wo mundhuwo. Vakaita kudaro, mbhangiro yavo ingathuka yabaya mwoyo wo mundhuwo.

12. Kufa ko mwamuna no vana vaviri, kwakapsasisa kudini Naomi?

¹² Naomi wainga mwanakaji wakagondeka waida Jehovha. Asi pakupera kufa ko mwamuna wake no vana vake vaviri, wakada kucinja zina rake kuti rive “Mara,” bzinoti “kuxaxa.” (Rute 1:3, 5, 20) Pa zvineso zvese zvakasongana na Naomi, Ruti nyamwana yake, yaingepovo. Ruti aazivi basi kumubesera kuti awane zvinodiwa zvake, asi wakavereketa masoko anovangisa. Ngo magama akapfava, Ruti wakakhombijira rudo no kupa besero raida Naomi.—Rute 1:16, 17.

13. Ngenyi vese vanofihwa ngo mwamuna kana mukaji vanoda besero redu?

¹³ Kudari hama kana hambzaji yakafihwa ngo mukaji kana mwamuna, zvokadi kamare inoda besero redu. Varovorani pa mucadho vanova inga muti muviri inokura yakabatana. Pa kufamba ko makore, miji jakhona jinopiyana-piyana. Ngokudaro muti umwe ukavhitwa wofa, unosararo aukuri ushoni. Mukufananavo, umwe paanofihwa ngo mukaji kana mwamuna zvingamuhwaja maningi zve zvingatora mukuvo wakakura maningi. Paula, * uwo wakava noni ngo civhumbu, wakati: “Upenyu hwangu hwakacinja mukuperera zve ndakakonehwa cokuita. Ndakaruza shamwari yangu yo pa mwoyo. Wainga mundhu wandaibhuya nae ngo pamusoro po zvese. Tainga tese pa mukuvo unodakajisa no mukuvo unonesa. Iyena waindipurukira mukuvo wese pondaimuverengera zvineso zvangu. Mwamunangu paakafa, ndakajizwa inga kuti ndaguhwa ngo pakati.”

14-15. Tingaembezeresa kudini mundhu wafihwa ngo mwamuna kana mukaji?

¹⁴ Tingaembezeresa kudini vaya vakafihwa ngo mwamuna kana mukaji? Danyu rokutanga zve rinosisira maningi ngo rokubhuya navo, pikija pamunova no zvinyowa kana mucikazivi cokunanga. Paula wanangwaya pakutanga, wakati: “Ndinozwisisa kuti rufu unoita kuti vandhu vatame kujizwa vakasujunuka. Ivona vanothya kunanga zviro zvinokhungunya wafihwaya. Asi zvinonyanyisa ngo zvokutama kuvereketa ciro.” Kazinji, mundhu wakafihwa aaveteri kuti tinange ciri cese cinocinja upenyu hwake pa nguva yondhoyo. Paula wakati: “Shamwari jangu pajaindivhunja kuti: ‘Ndino urombo ngo zvaitikari,’ ndaijizwa ushoni.”

¹⁵ William, uwo wakafihwa ngo mukaji wake pa makore akhirira, wakati: “Ndinodakara maningi pandinozwa vamweni vacindiceukija  zvaiitwa ngo mukaji wangu. Ngokudaro, ndinova no cokwadi co kuti iyena waidiwa no kureremejwa. Besero iro rinondivangisa maningi. Magama avo anondithondoja maningi ngokuti mukaji wangu wainga no mutengo mukuru maningi kwandiri zve wainga mudiwa wo pa mwoyo.” Noni imweni inozwi Bianca yakasanangura kuti: “Ndinovangiswa maningi vamweni povanoita mukumbiro na inini zve vondiverengera vhesi nganani jo Bhaibheri. Zvinondibesera pandinozwa vecibhuya ngo pamusoro po mwamuna wangu no kundipurukira ndecibhuya ngo pamusoro pake.”

16. (a) Zvicinyi zvatinodikana kuitira vaya vakafihwa ngo mukaji kana mwamuna? (b) Mukuzwirana na Jakobo 1:27 tinomutoro wapi?

¹⁶ Kudari inga ndi Rute wakaita zviri zvese kuna Naomi, itusu tinodikana kubesera vese vakafihwa ngo mudiwa wavo. Paula, wanangwaya pa kutanga, wakati: “Mwamunangu pavakafa, ndakawana besero rakakura maningi. No pakhirira mukuvo wakati kuti, vandhu vakandibeseraya vakabatikana maningi ngo basa ravo ro njiku no njiku. Pikija zvakadaro, upenyu hwangu hwakacinja maningi. Zvinodakajisa kudari vamweni povanozwisisa kuti mundhu wakafihwaya anoda besero pikija pakhirira mweji jakawanda kana makore.” Ngo zvokadi kuti takasiyana. Vamweni avanesenyi kuroveja upenyu upsa. Kuveni vamweni, pavanonga vaciceukija ciri cese covaiita no mudiwa wavo, zvinovahwaja maningi. Manera o kuhwisana no kufihwa zvinosiyana ku mundhu ngo mundhu. Ngaticeukije kuti Jehovha anotireremeja no kutipa mutoro wo  kutaja vakafihwa ngo mukaji kana mwamuna.—Verenganyi Jakobo 1:27.

17. Ngenyi vandhu vakarambwa ngo mwamuna kana mukaji vanoda besero redu?

¹⁷ Vandhu vamweni vanodikana kuhwisana no kuthimwa-thimwa no kusuruvara ngo kurambwa ngo mukaji kana mwamuna. Joyce, uwo warambwa ngo mwamunake ngo ndava yo mukaji umweni, wakati: “Kuhwajihwa kondaida kuzwa ngo kufihwa kwaizosiyana no kuhwajihwa kwandiri kuzwa ngo kurambwa. Kurambwa kwakandihwaja maningi kupinda kufihwa ngo mwamuna. Kudari mwamunangu naakafa ngo ndhenda kana ngo ngozi, ndaizozviziva kuti akucainga kuda kwake. Asi paciitiko cedu, mwamunangu wakandiramba. Ndakajizwa inga kuti ndatukwa zve andicasisiri.”

18. Tingaitisa kudini kuti tibesere vese vakarambwa?

¹⁸ Patinoita zviro zvidoko zvinovonesa kunaka mwoyo ku vandhu vakarambwa ngo mwamuna kana mukaji, tinokhombija kuti tino rudo navo. Wari no vari vega vanoda shamwari jaushoni. (Mazwi Akangwara 17:17) Mungakhombijisa kudini kuti muri shamwari yaushoni kwavari? Mungavakoka kuti vaviye koha kanyi kwenyu. Mungavakoka kuti muvhakace mwese kana kuti vawanike pakunamata kwenyu ko mbhuri, kana kutobuda navo mu basa ro kucumaera. Mukaita kudaro, munozodakajisa Jehovha, ngokuti iyena “ari phedo no mwoyo yakakhuvazwa” zve anojivirira kana kuti ndi “mutongi wakarurama wo noni.”—Nduyo 34:19; 68:6.

19. Mecirangarira zvinonangwa pana 1 Pedru 3:8, masunga kuitenyi?

¹⁹ Sambiri pano, Umambo hwa Mwari paunonga ucitonga nyika, “matambujiko o kare anozokanganiwa.” Tiri kudakarira kuguma mu nguva yo kuti “bzo kare abzizocerecejwibze, abzizodihwibze mu mwoyo.” (Isaia 65:16, 17) Icito yaguma dhiya iyi, ngatibesane ngocedu. Ngokudaro, ngatikhombije ngo zviito no magama kuti tino rudo no vese vanoita divi ro mbhuri ya Jehovha.—Verenganyi 1 Pedru 3:8; Shanduro yeNyika Itsva.