VAIZIRAERI povainga vecinasirira kuti vaambuke Murambo wo Jorodhani, kuti vanghwine mu nyika yo vainga vapikihwa ndi Mwari, vandhu vamweni vakavavhakacira. Vandhu vondhovo vainga matombozana, aida kukoka vanarume kuti vaende ku mabuso. Wainga mukana wovacikazivi kuuvonazve. Vaizowana shamwari jipsa, vaizotamba no kuha zviro zvaushoni. Matombozana awo, ainga no zvirovejeso no mugariro jakasiyana no Mutemo wainga wakapekeja Mwari vaIziraeri. Kangaije vanarume vamweni vakatorangarira kudari: ‘Apana cinoitika. Tinozojingwarira.’

 Zvicinyi zvakaitika? Bhaibheri rinoti: “Vandhu vakaamba kuhura no vanakaji vo vaMoabi.” Zvokadi kamare, vanakaji ava, vaida kuti vanarume vaya vanamate zvimwari zvo manyepo. Zve vakazvinamata! Ngokudaro “uxungu hwa Mwari hwakavabwakira.”—Bzviverengo 25:1-3.

VaIziraeri vaya, vakaphwanya Mutemo wa Mwari ngo njira mbiri: Ivona vakanamata zvithombe zve vakaita zvo uhure. Ngo kutama kuzwira kwavo, zviuru no zviuru zvo vandhu vakafa. (Exodo 20:4, 5, 14; Deuteronòmio 13:6-9) Zvicinyi zvakaitisa kuti ciitiko ici cive cinosuruvarisa? Kudari vanarume ava no vacizivi kuphwanya Mutemo wa Mwari, zviuru no zviuru zvo vaIziraeri zvaizoambuka Jorodhani no kunghwina mu Nyika yo Cipikihwa.—Bzviverengo 25:5, 9.

Ecibhuya ngo ciitiko ici, mupostori Pauro wakati: “Bzese ibzi bzakaitika kovari inga muezaniso. Bzakatahwa kuti tipangihwe itisu tinoraramari pa nguva yokupejisira yo makore.” (1 VaKorinto 10:7-11) Pacina kukana-kana, Sathana wakadakara maningi paakavona vaIziraeri viya veciita cishaishi cikuru no kuvaita kuti vatame kunghwina mu Nyika yo Cipikihwa. Ngo zvo ungwaru kamare kubatisisa zvakaitikari. Apana cimweni cinodakajisa Sathana kusiyapo kutivona tecitama kunghwina mu nyika imbza ya Mwari!

Sathana anoda kuti maKristu abatwe ngo murau wake, ngo iyo ndava iyena anoshandisa murau jaanonasa kuziva zve jakamboshanda kareko. Inga zvotaperari kuvona, kuti acengeje vaIziraeri iyena wakashandisa uhure. Nyamasi uno, uhure uciri kushandavo maningi. Kuti tiwire mu murau uwu, iyena anoshandisa zvoumitu-mitu.

Nyamasi uno, mundhu angakwanisa kuvona zvoumitu-mitu pa cifishe-fishe. Kareko, mundhu waida kuvona zvoumitu-mitu, waidikana kwenda ku ndau inovoniwa firimi kuti avone zvondhozvo kana kwenda kootenga majhoronari anovonesa zvoumitu-mitu. Kwenda ku ndau iji zvaiitisa maningi nyowa, ngokudaro vazinji avacaienda. Asi wari uno, mundhu ecishandisa interneti angakwanisa kuvona zvoumitu-mitu paanonga ari ku basa pikija pari pese paanonga ari. Zve mu nyika zinji, vanarume no vanakaji vangakwanisa kuvona zvoumitu-mitu vacikazivi kubuda pa muzi.

Asipi izvona basi. Foni no matabreti ari kuita kuti kuvona zvoumitu-mitu kureruke maningi. Vandhu povanonga vecifamba mu gwanja, vari mu karu kana mu mashibhombha, ivona vangakwanisa kuvona zviro zvakashata mu foni kana tabheti javo.

Zvecivoneka kuti wari zvareruka maningi kuvona zvoumitu-mitu pacina mundhu anozviziva, zviri kukhuvaza vandhu vakawanda maningi. Vazinji vanovona zvoumitu-mitu vari kukhuvaza mucadho wavo, vanova vandhu vacikajireremeji zve vanokhuvaza hana javo. Zvakashatisisa maningi nga izvi, zvinokhuvaza ushamwari wavo na Mwari. Zvokadi kamare, kuvona zvoumitu-mitu zvinokhuvaza vandhu viya vanozvivona. Kazinji, zvinoita kuti ivona vahwajihwe basi. Kuhwajihwa kondhoko kungagara mukuvo wakareba zve zvotonesa maningi kuzvikanganwa.

Tinodikana kuzwisisa kuti Jehovha anokwanisa kutingwarira ku murau uwu wa Sathana. Asi kuti iyena aite kudaro, tinodikana kuita zvicikazivi kuitwa ngo vaIziraeri vaya, ‘kupurukira izwi’ ra Jehovha. (Exodo 19:5) Tinodikanazve kuzwisisa kuti Mwari anonyenya kamare zvoumitu-mitu. Ngenyi tingananga kudaro?

Amborangariranyi izvi basi: Mutemo jakapa Mwari ku Iziraeri yo kare jainga jakasiyana no mutemo jo majinja amweni. Inga mufimbiji, ijona jaishanda kuitira kujivirira vaIziraeri kuti vatame kuita zviro zvakashata zvaiithwa ngo majinja amweni. (Deuteronòmio 4:6-8) Kuvhira pa mutemo jondhojo, ciro cimweni cainga cakanasa kujeka ngo co kuti: Jehovha anonyenya uhure.

 Paakapera kundha-ndhanisa zviro zvese zvakashata zvaiitwa ngo majinja amweni, Jehovha wakati ku vaIziraeri: ‘Mucateveja bzo vanoita vaKenani, nyika yo ndinomuseseja kuendeyo. . . . No nyika yakaswipiswa, ndizvo ndinozoivisira kushata kwayo panyezuru payo.’ Kuna Mwari, uwo wakacena wo vaIziraeri, vakenani vainga no maponero akasvipiswa zvokuti ndau yo vaigara yainga yakasvipa kamare.—VaLevi 18:3, 25.

Pikija Jehovha wakapanica vaKanani, vandhu vamweni vakaenderera mberi vacihura. No papera 1500 o makore, Pauro wakananga kuti maKristu aipona no majinja ‘aiita inga kuti aacaipurukira.’ Zvokadi kamare, ‘akajiregera, kuti aemurisise kuita mufumbo wese wo upombo.’ (VaEfeso 4:17, 19) Nyamasi unovo, vandhu vakawanda maningi vari kuita zvo uhure. Inga maKristu o cokwadi atidikani kuvona zviro zvakashata zvinoitwa ngo nyika ino.

Zvoumitu-mitu zvinokhombija kutama kureremeja Mwari. Iyena wakasika vandhu ngo muezaniso wake. Iyena wakatiita mu njira yo kuti tikwanise kuziva cakanaka no cakashata. Ngo ungwaru hwese, Mwari wakagaja mutemo ngo pamusoro po ruvatano. Izvi zvinoreva kuti ruvatano unodikana kuitwa ngo vandhu vakacadha. (Genesi 1:26-28; Mazwi Akangwara 5:18, 19) Kuzoti, vaya vanokhwijirija zvoumitu-mitu vari kuitenyi? Ivona avaripi kureremeja ndhungamiro ja Jehovha ngo pamusoro po mufambiro. Hina, vandhu vondhovo avaripi kureremeja Jehovha. Mwari anozotonga vaya vanophurusa ndhungamiro jake ngo kukhwijirija zvoumitu-mitu.—VaRoma 1:24-27.

Asi, tingati kudini no vaya vanovona zvoumitu-mitu kana kuverenga vacizvida kamare? Vamweni vanonanga kuti kuvona zvoumitu-mitu akukhuvazi. Asi, ivona vari kubesera vaya vacikareremeji ndhungamiro ja Jehovha. Kangaije povakatanga kuzviita avacaida kuti zvidaro. Pikija zvakadaro, Bhaibheri rinokhombija kamare kuti vanamati vokadi va Mwari vanodikana kuramba kuvona zvoumitu-mitu. Bhaibheri rinotingwaja kudari: ‘Imwimwi munoda Jehovha nyenyani zvakashata.’—Nduyo 97:10, Biblia Mazwi Akacena aMwari.

Pikija vaya vanoda kusiya kuvona zvoumitu-mitu zvinganesa maningi kuzviita. Itusu atizivi kukwana zve tinodikana kuhwisana no zvido zvicikazivi kucena. Kusiyapo zvondhozvo, mwoyo wedu ucikazivi kukwana ungaeja kutikhowesa kuti azvizivi  kushata kuvona zvoumitu-mitu. (Jeremia 17:9) Asi, vazinji vakaguma pa kuva maKristu vakawina hondo iyi. Kuziva izvi, zvingamuvangisa maningi, kudari muri kuhwisana no cineso cakafanana. Vonanyi kuti Soko ra Mwari ringamubeseresa kudini kuti mutize murau uwu wa Sathana wo kuvona zvoumitu-mitu.

Inga zvotaperari kuvona, vaIziraeri vazinji vakatendera zvido zvavo zvakashata, izvo zvakavaviisira ngozi. Zviro zvakafanana zvinoitikavo nyamasi uno. Jakobo hama ya Jesu, wakasanangura ngozi iyi paakati: “Kaveta mundhu anoejwa ngo maemuriro ake. Maemuriro ondhoo anomita no kubara uxaixi.” (Jakobo 1:14, 15) Mundhu paanosiya cido cakashata cikure mu mwoyo mwake, zvinozomuita kuti aite cishaishi. Ngokudaro, tinodikana kubvita murangariro wese wo kuva no zvido zvakashata zve totama kuzvirangarirazve.

Kudari murangariro ucizivi kucena ukaramba ucikura, itanyi ciri cese. Jesu wakati: “Nyara yako dangani murenje wako kudari bzikakuitisa uxaixi, bzitemei [zve] bzipsejei ndhambo kouri. . . . Jiso rako rikakuitisa cixaixi ribvisei, rikhandirei ndhambo kouri.” (Mateu 18:8, 9) Jesu aacaida kunanga kuti tinodikana kujitemadi kamare. Iyena wakaita muezaniso uwu kuti tivone dikano yo kuvhisa ngo kukasika ciri cese cingatiita kuti tikhugunyike. Tingashandisa kudini mbhangiro iyi, tikabhuya ngo pamusoro po zvoumitu-mitu?

Kudari mukavona zvoumitu-mitu, mucarangarira kuti, ‘apana cinoitika.’ Ngo kukasika furatiranyi, cinjanyi kanari yo tirivhizori. Kana kutojima komputadhori kana foni yenyu. Kuita zviro izvi, zvingamubesera kuti mukwanise kungwarira murangariro wenyu kusiyapo kutendera kuti zvido zvenyu zvakashata zvimuite kuti mushaishe.

Zvingatoita kuti imwimwi muri kukwanisa kusiya kuvona zvoumitu-mitu, asi nguva jese moramba meciceukija zviro zvakashata zvomaivona kare. Munodikana kuitenyi? Pikica jinokhombija zvoumitu-mitu kana murangariro jakadaro jingaramba jiri mu murangariro mo mundhu pa mukuvo wakareba. Zvingatoviya mu murangariro wenyu  mucikazviveteri. Pazvinoitika, kangaije mungatoda kuita zviro zvicikazivi kucena, zvakadari inga cinyamundundu kana bonyora kana kutoita zvimweni zvakapinda kushata. Ngokudaro, munodikana kuziva kuti zviceukijo izvo zvingatoviya pa mukuvo uri wese zve munodikana kuva makanasiririka kuti muhwisane nazvo.

Vangisanyi cisungo cenyu co kuda kurangarira no kuita zviro ngo manera aanoda Mwari. Itanyi inga ndi Pauro, uwo wainga wasana ‘kutambuja muviri wake, no kuuita muranda.’ (1 VaKorinto 9:27) Mucatendera kuti zvido zvakashata zvimuite muranda. “Phindukanyi, mecitenderuja mirangariro yenyu, kuti muzivisise ngo kwapi kuda kwa Mwari, ngo capi cauxoni, cinodakaja no cakaperera.” (VaRoma 12:2) Ceukijanyi kuti: Kurangarira no kuita zviro mukuzwirana no kuda ka Mwari zvinoviisa mudakaro mukuru maningi kusiyapo kuva no zvido zvakashata.

Ejanyi kuva no vhesi nganani jo Bhaibheri mu musoro. Inga muezaniso, Nduyo 119:37; Isaia 52:11; Mateu 5:28; VaEfeso 5:3; VaKolosi 3:5; Shanduro yeNyika Itsva, pomwe no 1 VaTesalònika 4:4-8. Ngokudaro, murangariro jakashata pajinoguma, ejanyi kurangarira vhesi jondhojo. Izvi zvinozomubesera kuti muve no mavonero anoita Jehovha zvoumitu-mitu no zvaanoda kuti imwimwi muite.

Waro munozodini, kudari cido co kuda kuvona kana kurangarira zviro zvicizivi kucena zvikanesa kuzvikunda? Ngo kungwarira kwese nasanyi kutevejera Jesu, uwo ari muezaniso wedu. (1 Pedru 2:21) Jesu pakupera kubhabhatijwa, Sathana wakamueja pa vhaza jakawanda. Jesu wakaitenyi? Iyena wakacungirira. Ngo kushandisa vhesi jo Bhaibheri iyena wakaramba muejo ja Sathana. Iyena wakati: “Ibvai Sathana” zve wakamusiya. Jesu aazivi kuremba pa kuhwisana kwake na Dhiabhu, ngokudaro imwimwivo mucadoremba. (Mateu 4:1-11) Sathana no nyika yake vanozoenderera mberi vecizaja murangariro wenyu ngo zviro zvakashata, asi mucadoremba. Mungakwanisa kuwina pa kuhwisa kwenyu kuvona zvoumitu-mitu. No besero ra Jehovha, mungakwanisa kunyisa muvengi wenyu.

Itanyi mukumbiro kuna Jehovha kuti amubesere. Pauro wakati: “Mutatijenyi Mwari bzomunotama. . . . Rugarisiko hwa Mwari hunopinda uzivi hwese hunozorinda mwoyo yenyu no murangariro yenyu, mwa Kristu Jesu.” (VaFilipi 4:6, 7) Mwari anozomupa runyararo hwo mukati no kuvangisa cisungo cenyu co kunyisa zvido zvakashata. Kudari mukakwedera kuna Jehovha, “yena anozomukhwedereravo.”—Jakobo 4:8.

Kungwarihwa kukuru kwatingawana kuitira cineso ciri cese i kuva no ushamwari wo phedo kamare no Mukuru-kuru wo mudenga no pasi. Jesu wakati: “Mambo wo nyika [Sathana] ari kuza. Ngo bzokadi akuna caanokwanisa kondiri.” (Johani 14:30) Jesu waizvizivisa kudini izvi? Iyena wakazvisanangura kudari: “Wiya wakandituma ana inini: aandiregeri ndega, ngokuti ngari jese ndinoita bzokumudakajisa.” (Johani 8:29) Pamuenderera mberi meciita zviro zvinodakajisa Jehovha, narini iyena aazomusii mwega. Tizanyi muejo wo kuvona zvoumitu-mitu, mukadaro, Sathana anozotizira ndhambo.