1. Jehovha anozwa kudini kudari vhuta rake rikahwirira kwaari?

INGA ZVOTAKABHUYA pa musoro waperari, Jehovha anojiezanisa pacake no muhavisi waushoni anonasa kukorondha vhuta rimwe nga rimwe. Iyena anopsaka mundhu wasvejeka. Iyena wakati kuno Vaiziraeri vakasiya kumushandira: “Vianyi kondiri, inini ndinozovia komuri.” Tinozviziva kuti iyena aciri kuva no mazwiro ondhoo, ngokuti iyena wakati: “Andizivi [kucinja].” (Malakia 3:6, 7) Jesu wakananga kuti Jehovha no ngirozi vanodakara pavanovona vashandiri vake vacihwirira kwaari.​—Luka 15:10, 32.

2. Tinozobhuya ngo pamusoro penyi pa musoro uwu?

² Ngativonenyi muezaniso mutatu jakananga Jesu, jakacijikira pa kubesera vese vaya vakaima kushandira Jehovha. Tinozobhuya ngo mugariro jatinodikana kuva najo kuti tibesere mavhuta akasvejeka kuti ahwirire kuna Jehovha. Tinojijira kuti tinozova no mudakaro mukuru patinobesera vaya vacikacaiti basa kuti vahwirire kuna Jehovha.

3-4. Mukuzwirana na Luka 15:8-10, ngenyi mwanakaji uu wakapsaka ushoni mukuruzadho wake wainga wakasvejeka?

³ Tinodikana kushanda ngo simba kuti tikwanise kuwana vaya vanoda kuhwirira kuna Jehovha. Muezaniso unowanika mu Vhangeri ra Ruka, Jesu wakabhuya ngo mwanakaji wakasvejekehwa ngo mukuruzado unosisira. Cinosisira maningi pa muezaniso uu, mapsakire aiita mukuruzadhowo.​—Verenganyi Luka 15:8-10.

⁴ Jesu wakasanangura mazwiro akava no mwanakaji, paakawana mukuruzadho unosisira wainga wasvejeka. Mu njiku ja Jesu, tombozana jo Iziraeri pojaicadha, majimai ajo nguva jimweni aijipa gumi ro mukuruzadho jakasiyana-siyana. Zvingaita kuti mukuruzadhowo, waisisira maningi ku mutombozana wiya, ngo kuti cainga cipo caakapuwa ndi mai wake. Mwanakaji wiya, anorangarira kuti mukuruzadho wiya wakambwera. Ngo kudaro, wakabwakija  cibani wosota, asi apana caakawana. Kangaije cibani ciya acicainasa kuvheneka ushoni kuti awane cimukuruzadho co sirivha. Pakupejisira, iyena wakapsaira ushoni mumba mese. Pakati po svina yaakaunganija wakavona mukuruzadho ucimunikira. Iyena wakadakara maningi ngo kuuwana. Izvo zvakamuita kuti adanije shamwari no vo cigarisano kuti avavhunje.

5. Ngenyi zvinoda kuvangisira kuti tiwane vacikacaiti basa?

⁵ Inga zvatinovona pa muezaniso wa Jesu, patinoruza ciro, tinodikana kushanda ngo simba kuti ticiwane. Mu kufananavo, tinodikana kushanda ngo simba kuti tiwane vaya vacikacaiti basa. Kangaije paano makore akati kuti acikavii kumusongano. Kangaije vakatoenda kogara ku ndau yokuti hama jinogaremo ajivazivi. Asi tingava no cokwadi cokuti vamweni vacikacaiti basa, vanoda kamare kuhwirira kuna Jehovha. Ivona vanoda kushandira Jehovha no hama no hambzaji, asi ivona vanoda besero redu.

6. Vese muungano vangabeseresa kudini pa kupsaka vacikacaiti basa?

⁶ Ndiani angabesera pa kupsaka vacikacaiti basa? Vacumaeri vese mu ungano vangabesera pa kupsaka vacikacaiti basa, tiri kubhuya ngo vakuru, mapiona no vese vokuti pa mbhuri pavo pano mundhu acikacaiti basa. Imwimwi muno shamwari kana o paukama acikacaiti basa here? Kunanga kuti pa basa rokucumaera muzi ngo muzi kana kucumaera ko pambhene, makambowanana no mundhu acikacaiti basa here? Kudari mundhuwo wakamuvhunja kwaanogara kana kumupa numero yake yo foni, imwimwi mungapa vakuru.

7. Majijenyenyi ngo zvananga hama Tomasi?

⁷ Vakuru vanomutoro mukuru maningi wo kuwana vaya vacikacaiti basa kuti vahwirire kuna Jehovha. Vangazviitisa kudini? Vonanyi zvakananga mukuru umweni anodanwa Tomasi. * Ivona vanogara Shipanya, vakabesera Zvapupu zvinopindirija makumarongomuna kuti zvihwirire muungano. Hama Tomasi vakati: “Cokutanga, ndinovhunjisa hama no hambzaji jingaziva kunogara mundhuwo wari. Kana kuti, ndinovhunjisa vacumaeri kuti vanoceuja ariwese acikavii kumusongano. Vazinji mu ungano vanodavira no cido cese ngokuti vanojizwa kuti vanobatanijwavo pa kupsaka. Pandinovhakacira hama kana hambzaji, ndinovhunjisa ngo pamusoro po vana vavo kana ukama. Vamweni vacikacaiti basa, vaiviya no vana vavo kumusongano zve vana ava pa mukuvo umweni kangaije vakaguma pakuva vacumaeri. Ivonavo vangada besero ro kuhwirira kuna Jehovha.”

8. Pa muezaniso wo mwana wakasvejeka unowanika pana Luka 15:17-24, baba vakatajisa kudini mwana wavo wakakhauya?

⁸ Mugariro japi jatinodikana kuva najo kuti tibesere vese vanoda kuhwirira kuna Jehovha? Vonanyi zvatingajija kuvhira kumuezaniso wa Jesu ngo pamusoro po mwana wakabuda pa muzi. (Verenganyi Luka 15:17-24.) Jesu wakadurujira kuti pakupejisira mwana wiya wakajivona ega kuti ibenji wo tema civaringo cokuhwirira kumuzi. Babake pavakamuvona, vakagogoma ko mukumbatira, izvo zvakaita kuti avone rudo hwa baba. Mwana uwu, wakajipa ndava ngo pamusoro po zviro zvakashata zvaakaita zve wakazvivona kuti aacaisisira kuti atajwezve inga mwana. Baba vaya vakazwira unyasha mwana wavo, uwo wakavavhunja mazwiro ake. Pejisire baba vaya vakaita zviri zvese zvaizovonesa ku mwana wavo kuti waashihwa ushoni. Ivona avazivi kumutaja inga mureki, asi vakamutaja inga mwana anodiwa. Zvinokhombija kuti babevo vaida mwana wavo wakakhauya, ngo zvokuti ivona vakaita mabuso, vomupekeja nguvo yakaseja maningi.

9. Mugariro japi jatinodikana kuva najo kuti tibesere vacikacaiti basa kuti vahwirire kuna Jehovha? (Vonanyi bhokiso rinoti “ Tingabeseresa Kudini Vese Vanoda Kuhwirira Kuna Jehovha.”)

 ⁹ Jehovha wakadari inga baba vanangwari pa muezaniso uwu. Iyena anoda hama no hambzaji jicikacaiti basa zve anoda kuti vahwirire kwaari. Ngo kutevejera Jehovha, tingavabesera kuti vahwirire kwaari. Kuti tiite izvi, tinodikana kukhombija kusengerera, unyasha no rudo. (Jakobo 2:13) Ngenyi tinodikana kutatija mugariro jese iji zve tingazviitisa kudini?

10. Ngenyi tinodikana kuva tinosengerera kuti tibesere vamweni kuti vakhwedere kuna Jehovha?

¹⁰ Tinodikana kusengerera ngokuti zvinotora mukuvo kuti mundhuwo ahwirire kuna Jehovha. Uzinji wo vandhu vainga vacikacaiti basa, vanonanga kuti vakuru no vamweni muungano vakadikana kuvavhakacira kakawanda kuti vashandirezve Jehovha. Hambzaji inodanwa Nansi, vanogara Azia, vakatara kudari: “Shamwari yangu yo mu ungano yo cike-ndi-cikevo, yakandibesera maningi. Iyona yaindidakarira inga ndainga musharuka. Iyona yakandivhunja mukuvo jaushoni jatakava tese. Yainasa kundipurukira ushoni pandaiivhunja mazwiro angu, zve aicaithyepi kundipa mbhangiro. Iyona yakavonesa kuti yainga shamwari yo kadi, yaindibesera mukuvo uriwese.”

11. Ngenyi tinodikana kuva no usizi kuti tibesere vaya vakasuruvara?

¹¹ Usizi wakadari inga mutombo ungabesera vaya vakakhuvazika kuti vajizwe ushoni. Vamweni vacikacaiti basa ko makore, vakacamwiswa ngo ariwese muungano zvokuti vacakasuruvara maningi. Mazwiro awo, anovaita kuti vatame kuva no cidakadaka cokuda kuhwirirazve kuna Jehovha. Ivona vangarangarira kuti avazivi kutajwa ushoni. Kangaije vanoda ariwese kuti avapurukire no kuzwisisa mazwiro avo. (Jakobo 1:19) Hambzaji Maria, avo vakambosiya  kwenda kumusongano ko mukuvo wakati kuti, vakati: “Ndaida waizondipurukira no kundivangisa zve no kundipa besero.”

12. Rudo unokhombija Jehovha kuno vaya vakamboima kumushandira, unoezaniswa nenyi?

¹² Bhaibheri rinosanangura rudo hwa Jehovha inga uruji kana bote. Kuitisa kudini? Vonanyi muezaniso uwu: Amborangariranyi kuti muri kundondomera mujombe, movona mundhu ecikhandira sarvha-vhidha. Ngo zvokadi kuti maizobongesera ngo kuti sarvha-vhidha iyi yaizomubesera kuti mutame kundondomera. Asi sarvha-vhidha andiyopi basi ingaponesa upenyu hwenyu. Kumwa inonga yakatondhora zvokuti amuzokwanisi kupona kudari mucina sarvha-vhidha. Munoda kuti ari wese amukhandirire bote, kuti mukwanise kuguma kuno sarvha-vhidha. Jehovha wakananga kudari kuno Vaiziraeri vaingaya vaima kumushandira: “Ndaivakweva ngo . . . zvisungo zvo rudo.” (Hoseya 11:4) Mwari acino mazwiro akafanana no vaya vakamboima kumushandira nyamasi uno zve vari kuneseka ngo ndava yo zvineso pomwe no kuthimwa-thimwa. Iyena anoda kuti ivona vazive kuti iyena anovada zve anoda kuvabesera kuti vahwirire kwaari. Jehovha angamushandisa kuti mukhombije rudo hwondhowo.

13. Zvakaitika na hama Pabro zvinokhombijisa kudini kuti rudo hwedu ungabesera vamweni kuti vahwirire kuna Jehovha?

¹³ Zvinosisira maningi kuvhunja vaya vacikacaiti basa kuti Jehovha anovada maningi zve itusu tinovadavo. Hama Pabro, vanogara ku Amerika yo kakusi, vakagara vacikacaiti basa ko makore anodakarika makumatatu. Ivona vakati: “Mangwanani amweni, pondainga ndecibuda pa muzi pangu, ndakasongana no hambzaji imweni yaamusharuka zve yakabhuya neni mu njira yo rudo. Ndakatanga kucema inga mwana  mudoko. Ndakaivhunja kuti zvaidari inga kuti Jehovha wakaituma kuti iviye kobhuya na inini. Pa mukuvo wondhowo ndakatema civaringo co kuhwirira kuna Jehovha.”

14. Mukuzwirana no muezaniso uri pana Luka 15:4, 5, zvicinyi zvaidikana kuitwa ngo muhavisi paaiwana vhuta rakasvejeka?

¹⁴ Tinodikana kwenderera mberi tecibesera no kuvangisa vaya vacikacaiti basa nguva jese jatinosongana navo. Inga mwana wakasvejeka wo pa muezaniso wa Jesu, ivona vanonga vecihwajihwa mu mazwiro zvokuti zvingatora mukuvo wakareba kuti kupere. Ngokuti vainga ku nyika ya Sathana, kangaije ushamwari wavo na Jehovha asipi wo cike-ndi-cikevo inga zvowainga kare. Tinodikana kuvabesera kuti vavangise ushamwari hwavo na Jehovha. Pa muezaniso wo vhuta rakasvejeka, Jesu anosanangura manera akaita muhavisi kuti adire vhuta pa mapfuji ake no kwenda naro kumushambi. Iyena waipeja nguva no simba kuti apsake vhuta rakasvejeka. Asi iyena anozviziva kuti irona rinoda maningi besero. Ngokuti irona, arikwanisi kufamba kuti rihwirire rega ku mushambi.​—Verenganyi Luka 15:4, 5.

15. Tingabeseresa kudini vaya vanoda kuhwirira kuna Jehovha? (Vonanyi bhokiso rinoti: “ Bhrushura Rinosisira Maningi.”)

¹⁵ Tinodinaka kupeja nguva yakawanda no simba kuti tibesere vacikacaiti basa kuti vanyise zvineso zvavo kuti vashandirezve Jehovha. Asi ngo besero ro mujimu wa Jehovha, Soko rake no mabhuku atinoashira, tingavabesera kuti vavangisezve ushamwari hwavo na Jehovha. (VaRoma 15:1) Tingazviitisa kudini? Mukuru umweni waanouzivi wakati: “Vazinji vakaima kuita basa vanodikanazve kuva no jijo yo Bhaibheri pavanosunga kuhwirirazve kuna Jehovha.” *  Ngo kudaro, pamunokumbihwa kuti mujije no mundhu acikacaiti basa, tenderanyi kudari mucizvikwanisa. Mukuru wiya wakatizve: “Mundhu anodaro kuitisa jijo yo Bhaibheri, anodikana kukhombija ushamwari kuti mundhu acikacaiti basa ave anomuthemba no kuva akasujunuka kuti abhuye nae.”

16. Tinozvizivisa kudini kuti ngirozi jinozotibesera?

¹⁶ Kuno muezaniso jakawanda jikhombija kuti ngirozi jinotibesera kuti tiwane vacikacaiti basa vanoda kuhwirira kuna Jehovha. (Apokalipsi 14:6) Inga muezaniso, hama Silvio vanogara Ekwadhori, vakaita mukumbiro kuna Mwari kuti atume mundhu kuti avabesere kuhwirira kuna Jehovha. Vacito vapeja kuita mukumbiro, vakuru vaviri vakaima pa musuvo pavo. Vakuru ava vakasunga kupa besero rese raidiwa kuti hama iyi ihwirire kuna Jehovha.

17. Tinojizwa kudini patinobesera vainga vacikacaiti basa?

¹⁷ Tinozova no mudakaro ngo kubesera vacikacaiti basa kuti vaviye kuna Jehovha. Vonanyi zvakananga hama Sarvhadhori vari piyona, avo vakavangisira maningi kuti vabesere vacikacaiti basa. Ivona vakati: “Pandinorangarira ngo pamusoro po vandhu vacikacaiti basa avo vakahwirira kuna Jehovha, nguva jimweni ndinombweja musoji ngo kudakara. Ndinodakara maningi ngokuti ndakwanisa kushanda na Jehovha ngo kubesera umwe wo vashandiri vake kuvha mu nyika ya Sathana kuti vahwirire kwaari.”—Maitiro o Vapostori 20:35.

18. Kudari muri umwe wo vacikacaiti basa, mungava no cokwadi cenyi?

¹⁸ Kudari muri umwe wo vacikacaiti basa, tabata murenje, ivanyi no cokwadi cokuti Jehovha aciri kumuda. Iyena anoda kuti muhwirire kwaari. Munodikana kuvangisira kuti muhwirire kwaari. Inga baba vanonangwa pa muezaniso wa Jesu, Jehovha ari kumuvetera kuti muhwirire kwaari zvokuti anozomuashira ngo nyara mbiri.