Pa vhesi 22 pano mugariro mupfumbamwe jinodikana kuva no Makristu: “Mucero wo mujimu I rudo, mudakaro, runyararo, kusengerera, unyasha, unaki, gonda, kupfava kujibata.” Iji, andijopi jega basi mugariro jakanaka jatingabesehwa kusakurira ngo mujimu wa Mwari.

Tinozvizivisa kudini? Tinozviziva ngo kuti mupostori Pauro acito abhuya ngo pamusoro po mucero wo mujimu, iyena wakatara kudari: “Mabasa o nyama anozivika pa mbhene: Upombo, kupombora, ugandanga, kuromberera bzo pasi, uroi, theka, kuxorana, uxanje, runya, kupipana, kukaxana, kuparajana, thima, kurejera, kuhisa no bzimweni bzakadaro.” (VaGalàsia 5:19-21) Pauro wakapejisa ngo magama o kuti “no bzimweni bzakadaro,” kuvonesa kuti iyena aazivi kundandanisa zviro zvese zvinobatanijwa pa mabasa onyama. (VaKolosi 3:5) Iyena wakaitavo zviro zvakafanana paakabhuya ngo pamusoro po mugariro jaushoni. Iyena wakati: “Akuna Mupango ungakanija bziro ibzi.” Ngo kudaro, Pauro aazivi kunanga mugariro jese jaushoni jatingasakurira tecibesehwa ngo mujimu mucena.

Tinozwisisa izvi patinoezanisa mucero wo mujimu no mucero wo ruvheneko wakatahwa ndi Pauro kuitira ungano yo Efeso, paakati: ‘Ngokuti [mucero yo] ruvheneko inobara kupfava kwese, ururami no zvokadi.’ (VaEfeso 5:8, 9) Hina, unaki idivi ro mucero wo ruvheneko, ngo divi rimweni, idivizve ro mucero wo mujimu.

Tingazwisisa izvi patinoezanisa mucero wo mujimu no mugariro mutandhatu jakavhunjwa Timoti ndi Pauro kuti ajisakurire. Jakadari inga iji: “Rutendo, rudo, kupfava mwoyo, urungami, unyaxa no kuvangirira.” (1 Timoti 6:11) Mugariro mutatu jinonangwa apa, “rutendo, rudo no kupfava mwoyo,” jinonangwa inga mucero wo mujimu. Zvokadi kamare, Timoti waizoda besero ro mujimu mucena kuti akwanise kusakurira mugariro mutatu jimweni jakanangwa apa, urungami, unyasha no kuvangirira.​—Ezanisanyi na VaKolosi 3:12; 2 Pedru 1:5-7.

Ngo kudaro, VaGalàsia 5:22, 23 aizivi kunanga mugariro jese jinodikana kusakurihwa ngo Makristu. Mujimu wa Mwari, ungatibesera kusakurira mugariro mupfumbamwe jakadihwa inga mucero wo mujimu. Asi kuna mugariro jakawanda maningi jatinodikana kusakurira kuti tive Makristu akaivha no kusimira undhu hupsa wakaruhwa mwa Mwari ngo ururami no unasi hwo zvokadi.​—VaEfeso 4:24.