TESE tinotenda kuti mu njiku jino jokupejisira, Jehovha ari kutungamirira no kubesera vandhu vake mu njira yo umwari. (2 Timoti 3:1) Asi tese tinodikana kuzwira Jehovha. Mugariro wedu wakaezana no wo Vaiziraeri vaingaya mu zvipare. Pavaizwa kurijwa ko mbayapaya ivona vaidikana kuita ciri-cese.

Jehovha wakavhunja Mosi kuti aite mbayapaya mbiri jo ndarama jakatakwa ngo martero, ijona jaishanda kuitira “kukwengweneja gungano no kuita civoniso co kubuda mu koponi.” (Bziverengo 10:2) Vapiri vaidikana kujirija mu njira yakasiyana-siyana kuitira kuti gungano rizvizive kuti zvicinyi zvaraidikana kuita. (Bziverengo 10:3-8) Nyamasi uno, vandhu va Mwari vanoashiravo ndhungamiro mu njira jakasiyana-siyana. Njira iji jinoticeuja marijihwe aaita mbayapaya kareko. Pa jijo iyi tinozovona njira ndhatu jatingawana ndijona ndhungamiro: Patinokokwa kuti tiende ku musongano mukuru, vakuru povanodanijwa kuti vaende kojijiswa, cimwenizve panonga pano cinjo yo jijiso yatinowana mu ungano.

Tenda jo majinja o Vaiziraeri jaitendeneja tabhernake, asi jainga akapauhwa ngo zvikwata zvirongomuna. Nguva jimweni, Jehovha waida kuti “gungano rese” riungane pa manghwiniro o kumavhazuva ko tabhernake. (Bziverengo 10:3) Kuti adanije majinja, vapiri vaidikana kuti varije mbayapaya mbiri. Vaiziraeri vese vaikwanisa kuzwa kurijwa uku, vaigara phedo no pamanghwiniro o tabhernake vaizokasika kuguma. Vaya vaigara ndhambo no tabhernake vaidikana kuti vafambe mukuvo wakareba, cimwenizve vaidikana kuti vavangisire kuti vagume. Azvinenyi hazvo kuti vamweni vaigara ndhambo vamweni vaigara phedo, Jehovha vaida kuti vese vaungane zve vazwe ndhungamiro jake.

Nyamasi uno itusu atiende kosongana ku tabhernake, asi tinokokwa tese kuti tiende kosongana pamwepo no vandhu va Mwari. Tinoita zvondhozvo ngo kwenda ku magungano no musongano jimweni jinosisira, kwatinoashira masoko no ndhungamiro jimweni jinosisira. Mu nyika jese, urongwa wo musongano wo Zvapupu zva Jehovha wakatojana. Vashandiri vese va Jehovha vanotendera mukokwa wo kwenda ku musongano, vanonga vari pakati po vandhu vakawanda vano mudakaro. Asi vamweni kuti vagume ku musongano iji mukuru, vanodikana kuita hwendo hwakakura maningi, kuveni vamweni vanoita hwendo mudoko. Kusiyapo zvese izvi, kuva pa musongano iji zvinosisira maningi ku umwe na umwe wavo.

Waro tinoti kudini no vandhu vanogara ndhambo no kunoitihwa musongano iji mukuru? Vandhu vazinji vanobesereka ngo mucini, ivona vangakwanisa kuvona musonganowo votojizwa inga vatori ikonayo kamare. Inga muezaniso, Bheteri ro Bhenini porakaashira muimiriri wo cine ro  nyika yese vakaita urongwa kuti hama jinogara ku dhorobha ro Nijheri vakwanise kuvona musongano uu. Dhorobha ro Nijheri rinowanika pakati po zvipare zvo Sahara rinodanijwa kuti Aririti. Vandhu vanokwana kuita makumaviri na umwe vakavona musongano uu, tiri kubhuya ngo hama no hambzaji no vandhu vanodakarira. Pikija vainga ndhambo maningi, ivona vakajizwa inga kuti vainga pa cikwata co vandhu vanokwana kuita 44.131 vainga pa musongano wiya. Hama imweni yakatara kudari: “Tinobonga maningi ngo kukwanisa kuvona musongano uu. Izvi zvinokhombijazve hocipiri kuti imwimwi munotida maningi!”

Vapiri pavairija mbayapaya, “imwe basi . . . vatungamiriri no nduna jo bzikwata,” vaidikana kuviya pa tenda yo musongano. (Bziverengo 10:4) Iponapo vaiashira masoko no kujijiswa ndi Mosi. Izvi zvaivabesera kuti vakwanise kutaja majinja ayani. Kudari imwimwi nomainga umwe wo vatungamiriri vayani, pacina kukana-kana maizoita zvese zvamunokwanisa kuti muwanike pa musongano uu.

Nyamasi uno, vakuru vo ungano asipi “vatungamiriri” vayani. Ivona avaeji kubzinyirira mavhuta a Mwari. (1 Pedru 5:1-3) Asi ivona vanoita zvavanokwanisa kuti vahavise mushambi. Ngokudaro, povanodanijwa kuti vaende ku jijiso jimweni, inga ku Cikora co Mushando wo Umambo, ngo zvokadi zvokuti vakuru vanoenda. Pa musongano iji, vakuru vanojijiswa kuti vakwanise kutungamirire ushoni shwiro jo ungano. Muviyo wakona ngo wokuti ungano inokura mu zvoumwari. Kangaije imwimwi amuto makaenda kovona umwe wo musongano iji, asi imwimwi munobeserekavo ngo vandhu vakaenda kovona musongano iji.

Pa mukuvo umweni, vapiri vairijisisa no kuthuruja izwi ro mbayapaya. Asi vandhu vaizviziva kuti Jehovha waida kuti vandhu vapinde. (Bziverengo 10:5, 6) Vaiziraeri vaimuka vakarongeka, asi iri rainga basa guru ku vese. Zvingaita kuti nguva jimweni Vaiziraeri vamweni vaivona kuva zvinonesa maningi kutendera cino iji. Ngenyi?

Kangaije vamweni vaivona kuti marijihwe aiita mbayapaya kuti ivona vapinde yaiviya ngo kukasika mu njira aicaivetehwa. Nguva jimweni ‘Gwiti . . . raigara kubvira madeko mbhera mangwana.’ Nguva jimweni zvaitora “njiku mbiri, mweji umwe” kana nguva yakati kuti. Kuti vaite cinjo. (Bziverengo 9:21, 22) Vaiziraeri vakaita cinjo kangana? Bziverengo Cipauko 33, cinobhuya ngo ndau jinokwana kuita 40 jakagara Vaiziraeri.

Mukuvo umweni Vaiziraeri vaikwanisa kugara mu ndau jainga jino munvhuriri. Zviro zvaidakaja maningi pakati po “cipare . . . cikuru no cinothisa.” (Deuteronòmio 1:19) Ici caizova ciejo. Vaiziraeri vaizorangarira kuti kubuda pavariwaro kwenda kumweni kwaizova no zvineso kupinda pavariwaro.

Majinja amweni paaitanga kupinda, amweni aidikana kuva anosengerera kuti mukuvo wavo ugumevo kuti vapinde. Vese vaizwa kurijwa ko mbayapaya asi asipi vese vaidikana kupinda pa mukuvo umwevo. Poyairijwa mbayapaya aipinda majinja ainga ari kumavhazuva ko tabhernake, ainga Judha, isakari na Zabhuroni. (Bziverengo 2:3-7; 10:5, 6) Pasure po kupinda ko majinja matatu, vapiri vairija mbayapaya kocipiri. Cainga citatijo cokuti majinja matatu aigara kakusi apinde. Vapiri vaita izvi mbhera vandhu vese vapinde.

Kangaije cinjo jimweni jinovepo mu sangano ra Jehovha jinganesa kutenderana najo. Zvingaita kuti imwimwi amuzivi kudakara ngo kuvepo ko cinjo jokuti imwimwi amucaijivetera. Kangaije maidakarira zviro zvimweni zvokuti amucaidakarirepi kuti izvona zvicinje. Ngo thangwe riri rese kangaije makajizwa kuti kusengerera kwenyu kwava pamuejo zvokuti zvakatora mukuvo kuti murovejane no cinjo. Kusiyapo izvo, patinoita zviro zvatinovona kuva zvakanaka tinozoashira makomborero a Mwari.

Mu njiku ja Mosi, Jehovha wakatungamirira mamirioni o vanarume, vanakaji no vana vadoko mu zvipare. Kudari novacizivi kutajwa no kutungamirihwa ndiyena, Vaiziraeri avacaizopona. Mu njiku jino jokupejisira, Jehovha anotitungamirira mu njira yo umwari. Iyena anoita kuti tive phedo naye no kuita kuti rutendo hwedu uve wakavanga. Ngokudaro, pamunozwa kurijwa ngo mbayapaya itanyi inga Vaiziraeri vakagondeka: Ticadononoka!