1. Ngenyi hama jimweni ajikwanisi kujija?

NYAMASI UNO, vandhu vanodikana kuvangisira maningi kuti vawane mare kuitira kupona. Uzinji wo hama jedu, jinoshanda nguva jakawanda kuti jiwane zvinodikana kuti jisapote mbhuri yajo. Ticikaverengi vaya vanopeja nguva jakawanda vacienda ku basa no kuhwirira ku muzi. Jimweni jinoita mabasa anorembesa. Pajinopera kuita zvese izvi, pacina kukana-kana jinonga jakaremba. Ijona jinonga jakaremba zvokuti nee ajitona no simba ro kujija.

2. Munoita jijo yenyu nguvenyi?

² Asi, cokwadi nga ici, tinodikana kupsaka nguva yo kujija, kunasa kujija kamare Soko ra Mwari no mabhuku edu o ciKristu. Ushamwari hwedu na Jehovha pomwe no kuwana kwedu upenyu ucikaperi zvinofira pondhopo! (1 Timoti 4:15) Vamweni vanodakarira kumuka sedho kuti vajije, vamweni no vakavata. Kuveni vamweni vanodakarira kujija no kurangarijisisa co usiku.

3-4. Mukhumbi Unotonga wakaita cinjo yapi ngo pamusoro po mabhuku atinodikana kuverenga zve ngenyi?

³ Amukani-kani kuti kupsaka nguva kuitira kujija kunosisira maningi. Asi, ngozvapi zvatingajija? Pano zvizinji zvatingajija. Kangaije mungananga kuti, ‘zviri kundinesera kuverenga zvese.’ Vamweni vanokwanisa kuverenga no kuvona mavhidhio ese ari kuitwa ngo sangano. Asi ku uzinji wo hama jedu, zvinonesa maningi kuwana nguva yo kuita zvondhozvo. Mukhumbi Unotonga unoziva zvineso zvese izvi. Ngo iyo ndava, mutengo wo mabhuku aidhindwa no kudihwa mu saiti apunguhwa.

⁴ Inga muezaniso, Bhuku Regore reZvapupu zvaJehovha, wari  aricabudiswizve, ngokuti zviitiko zvizinji zvinowanika mu jw.org^®, pomwe no mu urongwa wo mweji ngo mweji wo mu JW Broadcasting^®. Wari marevhista Murindiri no Mukai! ari kubudiswa matatu pa gore. Cinjo iyi airevi kuti tinodikana kupeja nguva teciita zviro zvimweni. Cinangwa co cinjo iyi ngo co kutipa nguva kuti tikwanise “kusana ibzo bzinodikana.” (VaFilipi 1:10) Ngativone kuti tingagajisa kudini zvido zvinosisira pakutanga zve tingabesereka kudini ngo kuita jijo yo mundhu ega.

5-6. Ngoapi mabhuku atinodikana kungwarira pa kujija kwedu?

⁵ Ngozvapi zviro zvinosisira maningi kwatiri? Tinodikana kupeja nguva yedu njiku jese kuti tijije Soko ra Mwari. Kangaije matokwanisa kuvona kuti kuverengwa ko Bhaibheri ko sumana imwe nga imwe kwapunguhwa, izvi zvakaithwa kuitira kuti tiwane nguva yakawanda yo kupsakisisa no kurangarijisisa zvotaverengaro. Ngokudaro, patinoverenga cido cedu acidikani kuva co kuda kupeja zvipauko zvo sumana, asi kusiya kuti Bhaibheri ripsase mwoyo no kutiita kuti tigume phedo na Jehovha.—Nduyo 19:14.

⁶ Ngozvapi zvatinodikana kujija no kungwarira kwese? Tinodikana kunasa kunasirira Murindiri kuitira kujija mu ungano pomwe no jijo yo Bhaibheri yo Ungano, kubatanijavo no zvese zvatinopuwa kuitira musongano wo pakati po sumana. Tinodikanazve kuverenga Murindiri no Mukai! mweji ngo mweji.

7. Kureva kuti tinodikana kupera simba, tikatama kukwanisa kuverenga no kuvona zvese zviri mu saiti yedu no JW Broadcasting here?

⁷ Kangaije mungati, ‘zvakanaka ndicazviita, asi ndinozodini no zvimweni zvinowanika mu saiti jw.org, pomwe no mu JW Broadcasting? Zvakawanda maningi!’ Ambovonanyi muezaniso uu basi: Moguma mu restauranti movona kuti muno zvokuha zvakawanda maningi. Zvokadi kamare amungakwanisi kuha zvese zviripo waro. Ndizvona zvinoitikavo no zviro zvinowanika mu saiti yedu. Kudari mukatama kukwanisa kuverenga zvese zviri mu saiti kana kuvona vhidhio jese, mucadopera simba. Verenganyi no kuvona zvamunokwanisa. Wari, ngatende tivone kuti zvicinyi zvinobatanijwa pa kujija zve tingabesereka kudini patinonga tecijija.

8. Mudanyu japi jamunodikana kuteveja pamunonga mecinasirira Murindiri zve munozobesereka kudini?

⁸ Kujija ikuverenga kuti mukwanise kujija ciri cese. Kujija asipi kuverenga ngo kukasika kana kumaka mupinguro basi. Inga muezaniso, pamunonga mecinasirira Murindiri kuitira kujija, cokutanga munodikana kuverenga divi rinoti zvaticajija. Tevere, verenganyi no kurangarira musoro unodaro kujijwa, zvimusoro zvidoko pomwe no mubvunjo jo kuhwirijira. Perapo, verenganyi ndima imwe nga imwe mucikakasiki. Sotesesanyi rinya yo kutanga yo ndima imwe nga imwe. Kazinji iyona inokhombija zvinoda kunangwa mu ndima yese. Cimwenizve, pamunonga meciverenga musoro wese, rangariranyi kuti kuitisa kudini ndima imwe nga imwe inobesera cimusoro cidoko zve ndimeyo inozwirana kudini no zviri kubhuiwaro. Kudari, mukawana gama ramucikanasi kuziva kana rinya yo mucikazwisisi, imakenyi perapo munozopsakisisa.

9. (a) Ngenyi zve kuitisa kudini zvinosisira maningi kusotesesa vhesi patinonga tecinasirira Murindiri wo kujija? (b) Inga zvakatahwa pana Joxwa 1:8, zvicinyi zvatinodikana kuita kusiyapo kuverenga vhesi?

⁹ Zvokadi kamare, Kujija Murindiri ikujija Bhaibheri. Ngokudaro, nasanyi kusotesesa mavhesi arimowaro, maningi-ningi ayaweya anozoda kuverengwa ku musongano.  Sotesesanyizve magama akapsipiswa kuti anogogomejeresa kudini zviri kunangwa mu ndimeyo. Kusiyapo zvondhozvo, psakanyi nguva yo kurangarijisisa vhesi jamunoverenga zve vonanyi kuti mungajishandisa kudini mu upenyu hwenyu.—Verenganyi Joxwa 1:8.

10. Mukuzwirana no Vaheberi 5:14, ngenyi vabari vanodikana kupeja nguva pa kunamata kwavo ko mbhuri kuti vabesere vana vavo kuti vakwanise kujija no kupsakisisa?

¹⁰ Zvokadi kamare, vabari vanoda kuti Kunamata Kwavo ko Mbhuri, sumana jese kuve kunodakajisa ku vana vavo. Nguva jese, vabari vanodikana kuvona kuti zvicinyi zvavanoda kujija pa sumana imwe nga imwe, asi, avadikani kujizwa inga kuti vari kuvangirijwa kuti vaite mutambo jinodakajisa sumana jese pa kunamata kwavo. Sumana jimweni, vabari vangatoshandisa vhidhiyo jinobudiswa mweji ngo mweji mu urongwa wo mu JW Broadcasting kana kutoita mutambo jinodakajisa, inga kuvaka ngarava yakaitwaya ndi Nowa pa Kunamata kwavo ko Mbhuri. Pikija zvakadaro, vana vanodikana kuziva kuti vangaitisa kudini kuti vajije. Inga muezaniso, vanodikana kujijira manera o kunasirira musongano kana manera o vangapsakisisa mubvunjo jovangawana kucikora. (Verenganyi Vaheberi 5:14.) Kudari vakaroveja kupeja nguva kuti vajije Bhaibheri, vanozova vakanasiririka kuti vateye njeve ku musongano jo ungano pomwe no magungano, pikija vacikavoni vhidhio nguva jese. Zvokadi kamare, nguva yo mungada kupeja mecijia zvinofira pa mupira no mugariro wo mwanewo.

11. Ngenyi zvinosisira kujijisa vajiji vedu vo Bhaibheri kuti vanase kujija povanonga vari vega?

¹¹ Vajiji vedu vo Bhaibheri vanodikana kuziva majijire ovangaita. Povakatanga kujija Bhaibheri, taidakadara ngo kuvavona vecimaka povainasirira bhuku ravo kuitira kujija kana povainasirira musongano jo ungano. Asi, tinodikana kuvajijisa manera ovangapsakisisa no kunasa kujija kamare povanonga vari vega. Tikadaro, pavanozosongana no zvineso, kusiyapo kupsaka vamweni kuti vawane besero, ivona vanozopsakisisa no kuwana masoko anovabesera mu mabhuku edu.

12. Patinonga tecijija, ngocapi cinodikana kuva cinangwa cedu?

¹² Kudari amudakariri maningi kujija, mucarangarira kuti amuzokwanisi kujija. Mungakwanisa. Mungatanga ngo kujija pa nguva shomani perapo mungaengejera nguva yenyu padoko ngo padoko. Kusiyapo zvondhozvo, ivanyi no cinangwa. Zvokadi kamare,  cinangwa cinosisira maningi catinaco, ngo co kuva phedo na Jehovha. Asi, ngo kukasika tingava no cinangwa ici, ngo kuda kudavira mubvunjo wotaitwa ngo ari wese kana kupsakisisa ngo pamusoro po cineso catiri kusongana naco.

13. (a) Sananguranyi kuti mujaha angaitisa kudini kuti ajivirire zvaanotenda ku vadoni vake vo kucikora? (b) Mungashandisa kudini magama anowanika pana VaKolosi 4:6?

¹³ Inga muezaniso, uri mujaha ari kujija cikora here? Vadoni vako vo kucikora vanotenda kuti mundhu aazivi kusikwa asi wakabva ku cinyama here? Waidakarira kujivirira zvinonangwa ngo Bhaibheri, asi unojizwa ucikwanisi here? Ngokudaro, unodikana kumboita cibasa kuitira kujija. Pakutanga unodikana kuva no zvinangwa zviviri: (1) unodikana kuvangisa rutendo hwako hwo kuti Mwari ndiyena wakasika zviro zvese zve (2) unodikana kujijira kusanangura zvaunotenda. (VaRoma 1:20; 1 Pedru 3:15) Zvibvunjisei kudari, ‘Ngenyi vadoni vangu vo kucikora vanotenda kuti vandhu vakabva ku cinyama?’ Perapo, nasai kupsakisisa masoko mu mabhuku edu. Kusanangura zvaunotenda azvinesi maningi inga zvaunorangarira. Vandhu vazinji vanotenda kuti vandhu vakabva ku cinyama, ngokuti ari wese anoreremejwa wakavabvunja kuti izvo ndizvona kamare. Kudari ukawana mafundo manganani angabesera ungatomabvunjavo vamweni.—Verenganyi VaKolosi 4:6.

14-16. (a) Mungaitisa kudini kuti muzivi ngo pamusoro po bhuku ro Bhaibheri ramucikanasi kuziva ushoni? (b) Ngo kushandisa mavhesi anangwaya, sananguranyi kuti mungaitisa kudini kuti muzwisise bhuku ra Amosi? (Vonanyizve bhokiso rinoti, “ Itanyi Kuti Bhaibheri Rive Rokadi Kwamuri!”)

¹⁴ Rangariranyi kuti pa musongano jedu, tinoda kujija ngo pamusoro po mabhuku madoko anowanika mu Bhaibheri, kangaije amuzivi kurovejana maningi nao. Ngokudaro, ciro cokutanga camaizoita ngo co kuda kujijira zvizinji ngo pamusoro pao. Asi, mungazviitisa kudini?

¹⁵ Cokutanga, jibvunjisenyi kudari: ‘Zvicinyi zvandinoziva ngo pamusoro po mutari wo bhuku iri? Wainga mundhu womushovonyi, waigara kwapi zve ngorapi rainga basa rake?’ Tikaziva zvese izvi ngo pamusoro po mutari wo bhuku rondhoro, tinozozwisisa kuti ngenyi iyena wakashandisa magama aya kana ngenyi wakashandisa muezaniso uu. Ngokudaro, pamunonga meciverenga Bhaibheri, psakanyi kuvona zviri zvese zvinomubesera kuvona mundhu wakatararo.

¹⁶ Ciro cimweni cingabesera ngo co kueja kupsakisisa kuitira kuziva kuti bhuku rondhoro rakatahwa rini. Mungazviita ngo kwenda kovona mu Tradução do Novo Mundo da Bíblia Sagrada pa divi rinoti, “Tabela dos Livros da Bíblia.” Mukuengejera, mungasotazve pa Appendix A6, munokwanisa kuvona munda-nda-nda wo mukuvo waitonga majimambo pamwepo no vaprofeti. Kudari bhuku ramunongaro mecijija ibhuku ro zviporofita, ejanyi kuzwisisa kuti upenyu wo vandhu mu mukuvo wo rakatahwaro wainga wakadini. Wainga ecibesera vandhu kuti vasiye mufambiro wapi wakashata? Wakapona nani mu mukuvo wondhowo? Kuti muwane masoko ese aya, kangaije mungadikana kwenda kosota mabhuku amweni. Inga muezaniso, kuti muzwisise zvaiitika mu mukuvo wakapona muporofita Amosi, maizoita ushoni mukaverenga mabhuku aya, 2 Majimambo no 2 Kronike, mavhesi aya i referensiya kruzadha ya Amosi 1:1. Cimwenizve mungapsaka kuziva ngo zva Hoseya, uwo wakapona mu mukuvo wondhowo na Amosi. Zvese izvi  zvingamubesera kuzwisisa ushoni mukuvo wakapona Amosi.—2 Majimambo 14:25-28; 2 Kronike 26:1-15; Hoseya 1:1-11; Amosi 1:1.

17-18. Mecishandisa muezaniso janangwari mu ndima iji kana jimweni jamunoziva, ezanisanyi kuti kuitisa kudini kujija kwenyu Bhaibheri, kungava kunodakajisa pamunonasa kusotesesa ciro cimwe nga cimwe pakuverenga kwenyu.

¹⁷ Patinoverenga Bhaibheri, zvakanaka kuva no cidaka-daka co kuda kuziva zvizinji. Inga muezaniso, ngatiti muri kuverenga cipauko 12 co ciporofita ca Zakaria, cinobhuya ngo kufa ka Mesia. (Zakaria 12:10) Pamunoguma pa vhesi 12, munovona kuti “mbhuri yo mubarihwana wa Natani” yaizocema ngo kufa ka Mesia. Kusiyapo kukasika moenda kumweni, imwimwi munoima mojibvunjisa kudari: ‘Mbhuri yo mubarihwana wa Natani, inenyi na Mesia? Ndingakwanisa kuzviziva here?’ Apa wari, mungatoshanda inga mupsakisisi. Inga muezaniso pamunoverenga Zakaria 12:12, Tradução do Novo Mundo, imwe referensiya kruzadha inomuendesa pana 2 Samueli 5:13, 14, pamunoiverenga munozwisisa kuti Natani wainga mwana wa Mambo Dhavhidhi. Referensiya kruzadha imweni inomuendesa pa Luka 3:23, 31, mavhesi aya anokhombija kuti Maria mai wa Jesu wainga mubarihwana wa Natani. (Vonanyi Munobva masoko kuitira co kutarira zvo musongano upenyu no mushando wa Junho wo 2018, pheji 5, pa musoro unoti, “Ndiani wainga baba wa Josefa?”) Kudakajisa kwazvo hei! Imwimwi mwaiziva kuti kuno zviporofita zvinonanga kuti Jesu waizova mubarihwana wa Dhavhidhi. (Mateu 22:42) Asi, Dhavhidhi wainga no vana vanodarika 20. Zvinodakajisa ngo zvo kuti Zakaria  wakamuka kunangira mbhuri ya Natani kuti yaizocema kufa ka Mesia.

¹⁸ Vonanyi muezaniso umweni. Mu cipauko co kutanga ca Luka, tinoverenga kuti ngirozi Gabriel yakabvakacira Maria no kumuzivisa kuti iyena waizobara mwana, uwo: “Anozoita mukuru, wozodanwa Mwana wa Mwari Mukuru-kuru. Tenji Mwari anozomupa dendemaro ro Umambo hwa baba wake Davidi, anozotonga mabvumbo a Jakobe mazuva acingaperi.” (Luka 1:32, 33) Zvingatoiita kuti tibatikane maningi ngo magama o ngirozi Gabriel, poyakananga kuti mwana wiya waizodanwa “Mwana wa Mwari Mukuru-kuru.” Asi, ngirozi Gabriel yakanangazve kuti Jesu “waizotonga” inga mambo. Ngokudaro, kangaije tingatotanga kutojibvunjisa kuti, magama awo aida kunangenyi kuna Maria. Kureva kuti Maria wakarangarira kuti magama o ngirozi Gabriel aireva kuti Jesu waizofakeya Mambo Herodhi kana majimambo amweni o Iziraeri here? Zvecivoneka kuti Jesu waizova Mambo, Maria waizova mambokaji zve mbhuri yake yaizogara mu nyumba ya mambo. Asi, mu Bhaibheri apana pakatahwa kuti Maria wakamborangarira kudaro zve apana patinoverenga kuti Maria wakakumbira kuva no cigaro mu Umambo, inga zvakaita vajiji vaviri va Jesu. (Mateu 20:20-23) Zviro zvese izvi zvinokhombija kamare kuti Maria wainga mundhu waijidodokesa maningi!

19-20. Inga zvinosananguhwa pa Jakobo 1:22-25; 4:8, ngocapi cinodikana kuva cinangwa cedu patinojija?

¹⁹ Ngaticeukije kuti, cinangwa cedu patinonga tecijija Bhaibheri no mabhuku edu o ciKristu ngo co kuva no ushamwari wo phedo na Jehovha. Tinodazve kuvona kuti tiri vandhu vo mushovonyi no kuita cinjo jinodikana kuti tikwanise kudakajisa Mwari. (Verenganyi Jakobo 1:22-25; 4:8.) Ngokudaro, mucito matanga kujija, itanyi mukumbiro kuna Jehovha kuti amubesere ngo mujimu mucena wake. Tinodikana kudeketera kuti Jehovha atibesere kunasa kuzwisisa zvatinongaro tecijija zve tivone kuti ngopapi patinodikana kuitisa nane.

²⁰ Tese tinodikana kuva inga mushandiri wakagondeka wa Mwari wakasananguhwaya ngo mutari wo nduyo kuti: “Anodakara ngo mupango wa Mwari worangarira matongero ake usiku no masikati. . . . bzese bzaanoita mbzauxoni.”—Nduyo 1:2, 3.