1. Tingava no cokwadi co zviro zvapi?

JEHOVHA MWARI anoda vanamati vake. Nguva jese waivada zve anondovada basi. Cimwenizve, iyena anoda ururami. (Nduyo 33:5) Ngokudaro, tingava no cokwadi co zviro zviviri: (1) Jehovha anohwajihwa paanovona vashandiri vake vacikaripi kutajwa ushoni. (2) Iyena wakagondisa kuti vashandiri vake avazogari vecishaiswa kutajwa kwenda no kwenda. Pa musoro wokutanga wo mutevejwana uu, * takajija kuti Mutemo wakapa Mwari vaIziraeri ecishandisa Mosi, waicijikira pa rudo. Cimwenizve, waivangisa vashandiri vake vese kuti vaite zvakarurama pikija no vaya vacaikwanisa kuzvijivirira. (Deuteronòmio 10:18) Mutemo uu unokhombija kuti Jehovha anotaja vanamati vake.

2. Mubvunjo japi jaticazodavira?

² Mutemo wa Mosi wakapera mu gore ro 33 N.V.Y.,ungano yo ciKristu no yapera kuumbwa. Zvicinyi zvaizoitika no maKristu? Kureva kuti avacaizova no jiviriro ngo kutama kuva no mutemo wakacijikira mu rudo no waikhwijirija ururami here? Andizvopi! MaKristu akava no mutemo mupsa. Pamusoro uno, tinozoziva kuti ngowapi mutemo uu. Perapo tinozodavira mubvunjo iji: Ngenyi tingananga kuti mutemo uu wakacijikira pa rudo? Ngenyi tingananga kuti iwona unokhwijirija ururami? Mukuzwirana no mutemo uu, vanotungamirira vangatajisa kudini vamweni?

3. Inga zvatinovona pana VaGalàsia 6:2, “mupango wa Kristu” unobatanijenyi?

³ Verenganyi VaGalàsia 6:2. MaKristu anodikana kuteveja ‘Mupango wa Kristu.’ Ngo zvokadi kuti Jesu aazivi kuita kutara mutemo yese kuitira vajiji vake, asi iyena wakavajijisa, wovapa mutemo pomwe no ndhungamiro. “Mupango wa Kristu” unobatanija zvese zvaakajijisa. Kuti tinase kuzwisisa ushoni Mutemo uu, ngativone ndima jinotevera.

4-5. Jesu waijijisa mu njira japi zve waijijisira kwapi?

⁴ Jesu waijijisa mu njira japi? Cokutanga, waijijisa vandhu ngo zviro zvaainanga. Magama ake ainga no simba ngokuti waivereketa cokwadi ngo pamusoro pa Mwari, mugariro wo upenyu no manera anozopejwa matambujiko ngo Umambo hwa Mwari. (Luka 24:19) Jesu waijijisazve ngo muezaniso. Ngo maponero ake, wakakhombija vateveri vake manera ovaidikana kupona.—Johani 13:15.

⁵ Jesu wakajijisira kwapi? Jesu wakajijisa paaita mushando wake pasi pano. (Mateu 4:23) Wakatojijisazve padoko pakupera kumuswa kwake. Inga muezaniso, paakabudira cikwata co vajiji vake kangaije vaidarika kuita 500, wakavapa mupango wokuti: ‘Itanyi vajiji.’ (Mateu 28:19, Shanduro yeNyika Itsva; 1 VaKorinto 15:6) Inga musoro wo ungano, Jesu wakaenderera mberi ecijijisa vajiji vake pikija naari mugore. Inga muezaniso, mu 96 N.V.Y., Kristu wakabvunja mupostori Johani kuti avangise no kupa mbhangiro maKristu okuzojwa.—VaKolosi 1:18; Apokalipsi 1:1.

6-7. (a) Tingazviwana kwapi zvakajijisa Jesu? (b) Tingaitisa kudini kuti tizwire mutemo wa Kristu?

⁶ Tingazviwana kwapi zvakajijisa Jesu? Zviro zvizinji zvakaitwa no kujijiswa ndi Jesu paainga ari pasi pano, tingazviwana mu Mavhangeri marongomuna. Asi, mabhuku ese o Matahwa o ciGiriki o ciKristu, angatibeseravo kuzwisisa murangariro wa Jesu. Ngokuti iwona akatahwavo ngo vandhu vakafemehwa ngo “murangariro wa Kristu.”—1 VaKorinto 2:16.

⁷ Zvatinojija: Jijiso ja Jesu jinobesera mu mugariro jese jo upenyu. Ngokudaro, mutemo wa Kristu unodikana kutungamirira zvese zvatinoita, pa muzi, kubasa, kucikora no  mu ungano. Tinojijira mutemo uu ngo kuverenga Matahwa o ciGiriki o ciKristu no kumarangarijisisa. Tinozwira mutemo uu ngo kuita mukuzwirana no zvaakajijisa pamwepo no ndhungamiro jinowanika mu Bhaibheri. Patinotevejera mutemo wa Kristu, tinozwira Mwari wedu ano rudo, Jehovha, uwo ari cinyuke co zvese zvakajijiswa ndi Jesu.—Johani 8:28.

8. Mutemo wa Kristu wakacijikira papi?

⁸ Nyumba kuti ivange inodikana kucihwa ushoni. Ngokudaro vanogaremo vanojizwa vakajiviririka no kungwaririka. Mukuezanavo, mutemo wakanaka unocijikiro yaushoni, unoita kuti vandhu vese vanopona mukuzwirana nawo, vajizwe vakajiviririka no kungwaririka. Mutemo wa Kristu unocijikiro yaushoni icikazivi kumbovonekazve, rudo. Waro, ngenyi tingananga kudeya?

9-10. Muezaniso wapi unotatija kuti Jesu waindundihwa ngo rudo zve tingamutevejeresa kudini?

⁹ Cokutanga, Jesu waindundihwa ngo rudo pa zvese zvaiita. Mazwiro o pena kana o unyasha, anotatija rudo uno mundhu kuno umweni. Acindundihwa ngo mugariro uu, Jesu waijijisa mbhungano yo vandhu, ecirapa vanohwaja, ecipa zvokuha vano njara no kumusa vakafa. (Mateu 14:14; 15:32-38; Marco 6:34; Luka 7:11-15) Pikija kuita zvese izvi zvaida nguva no simba, Jesu wainga no cido co kudira zvinodiwa zvo vamweni pambeji po zvinodiwa zvake. Citatijo cikuru co rudo uu, ngo cokuti iyena wakapira upenyu hwake kuti aponese vandhu.—Johani 15:13.

¹⁰ Zvatinojija: Tingatevejera Jesu ngo kudira zvinodiwa zvo vamweni pambeji po zvinodiwa zvedu. Tingatevejerazve Jesu ngo kujijira kukhombijira pena ku vandhu vatinocumaera. Patinondundihwa ngo pena kuti ticumaere no kujijisa masoko akanaka, tinozwira mutemo wa Kristu.

11-12. (a) Ngocapi cinotatija kuti Jehovha anotaja vanamati vake? (b) Tingatevejeresa kudini rudo hwa Jehovha?

¹¹ Cocipiri, Jesu wakavonesa kuti Baba wake vanoda vandhu. Pa mushando wake, Jesu wakatatija pambhene kuti Jehovha anotaja vanamati vake. Cimwe cazvo ngo cokuti: Umwe nga umwe wedu anosisira zve ano mutengo mukuru kuna Baba wedu Jehovha. (Mateu 10:31) Jesu wakavonesazve kuti Jehovha anodakara ngo kuashira bvuta rakasvejeka kudari rikakhauya zve roviya mu ungano. (Luka 15:7, 10) Jesu wakakhombijazve kuti muripo, citatijo co rudo wa Jehovha kwatiri.—Johani 3:16.

¹² Zvatinojija: Tingatevejeresa kudini rudo hwa Jehovha? (VaEfeso 5:1, 2) Ngo kuvona umwe nga umwe wo hama no hambzaji jedu kuva vano mutengo, vanosisira no kuashira ushoni “bvuta rakapsejeka” parinonga raviya kuna Jehovha. (Nduyo 119:176) Tinokhombija kuti tinoda hama no hambzaji jedu ngo kujipira kwedu pa kushandisa nguva yedu no simba kuti tivabesere, maningi-ningi pavanoda weya besero. (1 Johani 3:17) Patinokhombijira vamweni rudo, tiri kuzwira mutemo wa Kristu.

13-14. (a) Inga zvakatahwa pana Johani 13:34, 35, mutemo wapi wakapa Jesu vateveri vake zve ngenyi unodanwa mutemo mupsa? (b) Tingaitisa kudini kuti tizwire mutemo mupsa uu?

¹³ Cocitatu, Jesu wakabvunja vateveri vake kuti vakhombije rudo wo kujiramba. (Verenganyi Johani 13:34, 35.) Mutemo uu i mupsa ngo kuti unotibvunja kuti tikhombijire rudo mu njira yokuti aicaikumbihwa ngo Mutemo wakapa Mwari ku vaIziraeri wokuti: Tinodikana kuda hama no hambzaji jedu. Izvi  zvinoda kuva no rudo wo kujiramba. * Itusu tinoda maningi hama no hambzaji jedu kupinda madisiro atinojiita. Tinodikana kuvada maningi kupinda zvatiri, tikadaro, tinozova takanasiririka kuti tipe upenyu hwedu ngo ndava yavo, inga zvakaitwa ndi Jesu.

¹⁴ Zvatinojija: Tingaitisa kudini kuti tizwire mutemo mupsa uu? Ngo magama mashoma, ngo kuzvipira kuti tibesere hama no hambzaji jedu. Atiiti izvi ngo kupira upenyu hwedu basi asi tingatovaitira zviro zvidokowane. Inga muezaniso, tingapekeja bhureya hama kana hambzaji jaavasharuka kuti jiende ku musongano, kutovapekeja ciri cese kana kutoshandisa nguva yedu yo feriya kuti tibesere pa ngozi jinoitika jega. Tikakhombija rudo wo kujiramba, ungano yedu inozova ndau yokuti umwe na umwe wedu angajizwa wakajiviririka no kungwaririka.

15-17. (a) Kuitisa kudini zviito zva Jesu zvinokhombija ururami? (b) Tingatevejeresa kudini Jesu?

¹⁵ Gama rokuti “ururami,” rinowanika mu Bhaibheri ricinangira kuita zvinovoniwa ndi Mwari kuti zvakanaka no kuita zvondhozvo ticikakheti. Waro ngenyi tingananga kuti mutemo wa Kristu unokwijirija ururami?

¹⁶ Cokutanga, rangariranyi kuti, kuitisa kudini zviito zva Jesu zvinokhombija ururami. Mu njiku jake, vatungamiriri vo zviara zvo ciJudha, vainyenya mundhu wese aacainga mu Judha, vaizvivona inga vanosisira maningi kupinda vamweni zve vaishaisha kutaja vanakaji. Asi Jesu aacainga no mukheto. Jesu wakatendera vese vainga no rutendo kwaari, vaJudha no vaciripi vaJudha. (Mateu 8:5-10, 13) Iyena waicumaera vese acina mukheto, vakhupuki no varombo. (Mateu 11:5; Luka 19:2, 9) Iyena aazivi kushaisha kutaja vanakaji. Mukusiyana, Jesu wainga no nderemejo no unyasha ku vanakaji, kubatanijavo vaya avacaitajwa ushoni ngo vamweni.—Luka 7:37-39, 44-50.

¹⁷ Zvatinojija: Tingatevejera Jesu ngo kutama kuva no mukheto ku vamweni zve kucumaera vese vanoda kupurutana, azvinenyi dangani mukhupuki, murombo kana ngo wo ciara capi. Vanarume vo ciKristu vanotevejera Jesu ngo kutaja ngo nderemejo vanakaji. Patinoita zviro izvi, tiri kutevejera mutemo wa Kristu.

18-19. Jesu wakajijisa kudini ngo pamusoro po ururami? zve tinojijenyi ngo manera aakajijisa?

¹⁸ Cocipiri, ngativone zvakajijisa Jesu ngo pamusoro po ururami. Iyena wakajijisa ndhungamiro jaizobesera vateveri vake kuti vataje vamweni ngo ururami. Inga muezaniso, rangariranyi ngo pamusoro po ndhungamiro yakatahwa pana Mateu 7:12. Tese tinoda kutajwa ngo ururami. Ngokudaro, tinodikana kutaja vamweni ngo ururami. Tikaita kudaro, zvingazovandundira kuti vaite zvakarurama kwatiri. Waro tikavataja mu njira icikazivi kururama keni? Jesu wakajijisavo vateveri vake, vathembe kuti Jehovha ‘anozotonga ngo ururami [vese] vanomima kwaari usiku no masikati.’ (Luka 18:6, 7) Magama ese aya anogondisa kuti: Mwari wedu wakarurama, ari kuvona zvineso zvatiri kuhwisana nazvo mu njiku jino jo kupejisira, zve panguva kwayo anozoita zvakarurama kwatiri.—2 VaTesalònika 1:6.

¹⁹ Zvatinojija: Patinotevejera ndhungamiro jakajijisa Jesu, tinozotaja vamweni ngo ururami. Kudari tikashaishwa kutajwa mu nyika ino yakashata, tinowana embezero ngo kuziva kuti Jehovha anozoita zvakarurama.

20-21. (a) Vaya vanotungamirira vangatajisa kudini vamweni? (b) Mwamuna angakhombijisa kudini rudo wo kujiramba ku mukaji no vana?

²⁰ Mukuzwirana no mutemo wa Kristu, vaya vanotungamirira vangatajisa kudini vamweni? Zvecivoneka kuti cijikiro yo mutemo wa Kristu irudo, vese vanotungamirira vanodikana kutaja vamweni ngo rudo no nderemejo. Ivona vanodikana kuceukija kuti Kristu anoda kuti tikhombije rudo pa zvese zvatinoita.

²¹ Pa mbhuri. Mwamuna anodikana kuda mukaji wake “inga madisiro aakaita Kristu gungano.” (VaEfeso 5:25, 28, 29) Mwamuna anodikana kutevejera rudo wo kujiramba wa Kristu ngo kudira zvinodiwa zvo mukaji wake pakutanga kupinda zvake. Vanarume vamweni vanozvivona zvecinesa kukhombija rudo wakadari, kangaije vakarehwa pa mbhuri icikavoni kusisira ko rudo no ururami, ngo ndava yazvo, vakakurisa zvido zvakashata. Asi kuti vatevejere mutemo wa Kristu vanodikana kusiya zvido zvondozvo. Mwamuna anokhombija rudo wo kujiramba anoreremejwa ngo mukaji wake. Baba vano rudo wokadi avacaizonyangajisa vana vavo ngo magama no zviito zvavo. (VaEfeso 4:31) Kusiyapo izvo, ivona vanosimba vana vavo no kuvabvunja kuti vanovada. Izvo zvinoita kuti vana, vajizwe vakangwaririka no kujiviririka. Ngokuita kudaro, vana vangakwanisa kuva no rudo no kuthemba majibaba avo.

22. Mukuzwirana na 1 Pedru 5:1-3, ‘mabvuta’ nghani zve vangamatajisa kudini?

²² Mu ungano. Vakuru vanodikana kuceukija kuti ‘mabvuta’ asipi avo. (Johani 10:16; verenganyi 1 Pedru 5:1-3, Shanduro yeNyika Itsva.) Magama okuti ‘mushambi wo makapuwa ndi Mwari,’ ‘pamberi pa Mwari’ no ‘ndhaka ya Mwari,’ anoceukija vakuru kuti mabvuta  ao, ngha Jehovha. Iyena anoda kuti mabvuta ao, atajwe ngo rudo no nderemejo. (1 VaTesalònika 2:7, 8) Vakuru vanokhombija kuva no rudo ngo kutaja zvinodiwa zvo mabvuta, vanotendehwa ndi Jehovha no kukhombijihwa rudo no nderemejo ngo hama no hambzaji.

23-24. (a) Ngorapi basa ro vakuru mundhu paanoita cishaishi cikuru? (b) Pavanotonga ndava iji, zvicinyi zvavanodikana kuita?

²³ Ngo rapi basa ro vakuru kudari mundhu akaita cishaishi cikuru? Basa ravo rakasiyana no ro vakuru kana vatongi vo Iziraeri. Mutemo wa Mosi, wainanga ku vandhu vanotungamirira, vaidikana kutonga haiwa basi ndava mu divi ro kuumwari, asi kutama kuzwana no ugevenga. Asi mutemo wa Kristu unonanga kuti vakuru vano basa ro kutonga divi ro kuumwari ro cishaishico. Ivona vanozviziva kuti kutonga ndava yo kutama kuzwana no ugevenga, Mwari wakazvipa utongi. Utongi ndiwona unogaja murta kana kudihwa mukadheya.—VaRoma 13:1-4.

²⁴ Vakuru vangatongesa kudini cishaishi mu divi ro kuumwari? Ivona vanoshandisa Bhaibheri kuti vakwanise kutonga ndhangoyo zve votema civaringo. Nguva jese vanorangarira kuti mutemo wa Kristu wakacijikira pa rudo. Rudo unoita kuti vakuru vakwanise kuvona kuti: Zvicinyi zvavanodikana kuita kuti vabesere ari wese anoshaishwa kutajwa mu ungano? Ngo pamusoro po waposaro, rudo unozondundira vakuru kuti varangarire kudari: Kureva kuti wakhauya here? Tingamubesera kuti avezve no ushamwari na Jehovha here?

25. Pa musoro unotevera tinozobhuya ngenyi?

²⁵ Kudakajisa kwakadini kuva pasi po mutemo wa Kristu! Kudari tikashanda ngo simba kuti tiuzwire, tinobeseravo kuti ungano yedu ive ndau yo kuti umwe nga umwe ajizwe anodiwa, anoreremejwa no kujiviririka. Pikija zvakadaro, tiri kupona mu nyika yokuti ‘vandhu vakashata’ vanozobva pa ‘kushata kwenda pa kushatisisa.’ (2 Timoti 3:13, Shanduro yeNyika Itsva) Ngatirambe tecirinda. Ungano yo ciKristu, ingatongesa kudini ngo ururami ku vaya vanoita zvo uhure no vana vadoko? Musoro unotevera unozodavira mubvunjo uu.