1. Jesu wakanangenyi ngo pamusoro po upfumi hwo mugore?

ASIPI zvipo zvese zvatinokwanisa kuvona. Kunasa kunanga, zvipo zvinosisira maningi atikwanisi kuzvivona. Pa Hurukuro yo pa Dundhu, Jesu wakananga kuti upfumi hwo mugore hunosisira maningi kupinda zviro zvo kunyama. Kuvha iponapo, wakaengejera kudari: “Ngokuti pano upfumi hwako ngo pano mwoyo wako.” (Mateu 6:19-21) Patinovona zviro zvimweni inga upfumi, mwoyo wedu ungatiita kuti tizvipsake. Waro mundhu angaitisa kudini kuti aunganije ‘upfumi hwo mugore’? Tingazviita ngo kuva no zina rakanaka pambheri pa Mwari. Inga zvakabhuiwa ndi Jesu, upfumi hwo mugore narini auzobiwi.

2. (a) Mukuzwirana na 2 VaKorinto 4:17, 18, Pauro wakativangisa kuti tiitenyi? (b) Tinozovonenyi pa jijo iyi?

² Mupostori Pauro anotivangisa kuti ‘tiringise . . . bzicikavoneki.’ (Verenganyi 2 VaKorinto 4:17, 18.) Upfumi ucikavoneki unobatanija zvese zvaushoni zvatinozopuwa ndi Mwari mu nyika imbza. Asi kuno upfumi humweni ucikavoneki watingaashira wari uno. Pa jijo iyi, tinoda kuvona zviro zvirongomuna: Ushamwari na Mwari, mukumbiro, mujimu mucena no besero ratinopuwa ndi Jehovha, Jesu no ngirozi mu basa ro kucumaera. Tevere, tinozokwanisa kuvona kuti tingakhombijisa kudini kubongesera ngo upfumi uhu ucikavoneki.

3. Ngowapi upfumi unosisira maningi ucikavoneki watinawo? Zvingakwanisika kudini kuti Mwari ave no ushamwari no vandhu?

³ Upfumi ucikavoneki zve unosisira ngo wo kuva no ushamwari na Jehovha. (Nduyo 25:14) Asi zvingakwanisika kudini kuti  Mwari ave no ushamwari no vandhu vacizivi kukwana zve woenderera mberi wakacena? Izvi zvinokwanisika ngo pamusoro po muripo wa Jesu. Muripo wake ‘unofujura uxaixi hwo nyika.’ (Johani 1:29) Jehovha waizviziva kuti cinangwa cake co kuviisa Muponesi caizokwanirisika basi. Izvo ndizvona zvakamuita kuti akwanise kuva no ushamwari no vandhu vakararama Jesu acito afa.​—VaRoma 3:25.

4. Ipanyi muezaniso wo vanarume vakamborarama Jesu acito aviya pasi pano, vakava no ushamwari na Mwari.

⁴ Amborangariranyi vanarume vakamborarama Jesu acito aviya pasi pano vakava no ushamwari na Mwari. Abhirahama wainga mwanarume wainga no rutendo unoshamaisa maningi. No papera ciuru co makore naafa, Jehovha wakamudana kuti: “Xamwari yangu.” (Isaia 41:8) Izvi zvinokhombija kuti kufa akuparajanisi Jehovha no shamwari jake. Mu murangariro wa Jehovha, Abhirahama aciri penye. (Luka 20:37, 38) Muezaniso umweni ngo wa Jobe. Pa mukuvo umweni wokuti ngirozi jaiungana kudenga, Jehovha wakabhuya no cokwadi cese ngo pamusoro pa Jobe. Jehovha wakananga kuti iyena i “mundhu wakaperera no kururama, anothya Mwari, woramba bzakaxata.” (Jobe 1:6-8) Muezaniso umweni nghwa Dhanieri. Ko makore anokwana kuita makumasere, iyena wakagara mu nyika yokuti vandhu avacainamata Jehovha. Pikija zvakadaro, iyena wakava akagondeka kuna Jehovha. Nga izvo zvakaitisa kuti ngirozi jinange kuti iyena wainga “mundhu wokudikanwa.” (Danieli 9:23; 10:11, 19) Pacina kukana, Jehovha anocidaka-daka co kumusa shamwari jake.​—Jobe 14:15.

5. Zvicinyi zvatinodikana kuita kuti tive no ushamwari hwo phedo na Jehovha?

⁵ I vandhu vangana vacizivi kukwana vano ushamwari wo phedo na Jehovha nyamasi uno? Zviuru no zviuru zvo vandhu. Tinozvizivisa kudini? Tinozviziva ngo kuti mu nyika yese, vanarume vazinji, vanakaji no vana, vari kukhombija ngo mufambiro wavo kuti vanoda kuva shamwari ja Mwari. Jehovha “anoda ngo mwoyo wese varurami.” (Mazwi Akangwara 3:32) Ushamwari unokwanisika ngo ndava yo rutendo hovanaho ku muripo wokujipira wa Jesu. Ngo rutendo hwondhohwo, Jehovha no kunaka mwoyo kwese anotendera kuti tijipire kwaari no kubhabhatijwa. Patinotora mudanyu uu unosisira, tinobatana no zviuru no zviuru zvo Makristu akajipira no kubhabhatijwa, vano mudakaro wo kuva no ushamwari wo phedo no Mundhu anosisira maningi, mudenga no pasi.

6. Tingakhombijisa kudini kuti tinobongesera ngo kuva no ushamwari na Mwari?

⁶ Tingakhombijisa kudini kuti tinobongesera ngo kuva no ushamwari na Jehovha? Kudari inga ndi Abhirahama na Jobe, avo vakaramba vakagondeka ko makore akawanda, tinodikana kuenderera mberi takagondeka, azvinenyi kuti tino makore akadini tecishandira Jehovha mu nyika ino, yaperari kusakara. Cimwenizve, tinodikana kutevejera muezaniso wa Dhanieri. Kwaari, ushamwari hwaisisira maningi kupinda upenyu hwake kamare. (Danieli 6:7, 10, 16, 22) Tecibesehwa ndi Jehovha tingacungirira muejo jatingasongana najo, toenderera mberi tiri shamwari jake.​—VaFilipi 4:13.

7. (a) Mukuzwirana na Mazwi Akangwara 15:8, Jehovha anovona kudini mukumbiro jedu? (b) Jehovha anodavirisa kudini mukumbiro jedu?

⁷ Upfumi umweni ucikavoneki, mukumbiro. Shamwari jokadi jinodakarira kubhuya ngo pamusoro po murangariro wajo no mazwiro. Kureva kuti ndizvona zvinoitika no ushamwari hwedu na Jehovha here? Hina! Ngo pamusoro po Soko rake, Jehovha anonanga zvaanorangarira no mazwiro ake. Pa mukumbiro jedu tingakwanisa kubhuya naye zve tomuvhunja zvatinorangarira no mazwiro edu o mukati. Jehovha anodakarira maningi kuzwa mukumbiro jedu.  (Verenganyi Mazwi Akangwara 15:8.) Iyena anozwa mukumbiro jedu no kujidavira. Nguva jimweni anojidavira ngo kukasika. Asi, nguva jimweni tinodikana kuenderera mberi tecikumbira ngo pamusoro po ciri condhoco. Azvinenyi kuti ngozvapi zvatinokumbira, tingava no cokwadi cokuti mupinguro ungazoviya pa nguva kwayo, mu njira kwayo. Zvokadi kamare, mupinguro wa Mwari ungasiyana no wataivetera. Inga muezaniso, kusiyapo kupeja muejo watiri kusongana nawo, kangaije angatipa uzivi “no simba ro kunyisa maejo.”​—1 VaKorinto 10:13.

8. Tingakhombijisa kudini kuti tinobongesera ngo mukumbiro?

⁸ Pacina kukana-kana, mukumbiro i cipo cinosisira maningi. Tingakhombijisa kudini kubongesera ngo cipo co mukumbiro? Njira imwe ngo yo kutevera ndhungamiro yatinopuwa ndi Jehovha yo ‘kunamata ticikazorori.’ (1 VaTesalònika 5:17) Jehovha aativangiriji kuti tiite mukumbiro. Iyena anoreremeja rusujunuko hwedu zve anotivangisa kuti ‘tivangirire . . . tecindonamata.’ (VaRoma 12:12) Ngo kudaro, tingakhombija kubongesera kwedu ngo kuita mukumbiro ko vhaza jakawanda pa njiku. Asi atidikani kuita mukumbiro tecikumbira zviro basi. Tinodikana kubonga Jehovha no kumusimba ngo zvese zvaakaita.​—Nduyo 145:2, 3.

9. Hama imweni inovona kudini mukumbiro zve imwimwi munovonavo kudini mukumbiro?

⁹ Pasure po makore akati kuti tecishandira Jehovha, tinozokwanisa kuvona ngo phedo madavirire aanoita mukumbiro jedu. Izvo zvinozoita kuti kubongesera kwedu ngo pamusoro po cipo co mukumbiro kuengejeke. Vonanyi muezaniso wa hama Krijhi, vari kushanda mu nguva yakazara ko makumarongomuna na manomwe o makore. Ivona vakati: “Ciro candinodakarira maningi, ngo co kumuka fumi co mangwanani kuti ndibhuye na Jehovha ngo mukumbiro ndicikakasiki. Zvinodakajisa maningi kubhuya na Jehovha pandinonga ndecivona kubuda ko zuva zve zviro zvese zvaazvakaseja. Izvo zvinondiita kuti ndide kubongesera Jehovha ngo zvese zvaanondipa, kubatanijavo no cidakajiso co mukumbiro. Pandinoita mukumbiro comadeko, ndinojizwa ushoni zvokuti ndinovata no hama yakacena.”

10. Ngenyi mujimu mucena, upfumi?

¹⁰ Upfumi hwumweni hucikavoneki i mujimu mucena wa Mwari. Jesu wakativangisa kuti mukuvo wese tiite mukumbiro tecikumbira mujimu mucena. (Luka 11:9, 13) Ecishandisa mujimu wake, Jehovha anotipa simba, pikija ‘simba rakatokura’ kamare. (2 VaKorinto 4:7; Maitiro o Vapostori 1:8) Ngo Besero ro mujimu wa Mwari, tinoenderera mberi takavanga azvinenyi zvineso zvatinosongana nazvo.

11. Mujimu mucena ungatibeseresa kudini?

¹¹ Mujimu mucena ungatibesera patinoda kuita basa riri rese pa kushandira kwedu Jehovha. Iwona ungatibesera kuti tikwanise kuitisa nane kukwanisa kwedu kuita basa rotakagajwa. Ngokudaro, patinova no makomborero pa kushandira kwedu Mwari, tinozwisisa kuti tamawana ngo ndava yo besero ro mujimu mucena.

12. Mukuzwirana na Nduyo 139:23, 24, ngenyi tinodikana kukumbira mujimu mucena?

¹² Njira imweni inokhombija kuti tinoreremeja mujimu mucena, ngo yo kukumbira kuti Mwari atibesere kuvona dangani tino mazwiro kana murangariro jakashata mu mwoyo mwedu. (Verenganyi Nduyo 139:23, 24.) Asi, kudari tikapera kuita mukumbiro tovona kuti ticino murangariro kana mazwiro o kuita zvakashata, tinodikana kuita mukumbiro tecikumbira mujimu mucena wa Mwari kuti utipe simba ro kucungirira. Tikaita kudaro, tinonga tasunga kusiya kuita zviri zvese zvaizoita kuti Jehovha atame kutibesera ngo mujimu mucena wake.​—VaEfeso 4:30.

13. Zvicinyi zvingatibesera kuengejera kubongesera ngo mujimu mucena?

¹³ Kubongesera kwedu ngo pamusoro po mujimu mucena, kunozoengejeka patinorangarira ngo zvese zvaunotiitira wari uno. Jesu asati ahwirira kudenga, wakavhunja vajiji vake kudari: “Mukazoaxira mujimu mucena munozowana simba mozoita vafakazi vangu, mu Jerusalema, mu Judeya mwese, mu Samaria, mbhera ku magumo o nyika.” (Maitiro o Vapostori 1:8) Ndizvona kamare zviri kuitika nyamasi uno. Tecibesehwa ngo mujimu mucena, nyamasi uno kuno 8.5 o zviuru zvo vandhu vanonamata Jehovha pasi pese. Kusiyapo izvo, mujimu mucena  unotiita kuti tive no mucero yakanaka yo mujimu, yakadari inga rudo, mudakaro, runyararo, kusengerera, unyasha, unaki, gonda, kupfava, kujibata. (VaGalàsia 5:22, 23) Ngo ndava yazvo, tinokwanisa kwenderera mberi takabatana pa kunamata Jehovha. Pacina kukana-kana, mujimu mucena i cipo cinosisira maningi!

14. Ibesero rapi ricikavoneki ratinaro patinonga tecicumaera?

¹⁴ Kushanda na Jehovha, Jesu no ngirozi ndi hwona upfumi ucikavoneki. (2 VaKorinto 6:1) Asi tinozviitisa kudini izvi? Tinoshanda navo patinonga tecicumaera. Mupostori Pauro wakananga kudari ngo pamusoro pake no vanocumaera masoko akanaka: “Itisu tiri vabeseri va Mwari.” (1 VaKorinto 3:9) Kusiapo zvondhozvo, kucumaera kunotiita kuti tishande na Jesu. Jesu paakapa mupango wokuti: “Endanyi, jijisanyi vandhu vese,” iyena wakanangazve kuti: “Zivanyivo kuti ndinemwi.” (Mateu 28:19, 20) Tingati kudini ngo ngirozi? Patinocumaera “vangeri ricikaperi, . . . ku vandhu vese,” ngirozi jinotibesera. Kunasa kunanga, icidakajiso kubesehwa ngo ngirozi!​—Apokalipsi 14:6.

15. Ipanyi muezaniso unovonesa kusisira ko basa rinoithwa ndi Jehovha patinocumaera.

¹⁵ Besero ratinoashira recivha ka Jehovha, Jesu no ngirozi, rinotibesera kuti tikwanise kukusa mbeu yo Umambo. Mbeu jimweni jinowira mu mwoyo jinoda kuzwa cokwadi zve jotanga kukura. (Mateu 13:18, 23) Ndiyani anoita kuti mbeu yo cokwadi iyi ikwanise kukura no kubara mucero? Jesu wakananga kuti apana anokwanisa kuva muteveri wake “acakakwevehwa ndi Baba.” (Johani 6:44) Bhaibheri rinopa muezaniso wakanasa kujeka ngo pamusoro pazvo. Pa vhaza imweni, Pauro wakacumaera cikwata co vanakaji kunja ko dhorobha ro Firipo. Vonanyi zvinonanga Bhaibheri ngo pamusoro pa umwe wavo anodanwa Ridhiya: “Tenji wakamufunungura mwoyo, kuti atende bzainangwa ndi Paulo.” (Maitiro o Vapostori 16:13-15) Kudari inga zvakaitika na Ridhiya, zviuru no zviuru zvo vandhu zvakajija cokwadi ngokuti vakakwevehwa ndi Jehovha.

16. Ndiyani anofanera kusimbhwa ngo muviyo wakanaka watinowana mu basa ro kucumaera?

¹⁶ Ndiyani anofanera kusimbhwa ngo muviyo wakanaka watinowana mu basa ro kucumaera? Pauro wakadavira muvhunjo uwu ngo magama aakatarira ungano yo Korinto, paakati: “Inini ndakasima, Apolo wakadirijira, kaveta anorebesa ndi Mwari. Ndibzo, wiya anosima nokuti anodirijira asipi ciro; kaveta wiya anorebesa ngo mukuru: ndi Mwari.” (1 VaKorinto 3:6, 7) Inga ndi Pauro, patinobudirira mu basa ro kucumaera, Jehovha ngaanofanera kusimbhwa.

17. Tingakhombijisa kudini kubongesera kwedu ngo cidakajiso co ‘kushanda’ na Mwari, Kristu no ngirozi?

¹⁷ Tingakhombijisa kudini kubongesera kwedu ngo cidakajiso co ‘kushanda’ na Mwari, Kristu no ngirozi? Tingazviita ngo kuvangisira kupsaka mukana wo kuvhunja vamweni masoko akanaka. Kuno njira jakasiyana-siyana jo kuzviita, inga kucumaera ‘pa ndau yakawanda vandhu no muzi ngo muzi.’ (Maitiro o Vapostori 20:20, Baiberi Mazwi Akacena a Mwari) Hama zinji jinodakarira kupa ucapupu ucikazivi kurongwa. Pavanosongana no vandhu ivona vanovacungamija mu njira yo ushamwari zve voeja kutanga mabhuyo navo. Kudari mundhuwo akadakarira, vanoita zvese zvavanokwanisa kuti vamuvhunje masoko akanaka.

18-19. (a) Tinodikana kuitenyi kuti tidirijire mbeu yo cokwadi? (b) Ngowapi muezaniso unokhombija kuti Jehovha wakabesera mumwe mujiji wo Bhaibheri.

¹⁸ Basa redu inga “vabeseri va Mwari,” rinobatanija zvizinji kusiyapo kusima zvokadi basi, tinodikana kudirijira. Mundhu paanokhombija kudakarira, tinodikana kuita zvese zvatinokwanisa kuti timuhwiririre. Tikavona kuti atizokwanisi kumuhwiririra, zviri nane kuipekeja mundhu  umweni. Azvinenyi hazvo, cinangwa cedu cinodikana kuva co kutanga jijo yo Bhaibheri. Jijo painoenderera mberi, tinodakara maningi ngo kuvona njira inobesera Jehovha mujiji wo Bhaibheri kuti acinje mwoyo no kurangarira kwaaiita.

¹⁹ Vonanyi muezaniso wa Raphalalani wo Afrika dhu Suri, uwo wainga n’ganga. Iyena wakatanga kujija Bhaibheri zve waidakarira maningi zvaainga ecijija. Wakajija zvinonanga Bhaibheri ngo pamusoro po kubhuya no vandhu vokufa. (Deuteronòmio 18:10-12) Pakutanga, zvainesa kutenda cokwadi ici. Asi padoko ngo padoko, Raphalalani wakatendera kuti Mwari aumbe marangaririre ake. Ngo kudaro iyena wakasiya kushanda inga n’ganga, pikija rainga basa raimubesera kusapota upenyu hwake. Wari uno no makumatandhatu o makore, Raphalalani anoti: “Ndinobonga maningi Zvapupu zva Jehovha. Ivona vakandibesera ngo njira jakasiyana-siyana. Cimwenizve vakandibesera kuti ndiwane basa. Asi, pa zvese izvi, ndinobonga Jehovha ngo kundibesera kwake kuita cinjo mu upenyu hwangu. Wari ndinokwanisa kwenda kocumaera inga umwe wo Zvapupu zva Jehovha.”

20. Munodikana kutema civaringo co kuitenyi?

²⁰ Pa jijo iyi, tabhuya ngo pamusoro po zvipo zvirongomuna zvicikavoneki. Pa zvipo zvese izvi, cinosisira maningi, kuva no ushamwari wo phedo na Jehovha. Ushamwari uhwu, unotiita kuti tiashire zvipo zvimweni zvicikavoneki, inga kubhuya na Jehovha ngo mukumbiro, kuashira mujimu mucena no kushanda na Mwari, Jesu pomwe no ngirozi. Ngo kudaro, temanyi civaringo co kuda kuengejera kubongesera kwenyu ngo zvipo izvi zvicikavoneki. Zve nguva jese, bongeseranyi Jehovha ngo kuva kwake shamwari inoshamaisa.