Hambzaji Sara, * vakati: “Ngo cibarihwe ndiri mundhu ano nyowa zve andikwanisi kujithemba ushoni. Asi andijizwi ndakajiviririka pandinonga no vandhu vanojithemba maningi no kuva no hasha. Asi ndinojizwa ndakasujunuka pandinova no mundhu wakapfava no kujidodokesa. Ndingamuvhunja mazwiro angu no zvineso zvangu. Shamwari jangu jo phedo jakapfava zve jinozvidodokesa.”

Zvakananga hambzaji Sara zvinokhombija kuti kudari tikava vakapfava, vandhu vamweni vanoda kuva shamwari jedu. Kusiapo izvi, mundhu wakapfava anodakajisa Jehovha. Soko rake rinotingwaja kudari: ‘Simiranyi . . . Kupfava.’ (VaKolosi 3:12) Kupfava icinyi? Jesu wakakhombijisa kudini kuva mundhu wakapfava? Zve kuitisa kudini mugariro uu unotiita kuti tive no mudakaro mu upenyu?

Kupfava i mugariro unoviisa runyararo hwo mukati. Mundhu wakapfava anotaja ushoni vamweni, wakanaka mwoyo zve anokwanisa kujibata zviro zvakashata pazvinoitika.

Kupfava i cikhombijo co kuva no runyararo hwakavanga hwo mukati. Gama ro Cigiriki rokuti “kupfava,” rakashandiswa mu Bhaibheri kuti risanangure haci yo musora yakarovejwa ngo vandhu. Iyona inoramba ino simba, asi inodikana kujijiswa kuti ikwanise kungwarira simba rondhoro. Mu njira yakaezana, patinova vakapfava, tinongwarira zviito zvedu zve tinova no runyararo no vamweni.

Kangaije tangarangarira kudari: ‘Ngo cibarihwe andiripi mundhu wakapfava.’ Tiri kurarama mu nyika yakazara ngo vandhu vanohasha zve vacikasengereri. Ngo kudaro, zvinganesa maningi kwatiri kuti tive vakapfava. (VaRoma 7:19) Ngo iyo ndava, zvinoda kuvangisira kuti tisakurire mugariro wo kupfava, asi mujimu mucena wa Jehovha unozotibesera kuti tirambe tecieja kuva vandhu vakapfava. (VaGalàsia 5:22, 23) Ngenyi tinodikana kuvangisira kuti tive vandhu vakapfava?

Kupfava i mugariro unokwevejera vandhu. Inga ndi hambzaji Sara vatazwaya, tinoda kuva no vandhu vakapfava. Jesu i muezaniso wakanaka wo kukhombija kupfava no kunaka mwoyo. (2 VaKorinto 10:1) Pikija vana vadoko, vaida kugara phedo naye.—Marco 10:13-16.

Tikava vakapfava zvinova zvaushoni kwatiri no kuvandhu vakatitendeneja. Kudari tiri vakapfava, aticaizokasika kunyangajwa kana kutama kusengerera.  (Mazwi Akangwara 16:32) Itusu atizonyangajisi vamweni, kubatanija vandhu vatinoda. Ngo kudaro, atizojipekeji ndava. Zve vamweni vanozobesereka ngokuti tinozokwanisa kungwarira mazwiro no maitiro edu no kutama kuvanyangajisa.

Jesu wainga wakabatikana maningi zve ano basa rakawanda, pikija zvakadaro, wainga wakapfava pa zvese zvaaita. Vazinji mu njiku jake, vaishanda ngo simba zve vairemehwa maningi zvokuti vaida kutondhojwa. Rangariranyi basi mazwiro ovakava nawo, Jesu paakati: “Izanyi kondiri . . . Ngokuti ndini wakapfava no wokuthiva mwoyo”!—Mateu 11:28, 29.

Tingaitisa kudini kuti tive vandhu vakapfava inga ndi Jesu? Ngo kujija Soko ra Mwari, tinokwanisa kuvona matajire aiita Jesu vandhu no kuvona zvaaita povainga pa mugariro unonesa. Perapo, patinonga pa mugariro unoeja kupfava kwedu, tinozokwanisa kuita zviro inga ndi Jesu. (1 Pedru 2:21) Ngativone zviro zvitatu zvakabesera Jesu kuti ave mundhu wakapfava.

Jesu wainga mundhu anojidodokesa. Jesu wakananga kuti iyena wainga “wakapfava no wokuthiva mwoyo.” (Mateu 11:29) Bhaibheri rinonanga magama maviri aya, ngokuti kupfava kwakabatana kamare no kujidodokesa. (VaEfeso 4:1-3) Ngenyi tingananga kudaro?

Kujidodokesa kunotibesera maningi mundhu paanonanga zviro zvinotinyangaja. Inga muezaniso, Jesu wakaitenyi vandhu povakatanga kumushora vecinanga kuti iyena wainga “muhisi no mumwisi”? Iyena wakavonesa kuti zvovainanga zvainga zvokunyepa ngo manera aaipona. Zvecivoneka kuti iyena wainga mundhu anojidodokesa, wakananga kudari: “Uzivi hunozivika ngo maitiro ahwo.”—Mateu 11:19.

Kudari mundhu akananga zviro acizivi kurangarira ushoni ngo pamusoro po ganda redu, mugariro wedu kana kwatakakurira, zvaizova zvaushoni kuva mundhu wakapfava. Umwe mukuru anodanwa Pita anogara Afrika dhu Suri, wakati: “Pandinonyangajiswa ngo ari wese, ndinojivhunjisa kudari: ‘Naainga Jesu waizoitenyi pa mugariro wakadari?’” Iyena wakati: “Ndakajijira kutama kubatisisa zvinonangwaro.”

Jesu waizviziva kuti vandhu avazivi kukwana. Vajiji va Jesu vaida kuita zviro zvaushoni, asi ngo ndava yo kutama kukwana kwavo, avacaikwanisa kuita kudaro nguva jese. Inga muezaniso, pa usiku Jesu acito afa, Pedhru, Jakobo na Johani avazivi kukwanisa kugara vakarinda inga zvovakakumbihwa kuita. Jesu wakazwisisa kuti “mwiha wakanasirika kaveta muviri wakaremba.” (Mateu 26:40, 41) Ngo ndava yo kuzwisisa kutama kukwana kwavo, Jesu aazivi kuvanyangajirihwa.

Imwe hambzaji inodanwa Mendi, yaidakarira maningi kushora vamweni, asi wari iri kueja kutevejera muezaniso wo kupfava wa Jesu. Iyona yakati: “Ndiri kueja kuceukija kuti vandhu vese avazivi kukwana zve ndosotesesa maningi mugariro javo jaushoni inga zvinoita Jehovha.” Kureva kuti mavonero a Jesu o usizi ku vandhu vacizivi kukwana kwamubeseravo kuti mutaje vamweni ngo kupfava here?

Jesu waithemba Jehovha. Paainga pasi pano, Jesu wakadikana kucungirira manera akashata aaitajwa. Apacainga no vandhu vaimuzwisisa, avacaimudakarira zve vaimutambuja. Pikija zvakadaro, wakaenderera mberi ari mundhu wakapfava, ngokuti “waijipira kwa wiya anotonga ngo urungami.” (1 Pedru 2:23) Jesu waiziva kuti Baba wake vo mugore, vaizomubesera kuti acungirire no kuzopanica vaya vaishaisha kumutaja.

Kudari tikashaiswa kutajwa zve tokasika kunyangajwa, tinoita kuti zviro zvinyanye basi. Izvo ndizvona zvinoitisa kuti Matahwa atingwaje kudari: “Ndiani anonyangajwa, aateveji ururami hwa Mwari.” (Jakobo 1:20) Pikija tino thangwe rinotiita kuti tinyangajwe, ngo ndava yo kutama kukwana, tingatoiita zviro mu njira yakashata.

Imwe hambzaji inodanwa Kati, inogara Aremanha, yaianja kunanga kudari, ‘kudari aujijiviriri pacako, apana angakuiitira.’ Asi poyakatanga kuthemba Jehovha, yakacinja murangariro wayo. Iyona yakati: “Wari, asipi nguva jese ndinoda kuva ndakanasirika kuti ndijijivirire pacangu. Ndinoda kuva mundhu wakapfava, ngokuti ndinoziva kuti Jehovha anozonasirira zvese zvakashata pa nyika.” Kudari makamboshaiswa kutajwa, tevejeranyi muezaniso wa Jesu wo kuthemba Mwari, iwona unozomubesera kuti muenderere mberi muno mujimu wo kuva mundhu wakapfava.

Jesu wakananga kuti kudari tinoda kuva vakadakara, tinodikana kuva vandhu vakapfava. Iyena wakati: “Vanomucena vakapfava.” (Mateu 5:5) Tingabesereka kudini ngo kuva vakapfava? Ngativone mugariro jinotevera.

Kupfava kungamubesera pamunosongana no zvineso pa mucadho. Hama Roberto vanogara Austraria, vakati: “Ndakavereketa zviro zvizinji zvakashata kuno mukaji wangu, zvondicaida kuvereketa. Pakupera kubhuya zvese zvakashata, unovona kuti zvainga zvitori nane kutama kubhuya ciricese. Ndakahwajihwa maningi pondakavona kuti magama ondakavereketaya, akamuhwaja maningi.”

“Tese tinoxaixa ruzinji” ngo mavereketero edu no manera edu okurangarira pakabuda zvineso mu mucadho wedu. (Jakobo 3:2) Pa mugariro jakadaro, kupfava kungatibesera kuti tirambe takathiva no kungwarira zviya zvatinovereketa.—Mazwi Akangwara 17:27.

Hama Roberto vakashanda ngo simba kuti vasakurire kuthiva no kujibata. Ngowapi wakava muviyo wakona? Ivona vakati: “Wari, inini no mukaji wangu patinotama kuzwanana, ndinoeja kunasa kumupurukira, ndobhuya mu njira yakapfava zve ndongwarira kutama kunyangajwa ngo kukasika. Ndino ushamwari wakavanga maningi no mukaji wangu.”

Kupfava kunotibesera kuti tive vandhu vaushoni ku vamweni. Vaya vanokasika kunyangajwa avana shamwari jakawanda. Kupfava, kunotibesera kuti tirambe tino “rubatano no rugarisiko.” (VaEfeso 4:2, 3) Hambzaji Kati vanangwaya pakutanga, vakati: “Pandinova mundhu wakapfava, ndinokwanisa kuva no ushamwari waushoni no vamweni, asi pikija zvakadaro, zviciri kundinesera kuti ndinase kushanda ushoni pamwepo no vandhu vamweni.

Kupfava kunoviisa runyararo hwo mukati. Bhaibheri rinozwiranisa “hwiru hunobva mugore” no kupfava pomwe no runyararo. (Jakobo 3:13, 17) Mundhu wakapfava ano “mwoyo wakanaka.” (Mazwi Akangwara 14:30) Hama Martin, avo vakashanda ngo simba kuti vave mundhu wakapfava, vakati: “Wari andicavangiriri maningi pa zviya zvondananga, zvokuti zvese zvaidikana kuitwa ngo njira yondhoyo. Ngokudaro, ndiri mundhu ano runyararo hwo mukati zve ndino mudakaro.”

Zvokadi kamare, tingatodikana kushanda ngo simba kuti tive vandhu vakapfava. Imwe hama yakananga kudari: “Kunasa kunanga, nguva jimweni ndinonyangajwa maningi.” Asi Jehovha, uwo anotivangisa kuti tive vandhu vakapfava, anotibesera kuhwisana nazvo. (Isaia 41:10; 1 Timoti 6:11) Iyena anozopejisa kutijijisa no ‘kutipa simba.’ (1 Pedru 5:10) Nguva jimweni, inga ndi mupostori Pauro, tingakwanisa kutevejera “kuthiva no kupfava mwoyo kwa Kristu.”—2 VaKorinto 10:1.