Zviporofita zvimweni zvinonangwa apa zvinoitika pa nguva yondhoyo. Zviporofita zvese izvi zvinokhombija kuti tiri kupona mu “mukuvo wokupejisira.”—Danieli 12:4.

• Mavhesi Apokalipsi 11:7; 12:13, 17; 13:1-8, 12

  Ciporofita “Cikara” caitonga nyika pa makore akawanda. Asi pa mukuvo wo kupejisira, musoro wo cinomwe wakakhuvazika. Pa kupera mukuvo wakati kuti, musoro unoita nane zve “nyika yese” inotevera cikara. Sathana anoshandisa cikara condhoco kuti aende “korovana no vakasara vo bvumbo rake.”

  Kukwanirisika Pakupera ko Ndambi, kwakava no utongi hwo vandhu unovenga Jehovha. No papera makore akati kuti, Hondo yo Kutanga yo Nyika Yese poyainga yeciitwa, Umambo hwo Gra-Bhretanya wakaruza simba rahwo, asi wakatangazve kuvanga pohwakabatana no Estadhus Unidhus. Maningi-ningi mu mazuva ano okupejisira, Sathana anoshandisa utongi hwese hwo nyika ino kuti uteverere vandhu va Mwari.

• Mavhesi Danieli 11:25-45

  Ciporofita Pa mukuvo wo kupejisira, mambo wo kanjikazi na mambo wo kakusi vanohwisana ngo cavo ngo ndava yo kuva kwavo no simba.

  Kukwanirisika Aremanya no Utongi wo Nyika Jese wo Angro-Amerikana vanohwisana ngo ndava yo simba. Mu gore ro 1945, União Soviética no vabeseri vayo, vakashanda inga mambo wo kanjikazi. Mu gore ro 1991, União Soviética, yakawa zve pa kufamba ko nguva, Rusia no vadoni vayo vakashanda inga mambo wo kanjikazi.

• Mavhesi Isaia 61:1; Malakia 3:1; Luka 4:18

  Ciporofita Jehovha wakatuma “ndhumwa” kuti “inasirire gwanja” ucito hwakagajwa Umambo hwa Mesia. Ndhumwa iyi yakatanga “kotokotesa soko rakanaka ku varombo.”

  Kukwanirisika Kuvhira mu gore ro 1870 kwenda mberi, hama Charles Russell no vadoni vavo vakatanga kujijisa zvokadi zvo Bhaibheri. Mu gore ro 1880, ivona vakananga kuti vashandiri va Mwari vanodikana kucumaira. Vakabudisa musoro jakadari inga iji, “Vari kudikanwa Vaparidzi 1.000” na “Vakazodzwa Kuti Vaparidze.”

• Mavhesi Mateu 13:24-30, 36-43

  Ciporofita Muvengi anosima sakuro mu minda mo mwanarume umweni. Mwanarumewo anosia sakuro rikure zve roboboja tirigu mbhera pa mukuvo wo kukotora. Pa kukotora, sakuro rinodihwa pa ndau yakasiyana no tirigu.

  Kukwanirisika Kuvhira mu gore ro 1800 kwenda mberi, kwakatanga kuvoneka kamare kuti ngoapi ainga Makristu o cokwadi no o kunyepa. Pa mukuvo uno wo kupejisira, Makristu o cokwadi anounganijwa pa divi rakasiyana no Makristu o kunyepa.

• Mavhesi Danieli 2:31-33, 41-43

  Ciporofita Soka jo simbi no mavhu jo cithombi jakaitwa ngo simbi jakasiyana-siyana.

  Kukwanirisika Mavhu anoimirira vandhu vanotongwa ngo Utongi wo Nyika Jese wo Angro-Amerikana, avo vanopandukira utongi hwondhohwo. Ngo ndava yazvo, utongi uhwu ucikakwanisi wari kushandisa ushoni simba rahwo, unoimirihwa ngo simbi.

• Mavhesi Mateu 13:30; 24:14, 45; 28:19, 20

  Ciporofita Tirigu inodihwa mu “nyumbu” zve “muranda wakagondeka no wakangwara” wakagajwa kuti akorondhe “varanda vese.” “Vangeri iri ro Umambo” raizocumaehwa “pasi pese.”

  Kukwanirisika Mu gore ro 1919, muranda wakagondeka, wakagajwa kuti akorondhe vandhu va Mwari. Kutangira iponapo, Vajiji vo Bhabheri vakaengejera basa ravo ro kucumaera. Nyamasi uno, Zvapupu zva Jehovha zvinocumaera nyika jinopindirija 200 zve vanobudisa mabhuku akacijikira mu Bhaibheri mu ndimi jinopindirija 1.000.

• Mavhesi Danieli 12:11; Apokalipsi 13:11, 14, 15

  Ciporofita Cibanda co manyanga maviri cinovhunja vagari vo nyika kuti vaite “cithombe co cibanda.” Zve cibanda ici cinopa “mwiha mu cithombe co cibanda.”

  Kukwanirisika Utongi wo Nyika Jese wo Angro-Amerikana, yakatungamirira pa kuumba Liga das Nações. Sangano iri rinobesehwa ngo nyika jimweni. Mambo wo kanjikazi anobatanavo no Liga das Nações, asi anozviita basi kuvhira mu gore ro 1926 mbhera 1933. Vandhu vanotenda kuti Liga das Nações no Organização das Nações Unidas, ndivona vangakwanisa kuviisa runyararo mu nyika yese, zviro zvokuti Umambo hwa Mwari ndiwona basi ungaviisa.

• Mavhesi Danieli 8:23, 24

  Ciporofita Mambo anomavonekero anothisa “anozokwiya-kwiya ngo [njira inoshamaisa].”

  Kukwanirisika Utongi wo Nyika Jese wo Angro-Amerikana, yakakwanisa kuparaja zviro zvizinji maningi. Inga muezaniso, pa Hondo yo Cipiri yo Nyika Yese, Estadhus Unidhus, yakaparaja zviro zvizinji poyakakhandira mabhomba atomika maviri ku vavengi vo Utongi wo Nyika Jese wo Angro-Amerikana.

• Mavhesi Danieli 11:31; Apokalipsi 17:3, 7-11

  Ciporofita “Cikara cakapsuka” cino gumi ro munyanga cinokhwira mu rindi rakajikisisa zve ndi mambo wo cisere. Bhuku ra Dhanieri rinodanija mambo wo cisere uu kuva “cipserujo co cinyangajo.”

  Kukwanirisika Liga das Nações yakarembejeka pa Hondo yo Cipiri yo Nyika Yese. Hondo iyi noyapera, Organização das Nações Unidas ‘yakanghwina.’ Inga ndi Liga das Nações, iyona inoenderera mberi no murangariro wokuti inokwanisa kuviisa runyararo, zviro zvokuti Umambo hwa Mwari ndiwona ungaviisa. Organização das Nações Unidas inozohwisa zviara.

• Mavhesi 1 VaTesalònika 5:3; Apokalipsi 17:16

  Ciporofita Majinja anozoita ciziviso co “kunyarara no kugarisika” zve “gumi ro munyanga” no “cikara” vanozohwisa “mwanakaji wo uhure” vo muparaja. Pejisire majinja anozoparajwa.

  Kukwanirisika Majinja kangaije angananga kuti akwanisa kuviisa runyararo no rugarisiko mu nyika yese. Ngo kudaro majinja anobesera Organização das Nações Unidas, anozoparaja ciyara co manyepo. Ici cinozova citatijo cokuti dambujiko guru roda kutanga. Dambujiko iri, rinozopera Jesu paanozoparaja nyika ya Sathana pa Armagedhoni.

• Mavhesi Ezekieli 38:11, 14-17; Mateu 24:31

  Ciporofita Gogi anohwisa nyika yo vandhu va Mwari. Perapo, ngirozi jinozounganija “vakasanwa.”

  Kukwanirisika Mambo wo kanjikazi, kubatanijavo no majimambo amweni o nyika, anozohwisa vandhu va Mwari. No papera mukuvo wakati kuti kuhwiswa uku kwatanga, vokuzojwa vanonga vari pasi pano vanozounganijwa kuti vapinde kudenga.

• Mavhesi Ezekieli 38:18-23; Danieli 2:34, 35, 44, 45; Apokalipsi 6:2; 16:14, 16; 17:14; 19:20

  Ciporofita “Mundhu waipakira” pa ‘haci yokucena’ wakapejisa ‘kunyisa’ paakaparaja gogi no masoca ake. “Cikara” cinokhandihwa “mu gandwa ro enxofre yaibwaka” zve cithombe cakareba cakakwiiwa-kwiiwa.

  Kukwanirisika Jesu mambo wo Umambo hwa Mwari, anoviya kuti aponese vandhu va Mwari. No 144.000 vaanozotonga navo, pamwepo no cikwata co ngirozi, iyena anozoparaja majinja ese anohwisa vandhu va Mwari. Uku kunozova kupera ko nyika yese ya Sathana.