1. Mundhu anodikana kuitenyi acito atanga kuvaka nyumba?

AMBORANGARIRANYI basi, mundhu anoda kuvaka nyumba. Iyena anoziva mushovo wo nyumba yaanoda kuvaka. Asi, izvi zvinoreva kuti anoenda ku rojha ngo kukasika kuti atenge zvaanoda kuti atange kuvaka here? Haiwa. Acito atanga, pano ciro cinosisira maningi caanodikana kuita, kuvona kuti nyumba yondhoyo inozomutorera mare yakadini. Ngenyi? Ngokuti iyena anodikana kuziva dangani ano mare inokwana kuita zvese zvaanoda kuti apeje nyumba yake. Kudari akatanga apsaka kuziva kuti nyumba yondhoyo inoda mare yakawandisa kudini, anozokwanisa kupeja nyumba yake.

2. Mukuzwirana na Luka 14:27-30, munodikana kurangarirenyi mucito mabhabhatijwa?

² Waro, kureva kuti rudo no kubongesera kwenyu Jehovha, kwamuita kuti mude kubhabhatijwa here? Kudari ndizvona, muri pa mugariro wakafanana no wo mwanarume anodaya kuvaka nyumba. Ngenyi tingananga kudaro? Vonanyi basi magama a Jesu anowanika pana Luka 14:27-30. (Verenganyi.) Jesu wainga ecibhuya ngo pamusoro po kuva mujiji wake. Kuti tive muteveri wake, tinodikana kucungirira zvineso zvatingasongana nazvo no kutendera kusiya zviro zvakati kuti. (Luka 9:23-26; 12:51-53) Ngokudaro, mucito mabhabhatijwa, munodikana kunasa kurangarira ngo pamusoro po zvineso zvamungava nazvo ngo ndava yo kuva mujiji wa Kristu. Perapo, munonga makanasirika kuti muve mushandiri wa Mwari wakagondeka inga Mukristu wakabhabhatijwa.

3. Tinoda kubhuisana ngenyi pa musoro uwu?

³ Kuva mujiji wa Kristu wakabhabhatijwa, zvinoda kucungirira muejo no kusiya zviro zvimweni. Hina, mundhu anobhabhatijwa anova no makomborero akawanda wari no kumbejiyo. Ngatibhuisanenyi  ngo muvhunjo unosisira maningi ngo pamusoro po rubhabhatijo. Mupinguro wenyu unozobesera kudavira muvhunjo uwu, “Ndakanasiririka kuti ndibhabhatijwe here?”

4. (a) Kujipira icinyi? (b) Gama ro kuti ‘kujiramba’ rinoda kurevenyi inga zvinonangwa pana Mateu 16:24?

⁴ Kujipira icinyi? Mucito mabhabhatijwa, imwimwi munodikana kujipira. Kujipira, i kuita mukumbiro kuna Jehova ucivha ngo mukati mo mwoyo kamare, mecimuvhunja kuti munoda kushandisa upenyu hwenyu kuti mumushandire kwenda no kwenda. Pamunojipira pacenyu kuna Mwari, imwimwi ‘munojiramba.’ (Verenganyi Mateu 16:24.) Kuva mundhu wa Jehovha, cidakajiso cikuru maningi. (VaRoma 14:8) Kuvhira njiku yondhoyo, munonga mavhunja Jehovha kuti munoda kudakajisa iyena basi kuciripi imwimwi pacenyu. Kujipira kwenyu i mbhiko yo munonga maitira Mwari. Jehovha aativangiriji kuti tiite mbhiko yondhoyo. Asi, patinoiita, iyena anovetera kuti tiikwanirise.—Nduyo 116:12, 14.

5. Kujipira kwakabatana papi no kubhabhatijwa?

⁵ Kujipira kwakabatana papi no kubhabhatijwa? Mundhu paanojipira apana mundhu anozviziva; ndiyena basi na Jehovha. Kuveni rubhabhatijo unoita pakawanda vandhu, kazinji unoitwa mu magungano. Pamunobhabhatijwa, munonga mecikhombija vamweni kuti mapera kujipira kuna Jehovha. * Kubhabhatijwa kwenyu kunoita kuti vamweni vazive kuti imwimwi munoda Jehovha ngo mwoyo wese, mwiha, hwiru pomwe no simba. Zve munoda kumushandira kwenda no kwenda.—Marco 12:30.

6-7. Mukuzwirana na 1 Pedru 3:18-22, ngoapi mathangwe maviri anovonesa kuti rubhabhatijo unodikana?

⁶ Zvinodikanadi kamare kuti mundhu abhabhatijwe? Vonanyi magama anowanika pana 1 Pedru 3:18-22, Shanduro yeNyika Itsva. (Verenganyi.) Kudari inga arka yakakhombija kuti Nowa wainga no rutendo, kubhabhatijwa kwenyu kunokhombijavo kuti imwimwi majipira kuna Jehovha. Asi, kureva kuti zvinodikanadi kamare kuti mundhu abhabhatijwe? Hina. Pedhru wakananga kuti ngenyi zvinodikana. Cokutanga, iyena wakananga kuti iwona “hunomuponesa.” Rubhabhatijo ungatiponesa kudari tikaita mudanyu jinodiwa kuti tikhombije rutendo kuna Jesu no kutenda kuti iyena wakatifira, wakamuswa wopinda kumatenga zve wari “ari pa mukono muho wa Mwari.”

⁷ Cocipiri, kudari mukabhabhatijwa munozova no ‘hana yakanaka.’ Patinojipira kuna Mwari tobhabhatijwa, tinova no ushamwari unosisira maningi naye. Ngo ndava yo kukhauya kwedu ngo mwoyo wese no kutenda kwedu muripo, Mwari anotiregerera zvishaishi zvedu. Ngokudaro, tingava no hana yakanaka pamberi pake.

8. Zvicinyi zvinodikana kumundundira kuti mubhabhatijwe?

⁸ Zvicinyi zvinodikana kumundundira kuti mubhabhatijwe? Pakujija kwenyu Bhaibheri, makajija zvizinji ngo pamusoro pa Jehovha, mugariro jake no manera ake okuita zviro. Zvomakajijari ngo pamusoro pake, zvakamupsasa maningi zvomuita kuti mumude kamare. Rudo hwenyu kuna Jehovha ndiwona unodikana kumundundira kuti mubhabhatijwe.

9. Zvinoda kurevenyi kubhabhatijwa mu zina ra Baba, ro Mwana no ro mujimu mucena, inga zvinonangwa pana Mateu 28:19, 20?

⁹ Ciro cimweni cinomuitisa kuti mude kubhabhatijwa i cokwadi co Bhaibheri comakajija. Vonanyi zvakananga Jesu paakapa mupango wo kuita kuti vandhu vave vajiji. (Verenganyi Mateu 28:19, 20.) Mukuzwirana na Jesu, vese vaya vanoda kubhabhatijwa, vanodikana kuzviita “mu zina ra Baba no ro Mwana no ro mujimu mucena.” Zvinoda kurevenyi izvi? Zvinoreva  kuti munodikana kutenda ngo mwoyo wese zvokadi zvo Bhaibheri ngo pamusoro pa Jehovha; Jesu; pomwe no mujimu mucena. Zvokadi izvi zvinosimba maningi zve zvingapsasa maningi upenyu hwenyu. (Vaheberi 4:12) Ngatende tivone zvinganani zvakona.

10-11. Zvokadi zvapi zvo Bhaibheri zvomakajija no kutendera ngo pamusoro pa Baba?

¹⁰ Amborangariranyizve basi, pomakatanga kujija cokwadi ngo pamusoro pa Baba vedu vo mugore. Baba ava, ‘zina ravo ndi [Jehovha],’ ivona vari ‘panyezuru po nyika yese’ zve ndivona basi ‘Mwari [wo cokwadi].’ (Nduyo 83:19; Isaia 37:16) Ivona ndi Musiki wedu zve “ruponeso hunobva” kwavari. (Nduyo 3:9; 36:10) Iyena wakaita nasiriro kuti tiponeswe kuvha pa ushaishi no rufu no kutipa vetero yo kuzowana upenyu ucikaperi. (Johani 17:3) Kujipira kwenyu no kubhabhatijwa kunomuvonesa inga umwe wo Zvapupu zva Jehovha. (Isaia 43:10-12) Imwimwi munozova divi ro mbhuri yo nyika yese yo vanamati vanodada ngo kudanijwa ngo zina ra Mwari zve vanoita kuti irona rizivike ngo vamweni.—Nduyo 86:12.

¹¹ Zvokadi kamare, i cidakajiso cikuru maningi kuzwisisa zvinojijiswa ngo Bhaibheri ngo pamusoro pa Baba. Pomakatenda zvokadi izvi zvinosisira, mwoyo wenyu wakamuita kuti mude kujipira pacenyu kuna Jehovha, mobhabhatijwa.

12-13. Zvokadi zvapi zvomakajija no kutenda ngo pamusoro pa Jesu?

¹² Ngo api akava mazwiro enyu po makajijira kuteveja cokwadi ngo pamusoro pa Jesu? Jesu i mundhu wo cipiri anosisira maningi mudenga no pasi. Iyena musujunuri wedu. Ngo mwoyo wese wakapira upenyu hwake kwatiri. Patinokhombija ngo zviito zvedu kuti tinotenda muripo, tinoregerehwa zvishaishi zvedu, tosakurira ushamwari hwedu na Mwari no kuwana upenyu ucikaperi. (Johani 3:16) Jesu Mupiri Mukuru wedu. Iyena anoda kuti tibesereke ngo muripo no kuva no ushamwari na Mwari. (Vaheberi 4:15; 7:24, 25) Inga Mambo wo Umambo hwa Mwari, Jehovha anozomushandisa kuti acenese zina rake, kupeja ushati no kuviisa makomborero acikaperi mu Paradhiso pasi pano. (Mateu 6:9, 10; Apokalipsi 11:15) Jesu i muezaniso watinodikana kuteveja. (1 Pedru 2:21) Iyena wakashandisa upenyu hwake kuti aite kuda ka Mwari zve ngo kuita kudaro, wakatigajira muezaniso.—Johani 4:34.

¹³ Pamunotenda zvinojijiswa ngo Bhaibheri ngo pamusoro pa Jesu, munoguma pa kumuda. Rudo wondhowo, unomundundira kuti mushandise upenyu hwenyu pa kuita kuda ka Mwari, inga zvakaita Jesu. Izvi zvinozomuita kuti mupire upenyu hwenyu kuna Jehovha, mobhabhatijwa.

14-15. Zvokadi zvapi zvomakajija no kutenda ngo pamusoro po mujimu mucena?

¹⁴ Ngo zvapi zvomakarangarira po makajija kuteveja zvokadi ngo pamusoro po mujimu mucena? Makarangarira kuti mujimu mucena asipi mundhu, asi i simba rinoshanda ra Mwari. Jehovha wakashandisa mujimu mucena kuti utungamirire vandhu kutara Bhaibheri zve mujimu mucena unotibesera kuti tizwisise no kushandisa zvatinoverenga mu Bhaibheri. (Johani 14:26; 2 Pedru 1:21) Ecishandisa mujimu wake, Jehovha anotipa “simba rakakura kudaro.” (2 VaKorinto 4:7) Mujimu mucena unotipa simba ro kucumaera masoko akanaka, kuhwisana no muejo, kuhwisana no kusuruvara no kucungirira muejo. Unotibesera kuti tikhombije mugariro jakanaka jinova divi ro mucero wo mujimu. (VaGalàsia 5:22) Mwari wakasujunuka kuti ape mujimu wake mucena ku vaya vanomuthemba no kumukumbira mujimu wondhowo ngo mwoyo wese.—Luka 11:13.

¹⁵ Zvinovangisa no kuembejera kuziva kuti vanamati va Jehovha vangathemba kuti mujimu mucena unovabesera kuti vashandire Mwari. Pomakatendera zvokadi, makajija ngo  pamusoro po mujimu mucena, zvomuita kuti mujipire kuna Mwari, mobhabhatijwa.

16. Ngozvapi zvotajija mbhera wari?

¹⁶ Kujipira kuna Mwari ka kubhabhatijwa i ciro cinosisira maningi camuri kusana. Inga zvotapera kujija, munodikana kuva mundhu anotendera zvineso zvamungasongana nazvo pa kushandira kwenyu Jehovha no kutendera kusiya zvimweni. Asi makomborero amunozova nawo, anozova akawanda kupinda zvomakasiya kare. Rubhabhatijo ungamuponesa no kumuita kuti muve no hana yakacena pamberi pa Mwari. Cisungo cenyu co kuda kubhabhatijwa cinodikana kucijikira pa rudo hwenyu na Jehovha Mwari. Imwimwi munodikanazve kutenda ngo mwoyo wese zvokadi zvomakajija ngo pamusoro pa Baba, Mwana no mujimu mucena. Pakupera kuvona zvotaperari kujija, maizodavirisa kudini muvhunjo uu: “Ndakanasiririka kuti ndibhabhatijwe here?”

17. Ngozvapi zviro zvinodikana kuita mundhu acito abhabhatijwa?

¹⁷ Kudari mukavona kuti manasiririka kuti mubhabhatijwe, pacina kukana-kana maakukwanisa kuita zviri zvese kuti muve no ushamwari wakanaka na Jehovha. * Ngokuti pamainga mecijija Bhaibheri, makanasa kuziva Jehovha na Jesu. Makava no rutendo hwakavanga. (Vaheberi 11:6) Zvokadi kamare, munothemba zvigondiso zva Mwari zvinowanika mu Bhaibheri zve munotenda kuti muripo wa Jesu ungamuita kuti mufujurihwe zvishaishi zvenyu no kumuponesa ku rufu. Makakhauya ku zvishaishi zvenyu, mokumbira Jehovha kuti amuregerere zvomakaposa. Makacinja maponero amaiita kare ngo kuramba zvakashata, motanga kupona munjira inodakajisa Mwari. (Maitiro o Vapostori 3:19) Mova no cido co kwenda kovhunja vamweni ngo pamusoro po rutendo hwenyu. Mukadaro, munokwanirisa kuti mushande inga mucumaeri acizivi kubhabhatijwa, motanga kucumaera pamwepo no ungano. (Mateu 24:14) Jehovha anodada maningi ndimwi ngo kuita mudanyu iji jinosisira. Imwimwi makamuita kuti adakare maningi.—Mazwi Akangwara 27:11.

18. Zvicinyi zvamunodikanazve kuita mucito mabhabhatijwa?

¹⁸ Mucito mabhabhatijwa, pano zviro zvimweni zvamunodikana kuita. Inga zvotapera kujija, munodikana kujipira kuna Mwari. Itanyi mukumbiro unovha ngo mukati kamare pamunonga muri mwega zve mugondesenyi kuti imwimwi munozoshandisa upenyu henyu kuti muite kuda kwake. (1 Pedru 4:2) Perapo vhunjanyi murongi wo dare ro vakuru kuti imwimwi muri kuda kubhabhatijwa. Iyena anozobhuya no vakuru vamweni kuti vabhuye na imwimwi. Tapota mucadothimwa-thimwa ngo pamusoro po kubhuya navo. Ceujanyi kuti hama iji jinonasa kumuziva zve jinomuda. Ivona vanozohwirijira mafundo o Bhaibheri o makajija. Munozviziva kuti ngenyi? Ngokuti ivona vanoda kuva no cokwadi cokuti imwimwi munozwisisa zvijijo zvese zvamakajija no kuziva kuti imwimwi munoziva  kusisira ko kuzvipira no kubhabhatijwa. Vakavona kuti imwimwi munokwanirisa, ivona vanozomuvhunja kuti munozobhabhatijwa pa gungano rinotevera.

19-20. Zvicinyi zvamunodikana kuita pakupera kubhabhatijwa? Zve mungazviitisa kudini?

¹⁹ Mukapera kubhabhatijwa, zvicinyi zvamunodikana kuita? * Ceujanyi kuti kujipira i mbhiko yamunonga maita zve Jehovha anovetera kuti muikwanirise. Ngo kudaro, mukapera kubhabhatijwa, munodikana kupona mukuzwirana no mbhiko yamunonga maita pa kujipira kwenyu. Mungazviitisa kudini izvi?

²⁰ Rambanyi muri phedo no ungano. Inga Mukristu wakabhabhatijwa, wari maadivi ro “hama” kutenderera pasi pese. (1 Pedru 2:17) Hama no hambzaji jenyu mu ungano, i mbhuri yenyu yo kumujimu. Ngo kuviya pa musongano nguva jese, munozovangisa ushamwari hwenyu navo. Verenganyi Bhaibheri no kurangarijisisa zvese zvamunoverenga njiku jese. (Nduyo 1:1, 2) Mukapera kuverenga Bhaibheri, ivanyi no nguva yokumborangarira zvomaverengaro. Mukadaro, munozobaiwa mwoyo ngo masoko ondhoo. Endereranyi mberi ‘mecikumbira.’ (Mateu 26:41) Mukumbiro jomunoita jecivha ngo mu mwoyo jinozomuita kuti mukhwedere phedo na Jehovha. Ngo kudaro, Bhaibheri rinoti: “Ambanyi kupsanga Umambo hwa Mwari.” (Mateu 6:33) Mungazviitisa kudini? Ngo kudira basa ro kucumaera pa ndau yo kutanga mu upenyu hwenyu. Pamunoita basa ro kucumaera mukuvo wese, rutendo hwenyu hunovanga zve munonga mecibesera vamweni kuti vavevo no upenyu ucingaperi.—1 Timoti 4:16.

21. Kubhabhatijwa kwenyu kunozomuita kuti muwanenyi?

²¹ Kukheta kwenyu kujipira kuna Jehovha no kubhabhatijwa kunosisira maningi kupinda zviro zvimweni. I zvokadi kuti mungatosongana no zvineso zvakasiyana-siyana. Mungatosonganadi no zvineso kamare? Hina! Asi, zvineso zvamungasongana nazvo mu nyika ino, ngo zvo ‘nguva doko.’ (2 VaKorinto 4:17) Mukusiyana, kubhabhatijwa kwenyu kunozomuita kuti muve no mudakaro mu upenyu wari no “uhomi hwokadi-kadi” kumbejiyo. (1 Timoti 6:19) Ngo kudaro, tapota, nasanyi kurangarira no kuita mukumbiro ngo pamusoro po mupinguro wo muvhunjo uwu, “Ndakanasiririka kuti ndibhabhatijwe here?”