1-2. (a) Zvicinyi zvingatibesera kuti tihwisane no zvineso? (b) Tinozovonenyi pa musoro uno?

“PANDINORANGARIRA zvineso zvondakasongana nazvo, ndinovona inga kuti andicaizokwanisa kuhwisana nazvo ndega.” Makambonangavo zviro zvakafanana here? Uzinji wedu takambozvinanga. Kangaije makananga izvi pomakahwisana no ndhendha yainesa kana kufa ko mundhu anodiwa. Mukarangarira ngo pamusoro po zvineso zvondhozvo, munovona kuti makakwanisa kuzvinyisa ngokuti mujimu mucena wa Jehovha wakamupa “simba rakakura.”—2 VaKorinto 4:7-9.

² Cimwenizve, itusu tinoda besero ro mujimu mucena kuti titame kukwevehwa ngo mugariro wo nyika ino. (1 Johani 5:19) Kusiyapo zvondhozvo, tiri kuhwisana no ‘mujimu yakaxata.’ (VaEfeso 6:12) Tecirangarira zvineso zvese izvi, pa musoro uno, ticazovona njira mbiri jinoshandiswa ngo mujimu mucena kuti jitibesere kuhwisana nazvo. Tevere, tinozovona kuti tinodikana kuitenyi kuti tinase kuashira besero ro mujimu mucena.

3. Ngo yapi njira inoshandiswa ngo mujimu mucena kuti utibesere?

³ Njira imwe inoshandiswa ngo mujimu mucena, ngo yo kutipa simba kuti tikwanise kuita mabasa edu, pikija tecisongana no zvineso. Pauro waikwanisa kushandira Jehovha ngo kuti waithemba “simba ra Kristu.” Simba rondhoro raimubesa kuti akwanise kucungirira zvineso. (2 VaKorinto 12:9) Pa hwendo hwake wocipiri wo umisionario, Pauro wakashanda maningi mu basa ro kucumaera zve wakaita basa rimweni kuti ajisapote. Iyena wakagara ku Korinto pa muzi wa Akira na Prisira, avo vaiita tenda. Inga muiti wo tenda, Pauro wakabatana navo pa kuita basa rondhoro. (Maitiro o Vapostori 18:1-4) Mujimu mucena wakapa Pauro simba rokushanda kuti ajisapote no kucumaera.

4. Mukuzwirana no 2 VaKorinto 12:7b-9, ngo capi cineso cakasongana na Pauro?

 ⁴ Verenganyi 2 VaKorinto 12:7b-9. Pa vhesi iji, Pauro wakatara kuti waihwisana no “muzwa mu muviri.” Waida kunangenyi? Mundhu wese akabaiwa ngo muzwa anohwajihwa. Ngokudaro, Pauro waida kunanga kuti waihwisana no mugariro unohwaja maningi. Iyena wakasanangura mugariro wondhowo inga “ndhumwa ya Sathana” yakatumwa kuti ‘imurove.’ Kangaije asipi Sathana no madhimoni akaita kuti Pauro awanane no mugariro uwu. Zvingaita kuti Sathana paakavona Pauro no “muzwa” kana matambujiko, wakaita kuti ahwajihwezve maningi. Pauro wakaitenyi?

5. Jehovha wakadavira kudini mukumbiro wa Pauro?

⁵ Pauro waida kuti “muzwa” waaingaro nawo uvhiswe. Iyena wakananga kudari: “Ndakakumbira rutatu kuna Tenji, kuti ndisununguhwe koiri.” Pikija no mukumbiro jaakaita, muzwa wiya waindogara uripo. Waro, kunanga kuti Jehovha aacaizwa mukumbiro wa Pauro here? Haiwa. Jehovha waizwa. Iyena aazivi kuvhisa cinesoco, asi wakamupa simba kuti acijikire. Jehovha wakati: “Simba [rangu] rinotatijwa mu kurembejeka.” (2 VaKorinto 12:8, 9) Ngo besero ra Jehovha, Pauro wakaenderera mberi ecidakara no kuva no runyararo wo mukati!—VaFilipi 4:4-7.

6. (a) Jehovha angadavira kudini mukumbiro jenyu? (b) Mavhesi akadihwari mu ndima iyi, angamubesera kudini kuti muve no simba?

⁶ Inga ndi Pauro, makambokumbiravo besero kuna Jehovha kuti munyise cineso ciri cese here? Zvingaita kuti muri kuita mukumbiro, asi zvineso zvindoripo basi kana zviri kutonyanya. Motogumira pakurangarira kuti Jehovha wanyangajwa ndimwi. Kudari zviri kumuitikira, rangariranyi muezaniso wa Pauro. Jehovha wakadavira mukumbiro wa Pauro, anozodaviravo mukumbiro jenyu! Kangaije Jehovha aazovhisi cinesoco, asi ecishandisa mujimu mucena, angamupa simba kuti mukwanise kucungirira. (Nduyo 61:4, 5) Kangaije ‘mungarembejeka’ asi Jehovha aazomusii.—2 VaKorinto 4:8, 9; VaFilipi 4:13.

7-8. (a) Mu njira yapi mujimu mucena wakadari inga mbhepo? (b) Mupostori Pedhru wakasanangurisa kudini mashandire anoita mujimu mucena?

⁷ Ngoyapi njira imweni inoshandiswa ngo mujimu mucena kuitira kutibesera? Kudari inga mbhepo inondunda piketi mu jombe rino mavimbi, mujimu mucena unotibesera kuti tienderere mberi tecishandira Jehovha patinosongana no zvineso no kutiendesa ku ndau yakangwaririka, mu nyika imbza yakagondiswa ndi Mwari.

⁸ Inga mutandi, mupostori Pedhru waiziva ushoni kamare kufamba mu jombe. Zvinosisira maningi ngo zvokuti, paakabhuya ngo pamusoro po mashandire anoita mujimu mucena, iyena wakashandisa mavereketero anoitwa ngo vandhu vanoshanda mu jombe. Yena wakatara kudari: “Ngokuti apana mafemberero akaza ngo kuda ko mundhu; kaveta vandhu vakafemehwa [kana kukwevehwa] ngo mujimu mucena wakavereketa ngo zina ra Mwari.” Gama ro Cigiriki rakasandujwa apa ro kuti ‘kukwevehwa’ rinoda kureva ‘kundundihwa.’—2 Pedru 1:21.

9. Pedhru wairangarirenyi paakabhuya ngo pamusoro po ‘kundundihwa’?

⁹ Pedhru wairangarirenyi paakabhuya ngo pamusoro po ‘kundundihwa’? Ruka, uwo wakatara Maitiro o Vapostori, wakashandisa gama ro Cigiriki rakadotojana na iri, pakusanangura piketi iri kutohwa ngo mbhepo. (Maitiro o Vapostori 27:15) Inga zvakanangwa ngo mundhu umweni anojija ngo zvo Bhaibheri, Pedhru paakananga kuti vatari vo Bhaibheri  ‘vakandundihwa,’ wakashandisa mavereketero o kuezanisira o vandhu vanoshanda mu jombe. Ngokudaro, Pedhru apa waida kunanga kuti, kudari inga piketi inokweviwa ngo mbhepo kuti igume kwainoda, vaporofita no vatari vo Bhaibheri vakafemehwa kana kukwevehwa ngo mujimu mucena kuti vakwanirise basa ravo. Mundhu wondhowo wanangwaya kuti anojija ngo zvo Bhaibheri, wakananga kudari: “Ndingatonanga kuti vaporofita vakamusa thanga.” Jehovha wakaitavo divi rake, wakatumira “mbhepo” kana kuti mujimu mucena. Ngo divi rimweni, vatari vo Bhaibheri vakaitavo divi ravo. Ivona vakashanda vecitungamirihwa ngo mujimu wondhowo.

10-11. Ngozvapi zviro zviviri zvatinodikana kuita kuti titungamirihwe ngo mujimu mucena? Ipanyi muezaniso.

¹⁰ Zvokadi kamare, nyamasi uno Jehovha aacashandisi mujimu mucena kuti vandhu vatare Bhaibheri. Pikija zvakadaro, Jehovha ari kushandisa mujimu mucena kuti atungamirire vandhu vake. Izvi zvinovonesa kuti Jehovha ari kuita divi rake. Waro, tingabesereka kudini ngo mujimu mucena wa Mwari? Tinodikana kuva no cokwadi co kuti tiri kuita divi redu. Tingazviitisa kudini?

¹¹ Vonanyi basi muezaniso uu. Kuti abesereke ngo mbhepo, mufambisi wo piketi anoita zviro zviviri. Cokutanga, anodikana kuteya piketi ku divi rinoenda mbhepo. Kudari mufambisi wo piketi akagara pakavanda kana pacikagumi mbhepo, piketi yake aizofambi. Cocipiri, iyena anodikana kumusa thanga ro piketi zve worishamisa. Pikija kwecitotaka mphepo, piketi ingaenderera mberi yecifamba kudari mathanga akagara akashama kuti apinde mbhepo. Mukufananavo, tinozokwanisa kucungirira tecibesehwa ngo mujimu mucena wa Jehovha. Kuti titungamirihwe ngo mujimu mucena, tinodikana kuita zviro zviviri. Cokutanga, tinodikana kuita zviro zvinotungamirihwa ngo mujimu wa Mwari. Cocipiri, tinodikana “kuthujura mathanga” edu, kana kuti, kuita zvese zvatinokwanisa mu basa rokucumaera. (Nduyo  119:32) Kudari tikaita zviro izvi, mujimu mucena unozotibesera kuti tienderere mberi pikija no zvineso zvatinosongana nazvo. Iwona unozotibesera kucungirira mbhera mu nyika imbza ya Mwari.

12. Wari tirikuda kujijenyi?

¹² Mbhera wari, tavona njira mbiri jinoshandiswa ngo mujimu mucena kuitira kutibesera. Yokutanga, iwona unotipa simba kuitira kutibesera patinosongana no zvineso. Yocipiri, mujimu mucena unotiita kuti tienderere mberi zve unotibesera kuti tirambe tiri mu gwanja rinoendesa kuupenyu ucikaperi. Wari, ngatijije zviro zvirongomuna zvatingaita kuti tibesehwe ngo mujimu mucena.

13. Mukuzwirana na 2 Timoti 3:16, 17, matahwa angaitenyi kwatiri, asi tinodikana kuitenyi?

¹³ Cokutanga, jijanyi Bhaibheri. (Verenganyi 2 Timoti 3:16, 17.) Gama ro Cigiriki rakasandujwa apa kuti ‘rakafemehwa ndi Mwari,’ rinoreva ‘kutungamirihwa ndi Mwari.’ Mwari wakashandisa mujimu wake kuti adire murangariro wake muvatari vo Bhaibheri. Patinoverenga Bhaibheri no kurangarijisisa zvatinoverengaro, ndhungamiriro ja Mwari jinova mumurangariro no mumwoyo mwedu. Murangariro iji jakafemehwari, jinotindundira kuti tiite cinjo muupenyu kuti tidakajise Jehovha. (Vaheberi 4:12) Kuti mujimu mucena utibesere, ngatipsake mukuvo wo kuverenga Bhaibheri no kurangarijisisa zvatinoverenga. Tikaita kudaro, Soko ra Mwari ricakwanisa kutibesera pa zvatinovereketa no kuita.

14. (a) Ngenyi tingananga kuti pa musongano pano mujimu mucena? (b) Ngozvapi zvatingaita kuti tibesehwe ngo mujimu mucena?

¹⁴ Cocipiri, endanyi kumusongano kuti munamate Jehovha. (Nduyo 22:23) Pa musongano jo ungano, pano mujimu wa Jehovha. (Apokalipsi 2:29) Ngenyi tingananga zvondhozvo? Ngokuti patinonga takaungana kuti tinamate Jehovha no hama jedu, tinokumbira mujimu mucena, tinoimba ndumbo jo Umambo jakacijikira mu Soko ra Mwari pomwe no kupurukira ndhungamiro jinovha mu Bhaibheri, jatinopuwa ngo hama jakagajwa ngo mujimu mucena. Cimwenizve, mujimu mucena wondhowo, unobesera hambzaji kuti vanasirire no kuita mativi avo. Kuti tibesehwe ngo mujimu mucena, tinodikana kunasirira kuti tipevo mupinguro pamusongano. Tikadaro, zvinoita inga kuti tino “mathanga akashama.”

15. Mujimu mucena unotibesera kudini mu basa ro kucumaera?

¹⁵ Cocitatu, endanyi kocumaira. Patinoshandisa Bhaibheri pa kucumaira no kujijisa, tiri kutendera kuti mujimu mucena utibesere mu basa redu. (VaRoma 15:18, 19) Asi kuti tinase kubesereka, tinodikana kuenda koocumaera nguva jese tecishandisa Bhaibheri zvecikwanisika weya. Njira imweni inotiita kuti tibudirire mu mushando, ngo yo kushandisa kucumaera ko kuezanisira kunowanika pa Co Kutarira Zvo Musongano Upenyu Hwedu hwo ciKristu no Mushando.

16. Ngo api manera acikanesi o kuwana mujimu mucena?

¹⁶ Cocirongomuna, itanyi mukumbiro. (Mateu 7:7-11; Luka 11:13) Manera acikanesi okuwana mujimu mucena ngo o kuita mukumbiro. Akuna cingaphinga kuti mukumbiro wedu ugume kuna Jehovha. Mukuezanavo nee kadheya nee Sathana, azvikwanisi kuphinga mujimu mucena kuti utame kuguma kwatiri. (Jakobo 1:17) Tingaitisa kudini mukumbiro kuti tinase kubesereka ngo mujimu mucena? Kuti tidavire, ngativone muezaniso unowanika Muvhangeri ra Ruka. *

17. Tinojijenyi ngo muezaniso unowanika pana Luka 11:5-9, 13?

¹⁷ Verenganyi Luka 11:5-9, 13. Muezaniso wa Jesu unokhombija manera atinodikana kukumbira mujimu mucena. Pa muezaniso uu, mwanarume uu wakakwanisa kuwana zvaaida “ngo ndava yo kuvangirira” kwake. Pikija kwainga kwa usiku maningi, iyena aazivi kuthya kukumbira besero shamwari yake. (Vonanyi masoko o kujija o vhesi ya Luka 11:8, mu referensiya inowanika mu Co Kutarira Zvo Musongano co mweji wa Julho wo 2018, pheji yo 4.) Muezaniso uwu, unotijijisenyi ngo pamusoro po mukumbiro? Jesu wakati: “Kumbiranyi, munozopuwa. Psanganyi, munozowana. Gugujanyi, munozozaurihwa.” Waro, tinojijenyi? Kudari tinoda kubeswa ngo mujimu mucena, tinodikana kuita mukumbiro ticikarembi.

18. Mukuzwirana no muezaniso wa Jesu, ngenyi tingathemba kuti Jehovha anozotipa mujimu mucena?

¹⁸ Muezaniso wa Jesu unotibeserazve kuvona kuti ngenyi Jehovha anozotipa mujimu mucena. Mwanarume wo pa muezaniso uwu, waida kuashira ushoni varendo. Iyena aacainga no ciro co kupa murendo waingaya waguma pakati po usiku, asi waida kuita ciri cese kuti amupe zvokuha. Jesu wakananga kuti mwanarume uwu wakabeswa ngo ndava yo kuvangirira kwake. Jesu waida kujijisenyi? Kudari mundhu acikazivi kukwana anokwanisa kubesera shamwari inovangirira, Jehovha Baba wedu vo mugore vanokwanisavo kubesera vaya vanokumbira mujimu mucena ngo kuvangirira! Ngokudaro, tingaita mukumbiro tecithemba kuti Jehovha anozotipa mujimu mucena.—Nduyo 10:17; 66:19.

19. Ngenyi tingava no cokwadi co kuti tinozowina?

¹⁹ Sathana ari kutihwisa basi. Asi ngative no cokwadi co kuti tinozowina. Ngenyi? Ngokuti mujimu mucena unotibesera ngo njira mbiri. Yokutanga, iwona unotipa simba kuti tikwanise kuhwisana no zvineso. Yocipiri, iwona i simba rinotibesera kuti tienderere mberi tecishandira Jehovha mbhera kuguma mu nyika imbza. Ngokudaro, ngatinase kubesereka ngo besero ratinopuwa ngo mujimu mucena!