1-2. (a) Mukuzwirana no VaEfeso 6:16, ngenyi tinodikana kuva no ‘muvhiko wo rutendo’? (b) Tinozobhuisana ngo pamusoro po muvhunjo japi?

IMWIMWI muno “muvhiko wo rutendo” here? (Verenganyi VaEfeso 6:16.) Pacina kukana-kana, munawo. Kudari inga muvhiko waivhikira muviri wo musoca, rutendo unomuvhikiravo pa zviro zvakashata zvo nyika ino. Pakati po zviro zvakashatari, tinowana upombo, zvouphanga no zvese zvinonyenywa ndi Mwari.

² Zvecivoneka kuti tiri kupona mu “njiku jokupejisira,” rutendo wedu unozoenderera mberi uciejwa. (2 Timoti 3:1) Ngokudaro, munodikana kuvona kuti muvhiko wenyu wo rutendo uri pa mugariro wakanaka kana kuti haiwa. Mungazviitisa kudini? Ngozvapi zvingazomubesera kuti munase kungwarira muvhiko wenyu? Ngativone mupinguro wo muvhunjo iji.

3. Masoca aiitenyi no muvhiko wavo zve ngenyi?

³ Mu nguva jo Bhaibheri, masoca aishandisa maningi muvhiko jainga jakadihwa matovo. Masoca aizoja mafuta muvhikojo kuti matovo atame kuvora. Cimwenizve, aiita kuti simbi jakadihwaro, jitame kuita furujhu. Muvhiko pajaigujuka, masoca aijinasirira ngokukasika. Izvo, zvaiita kuti vagare vakanasiririka kuti vaende ku hondo. Muezaniso uu, ungashandavo pa rutendo.

4. Ngenyi munodikana kunasirira muvhiko wenyu wo rutendo zve mungazviitisa kudini?

⁴ Kudari inga masoca o kare, imwimwi munodikana kunasirira muvhiko wenyu no kuungwarira. Izvo zvinoita kuti mugare makanasiririka kuitira hondo yo Cikristu kana kuhwisana no vavengi vedu vanobatanija mujimu yakashata. (VaEfeso 6: 10-12) Kungwarira muvhiko wo rutendo iciro caanodikana kuita mundhu pacake. Mungavisa kudini no cokwadi co kuti makanasiririka kuti mucungirire pa zvineso? Cokutanga, munodikana kukumbira besero kuna Mwari. Perapo, verenganyi Bhaibheri, kuti muvone zviro ngo manera aanozvivona Jehovha. (Vaheberi 4:12) Bhaibheri rinoti: “Gondai Tenji Mwari ngo mwoyo wako wese, ucagonda uzivi hwako.” (Mazwi Akangwara 3:5, 6) Mecirangarira vhesi iji, ceujanyi zvivaringo zvamavha kutema sasambi. Inga muezaniso, muno cineso co kutama mare here? Makamborangarira cigondiso cinowanika pana Vaheberi 13:5, inonangaya kuti: “Andicakuregeri wega nokuti kukusia”? Pamakarangarira cigondiso ici, makathemba kuti Jehovha anozomubesera here? Kudari makazviita, muri kungwarira ushoni muvhiko wenyu wo rutendo.

5. Pamunonga mecisotesesa rutendo hwenyu, zvicinyi kangaije zvamungapfumbura?

⁵ Pamunosotesesa rutendo wenyu, kangaije mungakahamara. Kangaije mungapfumbura kuti muno pari pese pamakarembera. Inga muezaniso, kangaije makavona kuti kuthimwa-thimwa maningi, manyepo no kusuruvara kuri kurembesa rutendo hwenyu. Kudari zviri kuitika na imwimwi, zvicinyi zvamungaita kuti muvangise rutendo hwenyu?

6. Ngokwapi kuthimwa-thimwa kumweni kucikazivi kushata?

⁶ Kuthimwa-thimwa kumweni akuzivi kushata. Inga muezaniso, apana cakashata kudari tikathimwa-thimwa ngo kuda kudakajisa Jehovha na Jesu. (1 VaKorinto 7:32) Patinoita cishaishi cikuru, tino thimwa-thimwa maningi kuti tiitise nani ushamwari hwedu na Mwari. (Nduyo 38:19) Cimwenizve, tinothimwa-thimwa maningi ngo kuda kudakajisa mukaji kana mwamuna wedu no kukorondha mbhuri yedu. Kusiyapo zvondhozvo, tinothimwa-thimwa maningi ngo kugara ushoni ko hama jedu jo Cikristu.—1 VaKorinto 7:33; 2 VaKorinto 11:28.

7. Mukuzwirana na Mazwi Akangwara 29:25, ngenyi atidikani kuthya mundhu?

⁷ Ngo divi rimweni, kuthimwa-thimwa maningi, kungarembesa muvhiko wedu wo rutendo. Inga muezaniso, kangaije tingathimwa-thimwa ngo kuda kuwana zvokuha no nguvo. (Mateu 6:31, 32) Ngokudaro, tingatotanga kubatikana maningi ngo kupsaka zviro zvokunyama. Toguma pa kudisa maningi mare. Kudari tikatendera kuti izvo zviitike, rutendo hwedu kuna Jehovha unotanga kuremba zve ushamwari hwedu naye, unova pa ngozi. (Marco 4:19; 1 Timoti 6:10) Ciro cimweni cingapsasa rutendo hwedu, i kubatikana maningi pa zvinorangarihwa ngo vamweni. Kuthimwa-thimwa kondhoko, kungatiita kuti tithye vandhu kana kuteverehwa kusiyapo kuthya kunyangajisa Jehovha. Kuti tijingwarire pa ngozi iyi, tinodikana kudeketerera Jehovha kuti atipe rutendo no cicunge catinoda kuti tihwisane no cinesoco.—Verenganyi Mazwi Akangwara 29:25; Luka 17:5.

8. Tinodikana kuitenyi patinozwa mundhu acibhuya manyepo?

⁸ Sathana ndi “baba wo unyepi,” zve anoshandisa vandhu vake kuti andhandhanise manyepo ngo pamusoro pa Jehovha pomwe no hama no hambzaji jedu. (Johani 8:44) Inga muezaniso, vapanduki vanobudisa manyepo no kucinja cokwadi ngo pamusoro po sangano ra Jehovha. Kuti vaite zvondhozvo, vanoshandisa saiti jo mu interneti, urongwa hwo mu terevhizau no zvimweni zvinofambisa masoko. Manyepo awo, ari pakati po “mupaxa yese yakabwaka ya Sathana.” (VaEfeso  6:16) Waro, maizodini kudari mundhu akada kubhuya nemwi ngo pamusoro po manyepo ondhoo? Mucamupurukira! Ngenyi? Ngokuti tinothemba Jehovha no hama jedu. Zvokadi kamare, atidikani kushamwarijana no vapanduki. Ngo iyo ndava, mucasiya kuti ciri cese, cimuite kuti mubhuye navo.

9. Kusuruvara kungatiita kuti tijizwe kudini?

⁹ Kusuruvara kungarembesa rutendo hwedu. Atidikani kujivona inga kuti atina zvineso. Zvokadi kamare, kueja kuita zvondhozvo zvaizovoneka inga kutama kujitaja. Asi, atidikani kugara tecirangarira zvineso zvedu nguva jese. Ngenyi? Ngokuti tinozokanganwa vetero inoshamaisa yatinopuwa ndi Jehovha, totanga kusuruvara. (Apokalipsi 21:3, 4) Kusuruvara kungatiita kuti tipere simba zve totoguma pa kuremba. (Mazwi Akangwara 24:10) Waro, tingaitisa kudini kuti zvitame kutiitikira?

10. Majijenyi ngo karata yakatara hambzaji yanangwari?

¹⁰ Vonanyi zvakaitika no imwe hambzaji yo ku Estadhos Unidhus. Iyona yakaramba ino rutendo wakavanga pikija yaikorandha mwamuna wayo waihwaja. Pa karata imweni yo yoyakatumira ku cine ro pasi pese, iyona yakati: “Mugariro wedu nguva jimweni unophandisa musoro zve unosuruvarisa. Asi vetero yedu yakavanga. Tinodakara maningi ngo masoko akawanda atinoashira anovangisa rutendo hwedu zve anotiita kuti tienderere mberi takavanga. Zvokadi kamare, tinoda maningi mbhangiro jondhojo no vangiso. Ijona jinotibesera kuti tienderere mberi tecishandira Jehovha zve tecicungirira muejo jese ja Sathana.” Zvakanangari hambzaji iyi zvinokhombija kuti zvinokwanisika kuhwisana no kusuruvara! Kuitisa kudini? Ceujanyi kuti zvineso zvenyu i muejo ja Sathana. Thembanyi kuti Jehovha anozomupa vangiso yamunoda. Cimwenizve, reremejanyi zvokuha zvoumwari zvamunopuwa ndiyena.

11. Kudari tinoda kuziva dangani rutendo hwedu unoda kuitiswa nani, tinodikana kujiita muvhunjo japi?

¹¹ Mwakwanisa kuvona divi ro rutendo hwenyu ramunodikana kuitisa nani here? Mu mweji japerari, makakwanisa kugara mucikathimwi-thimwi maningi here? Makakwanisa  kuramba kupurukira masoko o vapanduki no kutama kubhuya navo here? Makakwanisa kuhwisana no kusuruvara here? Kudari madavira kuti hina, zvinovonesa kuti rutendo hwenyu uri pa mugariro waushoni. Asi tinodikana kungwarira, ngokuti Sathana anoshandisa murau jimweni kuti atihwise. Ngatende tivone jimwe jakona.

12. Upfumi ungatiita kuti tiitenyi?

¹² Upfumi ungatiphingaija no kutiita kuti titame kungwarira muvhiko wedu wo rutendo. Mupostori Pauro wakati: “Apana mundhu anonghwina mu cikwata co masoca, wojiregera kunghwina mu ndava jimweni, jiciripi jo hondo, kudari anoda kudakarira nduna yaro.” (2 Timoti 2:4) Masoca o Roma aacaitendehwa kungwinira mu zvorutengesehwano. Zvicinyi zvaizoitika kudari musoca naaitama kuteveja zvanangwari apa?

13. Ngenyi musoca aacaingwinira mu zvo kutengeserana?

¹³ Vonanyi izvi basi. Cikwata co masoca capeja mangwanani ese ceciterenari cecishandisa mapanga. Asi musoca umweni aazivi kuwanika kuti aterenari. Iyena ari kubazari acitengesa zvokuha. No usiku masoca anokwanisa kunasirira muvhiko jao no kuroja mapanga avo. Asi musoca wapindaya kotengesa zvokuha, kusiyapo kunasirira muvhiko no kuroja banga rake, ari kunasirira zvaarikuda kutengesa mangwana. Asi, comangwanani fumi, vavengi vanoguma ngo civhumbu kuti vavahwise. Munorangarira kuti musoca wapi anonga wakanasiririka kuti ahwe no kukwanisa kudakajisa mutungamiriri wake? Musoca wapi wamaida kuti ave divi renyu? Wiya wakanasiririka kana kuti wiya waibatikana ngo zvokutengesa?

14. Inga masoca, ngo zvapi zvinodikana kuva zvinosisira maningi kwatiri?

¹⁴ Inga musoca wakanasiririka, atidikani kuphingaijika pa zviro zvatinodikana kudira pa kutanga, kuwana citendehwa co vatungamiriri vedu, Jehovha na Jesu. Kwatiri, izvi zvinosisira maningi kupinda kuwana ciri cese catingapuwa ngo nyika ya Sathana. Tinova no cokwadi cokuti tino nguva no simba  kuti tishandire Jehovha no kungwarira ushoni muvhiko wedu wo rutendo pomwe no mativi amweni o zvijito zvedu zvo umwari.

15. Ngoyapi ngwajo yakapa Pauro zve ngenyi?

¹⁵ Nguva jese tinodikana kungwarira. Ngenyi? Mupostori Pauro wakangwaja vese “vanopsanga uthende” kuti ‘vaizoregera kutenda.’ (1 Timoti 6:9, 10) Magama o kuti ‘vaizoregera kutenda’ anokhombija kuti kudari tikapsakisisa upfumi kana kupsaka zviro zvicikasisiri maningi, tinoguma pa kukangaijika, tova pa muejo wo ‘kuemura bzabiresi no bzakaxata.’ Kusiyapo kutendera kuti zvidisiso izvi zvizaje mwoyo wenyu, ejanyi kuvona kuti izvona i murau wa Sathana kuti arembese rutendo hwenyu.

16. Ndhorovondho yatinoverenga pana Marco 10:17-22, inodikana kutiita kuti tirangarire muvhunjo japi?

¹⁶ Kangaije tino mare yakawanda kuti titenge zviro zvizinji zvatinoda. Kureva kuti zvakashata kutenga zviro zvatinoda asi ticikadi kuzvishandisa here? Azvizivi kushata maningi. Asi rangariranyi ngo pamusoro po muvhunjo iji basi: Pikija ndino mare yakawanda kuti nditenge ciri cese, kureva kuti ndinowana nguva kuti ndicishandise no kucingwarira here? Kureva kuti kudisa upfumi kungandiita kuti ndive inga mujaha wiya, wakarambaya mukoka wa Jesu here? (Verenganyi Marco 10:17-22.)  Pacina kukana-kana, zviri nani kupungura zvatinazvo mu upenyu no kupeja nguva yedu no simba kuti tiite kuda ka Jehovha!

17. Zvicinyi zvaticikadikani kukanganwa?

¹⁷ Atidikani kukanganwa kuti tiri pa hondo. Ngokudaro, njiku jese tinodikana kuva takanasirika kuti tihwe. (Apokalipsi 12:17) Hama no hambzaji jedu ajidikani kuthwara muvhiko wedu wo rutendo. Anodikana kuzviita ndisu tega.

18. Ngenyi masoca o mu nguva jo kare aibatisisa muvhiko wavo?

¹⁸ Mu nguva jokare, musoca waikhombija cicunge pa hondo, waireremejwa maningi. Asi, paaihwirira ku muzi acina muvhiko wake, wainyowejeka maningi. Musumuri wo ndorovondho jo Roma anozwi Tasitu, wakati: “Kudari musoca akasiya muvhiko wake sure, wainyowejeka maningi.” Ndizvona zvaiitisa kuti masoca abatisise muvhiko wavo.

19. Tingabatisisa kudini muvhiko wedu wo rutendo?

¹⁹ Itusu tinodikanavo kubatisisa muvhiko wedu wo rutendo. Kuitisa kudini? Tingazviita ngo kwenda kumusongano nguva jese no kuvhunja vamweni ngo pamusoro po Umambo hwa Mwari. (Vaheberi 10:23-25) Kusiyapo zvondhozvo, tinodikana kuverenga Bhaibheri njiku jese no kuita mukumbiro kuti Jehovha atibesere kushandisa zvatinojija. (2 Timoti 3:16, 17) Tikaita kudaro, muravo ja Sathana ajizotiiti kuti tihwajihwe kwenda no kwenda. (Isaia 54:17) Cimwenizve, ‘muvhiko [wedu] wo rutendo’ unozotivhikira. Tinozoshanda ngo simba no hama no hambzaji jedu. Zve tinozoita zvizinji kupinda kuwina po hondo yedu yo njiku no njiku, tinozova no cidakajiso co kuvona Jesu ecinyisa Sathana no vandhu vake.—Apokalipsi 17:14; 20:10.