1-2. Mukuzwirana na 1 Pedru 4:7, 8, zvicinyi zvinozotibesera kuti tihwisane no mugariro jinonesa?

ITUSU tiri kurarama kumbhiri ko “njiku jokupejisira.” Ngo iyo ndava, tiri kusongana no zvineso zvakawanda. (2 Timoti 3:1) Inga muezaniso, vonanyi zvakaitika ku nyika imweni yo kumavirira ko Afrika. Pakupera kuita fafanya yo vhoto vandhu vakatanga kumukirana. Ngo ndava yazvo, hama no hambzaji jedu jakatambujika ko mweji jinopindirija mutandhatu. Zvicinyi zvakavabesera kuti vahwisane no mugariro uwu? Vamweni vakaenda koofindara ku muzi ko hama ku ndau yakangwaririka. Hama imweni yakananga kudari: “Ndakadara maningi ngo kuva pamwepo no shamwari jangu pa mukuvo wakadari. Takakwanisa kuvangisana umwe no umweni.”

² “Dambujiko guru” parinotanga, tinozodakaravo ngo kuva pamwepo no shamwari jinotida. (Apokalipsi 7:14) Ngokudaro, tese tinodikana kuita zvese zvatinokwanisa kuti tivangise ushamwari hwedu no hama jedu. (Verenganyi 1 Pedru 4:7, 8.) Tingatojija zvakawanda ngo zvakaitika no muporofita Jeremiya. Iyena wakakwanisa kupona pa mugariro unonesa, Jerusarema ricito raparajwa, ngo kubesehwa ngo shamwari jake. * Tingatevejeresa kudini muezaniso wa Jeremiya?

3. (a) Zvicinyi zvaizoita kuti Jeremiya ajiparajanise? (b) Jeremiya waisumurirenyi Bharuki zve ngowapi wakava muviyo wakona?

³ Pa makumarongomuna o makore kana kupindirija, Jeremiya wakararama no vandhu vainga vacizivi kugondeka  kuna Mwari. Pakati pavo vaingepo vocigarisano, kangaije waingepovo ukama hwake hwo kudhorobha raakabarihwa, Anatoti. (Jeremia 11:21; 12:6) Pikija zvakadaro, Jeremiya aazivi kujiparajanisa. Iyena waisumura zvaaisongana nazvo kuna Bharuki, mutari wake wakagondeka. Ngokudaro, wakatisumuriravo ecishandisa Bhaibheri. (Jeremia 8:21; 9:1; 20:14-18; 45:1) Zvingaita kuti Bharuki paaitara zviitiko zvese zvo upenyu hwa Jeremiya, vovaviri vakajijira kuva no rudo pomwe no nderemejo umwe no umweni.—Jeremia 20:1, 2; 26:7-11.

4. Jehovha wakapa basa rapi Jeremiya zve basa iri rakavangisa kudini ushamwari hwake na Bharuki?

⁴ Ko makore akawanda, Jeremiya wakavhunja Vaiziraeri zvaizoitika no Jerusarema. (Jeremia 25:3) Ngokudaro, Jehovha wakapa mukana wo kupejisira vandhu vake kuti vakhauye. Iyena wakakumbira Jeremiya kuti atare pa muphukutu zviziviso zvese zvaainga amuvhunja kuitira vandhu vake. (Jeremia 36:1-4) Jeremiya na Bharuki pavaishanda pamwepo pa basa iri rovakapuwa ndi Mwari, pacina kukana-kana ivona vakava no mabhuyo aivangisa rutendo hwavo.

5. Bharuki wakakhombijisa kudini kuti wainga shamwari yaushoni ya Jeremiya?

⁵ Muphukutu pawakapera kutahwa, Jeremiya wakakumbira shamwari yake Bharuki kuti auverengere vandhu. (Jeremia 36:5, 6) Basa iri rainga recinesa, asi Bharuki wakariita ngo cicunge cese. Munokwanisa kurangarira mazwiro akava na Jeremiya, ngo kuvona Bharuki pa civanje co themberi eciverengera vandhu muphukutu here? (Jeremia 36:8-10) Nduna jo Vajudha jakaziva zvainga zvaitwa ndi Bharuki. Ngokudaro, jakamudanija kuti averenge muphukutuwo ngo izwi guru pamberi pavo. (Jeremia 36:14, 15) Nduna jakasunga kuvhunja Mambo Jowakimu zvainga zvananga Jeremiya. Jecikhombija nderemejo, nduna jakavhunja Bharuki kudari: “Endai kofindara, iwewe na  Jeremia; patame anoziva pomunogara.” (Jeremia 36:16-19) Iyi, yakava ngwajo yaushoni!

6. Jeremiya na Bharuki vakaitenyi mambo Jowakimu paakapisa muphukutu?

⁶ Mambo Jowakimu wakanyangajwa ngo masoko o muphukutu wa Jeremiya. Ngokudaro, iyena wakapisa muphukutuwo wodira Jeremiya na Bharuki mu kadheya. Asi Jeremiya aazivi kuthya. Iyena wakatora muphukutu umweni wopa Bharuki. Jeremiya paaivhunja Bharuki mazwi a Mwari, Bharuki waitara “mazwi ese  . . . ainga akatahwa mu buku rakapiswa ndi Jehoakimu, mambo wo vaJuda.”—Jeremia 36:26-28, 32.

7. Zvicinyi kangaije zvakaitika Jeremiya na Bharuki powakashanda vese?

⁷ Kazinji vandhu pavanohwisana no mugariro unonesa vari pamwepo, vanova no ushwamari hwakavanga. Jeremiya na Bharuki vakashandazve pamwepo kuti vatare muphukutu wainga wapiswa ndi Jowakimu mambo wainga wakashata. Pa mukuvo uu, Jeremiya na Bharuki vakajijira kuvona mugariro jaushoni jovainga najo. Tingajijenyi ngo muezaniso wo kugondeka wa Jeremiya na Bharuki?

8. Ngenyi zvinganesa kuvhunja vamweni mazwiro edu? Asi ngenyi atidikani kuremba?

⁸ Zvinganesa kuvhunja vamweni mazwiro edu kudari aripo mundhu wakatinyangajisa kareko. (Mazwi Akangwara 18:19, 24) Kana kuti tingarangarira kuti tinoda nguva no simba kuti tive no ushamwari wo phedo navo. Pikija zvakadaro, ticadoremba. Kudari tinoda kubesehwa ngo hama jedu panobuda zvineso, tinodikana kujijira kuvathemba wari no kuvavhunja murangariro jedu no mazwiro. Ici i ciro co kutanga cinosisira maningi kuti tive no shamwari jokadi.—1 Pedru 1:22.

9. (a) Jesu wakakhombijisa kudini kuti waigonda shamwari jake? (b) Kuitisa kudini kubhuya ngo pamusoro po murangariro no mazwiro, zvinomubesera kuti ushamwari hwenyu huvange? Ipanyi muezaniso.

⁹ Jesu wakakhombija kuti waigonda shamwari jake ngo kubhuya najo naakasujunuka. (Johani 15:15) Tingatevejera Jesu ngo kuvhunja shamwari jedu zvinotiita kuti tidakare no zvineso zvedu. Patinonga tecibhuya no ariwese, tinodikana kunasa kumupurukira. Patinoita kudaro, tinojijira kuti tino murangariro, mazwiro no zvido zvakafanana. Ngativone muezaniso wo hambzaji Sindi, ino makumaviri na mapfumbamwe o makore. Iyona yakashamwarijana no hambzaji iri piyona, inodanwa Maria Luisa ino makumatandhatu na manomwe o makore. Vovaviri vanocumaera vese ngo mucina mwese comangwanani zve vanobhuya ngo pamusoro po zviro zvakasiyana-siyana. Hambzaji Sindi vakati: “Ndinodakarira kubhuya no shamwari  jangu ngo pamusoro po zviro zvinosisira, ngokuti zvinondibesera kuti ndivazive no kunasa kuvazwisisa.” Pamunobhuya ngo pamusoro po murangariro no mazwiro enyu no shamwari jenyu no kujizwisisa pojinonga jecibhuya, ushamwari hwenyu unonasa kuvanga. Inga hambzaji Sindi, kudari imwimwi mukatanga kubhuya no vamweni, munozovona kuti ushamwari hwenyu hunokura zve hunozovanga maningi.—Mazwi Akangwara 27:9.

10. Mukuzwirana no Mazwi Akangwara 27:17, zvicinyi zvinoitika patinoshanda pamwepo no hama jedu?

¹⁰ Jeremiya na Bharuki vakava shamwari yo cike ndi cikevo pavakashanda vese. Munjira yakafanana, patinoshanda pamwepo no hama jedu, tinokwanisa kuvona mugariro javo jakanaka, tinokwanisazve kujijira zvizinji ngo muezaniso javo. Inga muviyo, rudo hwedu navo, unokura. (Verenganyi Mazwi Akangwara 27:17.) Rangariranyi zvinoitika pamunonga mecicumaera no shamwari yenyu. Wari muri kuvona, shamwari yenyu yecinasa kusanangura cimwe co zviro zvatinotenda, kana yecibhuya ngo pamusoro pa Jehovha no zvigondiso zvake. Munozva kudini? Kangaije rudo hwenyu naye, unokura.

11-12. Kuitisa kudini kucumaera no hama no hambzaji jedu kunovangisa ushamwari hwedu? Ipanyi muezaniso.

¹¹ Vonanyi muezaniso muviri jinovonesa kuti basa ro kucumaera rinovangisa ushamwari. Hambzaji imweni inodanijwa Adherina, ina makumaviri na matatu o makore, yakakumbira shamwari yayo Kamira, kuti vaende vese koshanda ku ndima imweni icizivi kushandwa maningi. Hambzaji Adherina vakananga kudari: “Taida maningi kuvangisira pa kucumaera no kudakarira mushando wedu. Asi, taida kuvangiswa kuti tiite zvese zvatinokwanisa pakushandira kwedu Jehovha.” Kunanga kuti vakabesereka ngo kushanda kwavo vese here? Hambzaji Adherina vakati: “Pakupera ko njiku, taibhuya ngo pamusoro po mazwiro edu, ngo pamusoro po kuvangiswa kwataiithwa ngo mabhuyo otaiva nao mu mushando zve no kuvona ngo phedo Jehovha ecibesera mushando wedu. Mabhuyo otaiitaya, akatibesera maningi. Cimwenizve akaita kuti tinase kuzivana.”

 ¹² Hambzaji jedu mbiri jicikazivi kucadha, Raira na Mariana vanogara ku Fransa, vakapera mabviki mashanu vecicumaera ku Bhangui mu nyika yo República Centro-Africana. Vacibhuya ngo pamusoro po zvaiitika, Hambzaji Raira vakananga kudari: “Inini na hambzaji Mariana takawanana no zvineso zvinganani. Asi, ngo kubhuisana zve no rudo, takanyisa zvinesozvo zve tovangisa ushamwari wedu. Ndakavona kuti hambzaji Mariana vaiita zviro ngo kukasika, vainga no rudo no vandhu vataicumaera zve vaivangisira maningi mu basa ro kucumaera. Zvese izvi, zvaindishamaisa maningi.” Amudikani kwenda nyika imweni kuti mujizwevo kudaro. Mungatoenda koocumaera no hama no hambzaji jo mu ungano yenyu. Mukaita kudaro, munozonasa kuvaziva zve munozova no ushamwari wo phedo naivona.

13. Zvicinyi zvatinovona patinoshanda pamwepo no shamwari jedu?

¹³ Zvicinyi zvatinovona patinoshanda pamwepo no shamwari jedu? Tinokwanisa kuvona mugariro javo jaushoni no kuposa kwavo. Zvicinyi zvingatibesera kuti tihwisane no kuposa kovanoita? Ngativonezve muezaniso waushoni wa Jeremiya. Zvicinyi zvakabesera muporofita uwu kuti avone divi raushoni zve atame kuvona kuposa kwavo?

14. Jeremiya wakajijenyi ngo pamusoro pa Jehovha zve zvakamubeseresa kudini?

¹⁴ Kusiyapo basi kutara bhuku rinotora zina rake, zvinovoneka inga kuti Jeremiya wakataravo bhuku ro Majimambo okutanga no ocipiri. Pacina kukana-kana, basa iri rakakhombija Jeremiya kuti Jehovha ano unyasha no vandhu vacizivi kukwana. Inga muezaniso, Jeremiya waizviziva zvakaita Akhabhi. Pikija wainga wakaita zviro zvizinji zvakashata, Akhabhi wakakhauya. Ngokudaro, Jehovha wakaita kuti iyena atame kuvona kuparajwa ko mbhuri yake pa mukuvo wo kurarama kwake. (1 Majimambo 21:27-29) Cimwenizve, Jeremiya waiziva zvakaita mambo Manasa, ngokunyangajisa kwake Jehovha kupinda Akhabhi. Pikija zvakadaro, Manasa paakakhauya, Jehovha wakamuregerera. (2 Majimambo 21:16, 17; 2 Kronike 33:10-13) Kuziva zviitiko izvi, kwakabesera Jeremiya kuti atevejere Jehovha, ngokuva mundhu anosengerera no anounyasha no shamwari jake.—Nduyo 103:8, 9.

15. Jeremiya wakatevejeresa kudini kusengerera ka Jehovha Bharuki paakaphingaijika?

¹⁵ Rangariranyi kuti Jeremiya wakabeseresa kudini Bharuki. Mu mukuvo umweni, Bharuki wakaphingaijika pakushandira kwake Jehovha. Asi Jeremiya aazivi kuremba kubesera shamwari yake. Acikapoti-poti, iyena wakavhunja Bharuki masoko akavha kuna Jehovha. (Jeremia 45:1-5) Tingajijenyi ngo zvakaitikari na Bharuki?

16. Mukuzwirana na Mazwi Akangwara 17:9, tinodikana kuitenyi kuti tivangise ushamwari hwedu?

¹⁶ Zvokadi kamare, atingaveteri kuti hama no hambzaji jedu jive jakakwana. Ngokudaro, patinoshamwarijana najo, tinodikana kuvangisira kuti ushamwari wondhowo urambe uripo. Kudari shamwari yedu ikashaisha, ticikapoti-poti, tinodikana kuipa mbhangiro inovha mu Bhaibheri. (Nduyo 141:5) Kudari shamwari yedu ikatinyangajisa, tinodikana kuiregerera. Tikapera kuiregerera, tinodikana kuvangisira kuti titame kugara tecinanga zvayakaposaro. (Verenganyi Mazwi Akangwara 17:9.) Mu njiku jino jokunesa, zvinosisira maningi kupsaka kuvona zviro zvaushoni zvinoitwa ngo hama jedu kusiyapo kupsaka zvovanoposa. Tikaita zvondhozvo, tinozovangisa ushamwari hwedu. Dambujiko guru parinozotanga, tinozodikana maningi kubesana.

17. Jeremiya wakakhombijisa kudini kuti i shamwari yokadi mu mukuvo wokunesa?

¹⁷ Jeremiya wakakhombija kuva shamwari yokadi mu mukuvo wo kunesa. Ebhedhe-Mereki, mutungamiriri wo banje, wakabesera kuti Jeremiya atame kufa mu rindi rakazara ngo matope. Ngo ndava yazvo, Ebhedhe-Mereki, waithya kuurawa ngo nduna jo dhorobha. Jeremiya paakazviziva, aazivi kunyarara, ecirangarira kuti shamwari yake yaizokwanisa kujivonera yega. Pikija wainga mu karabhoso, Jeremiya wakaita zvaaikwanisa. Iyena wakatumira shamwari yake Ebhedhe-Mereki, masoko anovangisa akavha kuna Jehovha.—Jeremia 38:7-13; 39:15-18.

18. Mukuzwirana na Mazwi Akangwara 17:17, tinodikana kuitenyi shamwari yedu painosongana no zvineso?

¹⁸ Nyamasi uno, hama no hambzaji jedu, jiri kusongana no zvineso zvakasiyana-siyana. Vazinji vanosongana no ngozi jinoitika jega, jakadari inga zviteke-teke no kuzara ko kumwa. Vamweni vanotambujika ngo ndava yo ngozi jinoitiswa ngo vandhu, jakadari inga hondo no ugandanga. Pazvinoitika zviro zvakadari, vamweni vedu vangakwanisa kutora hama iji kuti vagare najo. Kuveni vamweni vanokwanisa kupa mare kuti vavabesere. Asi, ciro cimwe cingaitwa ndisu tese i kuita mukumbiro kuna Jehovha, kuti abesere hama jedu. Kudari tikazwa kuti hama kana hambzaji iri kuneseka, tingatokonehwa zvokunanga kana zvokuita. Tese tingakwanisa kubesera. Inga muezaniso, tingatopeja nguva yakati kuti navo. Kunasa kuvapurutana pavanonga vecivereketa. Cimwenizve, tingatovaverengera vhesi yo Bhaibheri inovangisa, yatinodakarira. (Isaia 50:4) Cinodiwa maningi pa zvese izvi, i kuva pamwepo no hama jedu.—Verenganyi Mazwi Akangwara 17:17.

19. Ngenyi shamwari jaushoni jatinajo wari, jinozodikana maningi kumbejiyo?

¹⁹ Kuvhira wari, tinodikana kutema civaringo co kuva no ushamwari hwakavanga no hama no hambzaji jedu. Ngenyi? Ngokuti vavengi vedu vanozoeja kushandisa manyepo kana masoko o kunyepa kuti vatiparajanise. Vanozoita kuti titame kuthembana. Asi avazokwanisi. Ivona avazokwanisi kupeja rudo watinawo umwe no umweni. Apana cingakwanisa kupeja ushamwari hwedu. Tinozoenderera mberi tino ushamwari hwakavanga, kwenda no kwenda!