MUSORO WO KUJIJA WO 47
Zvicinyi Zvatinojija mu Bhuku ro Varevhi?
“Matahwa ese anofemehwa ndi Mwari [zve] anobesa.”—2 TIMOTI 3:16.
NDUMBO 98 Matahwa Ese —Akafemehwa ndi Mwari
ZVATICAJIJA *
1-2. Ngenyi Makristu nyamasi uno, anodikana kudakarira bhuku ro Varevhi?
MUPOSTORI Pauro wakaceuja mujaha Timoti kudari: “Matahwa ese anofemehwa ndi Mwari [zve] anobesa.” (2 Timoti 3:16) Izvi zvinobatanijavo bhuku ro Varevhi. Munorivonavo kudini bhuku iri? Vamweni vanonanga kuti irona rinomunda-nda-nda jo mutemo jicikashandizve nyamasi uno. Asi Makristu o cokwadi ano mavonero akasiyana.
2 Bhuku ro Varevhi rakatahwa ko 3.500 o makore akapera. Pikija zvakadaro, Jehovha wakariita kuti riwanike mbhera wari, ‘kuti tirijije.’ (VaRoma 15:4) Bhuku ro Varevhi rinotibesera kuzwisisa murangariro no mazwiro a Jehovha ngo pamusoro po zviro zvakati kuti. Ngokudaro, tinodikana kudakarira kurijija. Zvokadi kamare, pano zvijijo zvakawanda zvatingawana mu bhuku iri. Ngatende tivone zvirongomuna zvazvo.
ZVATINGAITA KUTI TITENDEHWE NDI JEHOVHA
3. Ngenyi kwaiitwa mupiro pa Njiku yo Kupfujura Zvishaishi?
3 Cijijo cokutanga: Tinodikana kutendehwa ndi Jehovha kuti iyena aashire mupiro jedu. Kamwe pa gore, painga no Njiku yo Kupfujura Zvishaishi. Jinja ro Vaiziraeri raiungana zve mupiri mukuru waiita mupiro wo cinyama. Mupiro ijo jaiceukija Vaiziraeri kuti ivona vaidikana kuregerehwa zvishaishi zvavo! Asi, mupiri mukuru acito atora ngazi yo mupiro kuti aende mukati mu ndau Yakacenesesa, iyena waidikana kuita basa rimweni. Zvokadi kamare, basa rondhoro rainga rinosisira maningi kupinda kuregerehwa ko zvishaishi zvo Vaiziraeri.
(Vonanyi ndima 4) *
4. Mukuzwirana na VaLevi 16:12, 13, zvicinyi zvaiitwa ngo mupiri mukuru paaingwina mu ndau Yakacenesesa pavhaza yo kutanga? (Vonanyi pikica yo pakapa.)
4 Verenganyi VaLevi 16:12, 13. Vonanyi basi zvaiitika pa Njiku yo Kupfujura Zvishaishi. Mupiri mukuru waingwina mu themberi. Mukono umwe, waibata cimujiyo cakazara ngo rubani unonuhira. Mukono umweni, waibata ciro co goridhe cino muriro. Iyena waiima pamberi po koritina yaifukija musuvo wo ndau Yakacenesesa. Iyi, yainga vhaza yokutanga pa vhaza ndhatu jaaingwina mu ndau Yakacenesesa pa Njiku yo Kupfujura Zvishaishi. Ngo nderemejo yese, waingwina mu ndau Yakacenesesa, woima pamberi po bhokiso ro citenderano. Pondhopo, waidari inga ari pamberi pa Jehovha Mwari! Pasure pazvo, iyena waitora rubani woudururira pa masimbe aibwaka. Zvondhozvo zvaiita kuti pazike munuhi waushoni, unodakajisa. * Pakupera mukuvo wakati kuti, waihwirirazve mu ndau Yakacenesesa no ngazi yo mupiro wo cishaishi. Vonanyi kuti mupiri mukuru waipisa rubani acito apira ngazi yo mupiro wo cishaishi.
5. Tinojijenyi ngo pamusoro po kushandiswa ko Rubani mu Njiku yo Kupfujura Zvishaishi?
5 Tinojijenyi ngo pamusoro po kushandiswa ko Rubani mu Njiku yo Kupfujura Zvishaishi? Bhaibheri rinonanga kuti, kuna Jehovha, mukumbiro jo vanamati vake vakagondeka, jakadari inga rubani. (Nduyo 141:2; Apokalipsi 5:8) Mucakanganwa kuti mupiri mukuru paaingwina mu ndau Yakacenesesa no rubani, waizviita ngo nderemejo. Mu njira yakafanana, patinoita mukumbiro kuna Jehovha, tinoita ngo nderemejo. Itusu tinobonga maningi Jehovha Musiki wedu ngo kutitenderavo kuti tikhwedere phedo naye, kudari inga mwana anokwedera kuna babake. (Jakobo 4:8) Iyena anotitendera kuti tive shamwari jake! (Nduyo 25:14) Ici, i ciro cakanaka maningi. Ngokudaro, atidi kuita zviri zvese zvingamusuruvarisa.
6. Tingajijenyi kuvhira pa kupiswa kwaiitwa rubani ngo mupiri mukuru acito aita mupiro?
6 Ceukijanyizve kuti mupiri mukuru waidikana kupisa rubani acito aita mupiro. Mu njira iyi, iyena waizova no cokwadi cokuti waitendehwa ndi Mwari pa kuita mupiro. Zvingatijijisenyi izvi? Paainga pasi pano, Jesu waidikana kuita ciro cinosisira maningi. Ciro condhoco caisisira maningi kupinda kuponeswa ko vandhu. Cainga cicinyi? Ngo kugondeka kwake, Jesu wakanasirira gwanja kuti Jehovha aashire mupiro wake. Ngo njira yondhoyo, Jesu wakavonesa kuti kuita zviro mu njira inodiwa ndi Jehovha, zvinobesa maningi. Izvi zvaizojekesa kuno vese kuti matongero a Jehovha, akanaka zve akarungama.
7. Ngenyi zvakaita Jesu, zvakadakajisa maningi Jehovha?
7 Paainga pasi pano, Jesu wainasa kuzwira Jehovha. Jesu aazivi kuregera kujivirira matongero a Babake kunyange aciteverehwa no kuziva kuti waizotambujwa maningi mbhera kufa. (VaFilipi 2:8) Paakawanana no muejo, “wakakhuwisisa no kubuda musoji” eciita mukumbiro kuna Jehovha. (Vaheberi 5:7) Kudeketera kwake, kwakakhombija kuti iyena wainga wakagondeka. Izvo zvakamubesera kuti aenderere mberi ecizwira Jehovha. Kuna Jehovha, mukumbiro jakaita Jesu, jaiita inga munuhi unodakajisa wo rubani. Zvakaita Jesu, zvakadakajisa maningi Jehovha, ngokuti zvakasiya pambhene kuti matongero a Babake, ndiona basi akanaka.
8. Tingatevejeresa kudini muezaniso wa Jesu?
8 Tingatevejeresa kudini muezaniso wa Jesu? Ngo kuita zvese zvatinokwanisa kuti tizwire Jehovha no kuva takagondeka kwaari. Mukasongana no muejo, ngo mwoyo wese itanyi mukumbiro kuna Jehovha, mecikumbira besero kuti muite zvinomudakajisa. Mukaita kudaro, munozovonesa kuti muri kubesera matongero a Jehovha. Cimwenizve, mucadokanganwa kuti Jehovha aazwi mukumbiro jedu kudari teciita zviro zvaanonyenya. Tikaita zvaanoda, mukumbiro jedu jinozodari inga rubani unodakajisa. Ivanyi no cokwadi cokuti kugondeka kwenyu no kuzwira, kunodakajisa maningi Jehovha. —Mazwi Akangwara 27:11.
TINOSHANDIRA JEHOVHA NGOKUTI TINOMUDA ZVE TINODA KUMUBONGESERA
(Vonanyi ndima 9) *
9. Ngenyi Vaiziraeri vaiita mupiro wo kuzwirana?
9 Cijijo cocipiri: Tinoshandira Jehovha ngokuti tinoda kumubongesera. Cijijo ici, cinovoneka pa mupiro wo kuzwirana. Mupiro iji, jainga divi rinosisira maningi pa kunamata kokadi ku Iziraeri yokare. * Bhuku ro Varevhi rinodurujira kuti Muiziraeri waidikana kuita mupiro wo kuzwirana “kuti abonge.” (VaLevi 7:11-13, 16-18) Iyena aacaita mupiro uu ngo kuvangirijwa, asi ngokuti waida kuuita. Wainga mupiro wo kujipira waiitwa ngo Muiziraeri ngokuti waida Mwari wake, Jehovha. Mundhu waiitaya mupiro, vo pa mbhuri yake no vapiri vaiha nyama yakapihwaya. Asi mativi amweni o cinyama aidikana kupihwa Jehovha basi. Mativi api ondhoo?
(Vonanyi ndima 10) *
10. Kuitisa kudini mupiro wo kuzwirana unonangwa pana VaLevi 3:6, 12, 14-16, wakaezana no basa raiita Jesu pa kushandira Jehovha?
10 Cijijo cocitatu: Tinoshandira Jehovha ngokuti tinomuda. Jehovha vaivona mabembhe kuva anosisira maningi pa cinyama. Iyena waivonazve kuti mativi amweni, kubatanijavo shingamo aisisira maningi. (Verenganyi VaLevi 3:6, 12, 14-16.) Ngokudaro, Jehovha waidakara maningi paaivona mu Iziraeri acijipira ega kuti amupe mabembhe no mativi amweni o cinyama. Mu Iziraeri waiita kudaro, waivonesa kuti waida maningi kupa Jehovha zviro zvinosisira maningi zvaainga nazvo. Mukuezanavo, Jesu ngo kuzvipira wakapa Jehovha zvaisisira maningi. Ecindundihwa ngo rudo waainga nawo na Mwari, wakamushandira ngo mwoyo wese. (Johani 14:31) Kuna Jesu kuita zvinoda Mwari cainga cidakajiso cikuru maningi. Iyena waida maningi mutemo ja Mwari. (Nduyo 40:8) Jehovha wakadakara maningi ngo kuvona kujipira kwa Jesu kuti amushandire!
Rudo watinawo na Jehovha unotindundira kuti tiite zvese zvatinokwanisa kuti timushandire (Vonanyi ndima 11-12) *
11. Ngenyi kushandira kwedu Jehovha kwakadari inga mupiro wo kuzwirana zve zvinotiembezeresa kudini?
11 Kushandira kwedu Jehovha kwakadari inga mupiro wo kuzwirana, ngokuti kunokhombija mazwiro edu kwaari. Itusu tinoda kuita zvese zvatinokwanisa kuti tishandire Jehovha, ngokuti tinomuda ngo mwoyo wese. Jehovha anodakara maningi paanovona mamiriyoni o vandhu vacimushandira ngo kuda kwavo ngo kuti vanomuda no kuda mutemo jake. Zvinoembezera kuziva kuti Jehovha anoreremeja zvatinoita no zvinotiitisaro kuti tiite basero. Inga muezaniso, kudari muri musharuka zve amucakwanisi kuita zvese zvomaida kuti mushandire Jehovha, ivanyi no cokwadi cokuti iyena anozvizwisisa. Kangaije muri kujizwa kuti amuripi kuita zvizinji mu basa ra Jehovha asi iyena arikuvona rudo unomudundiraro kuti muite zvamunokwanisaro. Jehovha anodakara ngo kuashira zviya zvamunokwanisa kumupa.
12. Ngoapi ainga mazwiro a Jehovha ngo pamusoro po mupiro wo kuzwirana zve izvo zvinotivangisa kudini?
12 Tinojijenyi ngo mupiro wo kuzwirana? Muriro powaipisa mativi anosisira maningi o cinyama, usi waipinda nyezuru, izvo zvaidakajisa maningi Jehovha. Ngokudaro, kudari murikushandira Jehovha ngo kuda kwenyu zve muri kuita zvese zvamunokwanisa, ivanyi no cokwadi cokuti Jehovha arikudakara. (VaKolosi 3:23) Rangariranyi Jehovha acidakara ngo kumutendera. Azvinenyi dengani munoshanda maningi kana padoko, zvamunoitira Jehovha zvinosisira maningi kwaari zve anozozviceukija kwenda no kwenda.—Mateu 6:20; Vaheberi 6:10.
JEHOVHA ARI KUKOMBORERA SANGANO RAKE
13. Mukuzwirana no VaLevi 9:23, 24, Jehovha wakakhombijisa kudini kuti waitendera vapiri vavhaya kugajwa?
13 Cijijo cocirongomuna: Jehovha ari kukomborera sangano rake pasi pano. Vonanyi zvakaitika mu gore ro 1512 N.V.I.Y, tabherinake poyakaimiswa pa Dundhu ro Sinai. (Exodo 40:17) Mosi wakatungamirira musongano wo kuti Aroni no vana vake vakagajwa kuti vashande inga vapiri. Vaiziraeri vainga vakaungana kuti vavone vapiri vaciita mupiro wavo wo kutanga wo zvinyama. (VaLevi 9:1-5) Jehovha wakakhombijisa kudini kuti waitendera vapiri vavhaya kugajwa? Aroni na Mosi povaikomborera vandhu, Jehovha wakatumira muriro wopisa mupiro wainga pa dandiro.—Verenganyi VaLevi 9:23, 24.
14. Ngenyi kutendera kwakaita pa Jehovha kugajwa ka Aroni no vana vake inga vapiri kunosisira nyamasi uno?
14 Muriro waivhaya kudenga waikhombijenyi? Jehovha wakatumira muriro kuitira kukhombija kuti waitendera Aroni no vana vake. Vaiziraeri povakavona cikhombijo caivonesa kuti vaitendehwa ndi Jehovha, pacina kukana-kana vakazwisisa kuti vaidikana kubeseravo. Ngenyi kutendera kwakaita Jehovha pa kugajwa ka Aroni no vana vake inga vapiri kunosisira nyamasi uno? Ngokuti vapiri mu Iziraeri vaiimirira Jesu Kristu, uwo arikushanda inga mupiri mukuru zve anozova no 144.000 zvo vandhu vacazoshanda inga majimambo no vapiri kumatenga.—Vaheberi 4:14; 8:3-5; 10:1.
Jehovha ari kutungamirira no kukomborera sangano rake. Itusu tinobesera zvese zvarinonanga (Vonanyi ndima 15-17) *
15-16. Ngo zvapi zvinokhombija kuti “muranda wakagondeka no wakangwara” anotendehwa ndi Jehovha?
15 Mu gore ro 1919, Jesu wakagaja cikwata cidoko co hama jakazojwa kuva “muranda wakagondeka no wakangwara.” Muranda uwu, unoimirira basa ro kucumaera no kupa vateveri va Kristu “bzokuha ngo nguva kwayo.” (Mateu 24:45) Kunanga kuti tinokhohwa kuti muranda wakagondeka no wakangwara anotendehwa ndi Jehovha here?
16 Sathana no nyika yake, ari kuita zvese zvaanokwanisa kuti aphingaije basa ro muranda wakagondeka. Ku mavonero o vandhu, muranda wakagondeka aacaizokwanisa kuita zvaakagajwa. Pikija no hondo mbiri jo nyika yese, kuteverehwa, zvineso zvo mare no kutajwa mu njira icikazivi kurungama, muranda wakagondeka arikuenderera mberi acipa zvokuha zvo umwari vateveri va Kristu pasi pano. Rangariranyi ngo pamusoro po kuwanda ko mabhuku atinao nyamasi uno, ao acikapagariswi, anowanika mu ndumi jinopindirija kuita 900. Izvi zvinovonesa pambhene kuti Jehovha arikubesera muranda wakagondeka. Vonanyi cimweni cinovonesa kuti Jehovha ari kukomborera: basa ro kucumaera. Ngo zvokadi kuti masoko akanaka ari kucumaehwa “pasi pese.” (Mateu 24:14) Pacina kukana-kana, Jehovha ari kukomborera sangano rake nyamasi uno.
17. Tingakhombijisa kudini kuti tinobesera sangano riri kushandiswa ndi Jehovha?
17 Zvinosisira maningi kujivhunjisa kudari: ‘Ndinobonga ngo kuva divi ro sangano ra Jehovha here?’ Mu nguva ja Mosi, Jehovha wakatumira muriro kuvha kumatenga kuitira kukhombija kuti waitendera vaingaya vakagajwa. Mukufananavo, Jehovha ari kuvonesa pambhene kuti ari kushandisa sangano rake. Ngokudaro tinodikana kubongesera maningi. (1 VaTesalònika 5:18) Tingakhombijisa kudini kuti tinobesera sangano riri kushandiswa ndi Jehovha? Ngokuteveja ndhungamiro jakacijikira mu Bhaibheri, jatinowana mu mabhuku edu, kumusongano no kumagungano. Mu kuengejera, tingakhombija kubesera kwedu ngo kuita zvese zvatinokwanisa kuti tiite basa rokucumaera no kujijisa.—1 VaKorinto 15:58.
18. Matema civaringo co kuitenyi?
18 Temanyi civaringo co kushandisa zvese zvomajija kuvhira mu bhuku ro Varevhi. Cokutanga, psakanyi kutendehwa ndi Jehovha kuti atendere mupiro jenyu. Cocipiri, shandiranyi Jehovha ngo kuda kumubongesera. Cocitatu, itanyi zvese zvamunokwanisa mu basa ra Jehovha mecindundihwa ngo rudo wamunahwo naye. Cocirongomuna, beseranyi ngo mwoyo wese sangano riri kukomborehwa ndi Jehovha nyamasi uno. Tikaita zvese izvi, tinokhombija kuna Jehovha kuti tinoda cidakajiso co kuva Zvapupu zvake!
NDUMBO 96 Bhuku ra Mwari—Upfumi
^ ndim. 5 Bhuku ro Varevhi rino mutemo jakapa Jehovha ku jinja ro Iziraeri yokare. Inga Makristu, atiripi pasi po mutemo jondhojo, asi jingatijijisa zviro zvakawanda maningi. Pa jijo iyi, tinozovona zvijijo zvirongomuna zvatingajija kuvhira mu bhuku ro Varevhi.
^ ndim. 4 Mu Iziraeri yo kare, rubani waipiswa mu tabherinake, waivoniwa kuva wakacena zve waishandiswa basi pa kunamata Jehovha. (Exodo 30:34-38) Asi, apana zvinotatija kuti Makristu o muzana rokutanga vaishandisa rubani pa kunamata Mwari.
^ ndim. 9 Kuti muwane masoko mazinji ngo pamusoro po mupiro wo kuzwirana, tapota vonanyi Estudo Perspicaz, Vhorume 3, pheji 121.
^ ndim. 54 KUDURUJIHWA KO PIKICA: Pa Njiku yo Kupfujura Zvishaishi, mupiri mukuru wainghwina mu ndau Yakacenesesa, naakabata ciro cino muriro, wodurudira rubani zvoita kuti pazike munuhi waushoni, unodakajisa. Pakupera mukuvo wakati kuti, waihwirirazve mu ndau Yakacenesesa no ngazi yo mupiro wo cishaishi.
^ ndim. 56 KUDURUJIHWA KO PIKICA: Kuitira kukhombija kubongesera ko mbhuri yake kuna Jehovha, mu Iziraeri umwe ari kupa mupiri vhuta kuitira mupiro wo kuzwirana.
^ ndim. 58 KUDURUJIHWA KO PIKICA: Pa mushando wake pasi pano, Jesu wakakhombija rudo wake ngo kuteveja mutemo wa Mwari no kubesera vateveri vake kuti vaite zvakafanana.
^ ndim. 60 KUDURUJIHWA KO PIKICA: Pikija no zvineso zvo uhomi, hambzaji yaamusharuka inopa Jehovha zvese zvainokwanisa ngo kucumaera yecishandisa karata.
^ ndim. 62 KUDURUJIHWA KO PIKICA: Mu mweji wa Fevereiro wo 2019, hama Gerrit Lösch vo Mukhumbi unotonga vakazivisa kubudiswa ko Shanduro yeNyika Itsva mu Ciaremau. Vese vaenga pa musongano uu vakadakara maningi zve vakabongesera. Nyamasi uno, vacumaeri vo Aremanya, inga hambzaji mbiri iji, jiri kudakara maningi ngo kushandisa Bhaibheri riya mu basa ro kucumaera.
