1. Mukuzwirana no Mateu 28:18-20, mupango wapi wakapa Jesu?

JESU, pasure po kumuswa kwake, wakavhunja vajiji vake kuti vaende kosongana ku Garireya. Iyena wainga no ciro caisisira maningi caaida kuti avavhunje. Ngo capi condhoco? I masoko ake aakananga anowanika pana Mateu 28:18-20, Shanduro yeNyika Itsva.—Verenganyi.

2. Muvhunjo japi jatinozovona?

² Mupango wakapa Jesu wokuita vajiji unoshandavo ku umwe nga umwe wo vashandiri va Mwari nyamasi uno. Ngo kudaro, ngatende tivone muvhunjo mutatu jinozwirana no basa ratakapuwa ndi Jesu. Wokutanga, kuti tijijise zvinoda Mwari ku vajiji vapsa, ngo zvapi zvatinodikana kuita? Wocipiri, vacumaeri vese mu ungano vangabeseresa kudini vajiji vo Bhaibheri kuti vaenderere mberi? Wocitatu, tingabeseresa kudini vaya vaima kucumaera kuti vaendezve koita vajiji?

3. Jesu wakanangenyi pa mupango wake?

³ Ndhungamiriro ja Jesu jakajeka. Tinodikana kujijisa vandhu zviro zvaakananga. Asi atidikani kukanganwa ciro cinosisira maningi. Jesu aazivi kunanga kuti: ‘Vajijisenyi zvese bzo ndakamutuma.’ Asi iyena wakati: Vajijisenyi ‘kuteveja zvese bzo ndakamutuma.’ Kuti tishandise ndhungamiriro iji patinoitisa jijo jo Bhaibheri, tinodikana kuvajijisa zvo vanodikana kuita no kuvakhombija manera o zvinoithwa. (Maitiro o Vapostori 8:31) Ngenyi tinodikana kuita izvi?

4. Zvinoda kurevenyi kuteveja mupango? Ipanyi muezaniso.

 ⁴ “Kuteveja” mupango zvinoreva kuuzwira. Tingajijisa kudini mundhu kuti azwire mupango wa Kristu? Muezaniso unotevera unozotibesera kuzwisisa kuti ngo zvapi zvatinodikana kuita. Amborangariranyi mundhu anojijisa cikora co kufambisa karu. Iyena angabeseresa kudini vajiji vake kuti vateveje mutemo jo muzvitaka? Cokutanga, mujijisi anodikana kujijisa vajiji vake mutemo jinodikanwa kutevejwa jo mucitaka. Pikija zvakadaro, kuti ajijise vajiji vake kuzwira mutemo jese iji, iyena anodikana kuita ciro cimweni. Iyena anodikana kupinda no mujiji womupekeja ndhungamiriro paanonga ecieja kufambisa no kueja kushandisa zvaajijiswa kucikora. Tingajijenyi ngo muezaniso uu?

5. (a) Mukuzwirana na Johani 14:15 na 1 Johani 2:3, ngo zvapi zvatinodikana kujijisa vajiji vedu kuti vaite? (b) Ngojapi muezaniso ngo pamsuoro po ndhungamiriro jatingapa vajiji vedu?

⁵ Patinonga tecijija Bhaibheri no vamweni, tinovajijisa zvinoda Mwari kwatiri. Asi tinodikana kuita zvizinji kupinda izvi. Tinodikana kujijisa vajiji vedu vo Bhaibheri kuti vashandise mu upenyu hwavo hwese zvo vanonga vajija. (Verenganyi Johani 14:15; 1 Johani 2:3.) Ngo muezaniso, tingakhombija vajiji vedu manera okushandisa ndhungamiriro jo Bhaibheri pavanonga vari kucikora, kubasa kana mu mabungaijo. Tingavakhombija zviri zvese zvakatiitikira mu upenyu hwedu zvinovonesa kuti kushandisa ndhungamiriro jo Bhaibheri kunotijivirira kana kunotibesera kuti titeme zvivaringo zvaushoni. Patinonga tino mujiji wedu, tingaita mukumbiro kuna Jehovha tecikumbira mujimu mucena kuti uvabesere.—Johani 16:13.

6. Ngo zvapi zvinobatanijwa pakujijisa vamweni kuti vateveje mupango wa Jesu?

⁶ Ngo zvapi zvinobatanijwa pakujijisa vamweni kuti vateveje mupango wa Jesu? Tinodikana kubesera vajiji vedu kuti vave no cido cokuda kuva vajiji. Vajiji vamweni vangathya pavanorangarira ngo basa ro kucumaera. Ngo kudaro tinodikana kuva vanosengerera patinonga tecivabesera kuti vazwisise zvokadi zvo Bhaibheri zvinovangisa rutendo hwavo. Tikaita kudaro cido cavo cinozova cakavanga voda kamare kucumaera. Zvicinyi zvatingaita kuti tibesere vajiji vedu kuti vave no cido co kucumaera masoko akanaka?

7. Tingabeseresa kudini mujiji wedu kuti adakarire kucumaera masoko akanaka?

⁷ Tingavhunjisa vajiji vedu vo Bhaibheri kudari: “Ngo zvapi zvacinja mu upenyu hwenyu ngo kushandisa zvamuri kujija kuvhira mu Bhaibheri? Waro mungavona kuti vamweni vangadavo kuzwa masoko aya? Mungaitenyi kuti muvabesere?” (Mazwi Akangwara 3:27; Mateu 9:37, 38) Khombijanyi mujiji wenyu taratadho jo kujijisa jinovha mu Bhokiso redu Rokujijisa, perapo siyanyi mujiji wenyu kuti asane zvaizodakarihwa ngo ukama hwake, shamwari kana vaanoshanda navo kubasa. Pekejanyi mujiji wenyu mataratadho akawanda. Mujijisenyi manera aangashandisa ngo njira kwayo kuti apekeje vamweni taratadhojo. Zvokadi kamare, mujiji wedu paanova mucumaeri acikazivi kubhabhatijwa, tinodikana kucumaera naye kuti timubesere.—Mucumaeri 4:9, 10; Luka 6:40.

8. Ngenyi zvinosisira kuti vajiji vedu vave no rudo hwakavanga kuna Mwari no kuno vadoni vavo? (Vonanyi bhokiso rinoti:  “Tingabeseresa Kudini Vajiji Vedu vo Bhaibheri Kuti Vade Maningi Mwari.”)

⁸ Ceujanyi kuti Jesu wakatipa mupango wo kujijisa vamweni kuti ‘vateveje zvese zvaakananga.’ Izvi zvinobatanija mupango muviri mukuru wokuda Mwari no kuda mudoni wedu.  Zvo zviviri zvinobatana kamare no basa ro kucumaera no kuita vajiji. (Mateu 22:37-39) Zvakabatana papi? Thangwe guru rinotiita kuti tide kucumaera irudo, rudo hwatinahwo kuna Mwari no kuno vadoni vedu. Zvinozwisisika kuti, vajiji vamweni vo Bhaibheri vangathya pavanorangarira ngo kwenda kocumaera. Asi itusu tingavangisa vajiji vondhovo kuti, ngo besero ra Jehovha padoko ngo padoko ivona vanozokwanisa kunyisa kuthya vandhu. (Nduyo 18:1-3; Mazwi Akangwara 29:25) Bhokiso rakabatana no musoro uwu, rinosanangura manera atingabesera mujiji wedu kuti aenderere mberi ecida Mwari. Mukuengejera, ungano ingaitenyi kuti ibesere mujiji mupsa kuti akhombije maningi rudo?

9. Pa muezaniso wo mundhu ari kujijisa kufambisa karu, mujiji angakwanisa kujijira ngo njira japi?

⁹ Rangariranyizve ngo muezaniso wo mundhu ari kujija kufambisa karu. Iyena anonga ecifambisa karu no mujijisi wake pamutivi. Waro mujiji uu angakwanisa kujijira ngo njira japi? Ngo kupurukira zvinonanga mujijisi wake no kuvona zvinonga zveciithwa ngo vafambisi vamweni. Inga muezaniso, mujijisi angamukhombija mufambisi anonga ecitendera umwenivo kuti adarike hake. Kana mujijisi angakhombija mufambisi umweni wathuruja rujhu jake kuti vamweni vanonga vecifamba ngo karu javo vakwanise kuvona, ovhunjavo mujiji wake kuti aitevo zvakafanana. Muezaniso iji, jinojijisa mujiji zviro zvinosisira maningi zvaangashandisa paanonga ecifambisa karu.

10. Zvicinyi zvingabesera mujiji wo Bhaibheri kuti aenderere mberi mu divi ro umwari?

¹⁰ Mukuezanavo, mujiji wo Bhaibheri ari kutanga kufamba mu gwanja ro upenyu, kusiapo kujija basi kuvha ku mujijisi wake iyena angajijavo ngo muezaniso jo vashandiri vamweni vakagondeka va Jehovha. Asi zvicinyi zvingabesera mujiji wo Bhaibheri kuti aenderere mberi mu divi ro umwari? Kuenda ku musongano. Ngenyi? Ngo kuti zvaanozwa ku musongano zvinozomubesera kuti ajije zvizinji, avangise rutendo no kumubesera kuti aengejere rudo hwake kuna Mwari. (Maitiro o Vapostori 15:30-32) Cimwenizve, pa musongano mujijisi wo Bhaibheri angabesera mujiji wake kuti azivane no hama no hambzaji jakacungirira zvineso zvakafanana no zvaari kusongana nazvo. Mujiji anozovona muezaniso jakanaka jo hama no hambzaji jinokhombija rudo mu ungano. Vonanyi basi muezaniso jinoteverari.

11. Mujiji angavona muezaniso japi mu ungano zve jingamupsasisa kudini?

¹¹ Mugariro wokutanga, amborangariranyi umwe mujiji wo Bhaibheri anorera ega vana. Anovona hambzaji yo Cikristu ino mugariro wakaezana naiyena. Paanovona ndhamburiko inoita hambzaji iyi kuti iviye ku Nyumba yo Umambo no vana vayo, zvinomupsasa maningi mwoyo. Mugariro umweni nga uwu, amborangariranyi mujiji ari kueja kusiya kubhema woziva hama yakakwanisa kusiya kubhema. Hama iyi inovhunja mujiji uwu, kuti rudo hwayo kuna Jehovha hwakaiita kuti izwire ndhungamiriro ja Mwari. (2 VaKorinto 7:1; VaFilipi 4:13) Hama iyi payakapera kuvhunja mujiji manera ayokasiya kubhema, iyona yonanga kuti: “Imwimwi mungakwanisavo kusiya kubhema.” Kuzwa zvakaitikari no hama iyi, zvinovangisa maningi mujiji uwu. Wari, ecimborangariranyi musikane umweni ari mujiji wo Bhaibheri ecivona hambzaji yo musikane yecidakara ngo kuva kwayo Capupu ca Jehovha. Zvinovoniwari ngo mujiji wo Bhaibheri ku hambzaji iri musikane, zvinomuita kuti ade kujija zvizinji ngo pamusoro po kuti ngenyi iyena wakadakara.

12. Ngenyi tingananga kuti umwe nga umwe mu ungano anobasa ro kubesera vajiji vo Bhaibheri?

¹² Vajiji vo Bhaibheri pavanoguma pakuziva  hama no hambzaji jakagondeka, ivona vanojija ngo muezaniso javo kuti zvinorevenyi kuteveja mupango wa Kristu, wo kuda Mwari no mudoni. (Johani 13:35; 1 Timoti 4:12) Inga zvatapera kuvona, mujiji wo Bhaibheri angajija ngo muezaniso jo hama jakasongana no mugariro wakafanana no waari kusongana nawo. Kuvhira ku muezaniso jondhojo, iyena angazovona kuti angakwanisa kuita cinjo kuti ave mujiji wa Kristu. (Deuteronòmio 30:11) Umwe nga umwe mu ungano, angabesera ngo njira jakasiyana kuti mujiji wo Bhaibheri aenderere mberi. (Mateu 5:16) Ngo zvapi zvamunoita kuti muvangise vajiji vo Bhaibheri vanoviya ku musongano?

13-14. Jesu wakatajisa kudini vapostori vake vainga vakacamwa?

¹³ Tinoda kuti hama no hambzaji jasiyaya kuita basa ro kucumaera kuti vaendezve kocumaera no kuita vajiji. Matajire akaita Jesu vapostori vainga vakacamwa anokhombija zvatinodikana kuita nyamasi uno.

¹⁴ Pakupejisira ko mushando wa Jesu pasi pano acito auraiwa, vapostori “vese vakamusia, votiza.” (Marco 14:50; Johani 16:32) Jesu wakaitenyi pa nguva yondhoyo apo vapostori vake vainga vakacamwa? No papera mukuvo mushoma Jesu naamuswa, wakavhunja vateveri vake kudari: “Endanyi mozivisa hama jangu [kuti inini ndamuswa].” (Mateu 28:10a) Jesu aazivi kusiya vapostori vake. Pikija ivona vakamusiya, iyena wakaenderera mberi ecivadanija ‘hama jake.’ Inga ndi Jehovha, Jesu wainga no unyasha zve wairegerera.—2 Majimambo 13:23.

15. Tinovona kudini ngavaya vakaima kuenda kocumaera?

¹⁵ Itusu tinoneseka maningi ngavaya vakaima kuenda kocumaera, ivona i hama jedu no hambzaji zvokuti tinovada! Itusu ticaceuja kushanda ngo simba kwaiita hama no hambzaji iji kuitira Jehovha. Vamweni vavo vakatoshanda makore akawanda. (Vaheberi 6:10) Zvokadi kamare, tino cidaka-daka co kubuda navo mubasa rokucumaera. (Luka 15:4-7) Waro mukutevejera Jesu, mu njira japi jatinokhombija kuti tinoneseka ndivona?

16. Tingakhombijisa kudini kuti tinoneseka nga vaya vakaima kuviya kumusongano?

¹⁶ Vakokenyi kuti vaviye kumusongano. Jesu wakavangisa vapostori vake vainga vakacamwa ngo kuvakoka kuti vaende vese ku musongano. (Mateu 28:10b; 1 VaKorinto 15:6) Mukuezanavo nyamasi uno, tinodikana kuvangisa vaya vakaimaya kuviya kumusongano, kuti vaviye kumusongano. Kangaije tingatodikana kuvakoka vhaza jakawanda kuti vaviye kumusongano. Pacina kukana-kana, Jesu wakadakara maningi vajiji vake povakaashira mukoka wake.—Ezanisanyi na Mateu 28:16 na Luka 15:6.

17. Zvicinyi zvatinodikana kuita patinovona mundhu aacaiviya ku musongano wotangazve kuviya?

¹⁷ Vaashirenyi ngo mwoyo wese. Jesu wakaita kuti vajiji vake vajizwe ushoni povakasongana naye. Ndiyena wakatanga kubhuya navo. (Mateu 28:18) Zvicinyi zvatinoita patinovona mundhu aacaiviya kumusongano wotangazve kuviya? Tinodikana kumuashira ngo mwoyo wese. Pakutanga itusu tingathya ngo kutama kuziva zvokunanga. Asi kuti titame kumusiya no nyowa tingananga hedu kuti, tadakara maningi ngo kumuvona.

18. Tingavangisa kudini vaya vakaima kucumaera?

¹⁸ Vavangisenyi. Vajiji va Jesu kangaije vaizvivona kuti avacaikwanisa kucumaera mu nyika yese. Jesu wakavangisa vajiji ngo kunanga kudari: “Zivanyivo kuti ndinemwi njiku jese.” (Mateu 28:20) Kunanga kuti izvi zvakabesera  vajiji vake here? Hina. Nowapera mukuvo mushoma novakatanga basa iri, ivona vainga vakabatikana ngo “kujijisa no kutokotesa” masoko akanaka. (Maitiro o Vapostori 5:42) Vaya vaima kucumaera vanodavo kuvangiswa. Ivona vangathya kutangazve nga papsa basa ro kucumaera. Itusu tingavavangisa kuti ivona avazoiti basa iri vari voga. Pavanonga vakanasiririka, itusu tingaenda navo kocumaera. Ivona vanozodakara maningi ngo kuvabesera kwedu pakwendazve kocumaera nga papsa. Patinovavona no kuvataja inga hama no hambzaji jedu, ivona vanotangazve kuvangisira zve ungano yese inodakara.

19. Ngocapi cisungo catinaco zve ngenyi?

¹⁹ Basa redu ro kucumaera no ro kuita vajiji rinopera rini? Mbhera kupera ko nyika ino yakashata. (Mateu 28:20) Waro, kunanga kuti tinokwanisa kuita basa ro kucumaera no kujijisa mbhera pa mukuvo wondhowo? Itusu takasunga kuita zvondhozvo! Tinodakara ngo kupeja nguva, simba no mare yedu kuti tiwane vaya vano ‘cido cakanaka co kuva no upenyu ucikaperi.’ (Maitiro o Vapostori 13:48, Shanduro yeNyika Itsva) Patinoita izvi, tinonga tecitevejera muezaniso wa Jesu. Iyena wakati: “Bzokuha bzangu, kuita kuda kwa wiya wakanditumaya no kupeja basa rake.” (Johani 4:34; 17:4) Ici cinodikanavo kuva cisungo cedu. Itusu tinoda kupejisa basa rotakapuwa kuita. (Johani 20:21) Itusu tinoda vamweni, kubatanijavo vaya vakaima kwenda kocumaera no kuviya kumusongano, kuti vacungirire na itusu pa kuita basa iri.—Mateu 24:13.

20. Mukuzwirana no VaFilipi 4:13, ngenyi tingakwanisa kupeja basa ro takapuwa ndi Jesu kuti tiite?

²⁰ Azvizivi kureruka kuita zvotakavhunjwa ndi Jesu. Pikija zvakadaro, atiripi toga pa basa iri. Jesu wakagondesa kuti waizova na itusu. Patinoita vajiji tinonga tiri “vabeseri va Mwari” pamwepo na Jesu Kristu. (1 VaKorinto 3:9; 2 VaKorinto 2:17) Ngokudaro, tingakwanisa kupeja basa iri. Zvinodakajisa maningi kubatikana pa basa iri no kubesera vamweni kuti vaitevo kudaro!—Verenganyi VaFilipi 4:13.