Ndakabahwa mu gore ro 1983. Mu makore okutanga o upenyu hwangu ndaivoneka inga mwana ano uhomi hwakanaka, asi pandakava no gumi ro makore ndakatanga kuhwajihwa muviri wangu wese. No papera makore maviri, ndakaeja kumuka njiku imweni, asi andicaikwanisa kumuka. Ndakaita zvese zvandaikwanisa kuti ndimuse mukumbo jangu, asi andicaengepi no simba ro kujimusa. Kuvhira njiku yondhoyo andizivi kukwanisa kufambazve. Ndhendha yangu yakandiita kuti nditamezve kukura. Nyamasi uno, ndakandofupika inga mwana mudoko.

Ndakapeja mweji munganani ndakajifungira pa muzi, mbhera Zvapupu zva Jehovha zviviri zvakaviya kondivhakacira. Vandhu pavaiviya kovhakacira pa muzi pedu kazinji ndaieja kufindara, asi pa njiku iyi ndakasiya kuti mwanakaji wiya abhuye na inini. Povainga vecibhuya ngo pamusoro po Paradhiso, ndakaceuja zvondakazwa kare, ko makore mashanu. Pa mukuvo wondhowo, misionario umweni anodanwa Jethro, waigara Suriname, wakaviya kovhakacira ndharaundha yedu ko mweji umwe zve wakatanga kujija Bhaibheri na babangu. Jethro wakanasa kunditaja. Ngo kudaro, ndakamudakarira maningi. Cimwenizve, cekuru wangu vainditora kuti ndiende navo ku musongano wo Zvapupu zva Jehovha waiitwa mu ndharaundhemo. Ngokudaro, Florence, mwanakaji wakandivhakaciraya njiku iya, paakandivhunjisa dangani ndinoda kujija Bhaibheri, ndakananga kuti ndinoda.

Hambzaji Florence vakaviyazve no mwamuna wavo, hama Justus, votanga kujija na inini Bhaibheri. Ivona povakavona kuti andicaikwanisa kuverenga, vakandijijisa. No papera mweji mushoma, ndakakwanisa kuverenga ndoga. Njiku imweni, varovorani ava, vakandivhunja kuti ivona vainga vagajwa kuti vaende koshandira ku Suriname. Zvinosuruvarisa ngo zvokuti, akucaiengepizve no mundhu umweni ku Orealla waizoenderera mberi ecijija Bhaibheri na inini. Asi zvinodakajisa ngo zvokuti, Jehovha aazivi kundikanganwa.

No papera mukuvo mushoma, piyona umwe anodanwa Floyd wakaviya koshandira ku Orealla zve wakabhuya na inini paaicumaera muzi ngo muzi. Paakabhuya na inini ngo pamusoro po kujija Bhaibheri, ndakaseka. Iyena wakavhunjisa kudari: “Uri kusekenyi?” Ndakamuvhunja kuti ndapeja kujija bhurushura Mwari Anodenyi Kuna Itusu? zve ndainga ndakatanga kujija bhuku Zivo Inotungamirira Kuupenyu Husingaperi. * Ndakamusanangurira kuti ngenyi andiciripi kujijazve. Hama Floyd vakapejisa kujija na inini bhuku iri, asi perapo vakaenda koshandira kumweni. Ndakasarazve ndicina mujijisi wo Bhaibheri.

 Asi mu gore ro 2004, hama Granville na hama Joshua, mapiyona maviri anosisira, vakagajwa kuti vashandire ku Orealla. Ivona vakabhuya na inini povainga vecicumaera muzi ngo muzi. Povakandivhunjisa dangani ndinoda kujija Bhaibheri, ndakaseka. Ndakavakumbira kuti titangezve kujija bhuku Zivo Inotungamirira Kuupenyu Husingaperi. Ndaida kuvona dangani ivona vaizondijijisa zviro zvakafanana no zvandakajijiswaya. Hama Granville vakandivhunja kuti musongano jainga jeciitwa mu ndharaundha yondaigararo. Ndaida kwenda ku musongano, asi ndainga ndicikabudi pa muzi ko gumi ro makore. Ngokudaro, hama Granville vakaviya ku muziyo vondidira pa kadera yo marodha, voenda na inini ku musongano.

Pa kupera mukuvo wakati kuti, hama Granville vakandivangisa kuti ndiite mativi pa Cikora co Mushando wo Umwari. Ivona vakati: “Iwewe uri cigono, asi unokwanisa kuvereketa. Njiku imweni iwewe unozoita hurukuru yo vese. Izvi zvinoitika.” Izvo zvakandivangisa kamare.

Ndakatanga kucumaera na hama Granville. Asi makwanja mazinji o ndharaundha iyi, aacaiengepi aushoni kuti kadera yo marodha ifambe. Ngokudaro, ndakakumbira kuti hama Granville vandidire mu bhara kuti tiende kocumaera. Izvi zvakashanda kamare. Mu mweji wa Abril wo 2005, ndakabhabhatijwa. Pondakapera kubhabhatijwa, hama jakandijijisa kuti ndiite basa ro kuvonerera mabhuku no kushanda no mucini wo kuengejera izwi.

Zvinosuruvarisa ngo zvo kuti mu gore ro 2007 baba wangu vakatamika, povakawira mu jombe wocejwa ngo vhintuwinya yo shati. Izvo zvakaita kuti ukama hwangu usuruvare maningi. Hama Granville vakaita mukumbiro na itusu, votiembezera ngo kutiverengera mavhesi o Bhaibheri. No papera makore maviri, takasonganazve no cineso cimweni cinosuruvaja maningi, hama Granville vakatamika ngo kundondomera mu jombe.

Ungano yedu yainga icinazve vakuru zve yainga yasara no mubeseri umwe basi wo ungano. Ndakasuruvara maningi ngokuti shamwari yangu yandaida, Granville, yainga yatamika. Iyona yaindibesera kuti ndive no ushamwari waushoni na Jehovha no kundibesera kuti ndive no zviro zvimweni zvo kunyama. Pa musongano wakatevera pasure po kufa kwavo, ndakagajwa kuti ndiverenge ndima jo Jijo yo Murindiri. Ndakakwanisa kuverenga ndima mbiri basi, asi pa ndima jimweni jakazotevera ndakatanga kucema zve musoji jangu jaindobuda basi. Ndakatodikana kubuda kamare pa tiribhuna.

Ndakatanga kujizwa ushoni hama jo ungano imweni pojakaviya kotibesera. Cimwenizve, bheteri rakatumira hama Kojo, piyona umweni anosisira. Ndakadakajihwa maningi ngo kuvona mai wangu no hama yangu vecitanga kujija Bhaibheri, voguma pa kubhabhatijwa. Perapo, mu mweji wa Março wo 2015, ndakagajwa inga mubeseri wo ungano. Pa kufamba ko nguva, ndakaita hurukuru yangu yo kutanga. Pa njiku yondhoyo, ndakadakara no musoji pa dama, ndoceukija zvondakavhunjwa ndi hama Granville pa makore akapera, povakati: “Njiku imweni unozoita hurukuru ya vese. Izvi zvinozoitika.”

Mu urongwa hwo JW Broadcasting^®, ndakakwanisa kuvona Zvapupu zvimweni zvino mugariro wakafanana no wangu. Pikija no zvineso zvavo, vanokwanisa kuita zvizinji no vakadakara. Inini ndingakwanisavo kuita zvizinji. Cido cangu cainga co kuda kuita zvizinji pa kushandira Jehovha. Ngokudaro, ndakatanga kushanda inga piyona wo nguva jese. Mu mweji wa Setembro wo 2019, ndakaashira masoko ondicaivetera! Mu mweji wondhowo, zvakaziviswa kuti ndainga ndakagajwa inga mukuru wo ungano ino vacumaeri vanokwana kuita 40.

Ndinobonga maningi hama no hambzaji jese jakandibesera kuti ndijije Bhaibheri no kundibesera kuti ndishandire Jehovha. Kusiyapo zvese izvo, ndinobonga maningi Jehovha ngokuti aazivi kundikanganwa.