HAMA NO hambzaji zinji jo kuti kare jakasiya nyika jo vakabarihwa kuti jiende koshanda ku nyika jimweni kuti jiwane mare, wari vari kuhwirira ku nyika javo. Vecindundihwa ngo rudo wo vanao kuna Jehovha no ku vadoni vavo, ivona vakathutha kuti vaende ku ndau ino vacumaeri vashoma. (Mateu 22:37-39) Waro ngozvapi zvavakadikana kusiya sure zve Jehovha wakavakomboreresa kudini? Kuti tinase kuzwisisa ngatende tivone zvakaitika ku Kamaroni nyika inowanika kumavirira ko Afrika.

Mu gore ro 1998, hama imweni inodanwa Onésime, yakavha ku nyika yayo Kamaroni kwenda ku nyika imweni. Yakapeja makore anokwana kuita 14 yecipona ku nyika imweni. Pa njiku imweni, musongano pawainga weciitwa, iyona yakazwa muezaniso ngo pamusoro po basa ro kucumaera. Muiti wo hurukuru wakati: “Kudari shamwari mbiri jiri kuveja pa ndau yakasiyana zve umweni wobata hove jakawanda kupinda umweni, kunanga kuti shamwari iyi, iciripi wari kubata maningi hove aicaizoenda kunaya shamwari yayo here?”

Muezaniso uwu, wakaita kuti hama Onésime varangarire ngo pamusoro po kuhwirira Kamaroni, kuno vandhu vazinji vanoda kujija Bhaibheri. Asi ivona vaineseka. Kunanga kuti ivona vaizokwanisa kurovejanazve no mugariro wo nyika iyi, pasure po kupeja makore ese aya vecipona ku nyika imweni here? Kuti vazvivone dangani vanokwanisa kana kuti haiwa, hama Onésime vakaenda kovhakacira Kamaroni ko mweji mutandhatu. Mu gore ro 2012 ivona vakatohwirira kamare kogara kondhoyo.

Hama Onésime vakati: “Ndakadikana kurovejana no mugariro wo kupisa pomwe no maponero aiitwa kondhoyo. Mu nyumba yo umambo ndaidikana kugarira mabhanko aihwajisa muviri.” Vecinyemwerera ivona vakati: “Asi pikija zvakadaro ndaikwanisa kuzwa urongwa hwese hwaiitwaro. Padoko ngo padoko ndakakwanisa kukanganwa mabhanko aushoni ondaigariraya mu Nyumba yo Umambo imweni.”

Mu gore ro 2013, hama Onésime vakacadha na hambzaji Géraldine, avo vainga vahwiriravo Kamaroni pasure po kupeja makore mapfumbamwe vecigara Fransa. Ngoapi makomborero akaashira varovorani ava ngo kubatisisa kwavo zviro zvo umwari? Hama Onésime vakati: “Inga varovorani, takaenda ku Cikora co Vavhangeri vo Umambo no kushanda pa Bheteri. Pa gore rimwe basi, vajiji vo Bhaibheri vo mu ungano yedu vanokwana kuita 20 vakabhabhatijwa. Ndakajizwa kamare kuti wari ndaapa ndau kwayo kuti ‘nditande.’” (Marco 1:17, 18) Hambzaji Géraldine vakaengejera vaciti: “Ndakava no makomborero akawanda maningi ondacairangarira.”

Hambzaji Judith vakathutha kwenda ku Estadhus Unidhus kuti vaengejere basa ravo ro kucumaera. Ivona vakananga kudari: “Pa vhaza jese jondaienda kovhakacira mbhuri yangu ku Kamaroni, pandainda kuhwirira ku Estadhus Unidhus ndaindocema basi ngokuti ndainga ndasiya sure jijo jese jo Bhaibheri jondainga ndatanga pa mukuvo uwu.” Pikica zvakadaro, hambzaji Judith vaindothya basi kuhwirira Kamaroni. Ku Estadhus Unidhus ivona vainga no basa raushoni raivapa mare yakawanda kuti vakwanise kubesera baba wavo ku Kamaroni. Asi ivona  vakathemba Jehovha, vohwirira Kamaroni. Ivona vakagumira pa kunanga kuti vaigara vecirangarira zviro zvovainga nazvo ku Estadhus Unidhus. Ngokudaro, vakaita mukumbiro kuna Jehovha kuti avabesere kucinja murangariro wavo. Vakabeserekazve ngo vangiso yovakaashira kuvha ku muvonereri wo ndharaundha no mukaji wake.

Hambzaji Judith pavanorangarira manera ainga zviro povakahwirira Kamaroni, ivona vakati: “Pa makore matatu basi ndakakwanisa kubesera vandhu varongomuna kuti vabhabhatijwe.” Hambzaji Judith vakatanga kushanda inga piyona anosisira. Nyamasi uno, ivona vanoshanda no mwamuna wavo, hama Sam-Castel, mu basa ro kuvhakacira ungano. Waro zvicinyi zvakaitika na Baba wa hambzaji Judith? Ivona no mbhuri yavo vakakwanisa kuwana cipitari ku nyika imweni caizokwanisa kuita peresau yaidikana kuitwa baba wavo, vacikapagari ciri cese. Zvinodakajisa ngo zvokuti, peresau iyi yakabuda ushoni kamare.

Hama inodanijwa Victor yakathutha kwenda Kanadhaa. Pakupera kuverenga Murindiri waibhuya ngo pamusoro po jijo yakakhwirira, ivona vakarangarira maningi ngo pamusoro po kujija kovaiita. Ivona vakasiya kujija ku univhersidhadhi, votanga kuita kurusu yo mukuvo mushomani. Ivona vakati: “Izvo zvakandibesera kuti ndiwane basa ngo kukasika no kuita ciro candaida maningi, kushanda inga piyona.” Pakupera mukuvo wakati kuti, hama Victor vakacadha na hambzaji Caroline perapo vakaenda kovhakacira Kamaroni. Kondhoyo, povainga vecivhakacira bheteri, vakavangiswa kuti kudari zvecikwanisika vaende koshandira ku Kamaroni. Hama victor vakati: “Aticaengepi no mathangwe o kuramba, zvecivoneka kuti tainga takapungura zvimweni mu upenyu, itusu takatendera mukoka uwu.” Pikija hambzaji Caroline vainga no zvineso zvo uhomi, vakatema civaringo co kuhwirira Kamaroni.

Hama Victor na hambzaji Caroline, vakatanga kushanda inga mapiyona o nguva jese kuti vabesere vandhu vese vovaisongana navo kuti vajije Bhaibheri. Kuti vaite zvondhozvo, ivona vakadikana kuviga mare kuti vakwanisa kutanga basa iri. Pakupeja mweji munganani vecishanda Kanadhaa, vakakwanisa kuhwirira Kamaroni no kwenderera mberi vecishanda inga mapiyona. Ngoapi makomborero ovakaashira? Ivona vakaenda ku Cikora co Vavhangeri vo Umambo, voshanda inga mapiyona anosisira zve wari vari kubesera basa ro kuvaka. Hama Victor vakati: “Kusiya nyumba yedu yaushoni, toenda koshandira ku Kamaroni zvakatiita kuti tivone besero ra Jehovha.”

Mu gore ro 2002, hama Alain avo vaijija ku univhersidhadhe yo Aremanya, vakaverenga taratadho yainga no musoro waiti, Majaha—Mucaitenyi mu Upenyu Hwenyu? Masoko ovakaverenga akavaita kuti vagaje zvido zvipsa mu upenyu hwavo. Mu gore ro 2006, ivona vakakokwa kuti vaende ku Cikora co Rovejo yo Mushando zve vogajwa kwenda Kamaroni nyika yo vakabarihwa.

Ku Kamaroni, hama Alain vakawana basa raizovabesera kuti vashande nguva nganani. Perapo, vakazowana basa raivapa mare yakawanda, asi vaineseka dangani vaizokwanisa kuva no nguva yo kukwanisa kwenda kocumaera no kujijisa vamweni inga zvovaiita kare. Ngokudaro, povakakokwa kuti vashande inga piyona anosisira, ivona vakatendera mukoka uwu. Patarau wavo wakavavhunja kuti waizovapa mare yakawanda, asi hama Alain vakabatisisa cisungo cavo co kuda kushanda inga piyona anosisira. Pakupera mukuvo wakati kuti, hama Alain vakacadha na hambzaji Stéphanie, vaimbogara Fransa ko makore manganani. Waro, ngozvapi zvineso zvakasongana na hambzaji Stéphanie povakathutha kwenda Kamaroni?

Hambzaji Stéphanie vakati: “Ngo ndava yo zvokuha, kupisa pomwe no maponero aiitwa mu  nyikemo, zvakandiita kuti ndive no zvineso zvo uhomi. Asi ndinobonga maningi Jehovha no sangano rake, ngokuti vakaita kuti ndikwanise kuwana marapihwe anofanera kuti ndijizwe ushoni.” Varovorani ava vakakomborehwa ngo kucungirira kwavo. Hama Alain vakati: “Pondakaenda kocumaera ku ndharaundha imweni iri ndhambo no dhorobha inodanwa Katé, takawana vandhu vakawanda maningi vaida kujija Bhaibheri. Pakupera mukuvo wakati kuti, takakwanisa kujija Bhaibheri naivona tecishandisa foni. Pa vandhu vatakawanaya, vaviri vakabhabhatijwa zve kwakaumbwa grupu.” Hambzaji Stéphanie vakaengejera vaciti: “Akuna mudakaro mukuru kupinda kubesera vandhu kuti vajipire kuna Jehovha. Ngo kushandira kuno, tiri kukwanisa kamare kuvona vandhu vacibhabhatijwa.” Nyamasi uno, hama Alain na hambzaji Stéphanie vari kushanda inga muvonereri wo ndharaundha.

Hambzaji Gisèle vakabhabhatijwa povainga veciita kursu ku Itariya kuti vave medhiko. Ivona vaishamaisika maningi ngo upenyu hwakareruka hwainga no varovorani vainga mapiyona vaivajijisa Bhaibheri zve vaidavo kuita zvizinji mu basa ravo ro kucumaera. Ngokudaro, hambzaji Gisèle povainga vecipejisa kursu yavo, vakatanga kushanda inga piyona wo nguva jese.

Ivona vaida kuhwirira Kamaroni kuti vaengejere kushandira kwavo Jehovha, asi vaithya. Ivona vakananga kudari: “Ndakadikana kusiya nyumba yaushoni yo ndaigara, shamwari no mbhuri, kunasa kunanga vese vaigara ku Itariya.” Pikija zvakadaro, mu mweji wa Maio wo 2016, hambzaji Gisèle vakahwirira Kamaroni. Pakupera mukuvo wakati kuti, ivona vakarovohwa ndi hama Léonce, bheteri ro nyikeyo rakavakumbira kuti vaende ku Ayos, dhorobha raida maningi vacumaeri.

Upenyu hwainga hwakadini ku Ayos? Hambzaji Gisèle vakati: “Kazinji kwaipeja sumana nganani kucina magezi zvokuti aticaikwanisa kucaja foni jedu. Jaigara mukuvo wakareba jicikashandi. Ndakajijira kubika ngo huni. Kuti tiende kocera kumwa taishandisa mabhara no toci co usiku kwecitondora kamare.” Varovorani ava vakahwisana kudini no mugariro uwu? Hambzaji Gisèle vakati: “Mujimu wa Jehovha wakatibesera kucungirira, cimwenizve, inini no mwamunangu taikwanisa kubesena. Ukama no shamwari jedu vaitivangisa zve nguva jimweni vaitotipa mare.”

Kunanga kuti hambzaji Gisèle vainga vakadakara ngo kuhwirira ku nyika yo vakabarihwa here? Ivona vakati: “Hina, tainga takadakara. Pakutanga takasongana no zvineso zve taisuruvara asi takakwanisa kuzvinyisa. Inini no mwamunangu takajizwa kuti takaita kamare zvataidikana kuita. Takathemba Jehovha zve tova phedo naye kamare.” Hama Léonce na hambzaji Gisèle, vakaenda ku Cikora co Vavhangeri vo Umambo zve wari vari kushanda inga mapiyona anosisira o nguva yakatemehwa.

Kudari inga mutandi anocungirira zvineso zvakawanda kuti abate hove jakawanda, vaya vanohwirira ku nyika yo vakabarihwa, ngo cido cese vanosiya zviro zvakawanda sure kuti vakwanise kubesera vaya vano mwoyo unoda kuzwa masoko o Umambo. Pacina kukana-kana Jehovha anoceukija basa riri kuitwa ngo vacumaeri ava no rudo hwovanokhombija ku zina rake. (Neemia 5:19; Vaheberi 6:10) Waro, kudari imwimwi muri kupona ku nyika iciripi yenyu zve moziva kuti ku nyika yo makabarihwa kunoda maningi vacumaeri, maizokwanisa kuhwirireyo here? Kudari mukahwirira munozova no makomborero akawanda maningi.—Mazwi Akangwara 10:22.