1-2. Tingatevejeresa kudini ngwajo inowanika pana Mazwi Akangwara 4:25? Ipanyi muezaniso.

AMBORANGARIRANYI ngo muezaniso mutatu iji. Imwe hambzaji yaamusharuka iri kurangarira zviro zvakaiitikira kare. Pikija iri kusongana no zvineso wari, iyona iri kuita zvese zvainokwanisa kuti ishandire Jehovha. (1 VaKorinto 15:58) Inoeja kujirangarira iri munyika imbza no ukama no shamwari jayo. Hambzaji imweni inoceukija kuti yakanyangajiswa ngo hambzaji doni, asi iyona inokheta kutama kuviga bundu. (VaKolosi 3:13) Hama iri kuceuja zviro zvayakaposa kare, asi inobatikana pakuita zvese zvainokwanisa kuti ishandire Jehovha yakagondeka, wari uno.—Nduyo 51:12.

² Muezaniso mutatu iji jakabatana papi? Zvokadi kamare hama ndhatu iji, jiri kuceuja zviro zvakaitika kare, asi ajiripi kusotesesa maningi zviro zvondhozvo. Kusiyapo zvondhozvo, ivona ‘vari kusota’ kumbeji kwavo.—Verenganyi Mazwi Akangwara 4:25.

3. Ngenyi tinodikana ‘kusotesesa ushoni’ kumbeji kwedu?

³ Ngenyi zvinosisira ‘kusotesesa’ kumbeji kwedu? Kudari inga mundhu aakwanisi kufamba mugwanja rakarungama kudari ecisota sure, itusuvo atizokwanisi kushandira Jehovha kudari tikarangarira maningi zvakatiitikira kare.—Luka 9:62.

4. Tinozobhuya ngenyi pa musoro uwu?

⁴ Pamusoro uwu, tinozobhuya ngo murau mutatu jingavepo kudari tikabatikana ngo zvakatiitikira kare. Ijona ngaiji: (1) madandha, (2) kuviga bundu no (3) kujipa ndava. Pa murau umwe nga umwe, tinozovona ndhungamiro jo Bhaibheri jingatibesera kuti titame kubatikana maningi pa zviro “bzakasara sure,” asi tosotesesa ushoni zviro “bziri pambeji.”—VaFilipi 3:13.

5. Mukuzwirana na Mucumaeri 7:10, zvicinyi zvaticikadikani kuita?

⁵ Verenganyi Mucumaeri 7:10. Vonanyi kuti vhesi iyi airipi kunanga kuti zvakashata kuvhunjisa kudari: “Ngenyi mukuvo wo  kare wainga waushoni?” Kurangarira zvakatiitikira icipo cinovha kuna Jehovha. Asi vhesi iyi inonanga kudari: “Ucananga kuti: ‘Ngenyi mukuvo wo kare wainga nane kupinda wa bzino?’” Ngo magama amweni tinodikana kungwarira kuti titame kuezanisa upenyu hwatainga nawo kare no upenyu watinawo wari zve toguma pa mbhejiso yokuti zviro zvese zviri kutiitikira wari, zvakanyanya kushata. Bhaibheri rimweni rakasanduja vhesi iyi kudari: “Narini ucadonanga kuti, ‘Ngenyi zviro zvainga zviri nane pa njiku japerari?’ Asipi zvoungwaru kuita muvhunjo uwu.”

6. Ngenyi asipi zvoungwaru kugara tecirangarira kuti upenyu hwedu wainga uri nane kare? Ipanyi muezaniso.

⁶ Ngenyi asipi zvoungwaru kugara tecirangarira kuti upenyu hwedu wainga uri nane kare? Madandha angatiita kuti ticeukije zviro zvaushoni zvakatiitikira kare. Zvecivoneka kuti iwona angatiita kuti ticeuje zviro zvaushoni, tinokwanisavo kukanganwa zviro zvakashata. Vonanyi basi zvakaitika no Vaiziraeri. Pasure po kubuda ku Ejipita, ngo kukasika ivona vakakanganwa kuti upenyu hwavo hwainesa. Kusiyapo zvondhozvo, ivona vakabatikana ngo zviro zvaushoni zvakavaitikira. Ivona vakati: “Tinoceukija hove jotaiha mahara mu Ejipiti, makaka, maxamba, murivo, masabola, hadwo!” (Bziverengo 11:5) Asi kunanga kuti zvovaihari zvaingadi zvo “mahara?” Haiwa. Vaiziraeri vaitambujwa mu njira yakashata maningi zve pamukuvo wiya, vaitajwa inga varanda. (Exodo 1:13, 14; 3:6-9) Ngo kukasika ivona vakakanganwa kutambujwa kwese kovaiitwaya. Ivona vakada kusotesesa zviro zvaushoni zvavainga nazvo kondhoyo, kusiyapo kusota zviro zvaushoni zvavainga vecipuwa ndi Jehovha. Jehovha aazivi kudakara ngo zvavakaitaro.—Bziverengo 11:10.

7. Zvicinyi zvakabesera imwe hambzaji kuti itize murau wo kuva no madandha?

⁷ Tingaitisa kudini kuti titize murau wo kuva no madandha? Vonanyi basi muezaniso wo imwe hambzaji yakatanga kushanda ku Bheteri ro Brooklyn mu gore ro 1945. Nopapera makore manganani, ivona vakazocadha no hama imweni yaishanda kondhoyo, perapo voshandiriyo ko makore akawanda. Asi, pakati po gore ro 1970, mwamuna wavo vakahwaja. Hambzaji iyi  yakananga kuti mwamuna wayo vacito vatamika, vakavapa ngwajo yaushoni maningi, yaizovabesera inga noni. Mwamuna wavo wakavavhunja kudari: “Takava no mucadho unodakajisa maningi. Vandhu vazinji avazivi kumbova no mucadho wakadari.” Ivona vakaengejera veciti: “Ucadokanganwa zviro zvese zvaushoni zvotakaita tese, asi ucadogara ucindozvirangarira nguva jese. Mukuvo paunonga wecipera, kuhwajihwa kwako kunozoperavo. Ngokudaro, ucadosuruvara maningi no kunyangajwa ngo ndava yo zviro zvakakuitikira. Dakarai ngo zvese zvaushoni zvotakakwanisa kuita tese kuti tikwanise kushandira Jehovha. Kuceukijira zviro zvakaitika kare, ndi cipo cinovha ka Mwari.” Amutendi kuti iyi yakava ngwajo yaushoni here?

8. Hambzaji yedu yakabesereka kudini ngo kutama kubatikana maningi ngo zviro zvakaitika kare?

⁸ Hambzaji yedu yakanasa kubatisisa magama aya. Yakashandira Jehovha yakagondeka mbhera kutamika kwayo poyainga no 92 o makore. Makore manganani icito yatamika, yakananga kudari: “Ndikasota sure pa makore anokwana kuita 63 ndecishandira Jehovha mu nguva yakazara, ndingatokwanisa kunanga no cokwadi cese kuti ndakava no upenyu unodakajisa.” Ngenyi? Ivona vakasanangura veciti: “Zvinoita kamare kuti upenyu hwedu uve unodakajisa, ngo zvokuti tiri divi ro mbhuri inoshamaisa yo hama no hambzaji zve tino vetero yo kuzopona na ivona mu paradhiso pasi pano, tecishandira Musiki wedu Mukuru, Mwari umwe ega wo cokwadi, Jehovha, kwenda no kwenda.” * Tingajija zvizinji ngo muezaniso wo hambzaji iyi, yakasotesesa ku zvigondiso zva Jehovha.

9. Inga zvinonangwa pana VaLevi 19:18, ngopapi panganesa maningi kuregerera mundhu watinyangajisa?

⁹ Verenganyi VaLevi 19:18. Kazinji zvinonesa maningi kuregerera vamweni kudari mundhu watinyangajisaro, i hama yo mu ungano, shamwari yedu kana ukama. Inga muezaniso, hambzaji imweni yainga yapumbhwa ngo hambzaji  yo mu ungano mwayo kuti iyona yainga yaba mare yayo. Pakufamba ko nguva, hambzaji iya yakapumbhaya imweni, yakaenda kokumbira kuregerehwa, asi hambzaji yakapumbhwaya yainga yakanyangajwa maningi zve aicaikwanisa kurangarira zvimweni. Makambojizwavo kudaro here? Pikija atizivi kumbosongana no mugariro wakafanana na uwu, kazinji itusu tinovona kuti zvinonesa maningi kuregerera mundhu watinyangajisa.

10. Zvicinyi zvingatibesera patinonga takanyangajwa?

¹⁰ Zvicinyi zvingatibesera patinonga takanyangajwa? Ciro cimwe ngo co kuceuja kuti Jehovha anovona zvese. Iyena anoziva zvese zvatinosongana na izvona, pikija vandhu pavanoshaisha kutitaja. (Vaheberi 4:13) Patinotambujika iyena anoneseka maningi. (Isaia 63:9) Zve iyena anogondesa kuti sambiri pano anozopeja zvese zvinotiita kuti titambujike.—Apokalipsi 21:3, 4.

11. Tinobesereka kudini kudari tikatama kuviga bundu?

¹¹ Cimwenizve, tinodikana kuceukija kuti patinoregerera vamweni, tinojibesera patoga. Izvi ndizvona zvakazozwisisa hambzaji yanangwa pa ndima yo 9. Pa kufamba ko nguva iyona yakazokwanisa kuregerera hambzaji yaingaya yakaipumbha. Yakazwisisa kuti, patinoregerera vamweni, Jehovha anotiregereravo. (Mateu 6:14) Yaizviziva kuti zvakaitari hambzaji imweni zvainga zvakashata, asi yakasana kutama kuviga bundu. Inga muviyo, hambzaji yedu yakadakara zve iri kukwanisa kubatikana pa kushandira Jehovha.

12. Zvicinyi zvatingajija kuvha pa 1 Johani 3:19, 20?

¹² Verenganyi 1 Johani 3:19, 20. Nguva jimweni itusu tingatojipa ndava. Inga muezaniso, vamweni vanojipa ndava ngo zviro zvakashata zvovakaita vacito vajija cokwadi. Kuveni vamweni vanojipa ndava ngo pamusoro po zvishaishi zvovakaita pakupera kubhabhatijwa. (VaRoma 3:23) Zvokadi kamare, itusu tinoda kuita zvakanaka. Asi itusu “tinoxaixa ruzinji.” (Jakobo 3:2; VaRoma 7:21-23) Pikija mazwiro okujipa ndava asipi aushoni, iwona angabesera nguva jimweni. Ngenyi? Ngokuti mazwiro okujipa ndava anoita kuti titamezve kuita cishaishi condhoco.—Vaheberi 12:12, 13.

13. Ngenyi atidikani kugara tecijipa ndava?

¹³ Ngo divi rimweni, zvingaita kuti nguva jimweni toguma pa kujipa ndava pikija tapera kukhauya zve Jehovha wakhombija kamare kuti watiregerera. Mushovo uwu wokujipa ndava, ungatikhuvaza maningi. (Nduyo 31:11; 38:4, 5) Kuitisa kudini? Vonanyi basi muezaniso wo imwe hambzaji yakaenderera mberi yecijipa ndava ngo pamusoro po zvishaishi zvoyakaita kare. Iyona yakati: “Ndaijizwa kuti zvese zvondaiita mu basa ra Jehovha, azvicaishanda nee padoko.” Uzinji hwedu tingatovavo no mazwiro akavari no hambzaji iyi. Ngo kudaro, tinodikana kungwarira kuti titame kunyanyisa maningi patinojipa ndava. Ngenyi? Ngokuti Sathana anozodakara maningi kudari tikasiya kushandira Jehovha pikija wapera kutiregerera kare.—Ezanisanyi no 2 VaKorinto 2:5-7, 11.

14. Tingavisa kudini no cokwadi cokuti Jehovha anotiregerera?

¹⁴ Nguva jimweni, tingatoguma pakukana-kana tojivhunjisa kudari: ‘Ndingavisa kudini no cokwadi cokuti Jehovha aazivi kundisiya?’ Kudari mukajiita muvhunjo uwu zvinokhombija kuti Jehovha angamuregerera. Pa mazana o mazana o makore akapera, umwe Murindiri wakananga kudari: “Zvingaita kuti nguva jimweni itusu tingaita cishaishi condhoco-condhoco, izvo kangaije zvingatanga kurembesa cido cedu co kushandira Mwari, asi mucadoremba, mucadoguma pa mbhejiso yokuti maita cishaishi cicikaregerehwi. Sathana anoda kuti imwimwi murangarire kudeya. Pa munosuruvara no kubararika hwiru ngokuita cishaishi ciricese, munonga mecikhombija kuti imwiwmi asipi mundhu  wakashata zve Jehovha angamuregerera. Rambanyi mecizvidodokesa zve itanyi mukumbiro kuti Jehovha amuregerere zve iyena anozomubesera kuti muvezve no hana yakacena. Mwana mudoko paanosongana no cineso avzinenyi kuti iyena wasongana naco pa vhaza yakadini, iyena anoenda kopsaka besero kuna baba wake, ndizvona zvamunodikanavo kuita psakanyi Jehovha kuti amubesere.” *

15-16. Vamweni vanozwa kudini pavanoziva kuti Jehovha aazivi kumbovasiya?

¹⁵ Vashandiri vazinji va Jehovha vakaembejehwa ngo kuziva kuti iyena aazivi kumbovasiya. Inga muezaniso, makore manganani akapera, hama imweni yakapsaswa maningi ngo muezaniso wo yakaverenga mumutevejwana unoti “Bhaibheri Rinochinja Upenyu.” Mumusoro wondhowo hambzaji yakananga kuti ngo ndava yo zviro zvakashata zvainga zvakaitika mu upenyu hwayo, iyona yakavona kuti zvainesa maningi kutenda kuti Jehovha waiida. Iyona yakaramba ino mazwiro ondhoo pikija no papera makore mazinji noyapera kubhabhatijwa, asi payakatora mukuvo yorangarijijsisa ngo pamusoro po muripo zvakaibesera kuzwisisa kuti Jehovha anoida. *

¹⁶ Zvakaitikari no hambzaji iyi zvakapsasa kudini hama iyi? Iyona yakatara kudari: “Pondainga mujaha ndaidakarira mainigi kuvona zvoumitu-mitu zve zvainesa maningi kusiya kuzvivona. Pa mukuvo waperari, ndakatangazve kuvona zvoumitu-mitu. Ndakakumbira vakuru kuti vandibesere kunyisa cineso ici. Ndakaita zvese zvandaikwanisa kuti ndicinyise, vakuru vakandigondesa kuti Jehovha anondida zve anoda kundiregerera. Asi nguva jimweni ndaijizwa inga kuti anditosisiri zve Jehovha aacaizondida. Kuverenga zvakaitika no hambzaji iya zvakandivangisa maningi. Wari ndinokwanisa kuzwisisa kuti pandinonanga kuti Mwari aazondiregereri, ndinonga ndecinanga kuti muripo wo mwana wake aukwani kuti ndiregerehwe zvishaishi zvangu. Ndakaceka musoro waibhuyaya ngo muezaniso wo hambzaji iya kuti ndikwanise kuuverenga no kuurangarijisisa, mazwiro okuti Jehohva aazondiregereri akatanga kuviyazve.”

17. Mupostori Pauro wakaitisa kudini kuti atize murau wo kujipa ndava?

 ¹⁷ Muezaniso wakadari inga uu, unoticeuja mupostori Pauro. Acito ava Mukristu iyena wakaita zvishaishi zvakawanda maningi. Pauro waiceuja zvese zvaakaita, asi aacaigara ecindorangarira zviro zvondhozvo basi. (1 Timoti 1:12-15) Iyena waivona muripo inga cipo kuitira iyena kamare. (VaGalàsia 2:20) Ngo kuita kudaro, iyena wakakwanisa kutiza murau wo kujipa ndava zve wobatikana pa kuita zvese zvaaikwanisa kuti ashandire Jehovha ecisota zvo kumbeji.

18. Zvicinyi zvotajija pa musoro uwu?

¹⁸ Ngozvapi zvatajija pakupera kupopora murau jese janangwari mumusoro uwu? (1) Kuceukija zviro zvakanaka zvakatiitikira, imakomborero anovha kuna Jehovha; asi izvi azvirevi kuti tinodikana kugara tecindorangarira zviro zvakatiitikiraro. Kumbeji kwedu mu nyika imbza kunozova kwakanakisisa kamare. (2) Vamweni vangatotinyangajisa, asi patinokheta kuvaregerera, tinokwanisa kubatikana ngo kumbeji kwedu. (3) Kujipa ndava kungatiita kuti titame kushandira Jehovha ngo mudakaro. Ngo kudaro, inga ndi Pauro tinodikana kutenda kuti Jehovha anotiregerera.

19. Tinozvizivisa kudini kuti mu nyika imbza atizocerecejizve zviro zvakatiitikira kare?

¹⁹ Tinovetero yo kupona kwenda no kwenda. Patinonga tecirarama mu nyika imbza atizoceukijizve ciri cese haco cinotiita kuti tisuruvare. Recinangira mukuvo wondhowo, Bhaibheri rinoti: “Bzo kare abzizocerecejwibze.” (Isaia 65:17) Amborangariranyi basi: Vamweni vedu vaano makore akawanda vecishandira Jehovha vaavasharuka, asi mu nyika imbza, tese tinozovazve majaha. (Jobe 33:25) Ngokudaro, ngatiteme civaringo co kutama kugara tecirangarira zviro zvakatiitikira kare. Kusiyapo zvondhozvo, tinodikana kuita zvese zvatinokwanisa kuti tisotesese kumbeji kwedu.