1. Jehovha angakwanisa kuitenyi kuti aite kuda kwake?

JEHOVHA angakwanisa kuita ciri cese caanoda kuti akwanirise cidisiso cake. Inga muezaniso, nguva jimweni Jehovha wakaguma pa kuva Mujijisi, Muembejeri pomwe no Mucumaeri. Mazina aya i muezaniso basi wo zviro zvakakwanisa kuva Jehovha. (Isaia 48:17; 2 VaKorinto 7:6; VaGalàsia 3:8) Asi, iyena anoshandisavo vandhu kuti vakwanirirse cidisiso cake. (Mateu 24:14; 28:19, 20; 2 VaKorinto 1:3, 4) Cimwenizve Jehovha anokwanisa kupa vashandiri vake ungwaru no simba kuti vakwanise kuita kuda kwake. Zvese zvinoitwari ndi Jehovha zvinozwirana no revo yo zina rake, izvi zvakanangwavo ngo vajiji vamweni vo Bhaibheri.

2. (a) Ngenyi nguva jimweni tingajivona inga kuti atisisiri kuna Jehovha? (b) Tinozovonenyi pa cijijo cino?

² Tese tinoda kuva vandhu vanosisira kuna Jehovha. Asi vamweni avatendi kuti vanosisira kuna Jehovha. Ngenyi? Kangaije ngo ndava yo makore avo, mugariro wavo kana kutokwanisa kwavo kuita ciri cese. Vamweni vangatorangarira kuti zvakwana zvavari kuitaro zve avana dikano yo kuita zvimweni. Pa jijo iyi, tinozovona kuti Jehovha anozotinasiririsa kudini kuti tiite kuda kwake. Tevere, tinozopopora zviitiko zvo Bhaibheri zvinovonesa kuti Jehovha wakakwanisa kupa vashandiri vake vorume no vokaji, simba ro kuda no kukwanisa kuita ciri cese. Pejisire, tinozovona manera atingatendera kushandiswa ndi Jehovha.

3. Mukuzwirana no VaFilipi 2:13, Jehovha anotibeseresa kudini patinova cido co kuda kuita ciri cese?

³ Verenganyi VaFilipi 2:13. * Jehovha angatipa cido co kukwanisa kuita zviro. Angazviitisa kudini? Inga muezaniso, tingatoziva  kuti ari wese mu ungano anoda besero kana kuti ciri cese cinoda kuitwa mu ungano. Cimwenizve, vakuru vangatoverenga karata inovha ku bheteri yecibhuya ngo pamusoro po kunodiwa vashandi. Kangaije tingatorangarira kudari: ‘Zvicinyi zvandinodikana kuita kuti ndibesere?’ Nguva jimweni tingatoashira basa rinonesa, asi torivona inga kuti atikwanisi kuriita. Kana kuti, pakupera kuverenga vhesi iri yese yo Bhaibheri, tingatojivhunjisa kudari: ‘Ndingazvishandisa kudini zvondaverengari kuti ndibesere vamweni?’ Narini Jehovha aazotivangiriji kuti tiite ciri cese. Asi paanovona kuti tinoda kubesera, iyena angatipa cido co kukwanisa kuita ciri cese.

4. Jehovha angatipekejesa kudini simba ro kuita ciri cese?

⁴ Jehovha angatipavo simba kuti tikwanise kuita ciri cese. (Isaia 40:29) Anozviitisa kudini? Iyena angashandisa mujimu wake mucena kuti tiitise nane kukwanisa kwedu kuita ciri cese. (Exodo 35:30-35) Ecishandisa sangano rake, Jehovha angatijijisa manera otingaita mabasa amweni. Kudari, tikavona kuti atiripi kukwanisa kuita basa rotakagajwa, tinodikana kukumbira besero. Kusiyapo zvondhozvo, mungatokumbira Jehovheo kamare, kuti amupe “simba rakakura kudaro.” (2 VaKorinto 4:7; Luka 11:13) Bhaibheri rino muezaniso, jinovonesa manera akaita Jehovha kuti anasirire vanarume no vanakaji no kuvapa cido pomwe no simba ro kuda kuita ciri cese. Patinoenderera mberi tecipopora zviitiko zvo vandhu ava, ejanyi kuvona kuti Jehovha angamushandisa kudini kuti muite zvakafanana no zvakaitari vashandiri ava vakagondeka.

5. Tinojijenyi ngo matajire aakaita Jehovha, Mosi?

⁵ Jehovha wakashandisa Mosi kuti asujunure Vaiziraeri. Asi, Jehovha wakashandisa rini Mosi? Kureva kuti ndi paya po kuti wainga wapera ‘kujijiswa uzivi hwese hwo vaEjipiti’? (Maitiro o Vapostori 7:22-25) Haiwa, cokutanga Jehovha wakacinja undhu wa Mosi. Iyena wakamubesera kuti ave mundhu anojidodokesa no kupfava. (Maitiro o Vapostori 7:30, 34-36) Kusiyapo kujithemba, Mosi wakajijira kuthemba Jehovha. Ngo cicunge caakapuwa ndi Jehovha, iyena wakakwanisa kubhuya hope ngo hope no mutongi wainga no simba maningi wo Ejipita. (Exodo 9:13-19) Tinojijenyi ngo manera aakataja Jehovha, Mosi? Jehovha anoshandisa vaya vano mugariro jakanaka no vaya vanothemba simba rinovha kwaari.—VaFilipi 4:13.

6. Tajijenyi ngo mashandisire akaita Jehovha Bharizirai kuti abesere Mambo Dhavhidhi?

⁶ Pa kufamba ko nguva, Jehovha washandisa Bharizirai kuti abesere Mambo Davhidhi. Pa nguva yondhoyo, Dhavhidhi wainga eciitiza mwana wake Abhisaroni. Dhavhidhi pomwe no vandhu vaainga navo vainga no “njara, nyota no kuremba.” Ngokudaro, Bharizirai no vandhu vamweni vakadira pa ngozi upenyu hwavo kuti vabesere Dhavhidhi no vadoni vake. Bharizirai wainga wa musharuka. Asi pikija zvakadaro, aazivi kujivona kuti aacasisiri kuna Jehovha. Kusiapo zvondhozvo, Bharizirai wakakhombija kukova kwake ngo kupa zviri zvese vamweni. (2 Samueli 17:27-29) Tinojijenyi apa? Azvinenyi kuti tino makore mangana, Jehovha angatishandisa kuti tibesere hama jiri munyika yedu kana jo nyika jimweni. (Mazwi Akangwara 3:27, 28; 19:17) Nguva jimweni tingabesera vanoda besero ngo kukasika. Asi kudari azvikwanisiki, tingaita mupiro kuitira kubesera basa ro nyika yese. Izvi, zvinoita kuti sangano rive no mare yo kubesera hama jinowihwa ngo ngozi.—2 VaKorinto 8:14, 15; 9:11.

7. Jehovha wakashandisa kudini Simoni zve ngenyi izvi zvinotivangisa?

⁷ Jehovha wakagondisa Simoni, mugondeki wainga waamusharuka, waigara mu Jerusarema, kuti iyena acaizofa acakavona Mesiya.  Cigondiso ico, cakavangisa maningi Simoni, ngokuti wainga ecivetera ko makore akawanda kuvia ka Mesiya. Jehovha wakakomborera Simoni ngo ndava yo gonda rake no kucungirira kwaiita. Njiku imweni Simoni “wakafemehwa ngo Mujimu Mucena” kuti aende ku themberi. Ikonayo, iyena wakavona Jesu aciri mwana mutate kamare. Jehovha wakashandisa Simoni kuti aporofite ngo pamusoro pa Jesu uwo waida kuzova Kristu. (Luka 2:25-35) Pikija Simoni aazivi kupona mbhera kuvona Jesu aciita mushando wake pasi pano, iyena wakadakara maningi ngo cidakajiso caakava naco co kuvona Jesu. Cimwenizve, anozova no zviro zvizinji zvaushoni kumbejiyo. Munyika imbza, Simoni, anozovona makomborero anozoviswa ngo utongi hwa Jesu ku majinja ese o pasi pano. (Genesi 22:18) Itusuvo, tingadakara ngo zvatingapuwa ndi Jehovha kuti tiite mu basa rake.

8. Jehovha angatishandisa kudini inga mashandisire aakaita Bharnabhe?

⁸ Muzana ro kutanga ro makore, mwanarume umweni anokova anodanijwa Josefa, wakatendera kushandiswa ndi Jehovha. (Maitiro o Vapostori 4:36, 37) Zvingaita kuti iyena waikwanisa ushoni kuembezera vamweni, ngokuti vapostori vakazomudura zina rokuti Bharnabha, rinoreva “mwana wo runyarajo.” Inga muezaniso, Sauro paakava Mukristu, hama zinji jaimuthya. Ngokuti waizivika maningi ngo basa rake ro kuteverera Makristu. Asi Bharnabha wakakhombija rudo zve wakamubesera. Pacina kukana-kana, Pauro wakabongesera maningi. (Maitiro o Vapostori 9:21, 26-28) Pa mukuvo umweni, hama jimweni jo Antiyokia yo Siriya, jakadavo kutondhojwa. Nga izvo, vakuru vo Jerusarema vakatumira ariwese kuti avavhakacire. Waro ndiyani wakazoendeyo? Hina, ndi Bharnabhe! Ivona vakasana ushoni kamare. Bhaibheri rinonanga kuti, iyena ‘wakavangisa vandhu, kuti vave no mwoyo wokuvanga no wokugonda Tenji.’ (Maitiro o Vapostori 11:22-24) Nyamasi uno, Jehovha angatiitavo “mwana wo runyarajo,” kuti tiembezere hama jimweni. Inga muezaniso, angatishandisa kuti tiembezere mundhu wafihwa. Kana mundhu ari wese anonga ecihwaja, Jehovha angatishandisa tiyende kumuvona kana kumufonera. Munoda kushandiswa ndi Jehovha inga Bharnabhe here?—1 VaTesalònika 5:14.

9. Tinojijenyi ngo manera akabesera Jehovha hama Vhazirayi kuti vave muhavisi waushoni mu ungano?

⁹ Jehovha wakabesera hama imweni inodanwa Vhazirayi kuti ive muhavisi waushoni. Ivona vainga no makore anokwana kuita makumaviri no matandhatu, povakagajwa kuita mukuru. Ivona vaijivona vacikakwanisi kubesera ungano, maningi-ningi hama jiri kuhwisana no zvineso. Asi, vakabesehwa maningi ngo vakuru vainga no makore akawanda vecishanda. Inga muviyo vakazoenda kojija ku Cikora co Mushando wo Umambo. Hama Vhazirayi vakavangisira maningi kuti vaitise nane. Inga muezaniso, ivona vakagaja zviro zidokowane zvavaidikana kukwanirisa. Pavaizvikwanirisa, kuthya kwavo kwaipera. Ivona vakananga kudari: “Zvandaithyaya maningi, wari zviri kundidakajisa manigi. Jehovha paanondibesera kuwana vhesi yandinoda kuti ndibesere hama kana hambzaji, ndinodakajihwa maningi.” Hama imwimwi mungajijavo ciri cese ngo muezaniso wa hama Vhazirayi. Itanyi kuti Jehovha amushandise. Mukaita kudaro, Jehovha anozomuita kuti mukwanise kuita basa ro makagajwa mu ungano.

10. Abhigairi wakaitenyi zve tinojijenyi ngo muezaniso wake?

¹⁰ Vhaza imweni Dhavhidhi no vadoni vake vainga veciteverehwa ndi mambo Sauri zve vaida kubeswa. Ngokudaro, Dhavhidhi no vanarume vaainga naye, vakakumbira Muiziraeri  umwe wakakuphuka waidanwa Nabhari kuti avape zvokuha. Ivona wakavona kuti azvicaishata kukumbira Nabhari zvokuha ngokuti vainga vakangwarira mushambi wake mu zvipare. Asi Nabhari waijikuja maningi zve wakaramba kuvabesera. Dhavhidhi wakanyangwajwa maningi zvokuti wakada kuuraya Nabhari no vese vo muzi wake. (1 Samueli 25:3-13, 22) Abhigairi, mukaji wa Nabhari wakazvizwa zvakaitika. Kusiyapo kuseja kwainga nako, Abhigairi wainga wakanaka mwoyo. Ngo kucunga kwese, wakaenda kuna Dhavhidhi, wogwadama ecimukumbira kuti atame kuuraya Nabhari. No nderemejo yese iyena wakananga kuti Dhavhidhi waizova no ndava yo ngazi. Wakamuvhujazve kuti zvainga zviri nane kusiya zvese mu nyara ja Jehovha. Kujidodokesa no kungwara ko mwanakaji wiya, kwakapsasa maningi Dhavhidhi. Iyena wakazwisisa kuti mwanakaji uwu wainga watumwa ndi Jehovha. (1 Samueli 25:23-28, 32-34) Abhigairi wakasakurira mugariro jaizomuita kuti ave anosisira kuna Jehovha. Izvi zvingaitikavo no hambzaji jedu jo Cikristu. Pavanosakurira mugariro jakadari inga zwisiso no kungwara, ivona vangashandiswa ndi Jehovha kuti vavangise mbhuri javo pomwe no ungano yo Cikristu.—Mazwi Akangwara 24:3; Tito 2:3-5.

11. Vana va Sharumi vakaitenyi? Ndiyani ari kutevejera muezaniso wavo nyamasi uno?

¹¹ Pa kufamba ko nguva, Jehovha wakashandisa vana vokaji va Sharumi kuti vabesere pa kuvakwa ko mufimbiji wo Jerusarema. (Neemia 2:20; 3:12) Pikija baba vakona vainga nduna, vana ava vakazvipira kuti vaite basa rinonesa zvokuti raitodira pa ngozi upenyu hwavo. (Neemia 4:15-18) Ivona vaisiyana kamare no vanarume vaizivika maningi vo Tekowa, avo “vakaramba kubata basa.” (Neemia 3:5) Munokwanisa kurangarira mudakaro wakava no vana vokaji va Sharumi, pavakapera kuvaka mufimbiji pa makumashanu o njiku no njiku mbiri here? (Neemia 6:15) Nyamasi uno, hambzaji jedu jiri kuitavo zvakafanana. Ivona, vari kudakara ngo kubesera pa basa rakacena ro kuvakwa no kunasirihwa ko ndau jinoshandiswa ndi Jehovha. Zvokadi hambzaji iji, ngo kuva kwajo no cido co kuda kuita, kukwanisa kwajo kuita pomwe no kugondeka, zviri kuita kuti basa ro kuvaka ripere ngo kukasika.

12. Jehovha angatishandisa kudini inga mashandisire aakaita Tabhita?

¹² Mwanakaji umweni wakashanda ngo simba kuna Jehovha ndi Tabhita. Bhaibheri rinonanga kuti iyena “waiita mabasa akanaka mazinji, no kubesa varombo.” (Maitiro o Vapostori 9:36) Tabhita waizivika maningi ngo kukova no kuva mundhu waushoni. Iyena waibesa maningi-ningi noni. Ngokudaro, paakafa noni zinji jakacema. Asi, Tabhita paakamuswa ndi mupostori Pedru, noni iji jakadakara maningi. (Maitiro o Vapostori 9:39-41) Tinojijenyi ngo muezaniso wa Tabhita? Tese, azvinenyi dangani tiri majaha kana vasikane, vasharuka, vanarume kana vanakaji, tingaita zviri zvese kuti tibesere hama no hambzaji jedu.—Vaheberi 13:16.

13. Jehovha wakashandisa kudini hambzaji Ruti pikija vainga no nyowa zve ivona vakanangenyi?

¹³ Hambzaji Ruti vaida kuva Misiyonario, asi vainga no nyowa. Pavainga mwana mudoko vaienda muzi ngo muzi vecipekeja mataratadho. Ivona vakananga kudari: “Ndaidakarira maningi basa riya.” Asi kubhuya no vandhu ngo pamusoro po Umambo hwa Mwari, cainga cineso kwavari. Pikija zvakadaro, pavainga no gumi no masere o makore, vakava piyona wo nguva jese. Mugore ro ciuru mazana mapfumbamwe no makumarongomuna na tandhatu (1946), ivona vakaenda kucikora co Giriyadhi, tevere vakazoenda kooshanda ku Havhai no Japau. Jehovha wakavashandisa mu njira inoshamaisa kuti vacumaere masoko akanaka mu nyika japerari kunangwa. Pavakaita makumasere o makore vecicumaera, vakazongana kudari: “Jehovha  arikundipa maningi simba no kundibesera kuti nditame kuva no nyowa. Ndinocokwadi cokuti Jehovha angashandisa mundhu wese anomuthemba.”

14. Mukuzwirana no VaKolosi 1:29, tinodikana kuitenyi kudari tinoda kushandiswa ndi Jehovha?

¹⁴ Kuvhira kare, Jehovha wakaita kuti vashandiri vake vaite mabasa akasiyana-siyana. Imwimwivo keni? Jehovha angamubesera kuti muitenyi? Zvinofira pakuvangisira kwamunoita. (Verenganyi VaKolosi 1:29.) Mukatendera kushandiswa ndi Jehovha, iyena angamuita kuti muve mucumaeri anovangisira, mujijisi waushoni, mundhu anotondhoja vamweni, mubati waushoni wo basa, shamwari yakanasiririka kuti ibesere kana kuita ciri cese kuti mukwanirise kuda kwake.

15. Mukuzwirana no 1 Timoti 4:12, 15, majaha anodikana kukumbirenyi kuna Jehovha?

¹⁵ Zvakadinivo imwimwi majaha, maaphedo wari no kuita madhodha? Sangano ra Mwari rinoda maningi vanarume vanosimba kuti vashande inga vabatiri vanoshandira, kuti vakwanise kuita mabasa mazinji. Ungano jimweni, jakawanda maningi vakuru kupinda vabatiri vanoshandira. Kudari muri mujaha, mwadini kusakurira cido cokuda kuita zvizinji mu ungano? Nguva jimweni, hama jimweni jinonanga kudari “kwandiri, zvakwana kushanda inga mucumaeri basi.” Kudari mecirangaira kudaro, kumbiranyi Jehovha kuti amubesere kuva no cido cokukwanirisa kushanda inga mubatiri anoshandira. Kumbiranyizve simba kuti mushande mbhera panopera simba renyu mu basa rake. (Mucumaeri 12:1)Majaha, tinoda maningi besero renyu!—Verenganyi 1 Timoti 4:12, 15.

16. Tinodikana kukumbirenyi kuna Jehovha zve ngenyi?

¹⁶ Jehovha angamuita kuti mukwanise kuita zvaanoda, kuti cidisiso cake cikwanisike. Ngokudaro, itanyi mukumbiro kuna Jehovha, kuti muve no cido co kuita basa rake.Cimwenizve, kumbiranyi Jehovha kuti amupe simba ramunoda kuti muite basero. Azvinenyi dangani muri mujaha kana musharuka, shandisanyi nguva yenyu, simba renyu, zvamunokwanisa kuita no zvamunazvo kuti mukuje Jehovha, wari uno. (Mucumaeri 9:10) Mucatendera kuti kuthya no kujizwa kuti amusisiri, zvimurembese pa kuvangisira kwenyu kuti muite zvizinji mu sangano ra Jehovha. I cidakajiso cakakura maningi kuita zvese zvatinokwanisa kuti tikuje baba wedu vano rudo!