1. Ngenyi tinodikana kunamata Jehovha basi?

JEHOVHA ndiyena Musiki no Mupi wo Upenyu. Ngokudaro, iyena anofanera kunamatwa. (Apokalipsi 4:11) Asi, pano ngozi. Pikija tecida Jehovha no kumureremeja, zviro zvimweni zvingaguma pa kuva zvinosisira maningi mu upenyu, zvotiita kuti tiruze rudo hwedu na Jehovha zve titame kunamata iyena basi. Tinodikana kuzwisisa manera ozvingaitika izvi. Asi pokutanga, ngatende tivone kuti zvinorevenyi kunamata Jehovha basi.

2. Mukuzwirana na Mateu 4:10, kunamata Jehovha basi, kunorevenyi?

² Mu Bhaibheri, magama o kuti kunamata Jehovha basi, anovonesa kuva no rudo naye. Kunamata Jehovha basi, kunoreva kutama kutendera kuti ciri cese cimuvhise mu mwoyo mwedu.—Verenganyi Mateu 4:10.

3. Ngenyi kunamata kwedu Jehovha, asipi ko cimbungundira inga nyagoso yo mbhaka?

³ Kunamata kwedu Jehovha basi, asipi ko cimbungundira inga nyagoso yo mbhaka. Ngenyi tingananga kudaro? Ngokuti ikona kwakacijikira pa zviro zvotakajija no zvatinonasa kuziva ngo pamusoro pake. Tinoziva mugariro jaushoni jese ja Jehovha. Tinoziva zvaanodakarira no zvaacikadakariri. Itusu tinowirirana naye. Tinozwisisa no kubesera zvidisiso zvake kuitira vandhu. Kwatiri, cidakajiso cikuru maningi kuva shamwari ya Mwari. (Nduyo 25:14) Ciri cese catinojija ngo pamusoro po Musiki wedu, cinotiita kuti tive phedo naye.—Jakobo 4:8.

4. (a) Sathana anoshandisenyi kuti titame kunamata Jehovha basi? (b) Tinozovonenyi pa musoro uno?

⁴ Sathana ari kuvonerera nyika ino. Iyena anoshandisa nyika yake aite kuti zviro zvinodakarihwa ngo vandhu kuti zvive zvinosisira mu upenyu hwedu no kuita kuti zvido zvedu zvakashata zvivange. (VaEfeso 2:1-3; 1 Johani 5:19) Caanoda  pa zvese izvi, i kuparajanisa mwoyo wedu. Mwoyo wedu ukaparajana, atizokwanisi kunamata Jehovha basi. Pa musoro uno, tinozovona njira mbiri jinoshandiswa ndi Sathana kuti akwanise kuita zvondhozvo. Yokutanga, ngo kutiita kuti tipsake maningi mare. Yocipiri, ngo kutiita kuti tishaishe kusana mabungaijo edu.

5. Ngenyi tinodikana kungwarira kuti titame kudisisa mare?

⁵ Apana cakashata kudari tikada kuva no zvokuha zvinokwana, nguvo no ndau yaushoni kuti tigare. Asi, tinodikana kungwarira kuti titame kudisisa maningi mare. Vandhu vazinji vanoita divi ro nyika ya Sathana, vanotanga ngo ‘kudisisa upfumi’ no zviro zvaingatenga. (2 Timoti 3:2, Baiberi Mazwi Akacena aMwari) Jesu waizviziva kuti vateveri vake vaizoejwa kuti vakhwijirije rudo wondhowo. Ngo iyo ndava iyena wakananga kudari: “Apana anokwanisa kubatira vandhu vaviri. Ngokuti anozonyenya umwe woda umweni, dangani anozobatira umwe, ecizonyenya umweni. Amukwanisi kubatira Marure pamwepo no upfumi.” (Mateu 6:24) Mushandiri wa Jehovha paanopeja nguva yakawanda no simba kuti awane upfumi mu nyika ino, iyena ari kueja kushandira vandhu vaviri. Anonga acikanamati Jehovha basi.

6. Tinojijenyi ngo magama a Jesu aakananga ku ungano yo Raudhiseya?

⁶ Mu kupera ko zana ro makore, kwainga no ungano ku dhorobha ro Raudhiseya. Vandhu vo ungano iyi vainanga kudari: “Ndiri mukhupuki, ndakaviga bzizinji, apana bzo ndinotama.” Asi mu mavonero a Jehovha na Jesu ivona vainga ‘vatami, varombo mapofu [zve vainga vari] mitu.’ Jesu wakadikana kuvapangira, haiwa ngo ndava yo kukhupuka kwavo  asi ngo ndava yo kudisisa kwavo upfumi. Rudo uwo, wainga wecikhuvaza ushamwari hwavo na Jehovha. (Apokalipsi 3:14-17) Kudari tikavona kuti tiri kutanga kudisisa mare, tinodikana kuita ciri cese ngo kukasika kuti ticinje murangariro wondhowo. (1 Timoti 6:7, 8) Mukaita kudaro, mwoyo wedu unozoparajanika. Cimwenizve, Jehovha aazotenderi kunamata kwedu. Iyena anoda kuti itusu timude “ngo mwoyo wako.” (Marco 12:30) Asi, mare ingagumisa kudini pa kuva inosisira maningi mu upenyu hwedu?

7-9. Majijenyi ngo zvakaitika no mukuru umweni anodanwa Dhavhidhi?

⁷ Vonanyi zvakaitika no umwe mukuru anodanwa Dhavhidhi, anogara Estadhus Unidhus. Iyena anojivona inga mushandi wo basa anovangisira. Iyena wakakhwijirijwa mu empereza yaaishandira ate wakaguma pakuvoniwa inga mushandi waushoni kutenderera nyika yese. Asi, iyena wakati: “Pa nguva yondhoyo, ndairangarira kuti kukhwijirijwa kwiya ainga makomborero a Jehovha.” Kureva kuti zvainga izvona here?

⁸ Hama Dhavhidhi, vakatanga kuzwisisa kuti basa ravo rainga ropsasa ushamwari hwavo na Jehovha. Ivona vakati: “Pondainga ku musongano no mu basa ro kucumaera, ndaigara ndecirangarira zvineso zvo ku basa. Ndainga ndecitaka mare yakawanda, asi ndaigara ndecinyangajwa maningi pomwe no zvineso mu mucadho wangu.”

⁹ Hama Dhavhidhi vakavona kuti zviripo zvovaidikana kudira pakutanga. Ivona vakati: “Yainga nguva yo kucinja mugariro wangu.” Ivona vaida kucinja nguva jo vaishanda. Ngokudaro, vakaenda kobhuya na shefi wavo. Ngowapi wakava muviyo? Hama Dhavhidhi vakaruza basa! Asi, ivona vakaitenyi? Vakati: “Njiku yakatevera, ndakatara petisau kuti ndishande  inga piyona wo besero wo kwenda no kwenda.” Pakufamba ko nguva, hama Dhavhidhi no mukaji wavo, vakatanga kushanda inga mapiyona o nguva jese. Kuti vajisapote, vari kuita basa ro rimpeza. Ivona avacaipeja maningi nguva pa mushovo wo basa rovaiita, asi vaida kudira pa kutanga kushandira kwavo Jehovha. Asi kusiyapo izvo, mare yo vaipocera yainga padoko kupinda yo kare. Pikija zvakadaro, mweji jese ivona vainga no mare yakakwana kuti vajisapote. Ivona vakanasa kuvona matajire anoita Jehovha vaya vanodira pakutanga Umambo hwa Mwari.—Mateu 6:31-33.

10. Tingangwaririsa kudini mwoyo wedu?

¹⁰ Azvinenyi dengani tiri vakhupuki kana varombo, tinodikana kungwarira mwoyo wedu. Tingazviitisa kudini izvi? Ticadisisa maningi mare. Cimwenizve, ticatendera kuti basa ratinoita rive rinosisira maningi kupinda kushandira Jehovha. Waro tingazvizivisa kudini kuti zviri kuitika kwatiri? Mungazvivhunjisa kudari: ‘Inini, pandinonga pa musongano no mu basa ro kucumaera, ndinorangarira maningi basa randinoita here? Ndinobatikana ngo kuviga mare kuitira kumbeji here? Ndiri kutendera kuti upfumi undiviisire zvineso mu mucadho wangu here? Waro ndaizotendera kushanda mu ndau jinovoneka kuti ajisisiri, kuti ndiwane nguva yakawanda yo kushandira Jehovha here?’ (1 Timoti 6:9-12) Pamunojiita muvhunjo iji, ceujanyi kuti Jehovha anotida maningi. Vandhu vaya vanonamata iyena basi, anovagondesa kudari: “Andicakuregeri wega nokuti kukusia.” Ndizvo zvakaitisa kuti Pauro atare kudari: “Mucatenda kukweviwa mecidisisa upfumi.”—Vaheberi 13:5, 6.

11. Mabungaijo amweni anoita kuti mundhu aitenyi?

¹¹ Jehovha anoda kuti tidakare mu upenyu. Cingatibesera kuti tive no mudakaro wondowo, mabungaijo. Hina, Bhaibheri rambwine rinongana kuti akuna ciro cinosisira maningi ku mundhu kuciripi “kuha no kumwira, ecibusa ngo mucero wo basa rake.” (Mucumaeri 2:24) Asi, mabungaijo amweni angatikhuvaza. Iwona anondundira vandhu kuti vaite zviro zvicikasisiri zve anoita kuti vandhu vadakarire zviro zvinonyenywa ndi Jehovha

12. Mukuzwirana no 1 VaKorinto 10:21, 22, ngenyi tinodikana kusana ushoni mabungaijo edu?

¹² Tinoda kunamata Jehovha basi, ngokudaro atitendehwi “kuhira pa dandiro ra Tenji no pa dandiro ra Sathana.” (Verenganyi 1 VaKorinto 10:21, 22.) Kazinji kuha no ariwese icitatijo coushamwari. Kudari tikasana  mabungaijo anokwevejera ugevenga, zvomadhimoni, zvouhure kana zvidisiso zvo kunyama, tiri kuhira pa meza yakanasirihwa ngo vavengi va Mwari. Izvi zvaizotikhuvaza no kuphwanya ushamwari hwedu na Jehovha.

13-14. Mukuzwirana na Jakobo 1:14, 15, ngenyi tinodikana kungwarira mabungaijo atinosana? Ipanyi muezaniso.

¹³ Mabungaijo anoezaniswa no zvokuha. Patinonga teciha, tingakwanisa kungwarira zvatinodira pa muromo. Asi patinopera kumija panoitika zviro zvizinji zvaticikakwanisi kuvona. Pakupejisira, zviro zvimweni zvatinohaya zvinopinda mu muviri. Kuha zviro zvakanaka zvinovaka muviri wedu. Asi kuha zviro zvicikabesi zvinokhuvaza uhomi hwedu. Muviyo jakona ajiviyi ngo civhumbu, asi ngo kufamba ko nguva jinozovoneka.

¹⁴ Mukuezanavo, patinosana mabungaijo, tinokwanisa kungwarira zvatinodira mu murangariro. Pejisire zvinoitika zviro zvaticikavoni mu murangariro no mu mwoyo mwedu. Ngokudaro mabungaijo akanaka angatibesera. Asi akashata angatikhuvaza. (Verenganyi Jakobo 1:14, 15.) Muviyo jo kuvona mabungaijo akashata ajiviyi ngo civhumbu asi ngo kufamba ko nguva jinozovoneka. Ndizvona zvinoitisa kuti Bhaibheri ritingwaje kudari: “Mucadocengejwa: Apana anotamba na Mwari. Bzaanosima mundhu ngo bzaanozokotora; ndiani anosima mu nyama yake, anozokotora kuvora mondhomo.” (VaGalàsia 6:7, 8) Zvokadi, zvinosisira maningi kwatiri kuti titize mabungaijo anokwevejera mu zviro zvinonyenywa ndi Jehovha!—Nduyo 97:10.

15. Ngocapi cipo caakatipa Jehovha?

¹⁵ Hama zinji jinodakarira kuvona vhidhiyo jo JW Broadcasting®, vecishandisa interineti. Hambzaji Marilyn vakati: “JW Broadcasting inondibesera kuti ndidakare zve ndingavona zvese zvandingawanemo ngokuti kwandiri zvakanaka. Pandinojizwa ndiri ndega kana ndakasuruvara, ndinokwanisa kuvona hurukuro jinovangisa kana Kunamata ko Mangwananyi. Ngokudaro, ndinojizwa ndiri phedo na Jehovha no sangano rake. Urongwa wo JW Broadcasting wacinja upenyu hwangu mukuperera.” Kusiyapo ma Broadcasting o mweji ngo mweji, JW Broadcasting ino ndumbo jinodakajisa no mavhidhiyo atingawana ngari yatinoda. Kureva kuti muri kubeserekavo ngo kushandisa cipo ici cinovhari kuna Jehovha here?

16-17. Ngenyi tinodikana kungwarira nguva yatinopeja ngo mabungaijo? Waro tingazviitisa kudini?

¹⁶ Azvikwani kungwarira mukhaindi wo mabungaijo atinosana. Tinodikana kunasa kuvona nguva yatinopeja ngo mabungaijo ondowo. Ngokuti, tingatopeja nguva yedu ngo mabungaijo kusiyapo kupeja nguva tecishandira Jehovha. Vamweni vanonesehwa kungwarira nguva povanonga vecibungaija. Hambzaji Abhigairi vano gumi ro makore na makore masere, vakati: “Kuvona TV zvinondibesera kuti ndizorore pa kupera ko basa. Asi ndikatama kungwarira ndingatogara mukuvo wakareba ndecivona TV.” Hama Samueri vano makumaviri o makore no gore rimwe, vakati: “Nguva jimweni ndinovona vhidhiyo jakawanda jino museswa mushoma mu Interineti. Ndinotanga ngo kuvona vhidhiyo imwe ,asi ndinozokanjamuka ndatopeja nguva jinodarika ndhatu kana murongomuna.”

¹⁷ Zvicinyi zvamungaita kuti mungwarire nguva yamunopeja ngo mabungaijo? Njira yokutanga ngo yo kuziva kuti munopeja nguva ngana mecibungaija. Toranyi phepha mutarire nguva jamunopeja mucivona TV, muri mu Interineti no kutamba gemi mu foni mwenyu. Izvi zviitenyi pa sumana imwe. Kudari mukavona kuti muri kupeja maningi nguva, ejanyi  kuita urongwa wo kutanga kuita zvinosisira maningi mopejisira ngo mabungaijo. Cokupejisira kumbiranyi Jehovha kuti amubesere kuteveja zviri pa urongwa wo maitaro. Mukaita kudaro munozowana nguva no simba ramunoda kuti muite jijo yo mundhu ega, kunamata ko mbhuri, muende ku musongano no kushandira Jehovha mu basa ro kucumaera. Izvi zvinomubeserazve kuti muve no hana yakagajana.

18-19. Tingakhombijisa kudini kuti tiri kunamata Jehovha ega basi?

¹⁸ Pakupera kutara ngo pamusoro po kupera ko nyika ya Sathana no kuvepo ko nyika imbza, mupostori Pedhru wakati: “Ngo ndava yabzo, hama jokudikana, ngari yo munogarira bzese ibzi, psakanyi kuwanika ndi Mwari, muri murunyararo, mucina uposi no ndava iriyese.” (2 Pedru 3:14) Patinopurukira ngwajo iyi no kuita zvese zvatinokwanisa kuti tive takacena mu zviro zvatinoita no kumujimu, tinokhombija kuti tinoda kunamata Jehovha ega basi.

¹⁹ Sathana no nyika yake vanoenderera mberi veciita zvese zvavanokwanisa kuti tisiye zviro zvinodikana kuitwa pa kutanga. (Luka 4:13) Asi pikija tecihwisana no zvineso, atizotenderi kuti ciri cese kana ariwese avhise cido cedu co kuda kunamata Jehovha. Tatema civaringo co kupa Jehovha zvaanofanera—kunamata iyena basi!