Mwanarume umweni anovonerera mugariro wo kunja, ecishandisa mucini unozwi radar, arikuvona pikica yecikura. Mucini uwu, urikuvonesa zibepo ziguru recikwedera ku ndau inogara vandhu vakawanda. Mwanarume uwu, arikuita zvese zvaanokwanisa kuti angwaje vandhu zibepo iri ricito raguma, ngokuti anoda kuti ivona vapone.

Inga mwanarume uwu, Jehovha arikungwaja vandhu ngo pamusoro po “zibepo” rakakurisisa ririkuviya, ricikazivi kumbonangwazve ngo vandhu vanovonerera mugariro wo kunja. Jehovha ari kungwajisa kudini vandhu? Tingavisa kudini no cokwadi co kuti Jehovha, arikupa vandhu nguva yakakwana kuti vaite ciricese? Ticito tadavira muvhunjo iji, ngativone ngwajo nganani jakapa Jehovha kareko.

Mu nguva jo Bhaibheri, Jehovha wakangwaja vandhu ngo pamusoro po mukhaindi no mukhaindi wo mbhepo jakavanga kana kutonga kwaaizotira vaya vacaida kumuzwira. (Mazwi Akangwara 10:25; Jeremia 30:23) Asi nguva jese iyena waingwaja vandhu avo nguva iciripo no kuvavhunja manera ovaidikana kukhombija ndiwona kuti vaimuzwira. (2 Majimambo 17:12-15; Neemia 9:29, 30) Kuitira kubesera kuti ivona vacinje, Jehovha kazinji waishandisa vashandiri vake vakagondeka kuti vazivise rutongeso hwake. Zvondhozvo zvaibesera vandhu kuti vazwisise kuti vaidikana kucinja ngo kukasika.—Amosi 3:7.

Umwe wo vashandiri avo vakagondeka ndi Nowa. Iyena wakacumaera ko makore akawanda ku vandhu vaiita zvo uhure no uphanga vo munguva jake zve wakavangwaja ngo pamusoro po kuviya ko Ndambi. (Genesi 6:9-13, 17) Zve wakavavhunja zvavaidikana kuita kuti vapone, zvokuti pa kufamba ko mukuvo wakazodanijwa ‘mucumaeri wo ururami.’—2 Pedru 2:5, Baiberi Mazwi Akacena aMwari.

Pikija no kuvangisira kwese kwa Nowa, vandhu avacaizwa zvaainanga. Ivona avazivi kutenda ngwajo yavaipuwa ndi Mwari ecishandisa Nowa. Ngo ndava yazvo, ivona vakapera kufa ‘usore [powakaza] wokukuta vese.’ (Mateu 24:39; Vaheberi 11:7) Apana na umwe hake waizonanga kuti Mwari aazivi kuvangwaja.

Pa vhaza jimweni, Jehovha wakavangwaja nguva iciripo acito aviisa rutongeso. Pikija zvakadaro, wakapa nguva yakakwana vandhu vaya vaizopsaswa ngo “zibepo” kuti vaiite ciri cese. Paakaviisira Vaejipita Gumi ro Matambujiko, Jehovha wakavangwaja nguva iciripo. Inga muezaniso, iyena wakatumira Mosi na Aroni kuti vangwaje Faro no vashandiri vake kuti dambujiko ro cisere, nvura yo mapuwe, yaizoviya mangwana zve yaizomosha zvizinji. Kureva kuti njiku imwe basi yaizokwana kuti vawane ndau yakajiviririka kuti vatiziremo here? Bhaibheri rinoti: “Varanda vamweni va Faro vakateveja mazwi a Tenji Mwari, vokasika kuviisa varanda vavo no bzifuyo bzavo pa muzi. Kaveta vaya vacikazivi kudira mu mwoyo izwi ra Tenji Mwari, vakaregera varanda no bzifuyo bzavo mu bani.” (Exodo 9:18-21) Zvakajeka kamare kuti Jehovha wakavapa nguva yakakwana kuti vashandiri va Faro vajinasirire. Vaya vakazwira avazivi kukhuvazwa ngo mbhepo iyi yakamoshari zviro zvizinji.

Cimwenizve, Faro no vashandiri vake, vakangwajwa dambujiko ro cigumi ricito ratanga. Asi, ivona vakaramba kuzwira. (Exodo 4:22, 23) Inga muviyo, vakavona kufa ko vana vavo vorume. Zvakava zvinosuruvaja kamare! (Exodo 11:4-10; 12:29) Kureva kuti ngwajo iyi yakaguma nguva  iciripo here? Hina! Mosi ngo kukasika wakavhunja Vaiziraeri ngo pamusoro po dambujiko ro cigumi zve wakadurujira zvovaidikana kuita kuti vapone. (Exodo 12:21-28) Vandhu vangana vakazwira ngwajo iyi? Mukuzwirana no zviverengo zvakaitwa, zvainga zviuru zvitatu zvo vandhu, kubatanijavo Vaiziraeri no ‘mutungwa wakavhengana’ wo vamweni vacaengepi Vaiziraeri pomwe no Vaejipita. Vese ava, avazivi kutongwa ndi Mwari zve vakabuda ku Ejipita.—Exodo 12:38.

Inga zvinokhombijwa ngo muezaniso iji, kuvhira kare Jehovha waipa vandhu nguva yakakwana kuti vazwire ngwajo jake. (Deuteronòmio 32:4) Waro zvicinyi zvakandundira Jehovha kuti aite kudaro? Mupostori Pedhru wakadurujira kuti Jehovha “aadi kuti mundhu afe, anoda kuti vese vaphinduke mwoyo.” (2 Pedru 3:9) Hina, Jehovha waireremeja maningi vandhu vakadaro. Iyena waida kuti vakhauye no kucinja mugariro wavo, rutongeso ucito waguma.—Isaia 48:17, 18; VaRoma 2:4.

Nyamasi uno, vandhu vese vari kungwajwa zve vanodikana kuita ciricese. Jesu paainga pasi pano, wakangwaja vandhu kuti nyika ino, yaizoparajwa pa ‘dambujiko guru.’ (Mateu 24:21) Iyena wakananga zvese zvaizovoniwa ngo vateveri vake no mugariro jovaizohwisana najo mukuvo uwo powaikwedera. Zvakanangari Jesu zviri kuitika mu nyika yese nyamasi uno.—Mateu 24:3-12; Luka 21:10-13.

Zvecivoneka kuti tiri kupona mu nguva iri kukwanirisika zvakanangari Jesu, Jehovha arikungwaja vandhu vese. Iyena anoda kuti vese vamushandire no kumuzwira, ngokuti vanozowana upenyu wakanaka wari no kuzokomborehwa mu nyika imbza. (2 Pedru 3:13) Jehovha anoda kuti vandhu vathembe zvigondiso zvake. Ngo iyo ndava, “vangeri iri ro Umambo” riri kucumaehwa vandhu vese. Jesu wakananga kuti masoko awo aizocumaehwa “pasi pese, [no] kuita ufakazi ku vandhu vese.” (Mateu 24:14) Mwari ari kuronga vashandiri vake kuti vaite “ufakazi,” kana kuti vacumaere masoko akanaka ku nyika jinokwana kuita 240. Jehovha anoda kuti vandhu vakawanda vapurukire ngwajo yaari kupa kuti vapone pa ‘zibepo’ guru riri kukwedera wari.—Sofonia 1:14, 15; 2:2, 3.

Cinodiwa maningi apa, asipi nguva inopa Jehovha kuti vandhu vazwe ngwajo jake. Inga zvotavona, nguva jese iyena anopa nguva yakakwana. Asi muvhunjo unomuka nga uwu: Kureva kuti vandhu vanopurukira ngwajo ya Mwari nguva iciripo here? Mwari wakatipa basa rinosisira maningi ro kucumaera masoko akanaka. Ngokudaro, itanyi zvese zvamunokwanisa kuti mubesere vandhu vakawanda kuti vazopone pa kuparajwa ko nyika ino.