1. Makristu akabhabhatijwa anodikana kuenderera mberi eciitenyi?

MAKABHABHATIJWA here? Kudari makabhabhatijwa, makavonesa pambhene kuti imwimwi muno rutendo kuna Jehovha zve munoda kumushandira no sangano * rake. Zvokadi kamare, rutendo hwenyu kuna Jehovha uri kuenderera mberi wecikura. Munodikana kuva no cokwadi cokuti Jehovha ari kushandisa sangano rake nyamasi uno.

2-3. Jehovha ari kutungamirira kudini sangano rake nyamasi uno? Ipanyi muezaniso.

² Nyamasi uno, Jehovha ari kutungamirira sangano rake mu njira inovonesa undhu hwake, cidisiso cake no ndhungamiriro jake. Ngatende tivone mugariro mutatu ja Jehovha jatingavona mu sangano rake.

³ Wokutanga, “Mwari aasani mundhu.” (Maitiro o Vapostori 10:34) Rudo wakaita kuti Jehovha ape mwana wake inga “ciriphwa co vese.” (1 Timoti 2:6; Johani 3:16) Jehovha anoshandisa vandhu vake kuti vacumaere masoko akanaka kuno vese vanoda kupurukira. Munjira iyi, iyena anobesera vese vanoda kubesereka ngo muripo kuti vapone. Wocipiri, Jehovha ndi Mwari wakarongeka zve wo runyararo. (1 VaKorinto 14:33, 40) Ngo kudaro, tinovetera kuti vanamati vake vamushandire ngo njira yakarongeka inga cikwata cino runyararo. Wocitatu, Jehovha i ‘Mujijisi Mukuru.’ (Isaia 30:20, 21) Izvi ndizvona zvinoitisa kuti sangano rake ribatikane maningi pa kujijisa mu ungano no mu basa ro kucumaera. Waro Makristu o muzana ro kutanga, akatevejeresa kudini  mugariro mutatu iji ja Jehovha? Vandhu va Jehovha nyamasi uno, vari kutevejeresa kudini mugariro iji? Zve mujimu mucena ungamubeseresa kudini pamunonga mecishanda no sangano ra Jehovha nyamasi uno?

4. Pana Maitiro o Vapostori 1:8, Jesu wakavhunja vateveri vake kuti vaitenyi zve vaizoashira muembejeri wapi?

⁴ Muzana ro kutanga ro makore. Masoko aicumaehwa ndi Jesu akapa vetero vandhu vese. (Luka 4:43) Iyena wakavhunja vateveri vake kuti vaenderere mberi veciita basa raakatanga, kuti vacumaere “mbhera ku magumo o nyika.” (Verenganyi Maitiro o Vapostori 1:8.) Zvokadi kamare, ivona avacaizokwanisa kuita basa iri vecithemba simba ravo. Ivona vaizoda “muembejeri,” mujimu mucena uwo wakagondeswa ndi Jesu.—Johani 14:26; Zakaria 4:6b.

5-6. Mujimu mucena wakabeseresa kudini vateveri va Jesu?

⁵ Vateveri va Jesu vakaashira mujimu mucena pa pentekoste yo 33 Kristu Aviya. Ngo besero ro mujimu wondhowo, ngo kukasika ivona vakatanga kucumaera, pa mukuvo mushoma basi mamirioni o vandhu akaashira masoko akanaka. (Maitiro o Vapostori 2:41; 4:4) Pavakatanga kuteverehwa, vajiji avazivi kuthya asi vakapsaka Mwari kuti avabesere. Ivona vakakumbira kudari: “Ipanyi varanda venyu simba ro kukwanisa kutokotesa izwi renyu ngo [cicunge].” Ivona vakazara ngo mujimu mucena zve “voamba kutokotesa izwi ra Mwari vacingathyi.”—Maitiro o Vapostori 4:18-20, 29, 31.

⁶ Vajiji va Jesu vakasoganovo no zvineso zvimweni. Inga muezaniso, ivona avacaingepi no makhopi akawanda o Matahwa. Avacaingepi no mabhuku aisanangura Bhaibheri inga otinawo wari nyamasi uno. Zve vaidikana kucumaera vandhu vaibhuya ndumi jakasiyana-siyana. Pikija no zvineso zvese izvi, vakaita zviro zvaivoneka inga kuti azvicaizokwanisika. Ivona vakacumaera masoko akanaka “ku bzisikwa bzese bziri mu nyika ino.”—VaKolosi 1:6, 23.

7. Pa zana ro makore akakhirira, vashandiri va Mwari vaizvizivisa kudini zvinoda Mwari kwavari zve ivona vaitenyi?

⁷ Munjiku jedu jino. Jehovha aciri kutungamirira no kuvangisa vandhu vake. Kazinji iyena anotungamirira vandhu vake ecishandisa Bhaibheri, iro rakafemehwa ngo mujimu mucena kuti ritahwe. Mu Bhaibheri tinowana zvizinji ngo pamusoro po mushando wa Jesu no mupango waakapa ku vateveri vake kuti vaenderere mberi no basa raakatanga. (Mateu 28:19, 20) Murindiri wa Julho wo 1881, wakananga kudari: “Atizivi kudanwa, nee atizivi kuzojwa kuti tiashire nderemejo no kuunganija upfumi, asi tishandise zvese zvatinazvo kuti ticumaere masoko akanaka.” Cibhuku cimweni cainga cino musoro waiti: Basa Iri Rakapuwa Ani? cakabudiswa muna 1919, cakati: “Basa iri rinoita inga rinothyisa, asi ngora tenji, ngo simba rake itusu tinoriita. Imwimwi muno cidakajiso cokuitavo basa iri.” Hina, inga Makristu o muzana ro kutanga, hama iji jainga no cicunge zve jaishanda ngo simba ngokuti ijona jaithemba kuti mujimu mucena waizojibesera kuti jicumaere kumushovo wese wo vandhu. Itusuvo tinothemba kuti mujimu mucena unozotibeseravo nyamasi uno.

8-9. Sangano ra Jehovha rakashandisa njira japi kuti rikawanise kucumaera masoko akanaka pasi pese?

⁸ Sangano ra Jehovha rinoshandisa mathurusi akanakisisa kuti rizivise masoko akanaka. Mathurusi ondhoo anobatanija mabhuku akadhindhwa, “Fotodrama da Criação,” magramafoni, karu jo izwi, radhio no zvizinji zviri kushandiswa nyamasi uno zvakadari inga komputadhori no interneti. Sangano ra Mwari riri kusandujavo mabhuku mu ndumi jakawanda maningi kupinda kare! Ngenyi? Ngokuti vandhu vese vangazwa masoko akanaka ngo ndumi yavo. Jehovha aakheti vandhu; iyena wakananga kuti masoko akanaka aizocumaehwa “ku vandhu vese, nyika,  majinja, ndimi no mabvumbo ese.” (Apokalipsi 14:6, 7) Iyena anoda kuti masoko o umambo agumire vandhu vese.

⁹ Tingativo kudini kuno vaya vakapfuma vanorarama mu ndau jakangwaririka? Kuti vandhu ava vakwanise kucumaehwa, Jehovha wakabesera sangano rake kuti ritange kushandisa njira jakasiyana-siyana jo kucumaera ko pambhene. Inga muezaniso, mu gore ra 2001 Mukhumbi Unotonga wakatendera kuti hama jo Fransa jitange kucumaera jecishandisa karinya no njira jimweni jaiita kuti vandhu vakwanise kuwana mabhuku. Pa kufamba ko nguva hama mu nyika jimweni jakatanga kushandisa njira iji jo kucumaera. Muviyo wakava waushoni, manera aya okucumaera akabudirira ushoni. Mu gore ro 2011 ku Estadhos Unidhus kwakatanga urongwa wo kucumaera mu ndau yakawanda vandhu mu madhorobha makuru o Novha Yorki. Mu gore rokutanga, mabhuku aikwana kuita 102.129 no marevhista aikwana kuita 68.911 akabudiswa. Vandhu vaikwana kuita 4.701 vakakumbira kujija Bhaibheri. Zvakajeka kuti mujimu mucena waitungamirira basa iri. Ngokudaro, Mukhumbi Unotonga wakatendera hama no hambzaji kutenderera pasi pese kuti vashandise njira iyi yo kucumaera.

10. Zvicinyi zvatingaita kuti tiitise nane kucumaera kwedu?

¹⁰ Zvamungaita. Pa musongano jo Cikristu Jehovha anotijijisa manera okucumaera. Shandisanyi zvamunojijiswaro. Nguva jese shandanyi pamwepo no cikwata cenyu co kucumaera. Hama no hambzaji jo cikwata cenyu, jingamubesera kuti muve mucumaeri waushoni, mujijisi waushoni no kumuvangisa ngo muezaniso wavo. Endereranyi mberi mecicumaera pikija no zvineso. Inga zvinonangwa pa vhesi yo musoro uwu, tinokwanisa kuita zvinoda Mwari ngo kubesehwa ngo mujimu mucena kuciripi ngo simba redu. (Zakaria 4:6b) Kusiyapo zvese izvi, tiri kuita basa ra Mwari.

11. Mukhumbi unotonga wo muzana ro rokutanga ro makore wakaitenyi kuti zviro zvirambe zvakarongeka pakati po vandhu va Mwari?

¹¹ Muzana ro kutanga ro makore. Mukhumbi unotonga wo Jerusarema wakashanda wakabatana kuti zviro zvive zvakarongeka no runyararo  pakati po vandhu va Mwari. (Maitiro o Vapostori 2:42) Inga muezaniso, shwiro yo kusokwa payakamuka mu gore ro 49 Kristu Aviya, mukhumbi unotonga, wecitungamirihwa ngo mujimu mucena wakabhuisana ngo pamusoro po shwiro iyi. Kudari ungano jairamba jakaparajana ngo pamusoro poshwiro iyi, basa ro kucumera aricaizoenderera mberi. Pikija painga no Vajudha, vapostori no vakuru avazivi kukwevejehwa ngo zvirovejeso zvo Vajudha kana majijisiro avo. Kusiyapo izvo, ivona vaisota Soko ra Mwari no kukumbira mujimu mucena kuti uvabesere kutema zvivaringo zvaushoni. (Maitiro o Vapostori 15:1, 2, 5-20, 28) Ngowapi wakava muviyo wakona? Jehovha wakakomborera cisungo cavo, zvokuti runyararo no kubatana kwakaramba kuripo zve vakaramba vecicumaera masoko akanaka.—Maitiro o Vapostori 15:30, 31; 16:4, 5.

12. Nyamasi uno, ngozvapi zvinokhombija kuti mu sangano ra Jehovha mwakarongeka zve muno runyararo?

¹² Munguva jino. Sangano ra Jehovha rakabesera vandhu va Jehovha kuti varambe vakarongeka no runyararo. Muna 1895, A Torre de Vigia de Sião no Arauto da Presença de Cristo wo 15 ya Novembro, zvainga no musoro waiti: “Kureremejana no kurongeka,” waicijikira pa 1 VaKorinto 14:40. Wainanga kudari: “Vapostori vakatara zviro zvizinji kuungano ngo pamusoro po kurongeka . . . Zvinosisira maningi kunasa kupurukira ‘zvakatahwa kare kuti zvititungamirire.’” (VaRoma 15:4) Sangano ra Jehovha nyamasi uno, riri kushanda ngo simba kuti ungano yo Cikristu ive yakarongeka no runyararo inga mu nguva yo Makristu o kutanga. Inga muezaniso, kudari imwimwi munoda kuvona Jijo yo Murindiri ku ungano imweni kana ku nyika imweni imwimwi munozviziva kuti jijo iyi inozoitiswa kudini zve munozivazve no musoro unozojijwaro. Ngo kudaro, munozojizwa makasujunuka. Mujimu mucena wa Mwari ndiwona basi ungaita kuti pave no rubatano hwakadari.—Sofonia 3:9.

13. Tecirangarira zvinonangwa pana Jakobo 3:17, tinodikana kujiita muvhunjo japi?

¹³ Zvamungaita. Jehovha anoda kuti vandhu vake ‘vagare no mujimu umwewo, ngo rubatano no rugarisiko.’ (VaEfeso 4:1-3) Ngo kudaro, jivhunjisenyi kudari: ‘Inini ndinoita kuti ungano irambe ino rubatano no runyararo here? Ndinozwira vaya vanotungamirira here? Kudari  ndino mutoro muungano kunanga kuti vamweni vanondithemba here? Ndiri mundhu anokasika kuguma, anobesera zve ano cido co kushanda here?’ (Verenganyi Jakobo 3:17.) Kudari mungavona kuti paripo pamungaitisa nane, kumbiranyi besero ro mujimu mucena. Pamunotendera kuti iwona ucinje undhu hwenyu no zviito, hama no hambzaji mu ungano vanozomuda maningi no kumureremeja.

14. Mukuzwirana no VaKolosi 1:9, 10, Jehovha waijijisa kudini Makristu okutanga?

¹⁴ Muzana ro kutanga ro makore. Jehovha anoda maningi kujijisa vandhu vake. (Nduyo 32:8) Iyena anoda kuti ivona vagume pakumuziva, vamude zve vapone kwenda no kwenda inga vana vanodiwa. Zvese izvo zvaizova zvicikakwanisiki pacina jijiso inovha kwaari. (Johani 17:3) Jehovha wakashandisa ungano yo muzana ro kutanga kuti ajijise vandhu vake. (Verenganyi VaKolosi 1:9, 10.) Mujimu mucena uwo uri “muembejeri” wainga wakagondiswa ndi Jesu, wakabesera maningi. (Johani 14:16) Mujimu mucena wakabesera vajiji va Jesu kuti vazwisise Soko ra Mwari no kuvaceuja zvese zvakanangwa no kuitwa ndi Jesu, pa kufamba ko nguva zvakazotahwa mu mavhangeri. Zivo iyi yakavangisa rutendo hwo Makristu okutanga. Yakavangisazve rudo hwavo kuna Mwari, kuno Mwana wake no ku umwe no umweni.

15. Munjira japi makavona kukwanirisika ko cigondiso ca Jehovha cinowanika pana Isaia 2:2, 3?

¹⁵ Munguva jino. Jehovha wakananga kuti “mu njiku jokupejisira” vandhu vo majinja ese vaizokhwira pa dundhu ro kuezanisira kuti vajijire makwanja ake. (Verenganyi Isaia 2:2, 3.) Itusu tiri kuvona kukwanirisika ko ciporofita ici. Tiri kuvona kuti kunamata ko cokwadi kwakanaka maningi kupinda kunamata ko kunyepa. Jehovha ari kupa vandhu vake zvokuha zvo umwari zvakacijikira mu Bhaibheri. (Isaia 25:6) Iyena anoshandisa “muranda wakagondeka no wakangwara,” kuti atipe zvokuha zvakawanda kudari,  zvinoviya ngo mu njira jakasiyana-siyana. Inga muezaniso, tingaverenga marevhista kana mabhuku, tingapurukira hurukuro jakagaravhahwi no kuvona vhidhio. (Mateu 24:45) Tingatovavo no mazwiro akafanana no akava no shamwari ya Jobe, Erihu, uwo wakati: ‘Ngo wapi mujijisi wakaezana na [Mwari]?’—Jobe 36:22.

16. Zvicinyi zvamungaita kuti mubesereka ngo jijiso ja Jehovha?

¹⁶ Zvamungaita. Mujimu mucena wa Mwari unozomubesera kushandisa zviya zvamunoverenga no kujija mu Soko rake. Itanyi mukumbiro inga wakaithwa ngo mutari wo nduyo paakati: “Ndijijisenyi makwanja enyu, Tenji Mwari, ndinozofamba ngokuteveja bzokadi bzenyu ndipenyi mwoyo unopurukira, kuti ndithye zina renyu.” (Nduyo 86:11) Cimwenizve, endereranyi mberi meciverenga no kujija Bhaibheri no mabhuku amweni anobudiswa ngo sangano ra Jehovha. Zvokadi kamare, cido cenyu asipi cokuda kuva no zivo basi. Ngo cokuda kudira cokwadi mu mwoyo menyu no kuzvishandisa mu upenyu. Mujimu mucena wa Jehovha ungazomubesera kuita zvondhozvo. Imwimwi mungavangisa hama no hambzaji jenyu. (Vaheberi 10:24, 25) Ngenyi? Ngokuti ivona i mbhuri yenyu yo kumujimu. Kumbiranyi Mwari kuti amupe mujimu mucena kuti mupe mupinguro jaushoni pa musongano no kuita zvese zvamunokwanisa kuti muite ushoni mativi enyu. Ngo kuita kudaro, munoga mecikhombijira Jehovha na Jesu kuti imwimwi munoda maningi “bzimabvuta” zvavo.—Johani 21:15-17.

17. Mungakhombija ngo njira japi kuti muri kubesera makagondeka sangano ra Jehovha?

¹⁷ Sambiri pano, pasi pano panozova no sangano rimwe basi recitungamirihwa ngo mujimu wa Mwari. Ngokudaro, shandanyi pamwepo no sangano ra Jehovha. Vonesanyi kuti imwimwi munoda vandhu vese inga Mwari, ngo kucumaera masoko akanaka ku vese vamunosongana navo. Tevejeranyi rudo hwake ngo kuva makarongeka no runyararo ngo kumusijira rubatano mu ungano. Purukiranyi mujijisi wenyu mukuru ngo kujijira zvese zvaanotipa. Nyika ya Sathana painozoparajwa imwimwi amuzothyi. Kusiyapo zvondhozvo, munozova makacunga no makaima pakati po vaya vanoshandira Jehovha vakagondeka.