1. Tinozvizivisa kudini kuti basa ro kuita vajiji rinoponesa upenyu hwo vandhu?

BASA rokuita vajiji, i basa ro kuponesa upenyu hwo vandhu. Tinozvizivisa kudini izvi? Jesu paakapa mupango unowanika pana Mateu 28:19, 20, iyena wakati: “Endanyi, jijisanyi vandhu vese no kuvabapatiza.” Ngenyi kubhabhatijwa kunosisira? Tinodikana kubhabhatijwa kudari tecida kupona kwenda no kwenda. Mundhu anoda kubhabhatijwa, anodikana kuva no rutendo wokuti ruponeso hunokwanisika basi ngokuti Jesu wakatifira no kumuswa. Izvo ndizvona zvakaitisa kuti mupostori Pedhru avhunje Makristu doni ake kudari: “Rubapatizo hunomuponesa nyamasi . . . ngo ndava yo kumuka ka Tenji wedu Jesu Kristu.” (1 Pedru 3:21) Ngokudaro, mujiji mupsa paanobhabhatijwa, angava no vetero yo kupona kwenda no kwenda.

2. 2 Timoti 4:1, 2, inonanga kuti tinodikana kuva vajijisi vo mushovonyi?

² Kuti tiite vajiji, tinodikana kuva vajijisi vaushoni. (Verenganyi 2 Timoti 4:1, 2.) Ngenyi? Ngokuti Jesu, wakativhunja kudari: “Endanyi, jijisanyi.” Mupostori Pauro wakananga kuti ‘vanganyi mucikarembi’ mu basero, ‘mukaita kudaro munozopona imwimwi, moponesavo vanomupurukira.’ Izvo zvakamuitisa kuti iyena anange kudari: ‘Rindanyi majijisiro [enyu].’ (1 Timoti 4:16) Zvecivoneka kuti tinoda kujijisa vandhu, majijisiro edu anodikana kuva aushoni.

3. Pa musoro uno, ngozvapi zvatinozojija ngo pamusoro po kuitisa jijo jo Bhaibheri?

³ Nguva jese, itusu tinojijisa zviuru no zviuru zvo vandhu zvokadi zvinowanika mu Bhaibheri. Asi, inga zvotavona pa musoro waperari,  tinodikana kuziva manera atingavabesera ndiona kuti vagume pa kuva vajiji va Kristu vakabhabhatijwa. Pa musoro uu, tinozovona zviro zvishanu zvinodikana kuitwa ngo mujijisi wese kuti abesere mujiji wake kuti aenderere mberi mbhera kobhabhatijwa.

4. Ngenyi mujijisi wo Bhaibheri, aadikani kuvereketa maningi paanonga ecijijisa? (Vonanyi masoko o pasi.)

⁴ Tinoda maningi zvatinojijisa kuvha mu Soko ra Mwari. Ngo kudaro, tingatoda maningi kubhuya ngo pamusoro pazvo. Pikija zvakadaro, muitisi wo Murindiri no anoitisa jijo yo Bhaibheri yo ungano kana ano jija no mundhu Bhaibheri aadikani kuvereketa maningi. Mujijisi umwe nga umwe, anodikana kushandisa Bhaibheri kuti jijo yake ibudirire, asi, anodikana kungwarira kuti atame kuvereketa maningi. Acadoeja kusanangura zvese zvaanoziva ngo pamusoro po Bhaibheri kana shwiroyo. * (Johani 16:12) Ezanisanyi uzivi hwo Bhaibheri hwo makava nawo mucito mabhabhatijwa no wamunahwo wari. Pomakazoguma pa kubhabhatijwa, kangaije maizwisisa basi jijiso jokutanga jo Bhaibheri. (Vaheberi 6:1) Kangaije zvakamutorera makore akawanda kuti mugume pa kuva no zivo yamunayo wari nyamasi, ngokudaro, mucaeja kumujijisa zvese zvamunoziva ngo njiku imwe basi.

5. (a) Mukuzwirana na 1 VaTesalònika 2:13, tinoda kuti mujiji wedu wo Bhaibheri azwisisenyi patinonga tecijija naye? (b) Tingavangisa kudini mujiji wedu wo Bhaibheri kuti abhuye ngo zvaari kujijaro?

⁵ Tinoda kuti vajiji vedu vo Bhaibheri vazwisise kuti zvovari kujijaro, zviri kuvha mu Soko rakafemehwa ra Mwari. (Verenganyi 1 VaTesalònika 2:13.) Tingaizviitisa kudini izvi? Vangisanyi mujiji wenyu wo Bhaibheri kuti abhuye ngo zviro zvaari kujijira. Kusiyapo kugara mucimusanangurira vhesi jamunowana mu ndima yamuri kujija, mukumbirenyi kuti asanangure vhesi jimweni jiri mukatimo. Beseranyi mujiji wenyu avone kuti Bhaibheri ringamubeseresa kudini pacake. Muitenyi muvhunjo jinozomubesera kuti akwanise kunanga zviro zvaanorangarira no zvaanozwa ngo pamusoro po vhesi jaaverengaro. (Luka 10:25-28) Inga muezaniso, muvhunjisenyi kudari: “Vhesi iyi yomaverengari, inomubeseresa kudini kuti mukwanise kuvona mugariro ja Jehovha?” “Zviro zvamuri kujijari kuvhira mu Bhaibheri zvingamubeseresa kudini?” “Munozwa kudini ngo zvamuri kujijari?” (Mazwi Akangwara 20:5) Zvinosisira maningi asipi zivo yakakura yaanayo, asi, i rudo hwaanahwo no mashandisire aanoita zvaanozivaro.

6. Ngenyi zvinosisira maningi kutora mucumaeri ano ruzivo kuti muende naye ku jijo yenyu yo Bhaibheri?

⁶ Kureva kuti munotoravo mucumaeri waano ruzivo kuti muende naye koitisa jijo yenyu  here? Kudari munoita zvondhozvo, mungapsaka mavonero ake ngo pamusoro po majijisiro amuri kuita no kuda kuziva kuti dangani muri kunasa kushandisa Bhaibheri pamunonga mecijijisa. Kudari mucida kuva mujijisi waushoni, munodikana kujidodokesa. (Ezanisanyi no Maitiro o Vapostori 18:24-26.) Mungatoshandisazve mukana wondhowo kuti muvhunjise mucumaeri wiya, dangani ari kuvonavo zviri zvese zvinokhombija kuti mujiji wenyu ari kuzwisisa zvaari kujijari kana kuti haiwa. Mungamukumbirazve kuti aitise jijo yenyu yo Bhaibheri kudari imwimwi amuzovipo ko sumana jakati kuti. Izvo zvinozoita kuti jijo yenyu ienderere mberi zve zvinozokhombija ku mujiji wo Bhaibheri kuti kujija Bhaibheri kunosisira maningi. Mucarangarira kuti iyi, “jijo” yenyu zvokuti apanazve na umwe anodikana kuiita. Kusiyapo zvese izvi, imwimwi munoda zvinosisira maningi ku mujiji wenyu. Ngokudaro, kuti aenderere mberi, anodikana kujija zvizinji ngo pamusoro po cokwadi.

7. Zvicinyi zvinozobesera mujiji kuti adakajihwe ngo zvaari kujijaro?

⁷ Mujiji anoda kuvona kuti imwimwi munoda no kutenda zvamuri kujijisaro kuvhira mu Bhaibheri. (1 VaTesalònika 1:5) Mukadaro, iyena anozodakajihwa maningi ngo zvaari kujijaro. Kudari zvecidiwa muvhunjenyi manera o makabesereka kamare pacenyu ngo kushandisa ndhungamiro jo Bhaibheri. Perapo, iyena anozozwisisa kuti Bhaibheri rino ndhungamiro jinoshanda jingamubeseravo.

8. Zvicinyi zvamungaitazve kuti mubesere mujiji wenyu wo Bhaibheri zve ngenyi munodikana kuita kudaro?

⁸ Pamunonga meciitisa jijo jo Bhaibheri, vhunjanyi mujiji wenyu muezaniso jo vandhu vakasongana no zvineso zviri kusonganaro naye no manera o vakakwanisa kuzvinyisa. Kangaije mungatoenda no hama imwe yo muungano yenyu ino muezaniso ungakwanisa kubesera mujijiwo. Kana mungatowana muezaniso jinovangisa mu jw.org pa mutevejwana unoti: “Bhaibheri Rinochinja Upenyu,” * mu Cishona. Musoro jondhojo no mavhidhiyo zvinozobesera mujiji wenyu kuvona kuti ngo zvo ungwaru kushandisa ndhungamiro jo mu Bhaibheri mu upenyu hwake.

9. Mungavangisa kudini mujiji wenyu kuti avhunje mbhuri yake no shamwari zvaari kujija?

⁹ Kudari mujiji wenyu wakarovora kana kurovohwa, kunanga kuti mudoni wake ari kujijavo here? Kudari aaripi, mukokenyivo kuti aviye kojija. Vangisanyi mujiji wenyu kuti avhunjevo  mbhuri yake no shamwari zvaari kujijaro. (Johani 1:40-45) Angazviitisa kudini? Mu njira yakareruka mungamuvhunjisa kudari: “Maizosanangurisa kudini cokwadi ici ku mbhuri yenyu? Kana kuti, “Maizoshandisa vhesi yapi kuti mukhohwese shamwari yenyu ngo pamusoro po shwiro iyi?” Mukaita kudaro, munonga meciroveja mujiji wenyu kuti ave mujijisi. Perapo, paanonga ecikwanisa ushoni, iyena angatanga kucumaera no ungano inga mucumaeri acizivi kubhabhatijwa. Mungatovhunjisavo mujiji wenyu dengani anozivavo ariwese anoda kujija Bhaibheri. Kudari aciziva mundhu ariwese, psakanyi mundhuwo ngo kukasika kuti mutange kujija naye Bhaibheri. Mukhombijenyi vhidhiyo inoti: Zvicinyi Zvinoitwa pa Jijo yo Bhaibheri? *

10. Inga zvinosananguhwa pana 1 VaTesalònika 2:7, 8, mujijisi angatevejeresa kudini muezaniso wa Pauro?

¹⁰ Vajijisi vanodikana kuneseka kamare ngo vajiji vavo, vavonenyi kuti vanozova hama no hambzaji kumbejiyo. (Verenganyi 1 VaTesalònika 2:7, 8.) Zvinovanesera maningi kusiya shamwari javo jo nyika kakuita cinjo jese jinodikana kuti vashandire Jehovha. Tinodikana kuvabesera kuti vawane shamwari jokadi mu ungano. Ivanyi shamwari yo mujiji wenyu ngo kupeja nguva naye. Asi, mucazviita basi pamunonga mucijija Bhaibheri, zviitenyi pa nguva imwenivo. Mufonerenyi, kumutarira mensajhi kana kutomuvhakacira pa mukuvo wakati kuti, kuitira kuvonesa kuti munoneseka ndiyena.

11. Tinoda kuti vajiji vedu vo Bhaibheri vawanenyi mu ungano zve ngenyi?

¹¹ Vandhu vamweni vanonanga kudari: “Ano nyara mbiri aapsi ngo muto wo nyemba.” Tingatonanga kudari: “Ungano yese ingabesera vajiji vapsa.” Ngokudaro, vajijisi vaushoni vo Bhaibheri vanobesera vajiji vavo kuti vakwanise kuziva hama mu ungano. Hama jondhojo, jingazobeseravo kuti mujiji uu akwedere phedo kuna Jehovha. Vajiji vondhovo, vangatodakaravo ngo kuva pamwepo no vandhu va Mwari avo vanovabeseravo kuti vakure mu divi ro kumujimu no kukwanisa kuhwisana no zvineso zvavanosongana nazvo. Tinoda kuti mujiji umwe nga umwe ajizwe kuti ari divi ro ungano, no kutizve ari divi ro mbhuri yedu yo kumujimu. Tinoda kuti mujiji wedu ajizwe ushoni paanonga pamwepo no hama no hambzaji jedu. Ngokudaro, zvinozomurerukira maningi kuti atamezve kushamwarijana no vandhu vacikamubeseri kuti ade Jehovha. (Mazwi Akangwara 13:20) Kudari shamwari jake jo kare jikaramba kushamwarijana naye, anozoziva kuti angakwanisa kuwana shamwari jokadi mu sangano ra Jehovha.—Marco 10:29, 30; 1 Pedru 4:4.

12. Ngenyi tinodikana kubhuya ngo pamusoro po kujipira no kubhabhatijwa ku mujiji wedu wo Bhaibheri?

¹² Munodikana kubhuya ko vhaza jakawanda ngo pamusoro po kusisira ko kujipira kuna Jehovha no kubhabhatijwa. Cinangwa cedu ngo co kumubesera kuti agume pakuva mujiji wakabhabhatijwa. Pakupera kujija ko mweji jakati kuti no kwenda kumusongano, iyena anodikana kuzwisisa kuti tiri kumubesera kuti agume pa kuva umwe wo Zvapupu zva Jehovha.

13. Ngozvapi zvinodikana kuitwa ngo mujiji kuti aenderere mberi mbhera kubhabhatijwa?

¹³ Kuno zviro zvakawanda zvinodikana kuitwa ngo mujiji wo Bhaibheri kuti agume pa kubhabhatijwa. Cokutanga, mujiji anodikana kuziva, kuda no kuva no rutendo kuna Jehovha. (Johani 3:16; 17:3) Tevere anodikana kuva no ushamwari naye no kutanga kubatana no ungano. (Vaheberi 10:24, 25; Jakobo 4:8) Padoko ngo padoko, mujiji anotanga kusiya kuita zviro zvakashata no kukhauya ku zvishaishi zvake. (Maitiro o Vapostori 3:19) Cimwenizve, iyena anovhunja vamweni ngo pamusoro po zvokadi zvo Bhaibheri zvaajija. (2 VaKorinto 4:13) Pejisire, anopira upenyu hwake kuna Jehovha no kubhabhatijwa. (1 Pedru 3:21; 4:2) Iyo, inonga iri njiku inodakajisa vandhu vese! Mujiji paanonga aciita ciri cese kuti akwanirise cido cake cokuda kubhabhatijwa, musimbenyi, hina kumusimba kamare no kumuvangisa kuti aenderere mberi mu gwanja rondhoro.

14. Mujijisi angasotesesa kudini kuenderera mberi ko mujiji wake?

¹⁴ Tinodikana kuva vandhu vanosengerera patinonga tecibesera mujiji wedu kuti aenderere mberi mbhera ajipire no kubhabhatijwa. Asi, ngo divi rimweni, tinodikana kuvona kuti dengani anoda kushandira Jehovha kana kuti haiwa. Muri kuvona zviri zvese zvinokhombija kuti mujiji wenyu ari kueja kuzwira mupango ja Jesu? Kana, kunanga kuti iyena anoda kujijira basi zvinonangwa mu Bhaibheri?

15. Ngozvapi zvinokhombija ku mujijisi kuti mujiji wake ari kwenderera mberi?

¹⁵ Nguva jese sotanyi kwenderera mberi kuri kuitwa ngo mujiji wenyu. Inga muezaniso, iyena anobhuya mazwiro aanao na Jehovha? Anoita mukumbiro kuna Jehovha? (Nduyo 116:1, 2) Anodakarira kuverenga Bhaibheri? (Nduyo 119:97) Anoviya kumusongano nguva jese? (Nduyo 22:23) Waita cinjo iri yese inokhombija kuti ari kushandisa zvaari kujija? (Nduyo 119:112) Ari kutanga kuvhunja mbhuri yake no shamwari zvaari kujija? (Nduyo 9:2) Ciro cinosisira maningi nga  ici, kunanga kuti anoda kuva umwe wo Zvapupu zva Jehovha? (Nduyo 40:9) Kudari mujiji wenyu aaripi kuenderera mberi mu njira jese janangwari apa, ngo nderemejo yese, ejanyi kuvona kuti ngenyi zviri kuitika kudaro. Perapo, bhuyanyi naye mu njira yo rudo asi, mucikasiki-siki. *

16. Ngozvapi zvinokhombija kuti jijo yo Bhaibheri inodikana kujamiswa?

¹⁶ Nguva jese jivhunjisenyi dengani munodikana kuenderera mberi mucijija no mundhu ari wese. Jivhunjisenyi kudari: ‘Kunanga kuti mujiji wenyu, anonasirira kuitira jijo yamunoda kuita here? Kureva kuti iyena aacina cidaka-daka co kuviya ku musongano here? Kureva kuti acino zvirovejeso zvakashata here? Aciri kuita divi ro ciyara co manyepo here?’ Kudari mukadavira kuti hina pa muvhunjo iji, zvinovonesa kuti kwenderera mberi mucijija naye, zvaizodari inga kueja kujijisa mundhu kusambira kuveni iyena aadi. Kudari mujiji aabongeseri ngo zvaari kujija zve aadi kuita cinjo, apana dikano yo kwenderera mberi mucijija naye.

17. Mukuzwirana na 1 Timoti 4:16, vajijisi vese vo Bhaibheri vanodikana kuitenyi?

¹⁷ Kwatiri zvinosisira maningi kukwanirisa basa ro kuita vajiji. Zvokadi tinoda kuti vajiji vedu vo Bhaibheri vaenderere mberi mbhera kubhabhatijwa. Ndizvona zvinoitisa kuti tishandise Bhaibheri patinonga ticijijisa no kukhombija kuti tinoda no kuthemba zvatinojijisaro. Tinoda kuvangisa vajiji vedu kuti vave no shamwari mu ungano. Cimwenizve, tinogogomejera maningi dikano yo kujipira no kubhabhatijwa pomwe no kusotesesa manera aari kuenderera mberi. (Vonanyi bhokiso rinoti: “ Vajijisi Vanodikana Kuitenyi Kuti Vajiji Vavo Vagume pa Kubhabhatijwa.”) Tinodakara maningi ngo kuita divi ro basa iri rinoponesa upenyu. Tinoda kuita zvatinokwanisa kuti tibesere vajiji vedu vo Bhaibheri kuti vagume pa kubhabhatijwa.