1. 2 VaKorinto 3:1-3 inotibeseresa kudini kuti tireremeje cidakajiso co kujijisa vandhu Bhaibheri mbhera kuguma pa kubhabhatijwa? (Vonanyi pikica yo pa kapa.)

NGOAPI mazwiro amunova nawo pamunovona mujiji wo ungano yenyu eciguma pa kubhabhatijwa? Ngo zvokadi kuti imwimwi munodakara maningi! (Mateu 28:19) Kudari imwimwi nomaijija naye, maizodakara maningi ngo kumuvona acibhabhatijwa. (1 VaTesalònika 2:19, 20) Ngo kudaro, vavharo kubhabhatijwa vanodanijwa ‘matsamba o kuinikira’ kuno vavajijisaro no kuno ungano yese.—Verenganyi 2 VaKorinto 3:1-3.

2. (a) Ngowapi muvhunjo unosisira watinodikana kujiita zve ngenyi? (b) Icinyi jijo yo Bhaibheri? (Vonanyi masoko o pasi.)

² Zvinodakajisa maningi kuvona kuti pa makore marongomuna adarika, mutengo unokwana kuita 10.000.000 o jijo jo Bhaibheri * jairipotwa mweji jese kutenderera pasi pese. Pa makore ondhoo, mutengo unopindirija 280.000 vaibhabhatijwa gore rimwe nga rimwe inga Zvapupu zva Jehovha zve vova vajiji vapsa va Jesu Kristu. Waro tingabeseresa kudini mamirioni o vajiji o Bhaibheri kuti vagume pa kubhabhatijwa? Jehovha acapa mukana vandhu kuti vagume pa kuva Zvapupu zvake. Ngaizvona zvinotiitisa kuti tiite zvese zvatinokwanisa pa kubesera kuti vakasike  kubhabhatijwa. Nguva iri kupera ngo kukasika!—1 VaKorinto 7:29a; 1 Pedru 4:7.

3. Zvicinyi zvatinozovona pa musoro uwu ngo pamusoro po kuitisa jijo jo Bhaibheri?

³ Zvecivoneka kuti zvinosisira maningi kuita vajiji wari uno, Mukhumbi Unotonga unopsaka kuziva no mabheteri zvineso zviripo kuti itusu tikwanise kubesera vajiji vedu vo Bhaibheri mbhera kubhabhatijwa. Musoro uwu no unoteverari, tinozovona kuti tinojijenyi ngo muezaniso wo mapiyona, mamisionario no vavonereri vo ndharaundha. * (Mazwi Akangwara 11:14; 15:22) Musoro muviri iji jinosanangura zvinodikana kuitwa ngo vajijisi no vajijivo kuti jijo yo Bhaibheri ibudirire ushoni. Mu musoro uwu, tinodovona zviro zvishanu zvinodikana kuitwa ngo vajiji vese kuti vakwanise kwenderera mberi mbhera kubhabhatijwa.

4. Tinodikana kuzivenyi ngo pamusoro po jijo yo Bhaibheri inoitwa pa musuvo wo mune wo muzi?

⁴ Hama no hambzaji jedu zinji jiri kujija Bhaibheri no vandhu pavanonga vakaima pa musuvo po mune wo muzi. Pikija atori matangiro akanaka angaita kuti mune wo muziwo adakarire kujija zvizinji ngo pamusoro po Bhaibheri, mabhuyo awo kazinji ngo okukasika zve aaitwi sumana jese. Kuti mune wo muziwo agume pa kudakarira zvinojijwa mu Bhaibheri, vamweni vanokumbira numero yo foni kuti vazomufonere kana kumutumira mesajhe kuti vakwanise kubhuisana pa museswa munganani ngo pa musoro po Bhaibheri. Ivona vangatoita mabhuyo ondhoo ko mweji jakati kuti vacito vatanga jijo yo Bhaibheri. Waro zvinoreva kuti anodoendereradi mberi kamare, wotojipira no kubhabhatijwa kudari iyena aapeji mukuvo wakawanda kana aatovangisiri kuti ajije Soko ra Mwari here? Kangaije haiwa.

5. Mukuzwirana na Luka 14:27-33, ngozvapi zvakagogomejera Jesu zvinozotibesera pa basa redu ro kuita vajiji?

⁵ Pa vhaza imweni Jesu wakasanangura ngo zvinodikana kuitwa ngo mundhu kuti ave mujiji wake. Iyena wakabhuya ngo mundhu waida kuvaka rusingo na mambo waida kwenda kohwisana na mambo umweni. Jesu wakananga kuti muvaki anodikana ‘kuaamba kugara pasi kuti averenge mare’ dangani inokwana kuvaka rusingo hwese. Mambo waidikanavo ‘kuamba agara pasi kuti avone dangani anokwanisa’ kwenda korhwa mbhera kuwina no masoca aanaro waro. (Verenganyi Luka 14:27-33.) Mukufananavo, Jesu waizviziva kuti mundhu anoda kuva mujiji wake anodikana kuziva zvaanodikana kuita kuti amutevere. Ngo ndava yazvo, tinodikana kuvangisa vajiji vedu vo Bhaibheri kuti tijije sumana jese. Tingazviitisa kudini?

6. Zvicinyi zvatinodikana kueja kuita kuti jijo jo Bhaibheri jienderere mberi ngo kukasika?

 ⁶ Tanganyi ngo kuengejera nguva jo munoitaya pa musuvo wo mune wo muzi. Kangaije pamunonga mecimuvhakacira mungashandisa vhesi jimweni jo kuengejera. Kudari jijo yotaiita no samuzi no takaima pa musuvo, yaano mukuvo wakati kuti, tingamuvhunjisa dangani pangawanika ndau yotingagara pasi kuti tienderere mberi no mabhuyo. Mupinguro wo mune wo muzi unozovonesa kuti kujija Bhaibheri kunosisira maningi kwaari. Pejisire, kuti mumubesere kuti aenderere mberi ngo kukasika, muvhunjisenyi dangani anoda kujija kaviri pa sumana. Pikija zvakadaro, zvizinji zvinodiwa kusiyapo kujija kamwe kana kaviri pa sumana.

7. Mujijisi anganasiririsa kudini kuitira zvaanodaro kwenda kojijisa?

⁷ Inga mujijisi, munodikana kunasirira zvomudaro kwenda koojijisa. Mungatanga ngo kuverenga zvakatahwaro mukati no kuvona mavhesi ari waro mukatimo. Ivanyi no mafundo makuru mu murangariro. Rangariranyi ngo pamusoro po zviri kunanga musorowo, zvimusoro zvidoko, muvhunjo jinoda kuitwa mu jijoyo no vhesi jakatahwaya “verenganyi,” mapikica pomwe no mavhidhiyo anobesera kusanangura shwiroyo. Perapo, mecirangariravo ngo mujiji wenyu, rangarijisisanyi kuti munganangisa kudini masoko ondhowo mu njira yakareruka no yakajeka yaizoita kuti mujiji wenyu arerukihwe kuzwisisa no kumashandisa.—Neemia 8:8; Mazwi Akangwara 15:28a.

8. Masoko o mupostori Pauro anowanika pana VaKolosi 1:9, 10, anotijijisenyi ngo kuita mukumbiro ngo pamusoro po mujiji wedu?

⁸ Inga divi ro kunasisira kwenyu, itanyi mukumbiro ngo pamusoro po mujiji wenyu no zvaanodikana kuitisa nane. Kumbiranyi kuti Jehovha amubesere kushandisa Bhaibheri kuti mukwanise kupsasa mwoyo wo mundhu wamuri kujijisaro. (Verenganyi VaKolosi 1:9, 10.) Ejanyi kuvona kuti mujiji wenyu anganesehwa kuzwisisa zvapi zve ngozvapi zvaanganeswhwa kuzvitenda. Rambanyi mecirangarira kuti cido cenyu ngo co kuda kumubesera kuti agume pa kubhabhatijwa.

9. Mujijisi angabeseresa kudini mujiji wake kuti anasirire kuitira jijo? Sananguranyi.

⁹ Tinovetera kuti jijo yatiri kuita mukuvo wese inozobesera mujiji wedu kuti abongesere ngo zvese zviri kuitwa ndi Jehovha na Jesu zve zvimuite kuti ade kujija zvizinji. (Mateu 5:3, 6) Kuti mujiji anase kubesereka ngo jijoyo, anodikana  kubatikana kamare pa zviya zvaari kujija. Kuti akwanise kuita zvondhozvo, tinodikana kumusanangurira kuti zvinosisira maningi kunasirira kuitira jijo yaanoda kuita ngo kuverenga cijijoco cese no kurangarijisisa manera aangazvishanda mu upenyu hwake. Waro mujijisi angabeseresa kudini? Nasiriranyi mwese no kumukhombija manera azvinoitwa. * Mukhombijenyi manera aangawana mupinguro jo muvhunjo no magama mashoma aangamarakari kuti azokwanise kuceukija mupinguro wake. Perapo muvhunjenyi kuti adavire ngo magama ake kamare. Paanoita kudaro, munozokwanisa kuvona kuti iyena ari kuzwisisa zvaari kujijaro. Panazve ciro cimweni camunodikana kuvangisa mujiji wenyu kuti aiite.

10. Ngenyi zvinosisira kuverenga Bhaibheri njiku jese zve zvicinyi zvinodiwa kuti anase kubesereka ngo zvaari kuverengaro?

¹⁰ Pa kuengejera kubesereka pa kujija kwaanova nako sumana jese no mujijisi wake, mujiji angabesereka ngo zviro zvaangaita ega njiku jese. Iyena anodikana kubhuya na Jehovha. Angazviitisa kudini? Ngo kumupurukira no kubhuya naye. Iyena angakwanisa kuita zvondhozvo, ngo kuverenga Bhaibheri njiku jese. (Joxwa 1:8; Nduyo 1:1-3) Mukhombijenyi manera aangashandisa “Urongwa Hwo Kuverenga Bhaibheri” unowanika mu jw.org. * Zvokadi kamare, kuti anase kubesereka ngo zvaanoverenga mu Bhaibheri, muvangisenyi kuti arangarijisise zvinojijiswa ngo Bhaibheri ngo pamusoro pa Jehovha no manera aangazvishandisa mu upenyu hwake.—Maitiro o Vapostori 17:11; Jakobo 1:25.

11. Mujiji angajijira kudini kuita mukumbiro mu njira kwayo zve ngenyi zvinosisira kuita mukumbiro kuna Jehovha nguva jese?

¹¹ Vangisanyi mujiji wenyu kuti abhuye na Jehovha ngo kuita mukumbiro njiku jese. Itanyi mukumbiro zvecivha mu mwoyo kamare, pamunonga mecitanga no kupejisa jijo yenyu zve bhuyanyivo ngo pamusoro po mujiji wenyu pa mukumbiro jondhojo. Paanonga ecipurukira mukumbiro jenyu, anozojijira manera okuita mukumbiro zvecivha ngo mu mwoyo kamare kuna Jehovha Mwari ngo zina ra Jesu Kristu. (Mateu 6:9; Johani 15:16) Kuverenga Bhaibheri njiku jese (kupurukira Jehovha) no kuita mukumbiro (kubhuya na Jehovha) zvinozobesera mujiji wenyu kuti akhwedere phedo naye. (Jakobo 4:8) Kudari mujiji wenyu akava no  cirovejeso co kuita izvi, zvinozomubesera kuti iyena ajipire kuna Jehovha no kubhabhatijwa.

12. Mujijisi angabeseresa kudini mujiji wake kuti ave no ushamwari na Jehovha?

¹² Zvese zvinojijwa ngo mujiji kuvha mu Bhaibheri azvidikani basi kugara mu murangariro asi zvinodikana kugara mu mwoyo mwake. Ngenyi? Ngokuti mwoyo wedu (uwo unobatanija zvese zvatinoda no mazwiro), unotiita kuti tiite ciri cese. Jesu wakajijisa vandhu zviro zvakawanda zve vaidakarira kujijiswa ndiyena. Asi vandhu vaimutevera ngokuti iyena waijijisa zviro zvaipsasa mwoyo javo. (Luka 24:15, 27, 32) Mujiji wenyu anodikana kuvona Jehovha inga Mundhu kamare, mundhu waangakwanisa kuva no ushamwari naye zve womuvonazve inga Baba wake, Mwari wake pomwe no Shamwari. (Nduyo 25:4, 5) Pamunonga mecijija Bhaibheri, itanyi kuti mujiji wenyu akwanise kuvona mugariro jakanaka jina Mwari. (Exodo 34:5, 6; 1 Pedru 5:6, 7) Pa musoro uri wese wamunonga mecijija vonesanyi kuti Jehovha i mundhu wo mushovonyi. Beseranyi mujiji wenyu kuti avone mugariro jakanaka jina Jehovha, jakadari inga, rudo, kunaka mwoyo pomwe no usizi. Jesu wakati: “Mupango mukuru no wokutungamira” ngo wo ‘kuda Tenji Mwari wako.’ (Mateu 22:37, 38) Ejanyi kuita kuti mujiji wenyu ade Jehovha ngo mwoyo wake wese.

13. Mungabeseresa kudini mujiji wenyu wo Bhaibheri kuti ajijire ngo pamusoro po mugariro ja Jehovha?

¹³ Pamunonga mecibhuya no mujiji wenyu khombijanyi kuti imwimwi munoda Jehovha. Izvo zvinozobesera mujiji wenyu avone kuti iyena anodikanavo kuda Jehovha no kuva no ushamwari naye. (Nduyo 73:28) Inga muezaniso, zvingaita kuti bhuku ramuri kujijaro kana vhesi yamaverengaro ino zviri zvese zvinobhuya ngo pamusoro pa Jehovha, zvinovonesa rudo hwake, uzivi, urungami kana simba rake. Waro zviro izvo, zvinomupsasisa kudini inga mujijisi? Zvivhunjenyi mujiji wenyu no kumuita kuti iyena azive kuti izvo ndi zvimwe zviro pakati po zvizinji zvinomuita kuti imwimwi mude Baba wedu vo mugore. Kunazve ciro cimweni cinodikana kuitwa ngo vajiji vese vo Bhaibheri kuti vaenderere mberi mbhera pa kubhabhatijwa.

14. Vaheberi 10:24, 25 ingabeseresa kudini mujiji wo Bhaibheri kuti aenderere mberi?

¹⁴ Tese tinoda kuti vajiji vedu vaenderere mberi mbhera pa kubhabhatijwa. Njira imweni yo kuvabesera ndiyona ngo yo kuvavangisa kuti vaviye kumusongano. Vajijisi vaano ruzivo vanonanga kuti vajiji vanoenda kumusongano  vanoenderera mberi ngo kukasika. (Nduyo 111:1) Vajijisi vamweni vanosanangurira vajiji vavo kuti pa jijo yavo yo Bhaibheri vanonga vecijija zviro zvakati kuti, asi pavanoenda kumusongano vanojija zvimweni zvakawanda. Verenganyi Vaheberi 10:24, 25 no mujiji wenyu zve muvonesenyi manera aanobesereka ngo kwenda kumusongano. Murijirenyi vhidhiyo inoti: Zvicinyi Zvinoitwa mu Nyumba yo Umambo? * Beseranyi mujiji wenyu avone kuti kwenda kumusongano sumana jese zvinosisira maningi mu upenyu hwake.

15. Tingaitenyi kuti tivangise mujiji wedu wo Bhaibheri kuti aende kumusongano nguva jese?

¹⁵ Maizoitenyi kudari mujiji wenyu wo Bhaibheri aazivi kumboviya kumusongano kana anotoviya pa njiku yaanoda? Ngo rudo hwese muvhunjenyi zvamavha kujija kumusongano. Paanovona manera amunovona musongano, kangaije izvo zvingamuita kuti ade kwendavo. Mupenyi Murindiri kana Co Kutarira Zvo Musongano, zviri kushandiswa pa musongano pa sumaneyo. Mukhombijenyi zvinoda kujijwa pa musongano unotevera no kumuvhunjisa kuti ngozvapi zvaadakarira maningi. Zvinozodakarihwa ngo mujiji wenyu pa musongano wokutanga, zvinozopinda zviri zvese hazvo zvaangazwa ku musongano uri wese wo ciara waakaenda. (1 VaKorinto 14:24, 25) Kondhono anozoziva vandhu vano muezaniso jakanaka jaangada kutevejera no kumubesera kuti aenderere mberi mbhera kubhabhatijwa.

16. Zvicinyi zvinodiwa kuti vajiji vo Bhaibheri vagume pa kubhabhatijwa zve zvicinyi zvatinozovona pa musoro unotevera?

¹⁶ Tingaitisa kudini jijo yo Bhaibheri ingaita kuti mundhuwo agume pa kubhabhatijwa? Tingabesera mujiji umwe nga umwe kuti avone kuti kujija Bhaibheri kunosisira. Tomuvangisazve kuti ajije sumana jese no kunasirira kuitira zviya zvaanoda kujija. Tinodikanavo kumuvangisa kuti abhuye na Jehovha njiku jese no kusakurira ushamwari naye. Pejisire, vangisanyi mujiji wenyu kuti aviye kumusongano. (Vonanyi bhokiso rinoti: “ Vajiji Vanodikana Kuitenyi Kuti Vaenderere Mberi Mbhera Kubhabhatijwa.”) Asi, inga zvinozosananguhwa pa musoro unotevera, kuno zviro zvishanu zvinodikana kuitwa ngo vajijisi vo Bhaibheri kuti vajiji vavo vagume pa kubhabhatijwa.